របៀបរស់នៅជាគ្រិស្តសាសនិក
ចូរបង្កើនភាពប៉ិនប្រសប់ក្នុងកិច្ចបម្រើផ្សាយ ពោលគឺចាប់ផ្ដើមការសន្ទនាដែលអាចឈានទៅដល់ការផ្សព្វផ្សាយ
លោកយេស៊ូអាចផ្សព្វផ្សាយក្រៅផ្លូវការដល់ស្ត្រីជនជាតិសាម៉ារីម្នាក់បាន ដោយសារលោកបានចាប់ផ្ដើមការសន្ទនាជាមួយនឹងស្ត្រីនោះ។ តើតាមរបៀបណាយើងអាចបង្កើនភាពប៉ិនប្រសប់ក្នុងការចាប់ផ្ដើមការសន្ទនាជាមួយនឹងមនុស្សដែលយើងមិនធ្លាប់ស្គាល់?
សូមរាក់ទាក់និងនិយាយជាមួយមនុស្សឯទៀត។ ទោះជាអស់កម្លាំងក្ដី លោកយេស៊ូបានចាប់ផ្ដើមការសន្ទនាដោយសុំទឹកពិសា។ ដូច្នេះ អ្នកអាចចាប់ផ្ដើមដោយនិយាយសួរសុខទុក្ខ រួចមកប្រហែលជានិយាយអំពីអាកាសធាតុ ឬព្រឹត្ដិការណ៍ថ្មីៗ។ សូមចាំថា គោលដៅដំបូងគឺចាប់ផ្ដើមការសន្ទនា ដូច្នេះសូមនិយាយអំពីប្រធានបទណាក៏បានដែលប្រហែលជាបុគ្គលនោះចាប់អារម្មណ៍។ បើបុគ្គលដែលយើងនិយាយជាមួយ មិនតបឆ្លើយ សូមសាកល្បងនិយាយជាមួយនឹងបុគ្គលម្នាក់ទៀត។ សុំព្រះយេហូវ៉ាឲ្យមានចិត្តក្លាហាន។—នេហ. ២:៤; សកម្ម. ៤:២៩
ខំរកឱកាសដើម្បីប្រាប់អំពីដំណឹងល្អ ប៉ុន្តែសូមកុំតក់ក្រហល់។ សូមសន្ទនាតាមសម្រួល។ បើបង្ខំឲ្យការសន្ទនាចូលប្រធានបទក្នុងគម្ពីរ បុគ្គលនោះប្រហែលជាមានអារម្មណ៍មិនស្រួល ហើយឈប់សន្ទនា។ សូមកុំខកចិត្តបើការសន្ទនាចប់មុនអ្នកអាចផ្សព្វផ្សាយ។ បើគ្រាន់តែគិតអំពីការផ្សព្វផ្សាយដំណឹងល្អធ្វើឲ្យអ្នកភ័យខ្លាច សូមហាត់ចាប់ផ្ដើមការសន្ទនាដោយមិនមានគោលដៅផ្សព្វផ្សាយ។ [សូមបង្ហាញនិងពិគ្រោះអំពីវីដេអូទី១]
សូមព្យាយាមបង្កើតឱកាសផ្សព្វផ្សាយ ដោយនិយាយយ៉ាងស្មោះអំពីជំនឿរបស់អ្នក ដែលអាចជំរុញចិត្តអ្នកស្ដាប់ឲ្យសួរសំណួរផ្សេងៗ។ លោកយេស៊ូបានមានប្រសាសន៍គួរឲ្យចាប់អារម្មណ៍ដែលជំរុញចិត្តស្ត្រីនោះឲ្យសួរសំណួរ។ នៅទីបំផុត លោកបានឆ្លើយសំណួររបស់នាងពេលលោកប្រាប់ដំណឹងល្អ។ [សូមបង្ហាញនិងពិគ្រោះអំពីវីដេអូទី២ រួចមកសូមបង្ហាញនិងពិគ្រោះអំពីវីដេអូទី៣]