ការផ្សព្វផ្សាយធ្វើឲ្យយើងមានចំណងមេត្រីភាពរឹងមាំជាមួយនឹងព្រះយេហូវ៉ា
១. តើយើងទទួលប្រយោជន៍អ្វីពីកិច្ចការផ្សព្វផ្សាយ?
១ ការចូលរួមក្នុងកិច្ចការផ្សព្វផ្សាយយ៉ាងសកម្ម អាចពង្រឹងចំណងមេត្រីភាពរបស់យើងជាមួយនឹងព្រះយេហូវ៉ា និងនាំឲ្យយើងមានសុភមង្គលច្រើនជាងដែរ។ សំខាន់បំផុត យើងចូលរួមក្នុងកិច្ចបម្រើផ្សាយគឺដើម្បីផ្គាប់ចិត្តព្រះយេហូវ៉ា។ ប៉ុន្តែ ដោយធ្វើតាមសេចក្ដីបង្គាប់ឲ្យ«ប្រកាសបណ្ដាំរបស់ព្រះ» នោះយើងទទួលពរពីព្រះយេហូវ៉ា ហើយក៏ទទួលប្រយោជន៍សម្រាប់ខ្លួនយើងតាមវិធីផ្សេងៗដែរ។ (២ធី. ៤:២; អេ. ៤៨:១៧, ១៨) តើការផ្សព្វផ្សាយដំណឹងល្អអាចពង្រឹងចំណងមេត្រីភាពរបស់យើងជាមួយនឹងព្រះយេហូវ៉ា ហើយធ្វើឲ្យយើងមានសុភមង្គលយ៉ាងដូចម្ដេច?
២. តើកិច្ចបម្រើផ្សាយពង្រឹងចំណងមេត្រីភាពរបស់យើងយ៉ាងដូចម្ដេច?
២ ចំណងមេត្រីភាពរបស់យើងត្រូវបានពង្រឹងហើយយើងទទួលពរ : ការផ្សព្វផ្សាយលើកទឹកចិត្តយើងឲ្យប្រមូលអារម្មណ៍លើពរផ្សេងៗដែលយើងនឹងទទួលក្រោមការគ្រប់គ្រងនៃរាជាណាចក្ររបស់ព្រះ ជាជាងគិតអំពីបញ្ហានៅសព្វថ្ងៃនេះ។ (២កូ. ៤:១៨) ពេលយើងពន្យល់នូវការបង្រៀនផ្សេងៗក្នុងគម្ពីរក៏ពង្រឹងជំនឿយើងឲ្យទុកចិត្តលើសេចក្ដីសន្យារបស់ព្រះយេហូវ៉ា និងនាំឲ្យយើងមានអំណរគុណចំពោះសេចក្ដីពិតដែរ។ (អេ. ៦៥:១៣, ១៤) កាលដែលយើងជួយអ្នកដទៃឲ្យបណ្ដុះនូវចំណងមេត្រីភាពជាមួយនឹងព្រះយេហូវ៉ា ដើម្បី«មិនរួមចំណែកក្នុងពិភពលោក»នេះ នោះក៏ជួយយើងឲ្យកាន់ជំហររឹងមាំមិនរួមចំណែកក្នុងពិភពលោកនេះដែរ។—យ៉ូន. ១៧:១៤, ១៦; រ៉ូម ១២:២
៣. តើកិច្ចបម្រើផ្សាយជួយយើងឲ្យបណ្ដុះនូវគុណសម្បត្ដិផ្សេងៗជាគ្រិស្តសាសនិកយ៉ាងដូចម្ដេច?
៣ ការចូលរួមក្នុងកិច្ចបម្រើផ្សាយជួយយើងឲ្យបណ្ដុះនូវគុណសម្បត្ដិផ្សេងៗជាគ្រិស្តសាសនិក។ ជាឧទាហរណ៍ ការខំប្រឹង«ធ្វើដូចមនុស្សគ្រប់ប្រភេទ» ក៏ជួយយើងឲ្យបណ្ដុះនូវចិត្តរាបទាបច្រើនទៀត។ (១កូ. ៩:១៩-២៣) កាលដែលយើងនិយាយជាមួយនឹងមនុស្សដែល«បានត្រូវគេធ្វើទុក្ខ និងទុកចោលឲ្យនៅរាត់រាយដូចសត្វចៀមដែលគ្មានគង្វាល» នោះយើងរៀនចេះបង្ហាញចិត្តអាណិតអាសូរនិងចេះយល់អារម្មណ៍អ្នកដទៃ។ (ម៉ាថ. ៩:៣៦) យើងបណ្ដុះនូវការស៊ូទ្រាំ ពេលយើងខំព្យាយាមថ្វីបើមានការព្រងើយកន្តើយឬការប្រឆាំងក៏ដោយ។ ដោយខំជួយអ្នកឯទៀត នោះយើងមានអំណរកាន់តែច្រើនឡើង។—សកម្ម. ២០:៣៥
៤. តើអ្នកមានអារម្មណ៍យ៉ាងណាចំពោះកិច្ចបម្រើផ្សាយ?
៤ យើងមានពរមែន ដោយបំពេញកិច្ចបម្រើផ្សាយដែលលើកសរសើរព្រះយេហូវ៉ា គឺជាព្រះតែមួយដែលសមនឹងទទួលការគោរពប្រណិប័តន៍ពីយើង! កិច្ចបម្រើផ្សាយពង្រឹងចំណងមេត្រីភាពរបស់យើង ហើយយើងទទួលពរច្រើនក្រៃលែង ពេលយើងជក់ចិត្តគំនិតទាំងស្រុងនឹង«ការធ្វើជាសាក្សីបញ្ជាក់យ៉ាងសព្វគ្រប់ពីដំណឹងល្អ»។—សកម្ម. ២០:២៤