របៀបរស់នៅជាគ្រិស្តសាសនិក
របៀបដែលយើងអាចផ្ដល់ជំនួយក្រោយគ្រោះមហន្តរាយ
នៅសព្វថ្ងៃនេះ គ្រោះមហន្តរាយធម្មជាតិកើនឡើងកាន់តែច្រើន។ ពេលមានគ្រោះមហន្តរាយធម្មជាតិកើតឡើង កិច្ចការផ្ដល់ជំនួយត្រូវតែមានការរៀបចំនិងការចាត់ចែងឲ្យបានល្អ និងដោយមានប្រសិទ្ធភាព។ ហេតុនេះហើយ គណៈអភិបាលបានរៀបចំផ្នែកកិច្ចការផ្ដល់ជំនួយនៅគ្រប់ការិយាល័យសាខាទាំងអស់។
ពេលបងប្អូនដែលធ្វើការនៅផ្នែកផ្ដល់ជំនួយឮថាមានគ្រោះមហន្តរាយនៅតំបន់ណាមួយ ពួកគាត់ទាក់ទងអ្នកចាស់ទុំនៅក្នុងតំបន់នោះភ្លាមៗដើម្បីស្វែងយល់អំពីសេចក្ដីត្រូវការរបស់បងប្អូន។ បើមានការខូចខាតលើសពីអ្វីដែលបងប្អូនក្នុងតំបន់អាចជួសជុលបាន នោះការិយាល័យសាខានឹងចាត់បងប្រុសៗដែលមានលក្ខណៈគ្រប់គ្រាន់ឲ្យនាំមុខក្នុងកិច្ចការផ្ដល់ជំនួយ។ បងប្រុសៗទាំងនោះប្រហែលជានឹងសុំជំនួយពីបងប្អូនដែលស្ម័គ្រចិត្ត ឲ្យផ្ដល់សម្ភារផ្សេងៗ ឬបងប្រុសៗទាំងនោះប្រហែលជាទិញ និងចែកចាយសម្ភារដែលបងប្អូនក្នុងតំបន់នោះត្រូវការ។
ការចាត់ចែងតាមរបៀបនេះពិតជាមានប្រយោជន៍ខ្លាំងណាស់។ នេះអាចជួយមិនឲ្យបងប្អូនឯទៀតធ្វើកិច្ចការដែលមិនចាំបាច់ មិនឲ្យមានភាពច្របូកច្របល់ និងមិនឲ្យខ្ជះខ្ជាយលុយកាក់ឬធនធានឡើយ ព្រោះនេះជាអ្វីដែលអាចកើតឡើងបើបងប្អូនណាម្នាក់សម្រេចចិត្តរៀបចំផ្ដល់ជំនួយដោយខ្លួនឯង។
បងប្អូនដែលការិយាល័យសាខាចាត់ឲ្យទៅផ្ដល់ជំនួយដឹងថា ពួកគាត់ត្រូវការថវិកា និងបងប្អូនស្ម័គ្រចិត្តប៉ុន្មាននាក់ដើម្បីសម្រេចកិច្ចការនោះ។ ពួកគាត់ក៏អាចស្គាល់មន្ត្រីដែលនៅក្នុងតំបន់នោះដែរ ហើយនេះអាចជួយឲ្យពួកគាត់ផ្ដល់ជំនួយដល់បងប្អូនកាន់តែរហ័ស។ ដូច្នេះ សូមកុំប្រមូលថវិកា ផ្ញើសម្ភារផ្សេងៗ ឬធ្វើដំណើរទៅតំបន់ដែលមានមហន្តរាយដោយខ្លួនឯងឡើយ លុះត្រាតែបងប្អូនបានត្រូវណែនាំឲ្យធ្វើដូច្នេះ។
ទោះជាយ៉ាងនេះក្ដី យើងចង់ជួយពេលមានគ្រោះមហន្តរាយកើតឡើង។ (ហេ. ១៣:១៦) យើងស្រឡាញ់បងប្អូនរបស់យើង! តើយើងអាចធ្វើអ្វី? សំខាន់បំផុត យើងអាចអធិដ្ឋានឲ្យបងប្អូនដែលរងគ្រោះដោយសារគ្រោះមហន្តរាយ និងបងប្អូនដែលកំពុងផ្ដល់ជំនួយ។ យើងក៏អាចធ្វើវិភាគទានសម្រាប់កិច្ចការទូទាំងពិភពលោកដែរ។ ក្រោមការដឹកនាំរបស់គណៈអភិបាល ការិយាល័យសាខាដឹងថាត្រូវចាត់ចែងថវិកាតាមរបៀបណាដើម្បីឲ្យបងប្អូនទទួលប្រយោជន៍ច្រើនបំផុត។ បើយើងចង់ជួយកិច្ចការផ្ដល់ជំនួយដោយផ្ទាល់ យើងអាចបំពេញពាក្យសុំសម្រាប់អ្នកស្ម័គ្រចិត្តបម្រើផ្នែករចនាប្លង់និងសាងសង់តាមតំបន់ (DC-50) ហើយប្រាប់អំពីពេលដែលយើងអាចជួយក្នុងកិច្ចការនោះ។
សូមទស្សនាវីដេអូទឹកជំនន់ដ៏សាហាវនៅប្រទេសប្រេស៊ីល រួចឆ្លើយសំណួរដូចតទៅនេះ៖
តើអ្វីធ្វើឲ្យអ្នកកោតស្ងើចចំពោះកិច្ចការផ្ដល់ជំនួយរបស់សាក្សីព្រះយេហូវ៉ាក្រោយទឹកជំនន់នៅប្រទេសប្រេស៊ីលក្នុងឆ្នាំ២០២០?