តើអ្នកនឹងឆ្លៀតយកឱកាសនេះឬទេ?
ពិធីរំលឹកដែលជិតមកដល់ ជួយយើងឲ្យបង្ហាញចិត្តកតញ្ញូ
១. តើពិធីរំលឹកជាឱកាសដ៏ពិសេសដើម្បីឲ្យយើងធ្វើអ្វី?
១ ពិធីរំលឹកនៅថ្ងៃទី១៤ ខែមេសា គឺជាឱកាសដ៏ពិសេសដើម្បីជួយយើងឲ្យបណ្ដុះនិងបង្ហាញចិត្តកតញ្ញូចំពោះគុណធម៌របស់ព្រះយេហូវ៉ា។ កំណត់ហេតុនៅសៀវភៅលូកា ១៧:១១-១៨ បញ្ជាក់អំពីទស្សនៈរបស់ព្រះយេហូវ៉ានិងលោកយេស៊ូចំពោះការមានចិត្តកតញ្ញូ។ គួរឲ្យស្ដាយណាស់ ក្នុងចំណោមអ្នកកើតជំងឺឃ្លង់១០នាក់ដែលបានជាសះស្បើយ មានតែម្នាក់គត់ដែលបានឆ្លៀតយកឱកាសទៅអរគុណលោកយេស៊ូវិញ។ នៅពេលអនាគត អំណោយដែលជាថ្លៃលោះនឹងធ្វើឲ្យមនុស្សជាសះស្បើយពីជំងឺទាំងអស់ ហើយនេះនាំឲ្យយើងទទួលជីវិតដែលគ្មានទីបញ្ចប់។ នៅគ្រានោះ យើងច្បាស់ជានឹងអរគុណព្រះយេហូវ៉ាជារៀងរាល់ថ្ងៃចំពោះពរទាំងនោះ។ ប៉ុន្តែ ក្នុងអំឡុងប៉ុន្មានសប្ដាហ៍ខាងមុខនេះ តើយើងអាចបង្ហាញចិត្តកតញ្ញូយ៉ាងដូចម្ដេច?
២. តើយើងអាចបណ្ដុះឲ្យមានចិត្តកតញ្ញូចំពោះថ្លៃលោះយ៉ាងដូចម្ដេច?
២ បណ្ដុះឲ្យមានចិត្តកតញ្ញូ: ការមានចិត្តកតញ្ញូគឺផ្ដើមចេញពីគំនិត។ ដូច្នេះដើម្បីជួយយើងឲ្យចេះពិចារណានិងបណ្ដុះឲ្យមានចិត្តកតញ្ញូចំពោះថ្លៃលោះ មានកាលវិភាគអំណានគម្ពីរពិសេសសម្រាប់ពិធីរំលឹកក្នុងប្រតិទិន និងសៀវភៅការពិនិត្យមើលបទគម្ពីរប្រចាំថ្ងៃ។ សូមពិចារណាអំពីព័ត៌មាននេះជាក្រុមគ្រួសារ។ ដោយធ្វើដូច្នោះ យើងនឹងមានអំណរគុណកាន់តែជ្រាលជ្រៅចំពោះថ្លៃលោះនោះ។ ជាលទ្ធផល នេះនឹងជំរុញយើងឲ្យមានការប្រព្រឹត្តល្អ។—២កូ. ៥:១៤, ១៥; ១យ៉ូន. ៤:១១
៣. ក្នុងរដូវពិធីរំលឹក តើតាមវិធីណាខ្លះដែលយើងអាចបង្ហាញចិត្តកតញ្ញូ?
៣ បង្ហាញចិត្តកតញ្ញូ: ចិត្តកតញ្ញូគឺត្រូវបង្ហាញដោយការប្រព្រឹត្ត។ (កូឡ. ៣:១៥) អ្នកកើតជំងឺឃ្លង់ដែលមានចិត្តកតញ្ញូបានខំព្យាយាមរកលោកយេស៊ូ ហើយអរគុណលោក។ គាត់ប្រាកដជាបានប្រាប់អ្នកឯទៀតដោយរំភើបចិត្តអំពីការអស្ចារ្យដែលលោកយេស៊ូបានធ្វើឲ្យជាសះស្បើយ។ (លូក. ៦:៤៥) តើចិត្តកតញ្ញូចំពោះថ្លៃលោះជំរុញចិត្តយើងឲ្យចូលរួមផ្សព្វផ្សាយយ៉ាងខ្នះខ្នែងក្នុងសកម្មភាពពិសេសសម្រាប់ពិធីរំលឹកឬទេ? ការធ្វើជាអ្នកត្រួសត្រាយជំនួយ ឬបង្កើនកិច្ចផ្សព្វផ្សាយក្នុងរដូវពិធីរំលឹក គឺជាវិធីដ៏ល្អមួយទៀតដើម្បីបង្ហាញចិត្តកតញ្ញូ។ នៅល្ងាចពិធីរំលឹក ចិត្តកតញ្ញូនឹងជំរុញយើងឲ្យទទួលស្វាគមន៍ភ្ញៀវដែលមកចូលរួម ព្រមទាំងត្រៀមឆ្លើយសំណួរផ្សេងៗដែលពួកគេចង់ដឹង។
៤. នៅពិធីរំលឹកនេះ តើយើងអាចធ្វើយ៉ាងណាដើម្បីកុំឲ្យស្ដាយក្រោយ?
៤ តើនេះជាពិធីរំលឹកចុងក្រោយរបស់យើងឬ? (១កូ. ១១:២៦) យើងមិនដឹងទេ។ ប៉ុន្តែអ្វីដែលយើងដឹងគឺថា ពិធីរំលឹកនៅឆ្នាំនេះជាឱកាសដ៏ពិសេសដើម្បីយើងបង្ហាញចិត្តកតញ្ញូ។ តើអ្នកនឹងឆ្លៀតយកឱកាសនេះមុនកន្លងផុតទៅឬទេ? សូមឲ្យពាក្យសម្ដីដែលចេញពីមាត់យើង និងការរំពឹងគិតក្នុងចិត្តយើង ជាទីពេញចិត្តដល់ព្រះយេហូវ៉ា ដែលជាអ្នកផ្ដល់ថ្លៃលោះដោយចិត្តទូលាយ។—ទំនុក. ១៩:១៤