អត្ថបទសិក្សា ១៩
តើតាមរបៀបណាយើងអាចពង្រឹងជំនឿលើសេចក្ដីសន្យារបស់ព្រះយេហូវ៉ាអំពីពិភពលោកថ្មី?
«ពេល[ព្រះយេហូវ៉ា]មានប្រសាសន៍អ្វីមួយ លោកនឹងធ្វើឲ្យកើតឡើង មែនទេ?»។—ជប. ២៣:១៩
ចម្រៀងលេខ១៤២ ចូររក្សាសេចក្ដីសង្ឃឹមជានិច្ច
សេចក្ដីសង្ខេបa
១-២. តើយើងត្រូវធ្វើអ្វីកាលដែលទន្ទឹងរង់ចាំពិភពលោកថ្មី?
យើងឲ្យតម្លៃចំពោះសេចក្ដីសន្យារបស់ព្រះយេហូវ៉ាអំពីការជំនួសរបៀបរបបពិភពលោកនេះទៅនឹងពិភពលោកថ្មីដ៏សុចរិត។ (២ពេ. ៣:១៣) ទោះជាយើងមិនដឹងថាពេលណាពិភពលោកថ្មីនោះនឹងក្លាយជាការពិតក្ដី មានភ័ស្តុតាងដែលបញ្ជាក់ថាយើងនឹងមិនរង់ចាំយូរទៀតទេ។—ម៉ាថ. ២៤:៣២-៣៤, ៣៦; សកម្ម. ១:៧
២ ទម្រាំដល់ពេលនោះ មិនថាយើងបាននៅក្នុងសេចក្ដីពិតយូរយ៉ាងណាក្ដី យើងទាំងអស់គ្នាត្រូវពង្រឹងជំនឿទៅលើសេចក្ដីសន្យានោះ។ ហេតុអ្វី? ពីព្រោះសូម្បីតែជំនឿរឹងមាំក៏អាចចុះខ្សោយបានដែរ។ តាមពិត សាវ័កប៉ូលបានហៅការខ្វះជំនឿថា៖ «ការខុសឆ្គងដែលទាក់យើងយ៉ាងងាយ»។ (ហេ. ១២:១) ដើម្បីការពារជំនឿរបស់យើងមិនឲ្យចុះខ្សោយ យើងត្រូវពិចារណាជាទៀងទាត់អំពីភ័ស្តុតាងដែលបង្ហាញថាពិភពលោកថ្មីនឹងទៅជាការពិតនៅឆាប់ៗខាងមុខនេះ។—ហេ. ១១:១
៣. តើយើងនឹងពិចារណាអ្វីខ្លះក្នុងអត្ថបទនេះ?
៣ ក្នុងអត្ថបទនេះ យើងនឹងពិចារណាអំពីរបៀបបីយ៉ាងដែលយើងអាចពង្រឹងជំនឿរបស់យើងទៅលើសេចក្ដីសន្យារបស់ព្រះយេហូវ៉ាអំពីពិភពលោកថ្មីគឺ៖ (១) ដោយរំពឹងគិតអំពីថ្លៃលោះ (២) ដោយគិតអំពីឫទ្ធានុភាពរបស់ព្រះយេហូវ៉ា និង(៣) ដោយចំណាយពេលធ្វើសកម្មភាពផ្សេងៗខាងការគោរពប្រណិប័តន៍ព្រះ។ បន្ទាប់មក យើងនឹងពិចារណាអំពីរបៀបដែលដំណឹងរបស់ព្រះយេហូវ៉ាទៅកាន់ហាបាគុកពង្រឹងជំនឿរបស់យើងនៅសព្វថ្ងៃនេះ។ ប៉ុន្តែដំបូង សូមយើងពិចារណាអំពីស្ថានភាពខ្លះដែលយើងប្រហែលជាជួបប្រទះនៅឥឡូវនេះ ដែលតម្រូវឲ្យមានជំនឿរឹងមាំលើសេចក្ដីសន្យាអំពីពិភពលោកថ្មីដែលនឹងមកដល់។
ស្ថានភាពដែលតម្រូវឲ្យមានជំនឿរឹងមាំ
៤. តើការសម្រេចចិត្តអ្វីខ្លះតម្រូវឲ្យមានជំនឿរឹងមាំ?
៤ រាល់ថ្ងៃយើងធ្វើការសម្រេចចិត្តដែលតម្រូវឲ្យមានជំនឿរឹងមាំ។ ជាឧទាហរណ៍ យើងត្រូវធ្វើការសម្រេចចិត្តថាគួរសេពគប់អ្នកណា ជ្រើសរើសការកម្សាន្តបែបណា ទទួលការអប់រំយ៉ាងណា គួររៀបការជាមួយអ្នកណា យកកូនឬមិនយក និងជ្រើសរើសការងារបែបណា។ ជាការល្អឲ្យយើងសួរខ្លួនយើងនូវសំណួរដូចតទៅនេះ៖ ‹តើការសម្រេចចិត្តរបស់ខ្ញុំបង្ហាញថាខ្ញុំជឿជាក់ថារបៀបរបបពិភពលោកនេះគឺបណ្ដោះអាសន្ន ហើយមិនយូរទៀតនឹងជំនួសដោយពិភពលោកថ្មីរបស់ព្រះឬទេ? ឬក៏តើខ្ញុំសម្រេចចិត្តធ្វើតាមមនុស្សដែលគិតថាសប្បាយឲ្យហើយទាន់នៅរស់ ព្រោះបើស្លាប់អ្វីៗក៏ចប់ដែរ?›។ (ម៉ាថ. ៦:១៩, ២០; លូក. ១២:១៦-២១) យើងនឹងធ្វើការសម្រេចចិត្តដ៏ល្អបំផុត បើយើងពង្រឹងជំនឿរបស់យើងថាពិភពលោកថ្មីគឺជិតណាស់ហើយ។
៥-៦. ហេតុអ្វីយើងត្រូវការជំនឿរឹងមាំពេលមានទុក្ខលំបាក? សូមលើកឧទាហរណ៍។
៥ យើងក៏ជួបទុក្ខលំបាកផ្សេងៗដែលតម្រូវឲ្យមានជំនឿរឹងមាំ។ យើងប្រហែលជាជួបការបៀតបៀន ជំងឺធ្ងន់ធ្ងរ ឬអ្វីផ្សេងទៀតដែលអាចនាំឲ្យយើងធ្លាក់ទឹកចិត្ត។ ដំបូងយើងប្រហែលជាគិតថា ‹ខ្ញុំអាចទ្រាំនឹងបញ្ហានេះបាន›។ ប៉ុន្តែ បញ្ហាដូចនេះច្រើនតែអូសបន្លាយអស់រយៈពេលយូរ។ ដូច្នេះ យើងនឹងត្រូវមានជំនឿរឹងមាំដើម្បីស៊ូទ្រាំនិងបន្ដបម្រើព្រះយេហូវ៉ាដោយអំណរ។—រ៉ូម ១២:១២; ១ពេ. ១:៦, ៧
៦ ពេលមានទុក្ខលំបាក យើងប្រហែលជាមានអារម្មណ៍ថាពិភពលោកថ្មីរបស់ព្រះយេហូវ៉ានឹងមិនមកឆាប់ៗទេ។ តើនេះមានន័យថាយើងមានជំនឿខ្សោយឬ? មិនតែងតែដូច្នេះទេ។ សូមគិតអំពីឧទាហរណ៍មួយ។ ក្នុងអំឡុងពេលរដូវប្រាំងដែលក្ដៅខ្លាំង យើងប្រហែលជាមានអារម្មណ៍ថារដូវវស្សានៅយូរទៀត។ ប៉ុន្តែ យើងដឹងថាវានឹងមក។ ស្រដៀងគ្នាដែរ ពេលយើងធ្លាក់ទឹកចិត្តខ្លាំង យើងប្រហែលជាមានអារម្មណ៍ថា ពិភពលោកថ្មីនឹងមិនមកឆាប់ៗទេ។ ប៉ុន្តែ បើជំនឿរបស់យើងរឹងមាំ យើងដឹងថាពិភពលោកថ្មីនឹងមកមិនខាន ព្រោះព្រះយេហូវ៉ាបានសន្យាហើយ។ (ចសព. ៩៤:៣, ១៤, ១៥; ហេ. ៦:១៧-១៩) ដោយមានទំនុកចិត្តបែបនេះ យើងអាចបន្ដចាត់ទុកការគោរពប្រណិប័តន៍ព្រះយេហូវ៉ាថាសំខាន់បំផុតក្នុងជីវិតរបស់យើង។
៧. តើយើងត្រូវជៀសវាងពីការគិតបែបណា?
៧ យើងក៏ត្រូវការជំនឿរឹងមាំដើម្បីធ្វើកិច្ចការផ្សព្វផ្សាយ។ មនុស្សជាច្រើនដែលយើងផ្សព្វផ្សាយឲ្យ មានអារម្មណ៍ថា«ដំណឹងល្អ»អំពីពិភពលោកថ្មីរបស់ព្រះដែលនៅឆាប់ៗខាងមុខគឺល្អពេកហួសពីការពិត។ (ម៉ាថ. ២៤:១៤; អេគ. ៣៣:៣២) យើងត្រូវប្រុងប្រយ័ត្នមិនកើតចិត្តសង្ស័យដូចពួកគេទៅលើអ្វីដែលព្រះយេហូវ៉ាបង្រៀនយើងឡើយ។ ដើម្បីការពារមិនឲ្យនេះកើតឡើង យើងត្រូវបន្ដពង្រឹងជំនឿរបស់យើង។ សូមយើងពិចារណាអំពីរបៀបបីយ៉ាងដែលយើងអាចធ្វើដូច្នេះ។
ចូររំពឹងគិតអំពីថ្លៃលោះ
៨-៩. តើការរំពឹងគិតអំពីថ្លៃលោះអាចពង្រឹងជំនឿរបស់យើងយ៉ាងដូចម្ដេច?
៨ របៀបទី១ដែលយើងអាចពង្រឹងជំនឿរបស់យើងគឺដោយរំពឹងគិតអំពីថ្លៃលោះ។ ថ្លៃលោះពង្រឹងទំនុកចិត្តរបស់យើងថាសេចក្ដីសន្យារបស់ព្រះនឹងក្លាយជាការពិត។ ពេលយើងគិតយ៉ាងយកចិត្តទុកដាក់អំពីមូលហេតុដែលព្រះផ្ដល់ថ្លៃលោះ និងការលះបង់ជាច្រើនរបស់ព្រះយេហូវ៉ា យើងពង្រឹងជំនឿរបស់យើងថាសេចក្ដីសន្យារបស់ព្រះអំពីជីវិតដែលគ្មានទីបញ្ចប់ក្នុងពិភពលោកដែលល្អប្រសើរជាង នឹងសម្រេចជាមិនខាន។ ហេតុអ្វីយើងអាចនិយាយដូច្នេះ?
៩ ស្ដីអំពីថ្លៃលោះ តើព្រះយេហូវ៉ាបានលះបង់អ្វី? លោកបានចាត់បុត្រជាទីស្រឡាញ់តែមួយគត់របស់លោកដែលជាដៃគូដ៏ជិតស្និទ្ធបំផុតពីស្ថានសួគ៌ ដើម្បីកើតជាមនុស្សល្អឥតខ្ចោះ។ ពេលនៅផែនដី លោកយេស៊ូបានស៊ូទ្រាំនឹងការពិបាកគ្រប់សព្វ។ បន្ទាប់មក លោកបានរងទុក្ខនិងស្លាប់ទាំងឈឺចាប់។ ព្រះយេហូវ៉ាបានបង់តម្លៃដ៏ខ្ពស់! ព្រះរបស់យើងដែលប្រកបដោយសេចក្ដីស្រឡាញ់នឹងមិនអនុញ្ញាតឲ្យបុត្ររបស់លោករងទុក្ខនិងស្លាប់ គ្រាន់តែដើម្បីឲ្យយើងអាចមានជីវិតល្អប្រសើរជាងសម្រាប់តែមួយរយៈពេលខ្លីប៉ុណ្ណោះទេ។ (យ៉ូន. ៣:១៦; ១ពេ. ១:១៨, ១៩) ដោយសារព្រះយេហូវ៉ាបានឲ្យបុត្រដ៏មានតម្លៃរបស់លោកដើម្បីជួយយើង លោកនឹងធ្វើឲ្យប្រាកដថាយើងអាចរស់ជារៀងរហូតក្នុងពិភពលោកថ្មី។
ចូររំពឹងគិតអំពីឫទ្ធានុភាពរបស់ព្រះយេហូវ៉ា
១០. យោងទៅតាមអេភេសូរ ៣:២០ តើព្រះយេហូវ៉ាអាចធ្វើអ្វី?
១០ របៀបទី២ដើម្បីពង្រឹងជំនឿរបស់យើងគឺដោយគិតអំពីឫទ្ធានុភាពរបស់ព្រះយេហូវ៉ា។ លោកមានឫទ្ធានុភាពដើម្បីសម្រេចសេចក្ដីសន្យាទាំងអស់របស់លោក។ ពិតមែន មនុស្សជាច្រើននៅសព្វថ្ងៃនេះមានអារម្មណ៍ថា យើងមិនអាចមានជីវិតដែលគ្មានទីបញ្ចប់នៅក្នុងពិភពលោកថ្មីទេ។ ប៉ុន្តែជារឿយៗព្រះយេហូវ៉ាសន្យាអ្វីដែលមនុស្សមិនអាចសម្រេចបាន។ នេះគឺដោយសារលោកគឺជាព្រះដែលមានឫទ្ធានុភាពខ្លាំងក្លាបំផុត។ (យ៉ូប ៤២:២; ម៉ាក. ១០:២៧) ដូច្នេះ យើងមិនភ្ញាក់ផ្អើលទេពេលលោកសន្យាអ្វីដ៏អស្ចារ្យសម្រាប់យើង!—សូមអាន អេភេសូរ ៣:២០
១១. សូមលើកឧទាហរណ៍អំពីសេចក្ដីសន្យាដ៏អស្ចារ្យមួយរបស់ព្រះ។ (សូមមើលប្រអប់ដែលមានចំណងជើងថា «សេចក្ដីសន្យាខ្លះដ៏អស្ចារ្យបានត្រូវសម្រេច»)
១១ សូមគិតអំពីអ្វីដែលព្រះយេហូវ៉ាបានសន្យានឹងរាស្ត្ររបស់លោកនៅអតីតកាលដែលមើលទៅមិនអាចកើតឡើង។ លោកបានប្រាប់អាប្រាហាំនិងសារ៉ាថាពួកគាត់នឹងមានកូនប្រុសម្នាក់ នៅពេលដែលពួកគាត់មានវ័យចាស់។ (ដក. ១៧:១៥-១៧) លោកក៏បានប្រាប់អាប្រាហាំថា កូនចៅរបស់គាត់នឹងទទួលទឹកដីកាណាន។ ក្នុងអំឡុងពេលជាច្រើនឆ្នាំដែលកូនចៅរបស់អាប្រាហាំគឺជនជាតិអ៊ីស្រាអែល បានធ្វើជាខ្ញុំបម្រើនៅស្រុកអេហ្ស៊ីប ច្បាស់ជាមើលទៅហាក់ដូចជាសេចក្ដីសន្យានោះនឹងមិនក្លាយជាការពិតទេ។ ប៉ុន្តែសេចក្ដីសន្យានោះបានសម្រេចមែន។ នៅពេលក្រោយមក ព្រះយេហូវ៉ាបានប្រាប់ថាអេលីសាបិតដែលជាស្ត្រីវ័យចាស់នឹងមានកូនម្នាក់។ លោកក៏បានប្រាប់ម៉ារៀដែលជាស្ត្រីក្រមុំបរិសុទ្ធថានាងនឹងបង្កើតបុត្ររបស់លោក។ នេះសម្រេចសេចក្ដីសន្យាដែលព្រះយេហូវ៉ាបានធ្វើអស់រាប់ពាន់ឆ្នាំមុនក្នុងសួនអេដែន។—ដក. ៣:១៥
១២. តើយ៉ូស្វេ ២៣:១៤ និងអេសាយ ៥៥:១០, ១១ពង្រឹងទំនុកចិត្តរបស់យើងយ៉ាងណាអំពីឫទ្ធានុភាពរបស់ព្រះយេហូវ៉ា?
១២ ពេលយើងគិតអំពីសេចក្ដីសន្យាទាំងអស់របស់ព្រះយេហូវ៉ា និងរបៀបដែលលោកបានសម្រេចសេចក្ដីសន្យាទាំងនោះ យើងយល់ថាលោកមានឫទ្ធានុភាពដ៏ខ្លាំងក្លា។ យ៉ាងនេះ ជំនឿរបស់យើងទៅលើសេចក្ដីសន្យារបស់លោកអំពីពិភពលោកថ្មីនឹងកាន់តែរឹងមាំឡើង។ (សូមអាន យ៉ូស្វេ ២៣:១៤; អេសាយ ៥៥:១០, ១១) នេះជួយយើងឲ្យត្រៀមខ្លួនយ៉ាងល្អប្រសើរជាងដើម្បីជួយអ្នកឯទៀតឲ្យយល់ថា សេចក្ដីសន្យាអំពីពិភពលោកថ្មីមិនមែនជាការយល់សប្ដិឬការស្រមើស្រមៃនោះទេ។ ព្រះយេហូវ៉ាផ្ទាល់បានប្រាប់អំពីមេឃថ្មីនិងផែនដីថ្មីថា៖ «ពាក្យទាំងនេះគួរឲ្យទុកចិត្ត ហើយក៏ពិតត្រង់»។—បប. ២១:១, ៥
ចូរចំណាយពេលក្នុងសកម្មភាពខាងការគោរពប្រណិប័តន៍ព្រះ
កិច្ចប្រជុំក្រុមជំនុំ
តើសកម្មភាពនេះអាចពង្រឹងជំនឿរបស់អ្នកយ៉ាងដូចម្ដេច? (សូមមើលវគ្គ១៣)
១៣. តើកិច្ចប្រជុំអាចពង្រឹងជំនឿរបស់យើងយ៉ាងដូចម្ដេច?
១៣ របៀបទី៣ដែលយើងអាចពង្រឹងជំនឿរបស់យើងគឺដោយចំណាយពេលក្នុងសកម្មភាពខាងការគោរពប្រណិប័តន៍ព្រះ។ ជាឧទាហរណ៍ សូមគិតអំពីប្រយោជន៍ដែលយើងទទួលពីកិច្ចប្រជុំក្រុមជំនុំ។ បងស្រីអាណាbដែលនៅក្នុងកិច្ចបម្រើពេញពេលផ្នែកផ្សេងៗអស់ជាច្រើនឆ្នាំនិយាយថា៖ «កិច្ចប្រជុំជួយខ្ញុំឲ្យរក្សាជំនឿរឹងមាំ។ ទោះជាអ្នកថ្លែងមិនសូវពូកែបង្រៀនឬមិនលើកចំណុចថ្មីក្ដី ខ្ញុំច្រើនតែឮអ្វីដែលជួយខ្ញុំឲ្យយល់គម្ពីរច្បាស់ជាង ហើយនោះពង្រឹងជំនឿរបស់ខ្ញុំ»។ ជំនឿរបស់យើងក៏អាចរឹងមាំជាងដែរ ពេលយើងស្ដាប់ចម្លើយរបស់បងប្អូននៅកិច្ចប្រជុំ។—រ៉ូម ១:១១, ១២; ១០:១៧
កិច្ចបម្រើផ្សាយ
តើសកម្មភាពនេះអាចពង្រឹងជំនឿរបស់អ្នកយ៉ាងដូចម្ដេច? (សូមមើលវគ្គ១៤)
១៤. តើកិច្ចបម្រើផ្សាយពង្រឹងជំនឿរបស់យើងតាមរបៀបណា?
១៤ យើងក៏ពង្រឹងជំនឿរបស់យើងពេលយើងចូលរួមក្នុងកិច្ចបម្រើផ្សាយ។ (ហេ. ១០:២៣) បងស្រីបាបារ៉ាដែលបម្រើព្រះយេហូវ៉ាអស់ជាង៧០ឆ្នាំនិយាយថា៖ «ខ្ញុំតែងតែឃើញថាកិច្ចការផ្សព្វផ្សាយពង្រឹងជំនឿរបស់ខ្ញុំ។ កាលដែលខ្ញុំកាន់តែនិយាយប្រាប់អ្នកឯទៀតអំពីសេចក្ដីសន្យាដ៏អស្ចារ្យរបស់ព្រះយេហូវ៉ា ខ្ញុំកាន់តែមានជំនឿរឹងមាំឡើង»។
ការសិក្សាផ្ទាល់ខ្លួន
តើសកម្មភាពនេះអាចពង្រឹងជំនឿរបស់អ្នកយ៉ាងដូចម្ដេច? (សូមមើលវគ្គ១៥)
១៥. តើការសិក្សាផ្ទាល់ខ្លួនពង្រឹងជំនឿរបស់យើងយ៉ាងដូចម្ដេច? (សូមមើលរូបភាពផងដែរ)
១៥ មានអ្វីមួយទៀតដែលពង្រឹងជំនឿរបស់យើងគឺ៖ ការសិក្សាផ្ទាល់ខ្លួន។ បងស្រីស៊ូសាននិយាយថា ពេលគាត់រៀបចំកាលវិភាគសិក្សា នោះជួយគាត់។ គាត់ថា៖ «នៅថ្ងៃអាទិត្យ ខ្ញុំសិក្សាទស្សនាវដ្ដីប៉មយាមសម្រាប់សិក្សានៅសប្តាហ៍បន្ទាប់។ នៅថ្ងៃច័ន្ទនិងថ្ងៃអង្គារ ខ្ញុំរៀបចំកិច្ចប្រជុំសម្រាប់កិច្ចបម្រើនិងជីវិតជាគ្រិស្តសាសនិក។ ថ្ងៃផ្សេងទៀត ខ្ញុំសិក្សាផ្ទាល់ខ្លួន»។ ដោយសារបងស៊ូសានតែងតែធ្វើតាមកាលវិភាគសិក្សារបស់គាត់ គាត់បន្ដពង្រឹងជំនឿរបស់គាត់។ បងស្រីអៃរីនដែលបានបម្រើនៅមន្ទីរចាត់ការពិភពលោកអស់ជាច្រើនទសវត្សរ៍បានឃើញថា ការសិក្សាទំនាយក្នុងគម្ពីរពង្រឹងជំនឿរបស់គាត់។ គាត់និយាយថា៖ «ខ្ញុំកោតស្ងើចចំពោះរបៀបដែលទំនាយរបស់ព្រះយេហូវ៉ាសម្រេចយ៉ាងល្អិតល្អន់»។c
នោះ«នឹងមកជាពិត»
១៦. ហេតុអ្វីពាក្យរបស់ព្រះយេហូវ៉ាដែលពង្រឹងទំនុកចិត្តហាបាគុកជាប់ទាក់ទងនឹងយើងសព្វថ្ងៃនេះ? (ហេប្រឺ ១០:៣៦, ៣៧)
១៦ អ្នកបម្រើខ្លះរបស់ព្រះយេហូវ៉ាបានរង់ចាំអស់រយៈពេលយូរឲ្យទីបញ្ចប់នៃរបៀបរបបពិភពលោកនេះមកដល់។ មនុស្សខ្លះគិតថាការមកដល់នៃទីបញ្ចប់គឺនៅយូរពេក។ ប៉ុន្តែ ព្រះយេហូវ៉ាដឹងអំពីអារម្មណ៍របស់អ្នកបម្រើលោក។ តាមពិត លោកបានពង្រឹងទំនុកចិត្តអ្នកប្រកាសទំនាយហាបាគុកថា៖ «អ្វីដែលអ្នកឃើញក្នុងគំនិតនោះ មិនទាន់ដល់គ្រាកំណត់នៅឡើយ ហើយអ្វីដែលអ្នកឃើញនោះនឹងកើតឡើងយ៉ាងឆាប់ គឺមិនកុហកឡើយ។ ទោះជាមើលទៅដូចជាពន្យារពេលក្ដី ចូរបន្តរង់ចាំដោយចិត្តរំភើបចុះ! ព្រោះនឹងមកជាពិត ឥតយឺតឡើយ!»។ (ហាប. ២:៣) តើព្រះបានផ្ដល់ទំនុកចិត្តបែបនេះសម្រាប់តែហាបាគុកឬ? ឬតើប្រសាសន៍របស់លោកជាប់ទាក់ទងនឹងយើងនៅសព្វថ្ងៃនេះដែរ? ក្រោមការដឹកនាំរបស់ព្រះ សាវ័កប៉ូលបានសំដៅពាក្យទាំងនោះទៅកាន់គ្រិស្តសាសនិកដែលទន្ទឹងរង់ចាំពិភពលោកថ្មី។ (សូមអាន ហេប្រឺ ១០:៣៦, ៣៧) ពិតមែន យើងអាចប្រាកដថាទោះជាសេចក្ដីសន្យារបស់ព្រះយេហូវ៉ាថាលោកនឹងសង្គ្រោះយើង មើលទៅបង្អែបង្អង់ក្ដី នោះ«នឹងមកជាពិត ឥតយឺតឡើយ!»។
១៧. តើបងស្រីម្នាក់បានធ្វើតាមយោបល់ដែលព្រះយេហូវ៉ាបានឲ្យទៅហាបាគុកយ៉ាងដូចម្ដេច?
១៧ អ្នកបម្រើជាច្រើននាក់របស់ព្រះយេហូវ៉ាបានធ្វើតាមយោបល់របស់លោកដែលឲ្យ«បន្តរង់ចាំដោយចិត្តរំភើប» ទោះជាពួកគេបានរង់ចាំអស់ជាច្រើនឆ្នាំហើយក្ដី។ ជាឧទាហរណ៍ បងស្រីឡូអ៊ីសបានចាប់ផ្ដើមបម្រើព្រះយេហូវ៉ានៅឆ្នាំ១៩៣៩។ គាត់និយាយថា៖ «នៅពេលនោះ ខ្ញុំបានគិតថាអាម៉ាគេដូននឹងមកដល់មុនខ្ញុំរៀនចប់វិទ្យាល័យ ប៉ុន្តែនេះមិនបានកើតឡើងទេ។ អស់ជាច្រើនឆ្នាំ ពេលខ្ញុំអានកំណត់ហេតុក្នុងគម្ពីរអំពីមនុស្សដែលបានរង់ចាំព្រះយេហូវ៉ាឲ្យសម្រេចសេចក្ដីសន្យារបស់លោក នោះបានជួយខ្ញុំឲ្យចេះរង់ចាំដែរ។ ខ្ញុំអានអំពីណូអេ អាប្រាហាំ យ៉ូសែប និងអ្នកឯទៀតដែលត្រូវរង់ចាំអស់រយៈពេលយូរមុនទទួលរង្វាន់ដែលព្រះយេហូវ៉ាបានសន្យា។ ការបន្ដរង់ចាំដោយចិត្តរំភើបបានជួយខ្ញុំនិងអ្នកឯទៀតឲ្យជឿជាក់ថាពិភពលោកថ្មីគឺជិតណាស់ហើយ»។ បងប្អូនជាច្រើននាក់ទៀតដែលបានបម្រើព្រះយេហូវ៉ាជាយូរមកហើយក៏យល់ស្របដែរ!
១៨. តើតាមរបៀបណាការសង្កេតមើលការបង្កើតអាចពង្រឹងជំនឿរបស់យើងទៅលើពិភពលោកថ្មីដែលនឹងមកដល់?
១៨ ពិតមែនថាពិភពលោកថ្មីមិនទាន់មកដល់ទេ ប៉ុន្តែសូមគិតអំពីអ្វីមួយចំនួនដែលមានរួចហើយដូចជាដួងតារា ដើមឈើ សត្វ និងមនុស្សជាតិ។ គ្មានអ្នកណានឹងសង្ស័យថាអ្វីទាំងអស់នេះមិនពិតនោះទេ ទោះជាមានពេលវេលាដែលអ្វីទាំងនេះមិនទាន់មានក៏ដោយ។ សព្វថ្ងៃនេះ មានអ្វីទាំងនេះដោយសារតែព្រះយេហូវ៉ាបង្កើតវា។ (ដក. ១:១, ២៦, ២៧) ព្រះរបស់យើងក៏បានសន្យាថាលោកនឹងបង្កើតពិភពលោកថ្មី ហើយលោកនឹងសម្រេចសេចក្ដីសន្យានោះ។ ក្នុងពិភពលោកថ្មី មនុស្សនឹងសប្បាយនឹងជីវិតដែលគ្មានទីបញ្ចប់ដោយមានសុខភាពល្អឥតខ្ចោះ។ យើងអាចប្រាកដថាពិភពលោកថ្មីនឹងមកនៅពេលកំណត់របស់ព្រះ។—អេ. ៦៥:១៧; បប. ២១:៣, ៤
១៩. តើអ្នកអាចពង្រឹងជំនឿរបស់អ្នកយ៉ាងដូចម្ដេច?
១៩ ទម្រាំដល់ពេលនោះ សូមប្រើគ្រប់ឱកាសដែលអ្នកមាន ដើម្បីពង្រឹងជំនឿរបស់អ្នក។ សូមមានចិត្តកតញ្ញូជានិច្ចចំពោះថ្លៃលោះ។ សូមគិតអំពីឫទ្ធានុភាពរបស់ព្រះយេហូវ៉ា។ សូមចំណាយពេលក្នុងសកម្មភាពខាងការគោរពប្រណិប័តន៍ព្រះ។ ដោយធ្វើដូច្នេះ អ្នកអាចនៅក្នុងចំណោម«ពួកអ្នកដែលបានទទួលសេចក្ដីសន្យាជាមត៌ក ដោយសារពួកគេមានជំនឿនិងចិត្តអត់ធ្មត់»។—ហេ. ៦:១១, ១២; រ៉ូម ៥:៥
ចម្រៀងលេខ១៣៩ សូមស្រមៃឃើញខ្លួននៅពិភពលោកថ្មី
a មនុស្សជាច្រើននៅសព្វថ្ងៃនេះមិនជឿលើសេចក្ដីសន្យាក្នុងគម្ពីរអំពីពិភពលោកថ្មីទេ។ ពួកគេគិតថានេះគ្រាន់តែជាការស្រមើស្រមៃ ជារឿងនិទាន ឬជាអ្វីដែលល្អពេកមិនអាចក្លាយជាការពិតបានឡើយ។ ប៉ុន្តែ យើងជឿជាក់ថាសេចក្ដីសន្យាទាំងអស់របស់ព្រះយេហូវ៉ានឹងត្រូវសម្រេច។ ទោះជាយ៉ាងនេះក៏ដោយ យើងនៅតែត្រូវខំរក្សាជំនឿរបស់យើងឲ្យរឹងមាំ។ តើតាមរបៀបណា? ក្នុងអត្ថបទនេះនឹងមានការពន្យល់។
b ឈ្មោះខ្លះបានត្រូវផ្លាស់ប្ដូរ។
c មានអត្ថបទជាច្រើនអំពីទំនាយក្នុងគម្ពីរនៅក្នុងសៀវភៅជំនួយស្រាវជ្រាវសម្រាប់សាក្សីព្រះយេហូវ៉ា ក្រោមផ្នែក«ទំនាយ»។ ជាឧទាហរណ៍ សូមមើលអត្ថបទដែលមានចំណងជើងថា «ចូរទុកចិត្តលើព្រះយេហូវ៉ាជាព្រះនៃ‹ពេលកំណត់និងរដូវកាល›» ក្នុងទស្សនាវដ្ដីប៉មយាម ថ្ងៃទី១៥ ខែឧសភា ឆ្នាំ២០១២។