ឧបករណ៍ជំនួយសម្រាប់បង្រៀនគម្ពីរ
១. តើអ្នកផ្សាយស្រដៀងនឹងសិប្បករយ៉ាងដូចម្ដេច?
១ តាមធម្មតា សិប្បករប្រើឧបករណ៍ផ្សេងៗ។ ឧបករណ៍ខ្លះគាត់ឧស្សាហ៍ប្រើសម្រាប់កិច្ចការនានា ចំណែកឧបករណ៍ខ្លះទៀតគាត់ប្រើយូរៗម្ដង។ សិប្បករដែលមានបទពិសោធន៍តែងតែមានឧបករណ៍សំខាន់ៗក្នុងប្រអប់ជានិច្ច ហើយគាត់ចេះប្រើឧបករណ៍ទាំងនោះយ៉ាងប៉ិនប្រសប់។ គម្ពីរលើកទឹកចិត្តគ្រិស្តសាសនិកម្នាក់ៗឲ្យខំព្យាយាមអស់ពីសមត្ថភាពក្នុងកិច្ចបម្រើផ្សាយ ហើយឲ្យធ្វើជា«អ្នកធ្វើការដែលគ្មានហេតុអៀនខ្មាស»ឡើយ។ (២ធី. ២:១៥) តើឧបករណ៍ជំនួយដ៏សំខាន់បំផុតរបស់យើងជាអ្វី? គឺជាគម្ពីរដែលជាបណ្ដាំរបស់ព្រះ។ គម្ពីរជាជំនួយដ៏ចាំបាច់ដែលយើងប្រើដើម្បី«បង្រៀនមនុស្ស . . . ឲ្យក្លាយទៅជាអ្នកកាន់តាម»លោកយេស៊ូ។ (ម៉ាថ. ២៨:១៩, ២០) ដូច្នេះ យើងគួរខ្នះខ្នែង«បង្រៀននិងពន្យល់បណ្ដាំនៃសេចក្ដីពិតយ៉ាងត្រឹមត្រូវ» ហើយដោយមានភាពប៉ិនប្រសប់។ ទោះជាដូច្នោះក្ដី មានឧបករណ៍ជំនួយផ្សេងៗដែលយើងឧស្សាហ៍ប្រើក្នុងការបង្រៀនគម្ពីរ។ ម្ល៉ោះហើយ យើងជាគ្រិស្តសាសនិកទាំងអស់គួររៀនប្រើឧបករណ៍ជំនួយទាំងនោះយ៉ាងប៉ិនប្រសប់ ដើម្បីបង្រៀនសេចក្ដីពិតដល់មនុស្ស។—សុភ. ២២:២៩
២. តើឧបករណ៍ជំនួយសំខាន់ៗសម្រាប់បង្រៀនគម្ពីរមានអ្វីខ្លះ?
២ ឧបករណ៍ជំនួយសំខាន់ៗសម្រាប់បង្រៀនគម្ពីរ: ក្រៅពីគម្ពីរ តើមានឧបករណ៍ជំនួយអ្វីទៀតដែលយើងគួរប្រើ? ឧបករណ៍ជំនួយដ៏ចម្បងដែលយើងប្រើដើម្បីបង្រៀនសេចក្ដីពិតពីគម្ពីរ គឺសៀវភៅតើព្រះគម្ពីរពិតជាបង្រៀនយ៉ាងណា? ក្រោយពីបង្រៀនសៀវភៅនេះចប់ យើងអាចប្រើសៀវភៅ«ចូររក្សាខ្លួនជាមនុស្សដែលព្រះស្រឡាញ់» ដើម្បីបង្រៀនសិស្សឲ្យអនុវត្តគោលការណ៍គម្ពីរក្នុងជីវិតប្រចាំថ្ងៃ។ ហេតុនេះ យើងគួរចេះប្រើសៀវភៅទាំងពីរនេះយ៉ាងប៉ិនប្រសប់។ មិនត្រឹមតែប៉ុណ្ណោះ យើងក៏មានសៀវភៅស្តើងខ្លះៗដែរ ដែលយើងអាចប្រើសម្រាប់បង្រៀនគម្ពីរ។ ជាឧទាហរណ៍ សៀវភៅស្តើងព្រះមានដំណឹងល្អសម្រាប់យើង! ជាសៀវភៅសំខាន់មួយដែលយើងអាចប្រើសម្រាប់ចាប់ផ្ដើមបង្រៀនគម្ពីរ។ បើក្នុងតំបន់ផ្សាយរបស់យើងមានមនុស្សដែលមិនសូវចេះអាន ឬដែលនិយាយភាសាផ្សេង ហើយក្នុងភាសានោះមានតែសៀវភៅខ្លះឬគ្មានសោះតែម្ដង យើងអាចប្រើសៀវភៅស្តើងចូរស្ដាប់ព្រះ ឬចូរស្ដាប់ព្រះដើម្បីរស់ជារៀងរហូត ក៏បានដែរ។ ឧបករណ៍ជំនួយសំខាន់ផ្សេងទៀតដើម្បីជួយសិស្សគម្ពីរស្គាល់អង្គការរបស់យើង គឺសៀវភៅស្តើងនៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា? បន្ថែមទៅទៀត មានវីដេអូដែលអាចជួយយើងបង្រៀនមនុស្សឲ្យក្លាយទៅជាអ្នកកាន់តាមគ្រិស្ត ដូចជាហេតុអ្វីគួររៀនគម្ពីរ? តើមានកម្មវិធីអ្វីខ្លះនៅសាលប្រជុំរបស់យើង? និងតើព្រះមាននាមឬទេ?ជាដើម។ វីដេអូទាំងនេះជាឧបករណ៍ជំនួយដែលយើងគួររៀនឲ្យចេះប្រើផងដែរ។
៣. នៅថ្ងៃខាងមុខ តើឯកសារកិច្ចបម្រើព្រះនឹងជួយយើងឲ្យធ្វើអ្វី?
៣ នៅថ្ងៃខាងមុខ ឯកសារកិច្ចបម្រើព្រះនឹងជួយយើងឲ្យចេះប្រើឧបករណ៍ជំនួយផ្សេងៗឲ្យបានប្រយោជន៍ច្រើនបំផុតក្នុងការបង្រៀនគម្ពីរ។ កាលដែលយើងខំព្យាយាមប្រើឧបករណ៍ជំនួយទាំងនោះយ៉ាងស្ទាត់ជំនាញ យើងនឹងធ្វើតាមឱវាទដែលព្រះដឹកនាំឲ្យសរសេរ ដែលថា៖ «ចូរប្រុងប្រយ័ត្នជានិច្ចនឹងខ្លួនអ្នក និងសេចក្ដីបង្រៀនរបស់អ្នក។ ចូរកាន់ខ្ជាប់នឹងការទាំងនេះ ព្រោះដោយធ្វើដូច្នេះ អ្នកនឹងសង្គ្រោះទាំងខ្លួនអ្នក ទាំងពួកអ្នកដែលស្ដាប់អ្នក»។—១ធី. ៤:១៦