កុំចុះចាញ់នឹងការជាប់រវល់
១. ហេតុអ្វីអ្នកខ្លះស្ទាក់ស្ទើរក្នុងការស្នើសុំបង្រៀនគម្ពីរ?
១ អ្នកខ្លះស្ទាក់ស្ទើរក្នុងការស្នើសុំបង្រៀនគម្ពីរ ពីព្រោះពួកគេជាប់រវល់។ ពួកគេដឹងថា ការជួយសិស្សគម្ពីរតម្រូវឲ្យចំណាយពេលរៀបចំបង្រៀន ដឹកនាំ និងជួយសិស្សឲ្យយកឈ្នះអ្វីក៏ដោយដែលរារាំងពួកគេមិនឲ្យរីកចម្រើនក្នុងការគោរពប្រណិប័តន៍ព្រះ។ សាវ័កប៉ូលបាននិយាយថា គាត់សុខចិត្តផ្ដល់ទាំងជីវិតដើម្បីជួយពួកអ្នកក្រុងថែស្សាឡូនិចឲ្យស្គាល់ព្រះយេហូវ៉ា។ (១ថែ. ២:៧, ៨) តើតាមរបៀបណាដែលយើងអាចបង្រៀនសិស្សគម្ពីរ សូម្បីតែយើងរវល់ខ្លាំងក៏ដោយ?
២. តើសេចក្ដីស្រឡាញ់ចំពោះព្រះយេហូវ៉ាគួរមានឥទ្ធិពលយ៉ាងណាទៅលើរបៀបដែលយើងប្រើពេល?
២ ការគោរពប្រណិប័តន៍ព្រះតម្រូវឲ្យចំណាយពេល: យើងត្រូវទទួលស្គាល់ការពិតថា ការគោរពប្រណិប័តន៍ព្រះតម្រូវឲ្យចំណាយពេល។ ជាឧទាហរណ៍ យើងចំណាយពេលជាទៀងទាត់ដើម្បីទៅកិច្ចប្រជុំ ចូលរួមកិច្ចបម្រើផ្សាយ អានគម្ពីរ និងអធិដ្ឋាន។ យើងមានចិត្តរីករាយដែលយើងអាច«ប្រើ»ពេលវេលាកាន់តែច្រើនដើម្បីគោរពប្រណិប័តន៍ព្រះយេហូវ៉ា ដោយសារយើងស្រឡាញ់លោក នេះប្រៀបដូចជាអ្នកដែលបានរៀបការហើយ ទោះជាពួកគេរវល់យ៉ាងណាក្ដី ក៏ពួកគេរីករាយលៃទុកពេលដើម្បីនៅជាមួយគូរបស់ខ្លួនដែរ។ (អេភ. ៥:១៥-១៧; ១យ៉ូន. ៥:៣) យោងតាមប្រសាសន៍របស់លោកយេស៊ូ ផ្នែកមួយដ៏សំខាន់នៃការគោរពប្រណិប័តន៍របស់យើង គឺការជួយមនុស្សឲ្យក្លាយទៅជាអ្នកកាន់តាមលោក។ (ម៉ាថ. ២៨:១៩, ២០) ការសញ្ជឹងគិតអំពីរឿងនេះនឹងជួយយើងមិនឲ្យស្ទាក់ស្ទើរក្នុងការបំពេញភារកិច្ចជាអ្នកបង្រៀនសិស្សគម្ពីរ។
៣. សូម្បីតែមានស្ថានភាពខ្លះដែលធ្វើឲ្យយើងអាក់ខានក្នុងកិច្ចបម្រើផ្សាយ តើយើងអាចជួយសិស្សគម្ពីរយ៉ាងដូចម្ដេច?
៣ ប៉ុន្តែចុះបើយើងអាក់ខានដោយសារការងារ មានជំងឺរ៉ាំរ៉ៃ ឬមានភារកិច្ចផ្សេងៗក្នុងកិច្ចបម្រើព្រះ តើយើងត្រូវធ្វើយ៉ាងណា? ម្ដងម្កាលអ្នកផ្សាយត្រូវទៅឆ្ងាយ ដូច្នេះពួកគាត់បង្រៀនសិស្សគម្ពីរតាមរយៈទូរស័ព្ទ ឬអ៊ីនធឺណិត។ អស់អ្នកដែលអាក់ខានបង្រៀនដោយសារមានជំងឺរ៉ាំរ៉ៃ បានរៀបចំឲ្យសិស្សគម្ពីរមកសិក្សានៅផ្ទះរបស់ពួកគាត់។ អ្នកខ្លះបានសុំឲ្យអ្នកផ្សាយដែលអាចបំពេញកិច្ចការនេះ ឲ្យបង្រៀនជំនួសពេលដែលពួកគាត់មិនអាចធ្វើបាន។
៤. តើការចូលរួមក្នុងកិច្ចការបង្រៀនសិស្សគម្ពីរ នាំឲ្យយើងទទួលពរអ្វីខ្លះ?
៤ ប៉ូលមានអំណរច្រើន កាលដែលគាត់ចំណាយពេលនិងកម្លាំងដើម្បីជួយអ្នកឯទៀតឲ្យរៀនសេចក្ដីពិត។ (សកម្ម. ២០:៣៥) ពេលដែលគាត់គិតអំពីមនុស្សទាំងអស់ដែលគាត់បានជួយនៅក្រុងថែស្សាឡូនិច នោះជំរុញចិត្តគាត់ឲ្យអរគុណព្រះយេហូវ៉ា។ (១ថែ. ១:២) បើយើងមិនចុះចាញ់នឹងការជាប់រវល់ដែលបង្អាក់យើងពីកិច្ចការបង្រៀនសិស្សគម្ពីរ នោះអាចនាំឲ្យយើងស្កប់ចិត្តនិងមានអំណរកាន់តែច្រើនឡើងក្នុងកិច្ចបម្រើផ្សាយ។