រូបខាងឆ្វេង៖ កិច្ចការផ្ដល់ជំនួយនៅប្រទេសស៊ីលី បងប្អូនស្ម័គ្រចិត្តបានជួយសាងសង់ផ្ទះរបស់ប្ដីប្រពន្ធមួយគូឡើងវិញក្រោយពីមានការឆេះព្រៃ។ រូបខាងស្ដាំ៖ បងស្រីពីរនាក់នៅប្រទេសនីហ្សេរីយ៉ាបានទទួលជំនួយក្រោយពីតំបន់របស់ពួកគាត់បានបំផ្លិចបំផ្លាញដោយទឹកជំនន់
របៀបដែលវិភាគទានរបស់អ្នកបានត្រូវប្រើ
ការផ្ដល់ជំនួយពេលមានមហន្តរាយធម្មជាតិនៅឆ្នាំ២០២៣ «យើងពិសោធដោយផ្ទាល់នូវសេចក្ដីស្រឡាញ់របស់ព្រះយេហូវ៉ា»
ថ្ងៃទី២៦ ខែមករា ឆ្នាំ២០២៤
គម្ពីរបានប្រកាសទុកជាមុនថា«ប្រជាជាតិមួយនឹងលើកទ័ពទៅច្បាំងនឹងប្រជាជាតិមួយ» ហើយនឹងមានមហន្តរាយផ្សេងៗនៅ«គ្រាចុងបញ្ចប់នៃរបៀបរបបពិភពលោក»។ (ម៉ាថាយ ២៤:៣, ៧) យើងបានឃើញថាទំនាយទាំងនេះកំពុងកើតឡើងពិតមែននៅក្នុងអំឡុងឆ្នាំកិច្ចបម្រើ២០២៣។a ទោះជាមានសង្គ្រាមនិងមហន្តរាយធម្មជាតិកើតឡើងប្រមាណ១០០ប្រទេសក្ដី សាក្សីព្រះយេហូវ៉ាបានធ្វើតាមគំរូរបស់ព្រះយេហូវ៉ាក្នុងការបង្ហាញសេចក្ដីស្រឡាញ់។ តើតាមរបៀបណា?
ក្នុងអំឡុងឆ្នាំកិច្ចបម្រើ២០២៣ បងប្អូនរបស់យើងបានរងគ្រោះដោយមហន្តរាយធម្មជាតិនិងមហន្តរាយដែលបង្កដោយមនុស្សជាង២០០ករណី។ សរុបទៅ សាក្សីព្រះយេហូវ៉ាបានប្រើប្រាក់ជាង១០លានដុល្លារbពីវិភាគទានសម្រាប់កិច្ចការទូទាំងពិភពលោក ដើម្បីផ្ដល់ជំនួយពេលមានមហន្តរាយ។ ទឹកប្រាក់នេះមិនរួមបញ្ចូលថវិកាផ្ទាល់ខ្លួនដែលបងប្អូនជាច្រើនបានប្រើដើម្បីជួយអស់អ្នកដែលត្រូវការជំនួយក្នុងតំបន់របស់ពួកគេ។ សូមពិចារណារបៀបដែលវិភាគទានរបស់អ្នកបានត្រូវប្រើដើម្បីជួយជនរងគ្រោះដោយសារមហន្តរាយ។ បងប្អូនរបស់យើងជាច្រើនបានរងគ្រោះដោយគ្រោះមហន្តរាយទាំងនោះ តែយើងសូមលើកឡើងតែពីរករណីប៉ុណ្ណោះ។
«សេចក្ដីស្រឡាញ់ពិតមានប្រាកដមែន»
នៅតំបន់ខ្លះក្នុងប្រទេសនីហ្សេរីយ៉ាឧស្សាហ៍មានទឹកជំនន់ណាស់។ ប៉ុន្តែ នៅខែតុលា ឆ្នាំ២០២២ មានទឹកជំនន់ធំបំផុតដែលមិនធ្លាប់មានក្នុងរយៈពេល១០ឆ្នាំ។ ផ្ទៃដីចម្ការជាង៦៧៦.០០០ហិចតា បានត្រូវបំផ្លិចបំផ្លាញ ហើយប្រជាជនជាងពីរលាននាក់ត្រូវជម្លៀសចេញពីផ្ទះសម្បែង។ ការិយាល័យសាខានីហ្សេរីយ៉ាបានតែងតាំងគណៈកម្មាធិការផ្ដល់ជំនួយ ឲ្យចាត់ចែងការផ្ដល់ជំនួយនិងជួយបងប្អូនឲ្យពង្រឹងជំនឿលើព្រះ។
បងប្អូននៅប្រទេសនីហ្សេរីយ៉ាបានដឹកជញ្ជូនជំនួយឆ្លងកាត់ផ្លូវភក់និងឆ្លងកាត់ទន្លេ
ផលប៉ះពាល់ទៅលើបងប្អូនរបស់យើង
អ្នកផ្សាយ៧.៥០៥នាក់បានត្រូវជម្លៀសចេញពីលំនៅរបស់ខ្លួន
ផ្ទះ៨៦០ខ្នងបានខូចខាតឬត្រូវបំផ្លាញ
សាលប្រជុំ៩០ខ្នងនិងសាលសន្និបាតមួយខ្នងត្រូវទឹកជន់លិច
ការប្រើប្រាស់ប្រាក់វិភាគទាន
ថវិកាជាង២៥០.០០០ដុល្លារបានត្រូវចំណាយទៅលើការផ្ដល់ជំនួយ រួមមាន៖
ស្បៀងអាហារ ដូចជាអង្ករ សណ្ដែក និងមីជាដើម
សម្ភារក្នុងផ្ទះ ដូចជា ពូកខ្នើយនិងមុង
ជួសជុលឬសាងសង់ឡើងវិញនូវផ្ទះដែលបានខូចខាត
តើតាមរបៀបណាបងប្អូនរបស់យើងបានប្រើប្រាក់វិភាគទានដោយឈ្លាសវៃ? របៀបមួយគឺដោយពិនិត្យមើលយ៉ាងយកចិត្តទុកដាក់នូវអគារនីមួយៗដើម្បីដឹងថាគួរជួសជុលឬយ៉ាងណា។ បើអគារមួយខូចខាតទាំងស្រុង ហើយត្រូវសង់ឡើងវិញ ពួកគេនឹងសង់តាមលំនាំអគារទូទៅដែលមានក្នុងតំបន់នោះ។
បងប្អូនរបស់យើងដែលបានទទួលជំនួយ ពិតជាមានអំណរគុណខ្លាំងណាស់។ បងស្រីម្នាក់បាននិយាយថា៖«ទឹកជំនន់បានធ្វើឲ្យជីវិតរបស់យើងក្រឡាប់ចាក់ ដោយសារចម្ការរបស់យើងបានត្រូវបំផ្លាញ ហើយយើងបាត់បង់ផ្ទះសម្បែង។ យើងរំភើបចិត្តណាស់ដែលបងប្អូនរបស់យើងបានមកនៅថ្ងៃនោះតែម្ដង ដើម្បីជួយយើងនិងរៀបចំកន្លែងស្នាក់នៅដែលមានសុវត្ថិភាពដល់យើង។ យើងសប្បាយចិត្តណាស់ពេលយើងបានទទួលស្បៀងអាហារពីការិយាល័យសាខា។ យើងរកពាក្យថ្លែងពុំបានទេ ពេលឃើញដោយផ្ទាល់ភ្នែកនូវសេចក្ដីស្រឡាញ់ដែលបងប្អូនបានបង្ហាញដូចបានចែងនៅយ៉ូហាន ១៣:៣៤, ៣៥។ . . . សេចក្ដីស្រឡាញ់ពិតគឺមានប្រាកដមែន។ ខ្ញុំនិងក្រុមគ្រួសារទាំងមូល សូមអរគុណបងប្អូនអស់ពីដួងចិត្ត ដែលបានមកជួយយើងនៅចំពេលតែម្ដង»។
អ្នកឯទៀតនៅក្នុងសហគមន៍ បានឃើញការផ្ដល់ជំនួយរបស់បងប្អូនយើង។ មេភូមិម្នាក់ក្នុងក្រុងសាបាក្រេអា នៅរដ្ឋបេលអ៊ែលសា បាននិយាយសរសើរថា៖«មានអង្គការឬវិហារជាច្រើននៅក្នុងពិភពលោក តែមានតែសាក្សីព្រះយេហូវ៉ាប៉ុណ្ណោះដែលបានធ្វើដូចនេះ។ . . . អង្គការ[របស់អ្នក]គឺល្អបំផុតនៅលើលោក»។
«យើងពិសោធដោយផ្ទាល់នូវសេចក្ដីស្រឡាញ់របស់ព្រះយេហូវ៉ា»
ក្នុងអំឡុងខែកុម្ភៈ ឆ្នាំ២០២៣ មានការឆេះព្រៃជាង៤០០ដង ដែលបណ្ដាលឲ្យមានការខូចខាតយ៉ាងធំនៅក្នុងប្រទេសស៊ីលី។ ផ្ទៃដីជាង៤៣០.០០០ហិចតា រួមទាំងតំបន់ខ្លះក្នុងប្រទេសស៊ីលីបានត្រូវបំផ្លាញ។ មនុស្សប្រមាណ៨.០០០នាក់បានត្រូវជម្លៀសចេញពីលំនៅរបស់ពួកគេ។ ភ្លាមៗក្រោយពីមហន្តរាយកើតឡើង ការិយាល័យសាខាបានរៀបចំផ្ដល់ជំនួយ។
នៅប្រទេសស៊ីលី បងប្អូនស្ម័គ្រចិត្តបានជួយសាងសង់ផ្ទះរបស់ក្រុមគ្រួសារមួយឡើងវិញ
ផលប៉ះពាល់ទៅលើបងប្អូនរបស់យើង
អ្នកផ្សាយ២២២នាក់បានត្រូវជម្លៀសចេញពីទីលំនៅរបស់ពួកគេ
ផ្ទះ២០ខ្នងបានខូចខាតទាំងស្រុង
ការប្រើប្រាស់ប្រាក់វិភាគទាន
ប្រាក់ជាង២០០.០០០ដុល្លារបានត្រូវចំណាយទៅលើកិច្ចការផ្ដល់ជំនួយ ដែលរួមមាន៖
ស្បៀងអាហារនិងទឹក
ប្រេងឥន្ធនៈ សម្ភារសម្អាត និងថ្នាំពេទ្យ
សាងសង់ផ្ទះដែលខូចខាតឡើងវិញ
ក្រុមគ្រួសារមួយបានតក់ស្លុតជាខ្លាំងពេលដែលឃើញថាអ្វីៗដែលពួកគេមាន បានត្រូវបំផ្លាញ។ ពួកគេបាត់បង់ទាំងផ្ទះទាំងមុខជំនួញ ដូច្នេះហើយពួកគេលែងមានមុខរបរចិញ្ចឹមជីវិតទៀត។ ប៉ុន្មានថ្ងៃដំបូង ពួកគេឈឺចិត្តណាស់ ព្រោះទីតាំងផ្ទះរបស់ពួកគេនៅសល់តែដីទទេ។ ប៉ុន្តែ ពេលដែលបងប្អូនរបស់យើងចាប់ផ្ដើមសាងសង់ផ្ទះរបស់គាត់ ពួកគេសប្បាយចិត្តឡើងវិញ ហើយមានអារម្មណ៍ធូរស្រាលជាង។ ដោយសារបងប្អូនដែលស្ម័គ្រចិត្ត បានបង្ហាញសេចក្ដីស្រឡាញ់និងមនោសញ្ចេតនាយ៉ាងជ្រាលជ្រៅចំពោះពួកគេ នោះជួយឲ្យពួកគេអាចស៊ូទ្រាំនឹងបញ្ហានោះ។ សេចក្ដីស្រឡាញ់របស់បងប្អូនពិតជាធ្វើឲ្យក្រុមគ្រួសារនេះរំជួលចិត្តណាស់ ហើយពួកគេបានចូលរួមជាមួយបងប្អូនដែលស្ម័គ្រចិត្តក្នុងការជួយសាងសង់ផ្ទះឲ្យបងប្អូនឯទៀត។
បងប្អូនជាច្រើនរំភើបចិត្តណាស់ចំពោះកិច្ចការផ្ដល់ជំនួយរបស់បងប្អូនយើង។ បងប្រុសម្នាក់បាននិយាយថា៖«ការរៀបចំរបស់ព្រះយេហូវ៉ាឲ្យមានគណៈកម្មាធិការខាងការផ្ដល់ជំនួយគឺពិតជាអស្ចារ្យណាស់។ មួយថ្ងៃក្រោយគ្រោះមហន្តរាយ ពួកគេបានទទួលស្បៀងអាហារនិងរបស់ចាំបាច់មួយចំនួន។ យើងរំជួលចិត្តណាស់ពេលអានអំពីការផ្ដល់ជំនួយនៅប្រទេសផ្សេងៗ។ ប៉ុន្តែ ពេលដែលនោះកើតឡើងចំពោះយើងផ្ទាល់ អារម្មណ៍របស់យើងគឺខុសគ្នាឆ្ងាយណាស់។ យើងកាន់តែដឹងគុណចំពោះអង្គការព្រះយេហូវ៉ា។ យើងដឹងគុណពេលឃើញបងប្អូនយើងធ្វើតាមគំរូព្រះយេហូវ៉ាដោយបង្ហាញគុណសម្បត្តិដូចលោក និងឃើញរបៀបដែលបងប្អូនយកចិត្តទុកដាក់ចំពោះសេចក្ដីត្រូវការរបស់យើងទាំងខាងផ្លូវកាយ ផ្លូវចិត្ត និងចំណងមិត្តភាពជាមួយព្រះយេហូវ៉ា។ យើងពិសោធដោយផ្ទាល់នូវសេចក្ដីស្រឡាញ់របស់ព្រះយេហូវ៉ា»។
កាលដែលរបៀបរបបពិភពលោកនេះជិតដល់ទីបញ្ចប់ យើងនឹងជួបគ្រោះមហន្តរាយកាន់តែច្រើនឡើងៗ។ (លូកា ២១:១០, ១១) ទោះជាយ៉ាងនោះក៏ដោយ តាមរយៈក្រុមជំនុំគ្រិស្តសាសនិក យើងឃើញថាលោកយេស៊ូគ្រិស្តជាស្ដេចរបស់យើងដែលប្រកបដោយសេចក្ដីស្រឡាញ់ នៅជាមួយយើង«ជារៀងរាល់ថ្ងៃ រហូតដល់គ្រាចុងបញ្ចប់នៃរបៀបរបបពិភពលោកនេះ»។ (ម៉ាថាយ ២៨:២០) វិភាគទានដែលបងប្អូនបានជូនដោយចិត្តទូលាយសម្រាប់កិច្ចការទូទាំងពិភពលោក តាមរយៈdonate.jw.org និងតាមវិធីផ្សេងទៀត រួមទាំងពេលវេលា និងកម្លាំងរបស់បងប្អូន បានសឲ្យឃើញថាបងប្អូនគាំទ្ររាជាណាចក្រព្រះនិងស្ដេចនៃរាជាណាចក្រនោះ។ សូមអរគុណដែលបងប្អូនបានបង្ហាញចិត្តទូលាយជានិច្ច។
a ឆ្នាំកិច្ចបម្រើ២០២៣ ចាប់ពីថ្ងៃទី១ ខែកញ្ញា ឆ្នាំ២០២២ ដល់ថ្ងៃទី៣១ ខែសីហា ឆ្នាំ២០២៣។
b ក្នុងអត្ថបទនេះ ទឹកប្រាក់ដុល្លារទាំងអស់ជាដុល្លារអាម៉េរិក។