តើអ្នកនឹងឆ្លើយយ៉ាងណា?
១. ហេតុអ្វីយើងគួរធ្វើតាមគំរូរបស់លោកយេស៊ូពេលមានមនុស្សសួរសំណួរ?
១ រហូតមកដល់សព្វថ្ងៃនេះ មនុស្សនៅតែមានការអស្ចារ្យនឹងរបៀបឆ្លើយសំណួរដ៏មានប្រសិទ្ធភាពរបស់លោកយេស៊ូ។ ក្នុងកិច្ចបម្រើផ្សាយរបស់យើងមនុស្សសួរសំណួរផ្សេងៗ។ ដូច្នេះដើម្បីឲ្យមានប្រសិទ្ធភាពយើងគួរធ្វើតាមរបៀបដែលលោកយេស៊ូបានឆ្លើយសំណួររបស់មនុស្ស។—១ពេ. ២:២១
២. តើអ្វីដែលប្រហែលជាអាចជួយយើងឲ្យមានប្រសិទ្ធភាពក្នុងការឆ្លើយសំណួរ?
២ ស្ដាប់ជាមុន: លោកយេស៊ូបានគិតពីមូលហេតុបានជាមនុស្សសួរដូច្នេះ។ ជួនកាលការសួរសំណួរជួយយើងឲ្យដឹងថា តើបុគ្គលនោះកំពុងគិតអំពីអ្វី? មនុស្សដែលសួរថា៖ «តើអ្នកជឿទៅលើលោកយេស៊ូទេ?»។ ប្រហែលជាគាត់ឆ្ងល់ពីមូលហេតុដែលអ្នកមិនចូលរួមធ្វើពិធីបុណ្យណូអែល។ ប្រសិនបើអ្នកគិតពីមូលហេតុដែលគាត់សួរសំណួរនេះឲ្យបានដិតដល់ នោះអ្នកអាចវែកញែកហេតុផលជាមួយគាត់ដោយមានប្រសិទ្ធភាពជាង។—លូក. ១០:២៥-៣៧
៣. តើមានជំនួយអ្វីដើម្បីជួយយើងឲ្យរកចម្លើយពីបទគម្ពីរដែលនាំឲ្យពេញចិត្ត?
៣ បង្ហាញពីបណ្ដាំរបស់ព្រះ: ធម្មតាជាការល្អឲ្យយើងបង្ហាញពីគម្ពីរ ដើម្បីឆ្លើយសំណួរ។ (២ធី. ៣:១៦, ១៧; ហេ. ៤:១២) កូនសៀវភៅរបៀបចាប់ផ្ដើមនិងបន្តការពិគ្រោះគ្នាអំពីព្រះគម្ពីរ និង«ប្រធានបទសម្រាប់ការពិភាក្សាដោយប្រើបទគម្ពីរ» ដែលមានក្នុងសេចក្ដីបកប្រែពិភពលោកថ្មីពីបទគម្ពីរគ្រិស្តសាសនិកជាភាសាក្រិច ជួយផ្ដល់ចម្លើយយ៉ាងត្រឹមត្រូវ។ ទោះបីជាបុគ្គលដែលសួរសំណួរនោះចាត់ទុកថាគម្ពីរជាសៀវភៅធម្មតាក៏ដោយ អ្នកក៏ប្រហែលជាអាចប្រាប់ដោយប៉ិនប្រសប់ពីអ្វីដែលគម្ពីរបង្រៀន។ សូមលើកទឹកចិត្តបុគ្គលនោះឲ្យគិតពិចារណាអំពីភាពត្រឹមត្រូវនៃប្រាជ្ញាដែលមានក្នុងគម្ពីរ។ ដោយត្រាប់តាមគំរូរបស់លោកយេស៊ូ នោះចម្លើយរបស់អ្នកនឹង«ធៀបដូចជាផ្លែសារីមាសឆ្លាក់ភ្ជាប់នឹងក្បាច់ប្រាក់»ពោលគឺ ថ្លៃថ្នូរ ល្អ ហើយមានតម្លៃ។—សុភ. ២៥:១១
៤. តើនៅពេលណាខ្លះដែលយើងមិនគួរព្យាយាមឆ្លើយរាល់សំណួរដែលគេសួរ?
៤ តើគួរឲ្យយើងឆ្លើយរាល់សំណួរទេ?: ប្រសិនបើអ្នកមិនដឹងចម្លើយ យើងមិនគួរមានអារម្មណ៍ខ្មាសនឹងនិយាយថា៖ «ខ្ញុំមិនដឹងចម្លើយទេ ប៉ុន្តែខ្ញុំអាចធ្វើការស្រាវជ្រាវ ហើយត្រឡប់មកវិញឆ្លើយសំណួររបស់អ្នក»។ ការបង្ហាញចិត្តសុភាពរាបទាប និងការយកចិត្តទុកដាក់បែបនេះ ប្រហែលជានឹងជំរុញម្ចាស់ផ្ទះឲ្យអញ្ជើញអ្នកត្រឡប់មកវិញ។ ប្រសិនបើអ្នកឃើញថាគេសួរសំណួរចង់ប្រឆាំង ហើយចាប់ផ្ដើមប្រកែកចង់ឈ្លោះ សូមធ្វើតាមគំរូរបស់លោកយេស៊ូដោយមិនចាំបាច់ឆ្លើយតបទេ។ (លូក. ២០:១-៨) ស្រដៀងគ្នាដែរ ប្រសិនបើនរណាម្នាក់មិនបង្ហាញចំណាប់អារម្មណ៍ស្មោះនឹងសេចក្ដីពិត ហើយព្យាយាមជជែកជំទាស់អ្នក ចូរបញ្ចប់ការសន្ទនាដោយសម្លូតហើយប្រើពេលរបស់អ្នកទៅស្វែងរកអស់អ្នកដែលមានចិត្តស្មោះ។—ម៉ាថ. ៧:៦
៥. ដើម្បីឆ្លើយសំណួររបស់មនុស្ស តើលោកយេស៊ូបានទុកគំរូអ្វី?
៥ លោកយេស៊ូជ្រាបថាការទុកចិត្តទៅលើព្រះយេហូវ៉ា គឺសំខាន់ណាស់ដើម្បីបំពេញកិច្ចការរបស់លោកក្នុងការ«ធ្វើជាសាក្សីបញ្ជាក់អំពីសេចក្ដីពិត» ដែលរួមបញ្ចូលការឆ្លើយសំណួររបស់អស់អ្នកដែលពិតជាចង់ដឹង។ (យ៉ូន. ១៨:៣៧) យើងមានឯកសិទ្ធិដើម្បីត្រាប់តាមគំរូរបស់លោកយេស៊ូក្នុងការឆ្លើយសំណួររបស់អស់អ្នកដែលមាន«ចិត្តគំនិតត្រឹមត្រូវឲ្យបានជីវិតដែលគ្មានទីបញ្ចប់»!—សកម្ម. ១៣:៤៨