ចូរផ្ដល់សេចក្ដីសង្ឃឹមដល់មនុស្សក្រីក្រ
១ ព្រះយេស៊ូបានយកចិត្តទុកដាក់ជាពិសេសចំពោះមនុស្សក្រីក្រ។ ទោះជាមានពេលខ្លះទ្រង់ធ្វើអព្ភូតហេតុផ្ដល់ម្ហូបអាហារ ប្រោសមនុស្សឈឺឲ្យជាក្ដី ប៉ុន្តែទ្រង់ប្រមូលអារម្មណ៍ទៅលើការផ្សព្វផ្សាយ«ដំណឹងល្អ»ចំពោះមនុស្សក្រីក្រ។ (ម៉ាថ. ១១:៥) កិច្ចបម្រើផ្សាយរបស់គ្រិស្តសាសនិកសព្វថ្ងៃនេះ ក៏នៅតែផ្ដល់ប្រយោជន៍ចំពោះមនុស្សក្រីក្រដូចមនុស្សឯទៀតដែរ។—ម៉ាថ. ២៤:១៤; ២៨:១៩, ២០
២ ផ្ដល់សេចក្ដីសង្ឃឹមពិត : ពួកមេដឹកនាំនៅក្នុងពិភពគ្រិស្តសាសនាសន្យាជាញឹកញយចំពោះមនុស្សក្រីក្រថា បើពួកគាត់ឲ្យវិភាគទានជាច្រើនទៅវិហារ ពួកគេនឹងបានចម្រើនឡើងដែរ។ ទោះជាយ៉ាងណាក៏ដោយ គម្ពីរបង្រៀនថាមានតែរាជាណាចក្ររបស់ព្រះប៉ុណ្ណោះ ទើបអាចបញ្ចប់នូវភាពក្រីក្រនិងបញ្ហាទាំងអស់របស់មនុស្សជាតិ។ (ទំនុក. ៩:១៨; ១៤៥:១៦; អេសា. ៦៥:២១-២៣) ដោយបង្រៀនមនុស្សក្រីក្រអំពីសេចក្ដីពិតក្នុងគម្ពីរ យើងជួយពួកគេឲ្យមានសង្ឃឹម និងផ្ដល់នូវអ្វីៗដែលពួកគេត្រូវការដើម្បីស្គាល់និងថ្វាយបង្គំព្រះ។—ម៉ាថ. ៥:៣
៣ ពួកផារិស៊ីនៅសម័យព្រះយេស៊ូបានមើលងាយមនុស្សដែលក្រីក្រដោយហៅពួកគេថា ‹អាម-ហា-អា-រិត› ដែលបានន័យថា«ប្រជាជននៅក្នុងស្រុក»។ ប៉ុន្តែព្រះយេស៊ូមានទស្សនៈថា«ឈាមគេ»ឬជីវិតរបស់ពួកគេ គឺ«វិសេស»ណាស់។ (ទំនុក. ៧២:១៣, ១៤) យើងអាចធ្វើតាមគំរូព្រះយេស៊ូ ហើយបង្ហាញសេចក្ដី«មេត្ដា»ដល់ពួកអ្នកក្រីក្រដោយយកចិត្តទុកដាក់ចំពោះគេ និងបញ្ហាដែលពួកគេមាន។ (សុ. ១៤:៣១) យើងមិននិយាយមើលងាយមនុស្សដែលរស់នៅតំបន់ក្រីក្រ ឬស្ទាក់ស្ទើរនឹងផ្សព្វផ្សាយឲ្យពួកគេទេ។ មនុស្សដែលស្ដាប់តាមសារដំណឹងល្អភាគច្រើនជាអ្នកក្រីក្រ។
៤ ផ្ដល់ប្រយោជន៍នៅឥឡូវនេះ : សេចក្ដីបង្រៀនរបស់យើងចំពោះមនុស្សក្រីក្រតាមគោលការណ៍ក្នុងគម្ពីរ ជួយកាត់បន្ថយលទ្ធផលដែលនាំឲ្យក្រីក្រនៅឥឡូវនេះ។ ជាឧទាហរណ៍ គម្ពីរបញ្ជាក់ថាព្រះស្អប់មនុស្សដែលប្រមឹកស្រា លេងល្បែងស៊ីសង មនុស្សខ្ជិល ប្រើថ្នាំជក់ និងការប្រព្រឹត្តឯទៀតដែលនាំឲ្យទៅជាក្រខ្សត់។ (សុ. ៦:១០, ១១; ២៣:២១; ២កូ. ៧:១; អេភ. ៥:៥) បទគម្ពីរលើកទឹកចិត្តឲ្យប្រព្រឹត្តដោយស្មោះត្រង់ និងខំធ្វើការឲ្យ«អស់ពីចិត្ត» ជាគុណសម្បត្ដិដែលនិយោជកចង់បានពីបុគ្គលិក។ (កូល. ៣:២២, ២៣; ហេ. ១៣:១៨) ជាការពិតមែន តាមការស្ទង់មតិមួយអំពីនិយោជកភាគច្រើនដែលចាត់ទុកថា ការប្រព្រឹត្តទៀងត្រង់ និងនិយាយពាក្យពិតជាគុណសម្បត្ដិដ៏សំខាន់ដែលនិយោជកចង់បានឲ្យធ្វើការ។
៥ ព្រះយេហូវ៉ាយកចិត្តទុកដាក់ចំពោះទុក្ខលំបាករបស់មនុស្សក្រីក្រ។ នៅពេលអនាគតឆាប់ៗខាងមុខនេះ ព្រះយេស៊ូនឹងរំដោះ«ពួកក្រីក្រឲ្យរួចក្នុងកាលដែលថ្លែងទុក្ខ»។ (ទំនុក. ៧២:១២) ទំរាំមកដល់ពេលនោះ យើងចង់រកគ្រប់ឱកាសដើម្បីជួយសម្រាលទុក្ខមនុស្សទាំងអស់ដែលរួមបញ្ចូលមនុស្សក្រីក្រ តាមរយៈសារនៃសេចក្ដីសង្ឃឹមក្នុងគម្ពីរ។