ចូរបង្កើនភាពប៉ិនប្រសប់ក្នុងកិច្ចបម្រើផ្សាយ ដោយបង្រៀនសិស្សគម្ពីរឲ្យមានទម្លាប់ល្អក្នុងការសិក្សា
ហេតុអ្វីសំខាន់?: ដើម្បីសិស្សគម្ពីរអាចរីកចម្រើនទៅដល់ភាពចាស់ទុំខាងការគោរពប្រណិប័តន៍ព្រះ គាត់ត្រូវទទួលចំណេះជ្រាលជ្រៅថែមទៀត មិនគ្រាន់តែសេចក្ដីបង្រៀនបឋមៗពីបណ្ដាំរបស់ព្រះប៉ុណ្ណោះទេ។ (ហេ. ៥:១២–៦:១) ដូច្នេះ គាត់ត្រូវខំព្យាយាមសិក្សា។ នេះរួមបញ្ចូលការយល់ថា តើព័ត៌មានថ្មីដែលគាត់ទើបរៀន និងព័ត៌មានដែលបានរៀនរួចហើយទាក់ទងគ្នាយ៉ាងណា ព្រមទាំងគិតពិចារណាអំពីប្រយោជន៍ដែលមកពីការអនុវត្តន៍អ្វីដែលគាត់បានរៀនផងដែរ។ (សុភ. ២:១-៦) សិស្សត្រូវរៀនស្រាវជ្រាវគម្ពីរដោយខ្លួនឯង ដើម្បីគាត់អាចរកចម្លើយក្នុងគម្ពីរ ដោយប្រើសៀវភៅផ្សេងៗរបស់យើង។ បើគាត់ខំព្យាយាមអស់ពីសមត្ថភាពធ្វើតាមអ្វីដែលគាត់បានរៀន នោះនឹងជួយគាត់កុំឲ្យចុះចាញ់ការល្បងលដែលគ្រិស្តសាសនិកនឹងប្រឈមមុខ។—លូក. ៦:៤៧, ៤៨
សូមសាកធ្វើដូច្នេះក្នុងអំឡុងខែនេះ:
ពេលបញ្ចប់ជំពូកមួយឬចំណងជើងតូចមួយ សុំសិស្សឲ្យសង្ខេបអ្វីដែលគាត់បានរៀនក្នុងពាក្យពីរបីប្រយោគ។ បើអ្នកគ្មានសិស្សទេ សូមហាត់សង្ខេបកំណត់ហេតុក្នុងគម្ពីរ ឬវគ្គនីមួយៗពីទស្សនាវដ្ដីប៉មយាម ក្នុងពាក្យពីរបីឃ្លា ដើម្បីជួយអ្នកឲ្យបង្កើនការយល់ដឹងអំពីអ្វីដែលអ្នកបានអាន។