ប្រអប់សំណួរ
◼ ប្រសិនបើកូនក្រមុំកូនកំលោះមានបំណងចង់រៀបអាពាហ៍ពិពាហ៍នៅសាលប្រជុំ តើពួកគាត់គួរពិភាក្សាជាមួយពួកអ្នកចាស់ទុំពីរឿងអ្វីខ្លះ?
ការរៀបអាពាហ៍ពិពាហ៍ដែលរៀបចំឡើងតាមគោលការណ៍ក្នុងគម្ពីរ នាំមកនូវការលើកកិត្ដិយសព្រះយេហូវ៉ា។ នេះបង្ហាញយ៉ាងច្បាស់ថាការរៀបអាពាហ៍ពិពាហ៍នៅសាលប្រជុំគួរប្រព្រឹត្តឡើងយ៉ាងដូច្នោះដែរ។ នេះអាចបង្ហាញមនុស្សក្នុងសង្គមឲ្យឃើញច្បាស់អំពីអង្គការយើង។ ដូច្នេះ គួរធ្វើ«ទាំងអស់តាមបែបគួរសម ហើយដោយលំដាប់លំដោយ»។ ហេតុនេះ ជាការសមរម្យឲ្យអ្នកចាស់ទុំក្នុងក្រុមជំនុំនោះ ពិគ្រោះជាមួយសាមីខ្លួនអំពីរឿងណាខ្លះដែលទាក់ទងនឹងពិធីមង្គលការរបស់ពួកគេ មុននឹងសម្រេចឲ្យធ្វើឡើងនៅសាលប្រជុំ។—១កូ. ១៤:៤០
សាមីខ្លួនដែលមានបំណងចង់រៀបអាពាហ៍ពិពាហ៍នៅសាលប្រជុំ គួរសរសេរពាក្យស្នើសុំទៅគណៈកម្មាធិការខាងកិច្ចបម្រើនៃក្រុមជំនុំដែលគាត់ចង់ប្រើ។ ពួកគេត្រូវផ្ញើសំបុត្រស្នើសុំនោះ ឲ្យបានយូរខែទុកជាមុន និងគួរបញ្ជាក់ពីថ្ងៃខែ ហើយម៉ោងណាដែលពួកគាត់ចង់ប្រើសាលប្រជុំនោះ ឲ្យបានត្រឹមត្រូវច្បាស់លាស់។ ពួកគេត្រូវដឹងថា ពួកអ្នកចាស់ទុំនឹងមិនផ្លាស់ប្ដូរកម្មវិធីប្រជុំ ដើម្បីរៀបចំពិធីមង្គលការនោះទេ។ មិនតែប៉ុណ្ណោះកូនកំលោះនិងកូនក្រមុំត្រូវជាមនុស្សដែលមានជំហររឹងមាំ ហើយរស់នៅស្របតាមគោលការណ៍ក្នុងគម្ពីរ និងកាន់ខ្ជាប់តាមខ្នាតតម្រាសុចរិតរបស់ព្រះយេហូវ៉ា។
សូមប្រាកដថាការរៀបចំពិធីមង្គលការនោះ នាំមកនូវការលើកកិត្ដិយសព្រះរបស់យើង។ សាមីខ្លួនការគួរពិគ្រោះពីការរៀបចំពិធីមង្គលការជាមួយគណៈកម្មាធិការខាងកិច្ចបម្រើ មុននឹងសម្រេចធ្វើអ្វីខ្លះ។ ពួកអ្នកចាស់ទុំមិនគួរបង្ខំសាមីខ្លួនការឲ្យធ្វើតាមគំនិតរបស់ខ្លួនស្តីពីអ្វីដែលពួកគេគួរធ្វើនោះទេ ក៏ប៉ុន្តែបើមានអ្វីមិនសមរម្យ សាមីខ្លួនការគួរធ្វើតាមយោបល់ដែលអ្នកចាស់ទុំផ្ដល់ឲ្យ។ មានតែបទភ្លេងពីបទភ្លេងរាជាណាចក្រ ឬពីសៀវភៅចម្រៀងសរសើរព្រះយេហូវ៉ាប៉ុណ្ណោះ ដែលអាចយកមកចាក់ស្ដាប់។ ការតុបតែងសាលប្រជុំឬកៅអី គួរមានការអនុញ្ញាតជាមុន។ ប្រសិនបើមានការថតរូបឬវីដេអូ គួរប្រព្រឹត្តឡើងដោយមានភាពថ្លៃថ្នូរ។ ពួកអ្នកចាស់ទុំប្រហែលជាអាចអនុញ្ញាតឲ្យហាត់សមនៅសាលប្រជុំជាមុនសិនបាន ប្រសិនបើមិនរំខានដល់កម្មវិធីណាខ្លះរបស់ក្រុមជំនុំ។ មិនគួរឲ្យមានបិទសេចក្ដីអញ្ជើញលើក្ដារខៀនព័ត៌មានឡើយ។ ទោះជាយ៉ាងណាក៏ដោយ អ្នកចាស់ទុំអាចប្រកាសជូនដំណឹងយ៉ាងខ្លីចំពោះបងប្អូនក្នុងអំឡុងការប្រជុំអប់រំកិច្ចបម្រើ ថានឹងមានការរៀបចំពិធីរៀបអាពាហ៍ពិពាហ៍នៅក្នុងសាលប្រជុំ។
ទោះបីជាមិនមែនជាសេចក្ដីតម្រូវឲ្យអ្នកកំដរខាងប្រុស ឬខាងស្រីជាអ្នកដែលបានទទួលការជ្រមុជទឹកហើយក្ដី គឺមិនសមរម្យទេ បើអ្នកកំដរទាំងនោះមានរបៀបរស់នៅមិនល្អតាមគោលការណ៍ក្នុងគម្ពីរ ឬមានកិរិយាប្រព្រឹត្តមិនគួរសម ដែលអាចធ្វើឲ្យភ្ញៀវដែលមកចូលរួមឆ្ងល់ពីមូលហេតុជ្រើសរើសបុគ្គលបែបនោះ។ ប្រសិនបើអាចធ្វើបាន គួរឲ្យអ្នកចាស់ទុំជាអ្នកថ្លែងសុន្ទរកថានៅពិធីមង្គលការ។ ពួកអ្នកចាស់ទុំមានគុណសម្បត្ដិគ្រប់គ្រាន់ខាងការបង្រៀនបណ្ដាំរបស់ព្រះ។ ដូច្នេះ ពួកគេមានសមត្ថភាពក្នុងការលើកនូវចំណុចសំខាន់ៗពីគោលការណ៍ក្នុងគម្ពីរដែលអាចអនុវត្តក្នុងឱកាសដ៏សំខាន់នេះ។—១ធី. ៣:២
អ្នកចាស់ទុំដែលជាអ្នកថ្លែងសុន្ទរកថានៅពិធីមង្គលការត្រូវដឹងទុកជាមុននូវរបៀបចាត់ចែងផ្សេងៗក្នុងពិធីមង្គលការនោះ។ គាត់ជួបជាមួយសាមីខ្លួនទាំងសងខាងដើម្បីសួរនាំអំពីសីលធម៌ល្អក្នុងអំឡុងពេលពួកគេដើរលេងជាគូ ហើយពួកគេក៏គួរជម្រាបអ្នកចាស់ទុំដោយឥតលាក់លាមផងដែរ។ ប្រសិនបើ កូនកំលោះនិងកូនក្រមុំធ្លាប់រៀបការរួចហើយ ពួកគេគួរបង្ហាញភ័ស្តុតាងថាខ្លួនបានធ្វើតាមច្បាប់ក្នុងគម្ពីរ ហើយថាពួកគេក៏មានសិទ្ធិអាចនឹងរៀបការស្របតាមច្បាប់រាជការផងដែរ។ (ម៉ាថ. ១៩:៩) នេះក៏រួមបញ្ចូល ការបង្ហាញអ្នកចាស់ទុំនូវលិខិតលែងលះគ្នាផងដែរ។
ពេលដែលសាមីខ្លួនទាំងសងខាងពិភាក្សាគ្នាដោយចំហ និងសហការគ្នាយ៉ាងអស់ពីចិត្តជាមួយពួកអ្នកចាស់ទុំ នោះពិធីមង្គលការនឹងជាទីដ៏សប្បាយរីករាយចំពោះទាំងអស់គ្នា។—សុ. ១៥:២២; ហេ. ១៣:១៧