អត្ថបទសិក្សា ៣០
ចូរឲ្យតម្លៃចំពោះតួនាទីរបស់អ្នកក្នុងក្រុមគ្រួសារព្រះយេហូវ៉ា
«លោកឲ្យគាត់ទាបជាងទេវតាតែបន្តិចប៉ុណ្ណោះ លោកថែមទាំងឲ្យគាត់មានកិត្តិយសនិងសិរីរុងរឿងទៀតផង»។—ចសព. ៨:៥
ចម្រៀងលេខ១២៣ ចុះចូលដោយស្មោះក្រោមការរៀបចំរបស់ព្រះ
សេចក្ដីសង្ខេបa
១. តើយើងប្រហែលជាសួរសំណួរយ៉ាងណា ពេលយើងគិតអំពីអ្វីៗទាំងអស់ដែលព្រះយេហូវ៉ាបានបង្កើត?
ពេលយើងគិតអំពីអ្វីៗទាំងអស់ដែលព្រះយេហូវ៉ាបានបង្កើត យើងប្រហែលជាមានអារម្មណ៍ដូចដាវីឌជាអ្នកតែងចម្រៀងសរសើរព្រះ ដែលបានអធិដ្ឋានសួរព្រះយេហូវ៉ាថា៖ «ពេលខ្ញុំសម្លឹងមើលមេឃជាស្នាដៃរបស់លោក ហើយមើលដួងចន្ទ និងដួងតារា ដែលលោកបានបង្កើត ខ្ញុំនឹកក្នុងចិត្តថា តើមនុស្សជាតិជាអ្វីដែលលោកត្រូវគិតដល់? ហើយតើកូនមនុស្សជាអ្នកណាបានជាលោកត្រូវថែរក្សា?»។ (ចសព. ៨:៣, ៤) ដូចដាវីឌ យើងប្រហែលជាគិតថាយើងតូចតាច បើប្រៀបធៀបនឹងដួងតារាដែលព្រះយេហូវ៉ាបានបង្កើត ហើយយើងកោតស្ងើចដែលព្រះយេហូវ៉ាយកចិត្តទុកដាក់ចំពោះយើង។ ទោះជាយ៉ាងនោះក៏ដោយ ក្នុងអត្ថបទនេះយើងនឹងឃើញថា ព្រះយេហូវ៉ាបានយកចិត្តទុកដាក់ចំពោះមនុស្សដំបូងបង្អស់គឺអាដាមនិងអេវ៉ា ហើយលោកក៏បានឲ្យពួកគេធ្វើជាសមាជិកក្រុមគ្រួសាររបស់លោកដែរ។
២. តើអ្វីជាគោលបំណងរបស់ព្រះយេហូវ៉ាចំពោះអាដាមនិងអេវ៉ា?
២ អាដាមនិងអេវ៉ាជាមនុស្សដំបូងដែលជាកូនរបស់ព្រះយេហូវ៉ា ហើយលោកជាបិតារបស់ពួកគេនៅស្ថានសួគ៌ដែលស្រឡាញ់ពួកគេ។ លោកឲ្យប្ដីប្រពន្ធមួយគូនេះនូវកិច្ចការដែលពួកគេត្រូវធ្វើ។ ព្រះបានប្រាប់ពួកគេថា៖ «ចូរបង្កើតកូនឲ្យចម្រើនជាច្រើនឡើង ឲ្យមានពេញពាសលើផែនដីចុះ ហើយចូរគ្រប់គ្រងផែនដី»។ (ដក. ១:២៨) ដូច្នេះ លោកចង់ឲ្យពួកគេបង្កើតកូន និងថែរក្សាផែនដីដែលជាទីលំនៅរបស់ពួកគេឲ្យបានល្អ។ បើអាដាមនិងអេវ៉ាបានស្ដាប់បង្គាប់ និងបានធ្វើអ្វីទាំងអស់ដែលព្រះបានសុំពួកគេឲ្យធ្វើ នោះពួកគេនិងកូនចៅរបស់ពួកគេនឹងធ្វើជាសមាជិកក្រុមគ្រួសាររបស់ព្រះជារៀងរហូត។
៣. ហេតុអ្វីយើងអាចនិយាយថាអាដាមនិងអេវ៉ាមានតួនាទីសំខាន់ក្នុងក្រុមគ្រួសាររបស់ព្រះយេហូវ៉ា?
៣ អាដាមនិងអេវ៉ាមានតួនាទីសំខាន់ក្នុងក្រុមគ្រួសាររបស់ព្រះយេហូវ៉ា។ នៅចម្រៀងសរសើរព្រះ ៨:៥ ដាវីឌបាននិយាយអំពីការដែលព្រះយេហូវ៉ាបានបង្កើតមនុស្ស ថា៖ «លោកឲ្យគាត់ទាបជាងទេវតាតែបន្តិចប៉ុណ្ណោះ លោកថែមទាំងឲ្យគាត់មានកិត្តិយសនិងសិរីរុងរឿងទៀតផង»។ ពិតមែនថា ព្រះយេហូវ៉ាមិនបង្កើតមនុស្សឲ្យមានកម្លាំង ប្រាជ្ញា និងសមត្ថភាពស្មើនឹងទេវតាទេ។ (ចសព. ១០៣:២០) ប៉ុន្តែ មនុស្សគឺ«ទាបជាង»ពួកទេវតាដ៏ខ្លាំងក្លាទាំងនោះតែបន្តិចប៉ុណ្ណោះ។ នេះពិតជាអស្ចារ្យមែន! ពេលព្រះយេហូវ៉ាបានបង្កើតមនុស្សដែលជាឪពុកម្ដាយដំបូងរបស់យើង លោកបានឲ្យពួកគេជីវិតដ៏ល្អក្រៃលែង។
៤. តើអ្វីបានកើតឡើងចំពោះអាដាមនិងអេវ៉ាដោយសារពួកគេមិនបានស្ដាប់បង្គាប់ព្រះយេហូវ៉ា ហើយតើយើងនឹងពិចារណាអ្វីខ្លះក្នុងអត្ថបទនេះ?
៤ គួរឲ្យស្ដាយណាស់ ដោយសារអាដាមនិងអេវ៉ាមិនបានស្ដាប់បង្គាប់ព្រះយេហូវ៉ា ពួកគេលែងធ្វើជាសមាជិកក្រុមគ្រួសារលោកទៀត។ នេះបានបណ្ដាលឲ្យមានបញ្ហាជាច្រើនចំពោះកូនចៅរបស់ពួកគេ ដូចដែលយើងនឹងឃើញក្រោយមកក្នុងអត្ថបទនេះ។ ប៉ុន្តែ គោលបំណងរបស់ព្រះយេហូវ៉ាមិនបានផ្លាស់ប្ដូរទេ។ លោកចង់ឲ្យមនុស្សដែលស្ដាប់បង្គាប់លោកធ្វើជាកូនរបស់លោកជារៀងរហូត។ ដំបូង សូមយើងពិចារណាអំពីរបៀបដែលព្រះយេហូវ៉ាបានបង្ហាញថាយើងមានតម្លៃចំពោះលោក។ បន្ទាប់មក យើងនឹងពិចារណាអំពីអ្វីដែលយើងអាចធ្វើនៅឥឡូវនេះ ដើម្បីបង្ហាញថាយើងចង់ធ្វើជាសមាជិកក្រុមគ្រួសាររបស់ព្រះ។ ចុងក្រោយ យើងនឹងពិចារណាអំពីពរដែលកូនរបស់ព្រះយេហូវ៉ានៅផែនដីនឹងទទួលជារៀងរហូត។
របៀបព្រះយេហូវ៉ាលើកកិត្តិយសមនុស្សជាតិ
តើព្រះយេហូវ៉ាបានឲ្យកិត្តិយសដល់យើងតាមរបៀបណាខ្លះ? (សូមមើលវគ្គ៥-១១)b
៥. តើយើងអាចបង្ហាញព្រះយ៉ាងដូចម្ដេចថាយើងដឹងគុណលោក ដែលបានបង្កើតយើងឲ្យមានភាពដូចលោក?
៥ ព្រះយេហូវ៉ាលើកកិត្តិយសយើងដោយបង្កើតយើងឲ្យមានភាពដូចលោក។ (ដក. ១:២៦, ២៧) ដោយសារយើងបានត្រូវបង្កើតឲ្យមានភាពដូចព្រះ យើងអាចបណ្ដុះឲ្យមាននិងបង្ហាញគុណសម្បត្តិដ៏អស្ចារ្យជាច្រើនរបស់លោក ដូចជាសេចក្ដីស្រឡាញ់ ចិត្តអាណិតអាសូរ ភាពស្មោះត្រង់ និងសេចក្ដីសុចរិត។ (ចសព. ៨៦:១៥; ១៤៥:១៧) កាលដែលយើងបណ្ដុះឲ្យមានគុណសម្បត្តិបែបនេះ យើងលើកកិត្តិយសព្រះយេហូវ៉ា ហើយបង្ហាញថាយើងដឹងគុណលោក។ (១ពេ. ១:១៤-១៦) ពេលយើងធ្វើអ្វីៗដែលបិតារបស់យើងនៅស្ថានសួគ៌ពេញចិត្ត យើងសប្បាយនិងស្កប់ចិត្ត។ ម្យ៉ាងទៀត ដោយសារព្រះយេហូវ៉ាបានបង្កើតយើងឲ្យមានភាពដូចលោក យើងអាចទៅជាមនុស្សដែលលោកចង់ឲ្យធ្វើជាសមាជិកក្រុមគ្រួសាររបស់លោក។
៦. តើព្រះយេហូវ៉ាបានលើកកិត្តិយសមនុស្សយ៉ាងដូចម្ដេចពេលលោករៀបចំផែនដី?
៦ ព្រះយេហូវ៉ាបានរៀបចំទីលំនៅដ៏ពិសេសសម្រាប់យើង។ ព្រះយេហូវ៉ាបានរៀបចំផែនដីសម្រាប់មនុស្សជាតិ អស់ជាច្រើនឆ្នាំមុនដែលលោកបានបង្កើតបុរសដំបូង។ (យ៉ូប ៣៨:៤-៦; យេ. ១០:១២) ដោយសារព្រះយេហូវ៉ាសប្បុរសនិងមានចិត្តទូលាយ លោកបានផ្ដល់អ្វីល្អៗជាច្រើនដើម្បីឲ្យយើងសប្បាយ។ (ចសព. ១០៤:១៤, ១៥, ២៤) ម្ដងម្កាល លោកបានគិតអំពីអ្វីៗដែលលោកបានបង្កើត ហើយលោក«បានឃើញថាអ្វីទាំងនោះគឺល្អ»។ (ដក. ១:១០, ១២, ៣១) លោកបានលើកកិត្តិយសមនុស្ស ដោយឲ្យពួកគេមាន«អំណាចលើ»អស់ទាំងស្នាដៃដ៏អស្ចារ្យរបស់លោកនៅផែនដី។ (ចសព. ៨:៦) ព្រះចង់ឲ្យមនុស្សល្អឥតខ្ចោះអរសប្បាយក្នុងការថែរក្សាអ្វីៗដ៏អស្ចារ្យដែលលោកបានបង្កើត។ តើអ្នកអរគុណព្រះយេហូវ៉ាជារឿយៗចំពោះសេចក្ដីសន្យាដ៏អស្ចារ្យនេះឬទេ?
៧. តើតាមរបៀបណាយ៉ូស្វេ ២៤:១៥ បង្ហាញថាមនុស្សមានចិត្តសេរី?
៧ ព្រះយេហូវ៉ាបានឲ្យយើងនូវអំណោយមួយ ពោលគឺចិត្តសេរី។ យ៉ាងនេះ យើងអាចជ្រើសរើសឬសម្រេចចិត្តអំពីអ្វីដែលយើងនឹងធ្វើក្នុងជីវិត។ (សូមអាន យ៉ូស្វេ ២៤:១៥) សមត្ថភាពជ្រើសរើសឬសម្រេចចិត្តនោះគឺជាចិត្តសេរី។ ព្រះដែលស្រឡាញ់យើង អរសប្បាយពេលយើងសម្រេចចិត្តបម្រើលោក។ (ចសព. ៨៤:១១; សុភ. ២៧:១១) យើងអាចប្រើចិត្តសេរីរបស់យើងដើម្បីធ្វើការសម្រេចចិត្តល្អជាច្រើនទៀត។ សូមគិតអំពីគំរូរបស់លោកយេស៊ូ។
៨. សូមលើកឧទាហរណ៍មួយអំពីរបៀបដែលលោកយេស៊ូបានប្រើចិត្តសេរីរបស់លោក។
៨ យើងអាចធ្វើតាមគំរូរបស់លោកយេស៊ូ ដោយសម្រេចចិត្តថាយើងនឹងយកចិត្តទុកដាក់ចំពោះប្រយោជន៍អ្នកឯទៀតច្រើនជាងប្រយោជន៍ខ្លួនឯង។ នៅពេលមួយ លោកយេស៊ូនិងពួកសាវ័ករបស់លោកអស់កម្លាំងយ៉ាងខ្លាំង ដូច្នេះពួកគាត់ធ្វើដំណើរទៅកន្លែងស្ងាត់ដើម្បីសម្រាក។ ប៉ុន្តែ ពួកគាត់មិនអាចសម្រាកបានទេ ពីព្រោះមនុស្សមួយក្រុមធំបានមក ហើយចង់ឲ្យលោកយេស៊ូបង្រៀនពួកគេ។ លោកយេស៊ូមិនបានខឹងនឹងពួកគេទេ។ ផ្ទុយទៅវិញ លោកមានចិត្តក្ដួលអាណិតចំពោះពួកគេ។ ដូច្នេះ តើលោកយេស៊ូបានធ្វើអ្វី? «លោកចាប់ផ្ដើមបង្រៀនពួកគេអំពីអ្វីៗជាច្រើន»។ (ម៉ាក. ៦:៣០-៣៤) ពេលយើងយកតម្រាប់លោកយេស៊ូ ដោយប្រើពេលវេលានិងកម្លាំងរបស់យើងដើម្បីជួយអ្នកឯទៀត យើងនាំឲ្យបិតារបស់យើងនៅស្ថានសួគ៌ទទួលការសរសើរតម្កើង។ (ម៉ាថ. ៥:១៤-១៦) យើងក៏បង្ហាញព្រះយេហូវ៉ាថាយើងចង់ធ្វើជាសមាជិកក្រុមគ្រួសាររបស់លោក។
៩. តើព្រះយេហូវ៉ាបានឲ្យអំណោយដ៏វិសេសអ្វីដល់មនុស្សជាតិ?
៩ ព្រះយេហូវ៉ាបានឲ្យមនុស្សមានសមត្ថភាពបង្កើតកូន ហើយមានភារកិច្ចបង្រៀនកូនៗឲ្យស្រឡាញ់និងបម្រើលោក។ បើអ្នកជាឪពុកម្ដាយ តើអ្នកឲ្យតម្លៃចំពោះអំណោយដ៏វិសេសនេះឬទេ? ទោះជាពួកទេវតាទទួលពរជាច្រើនពីព្រះយេហូវ៉ាក្ដី ពួកគេមិនបានទទួលឯកសិទ្ធិនេះទេ។ ដូច្នេះ បើអ្នកជាឪពុកម្ដាយ សូមឲ្យតម្លៃចំពោះឯកសិទ្ធិរបស់អ្នកក្នុងការចិញ្ចឹមអប់រំកូន។ ឪពុកម្ដាយបានទទួលភារកិច្ចដ៏សំខាន់មួយ គឺចិញ្ចឹមអប់រំកូនតាម«ការប្រៀនប្រដៅនិងការណែនាំរបស់ព្រះយេហូវ៉ា»។ (អេភ. ៦:៤; បច. ៦:៥-៧; ចសព. ១២៧:៣) ដើម្បីជួយឪពុកម្ដាយ អង្គការរបស់ព្រះផ្ដល់ឧបករណ៍ជាច្រើនដែលមានមូលដ្ឋានលើគម្ពីរ ដូចជាសៀវភៅ វីដេអូ ចម្រៀង និងអត្ថបទតាមគេហទំព័ររបស់យើង។ នេះសឲ្យឃើញថាបិតារបស់យើងនៅស្ថានសួគ៌និងបុត្ររបស់លោកស្រឡាញ់ប្អូនៗវ័យក្មេងមែន! (លូក. ១៨:១៥-១៧) ព្រះយេហូវ៉ាពេញចិត្តពេលឪពុកម្ដាយពឹងផ្អែកលើលោក និងខំប្រឹងអស់ពីសមត្ថភាពដើម្បីថែទាំកូនៗដ៏មានតម្លៃរបស់ពួកគេ។ ឪពុកម្ដាយបែបនេះក៏ជួយកូនៗរបស់ពួកគេឲ្យមានសេចក្ដីសង្ឃឹមធ្វើជាសមាជិកក្រុមគ្រួសាររបស់ព្រះយេហូវ៉ាជារៀងរហូត!
១០-១១. តើព្រះយេហូវ៉ាបានផ្ដល់ឱកាសអ្វីឲ្យយើងតាមរយៈថ្លៃលោះ?
១០ ព្រះយេហូវ៉ាបានឲ្យបុត្រជាទីស្រឡាញ់ ដើម្បីយើងអាចធ្វើជាសមាជិកក្រុមគ្រួសាររបស់លោកម្ដងទៀត។ ដូចបានរៀបរាប់នៅវគ្គ៤ ពេលអាដាមនិងអេវ៉ាបានប្រព្រឹត្តអំពើខុសឆ្គង ពួកគេនិងកូនចៅរបស់ពួកគេមិនអាចធ្វើជាសមាជិកក្រុមគ្រួសាររបស់ព្រះយេហូវ៉ាទៀតទេ។ (រ៉ូម ៥:១២) អាដាមនិងអេវ៉ាបានសម្រេចចិត្តមិនស្ដាប់បង្គាប់ព្រះ ដូច្នេះគឺសមត្រឹមត្រូវដែលពួកគេបានត្រូវដកចេញពីក្រុមគ្រួសាររបស់លោក។ ប៉ុន្តែ ចុះយ៉ាងណាចំពោះកូនចៅរបស់ពួកគេ? ព្រះយេហូវ៉ាស្រឡាញ់មនុស្ស ដូច្នេះលោកបានរៀបចំឲ្យកូនចៅរបស់ពួកគេដែលស្ដាប់បង្គាប់លោកទៅជាសមាជិកក្រុមគ្រួសារលោក។ លោកបានធ្វើដូច្នេះ តាមរយៈគ្រឿងបូជានៃបុត្រតែមួយរបស់លោក គឺលោកយេស៊ូគ្រិស្ត។ (យ៉ូន. ៣:១៦; រ៉ូម ៥:១៩) ដោយសារគ្រឿងបូជារបស់លោកយេស៊ូ ព្រះយេហូវ៉ាអាចទទួលមនុស្សស្មោះត្រង់១៤៤.០០០នាក់ជាកូនរបស់លោក។—រ៉ូម ៨:១៥-១៧; បប. ១៤:១
១១ បន្ថែមទៅទៀត មនុស្សស្មោះត្រង់រាប់លាននាក់ទៀតកំពុងស្ដាប់បង្គាប់ព្រះដោយធ្វើតាមបំណងប្រាថ្នារបស់លោក។ ពួកគេមានសេចក្ដីសង្ឃឹមទៅជាសមាជិកក្រុមគ្រួសាររបស់លោក ក្រោយពីការសាកល្បងចុងក្រោយនៅទីបញ្ចប់នៃគ្រា១.០០០ឆ្នាំ។ (ចសព. ២៥:១៤; រ៉ូម ៨:២០, ២១) ដោយសារពួកគេមានសេចក្ដីសង្ឃឹមនោះ សូម្បីតែនៅឥឡូវនេះ ក៏ពួកគេហៅព្រះយេហូវ៉ាដែលជាអ្នកបង្កើតរបស់ពួកគេថា«បិតា»។ (ម៉ាថ. ៦:៩) ចំណែកឯពួកអ្នកដែលនឹងត្រូវប្រោសឲ្យរស់ឡើងវិញ ពួកគេក៏នឹងមានឱកាសរៀនអំពីអ្វីដែលព្រះយេហូវ៉ាតម្រូវពីពួកគេ។ ពួកអ្នកដែលសម្រេចចិត្តធ្វើតាមការណែនាំរបស់លោក ក៏នឹងទៅជាសមាជិកក្រុមគ្រួសាររបស់លោកនៅពេលក្រោយមកដែរ។
១២. តើសំណួរអ្វីនឹងត្រូវឆ្លើយនៅឥឡូវនេះ?
១២ ដូចយើងបានឃើញ ព្រះយេហូវ៉ាបានធ្វើអ្វីៗជាច្រើនដើម្បីលើកកិត្តិយសមនុស្ស។ លោកបានទទួលពួកអ្នកដែលបានត្រូវរើសតាំងរួចហើយឲ្យធ្វើជាកូនរបស់លោក ហើយលោកបានឲ្យ«មនុស្សមួយក្រុមធំ»មានសេចក្ដីសង្ឃឹមទៅជាកូនរបស់លោកនៅក្នុងពិភពលោកថ្មី។ (បប. ៧:៩) តើយើងអាចធ្វើអ្វីនៅឥឡូវនេះដើម្បីបង្ហាញព្រះយេហូវ៉ាថាយើងចង់ធ្វើជាសមាជិកក្រុមគ្រួសាររបស់លោកជារៀងរហូត?
ចូរបង្ហាញព្រះយេហូវ៉ាថាអ្នកចង់ធ្វើជាសមាជិកក្រុមគ្រួសាររបស់លោក
១៣. តើយើងអាចធ្វើអ្វីដើម្បីទៅជាសមាជិកក្រុមគ្រួសាររបស់ព្រះ? (ម៉ាកុស ១២:៣០)
១៣ ចូរបង្ហាញសេចក្ដីស្រឡាញ់របស់អ្នកចំពោះព្រះយេហូវ៉ាដោយបម្រើលោកអស់ពីចិត្ត។ (សូមអាន ម៉ាកុស ១២:៣០) ប្រហែលជាអំណោយដ៏វិសេសបំផុតមួយដែលយើងទទួលពីព្រះយេហូវ៉ាគឺ យើងអាចគោរពប្រណិប័តន៍លោក។ យើងបង្ហាញព្រះយេហូវ៉ាថា យើងស្រឡាញ់លោកដោយ«កាន់តាមបញ្ញត្ដិរបស់លោក»។ (១យ៉ូន. ៥:៣) បង្គាប់មួយដែលព្រះយេហូវ៉ាចង់ឲ្យយើងធ្វើតាមគឺបង្គាប់ដែលលោកយេស៊ូបានឲ្យយើង ពោលគឺបង្រៀនអ្នកឯទៀតឲ្យក្លាយទៅជាអ្នកកាន់តាមលោក ហើយជ្រមុជទឹកឲ្យពួកគេ។ (ម៉ាថ. ២៨:១៩) លោកក៏បង្គាប់យើងឲ្យស្រឡាញ់គ្នាទៅវិញទៅមកដែរ។ (យ៉ូន. ១៣:៣៥) ព្រះយេហូវ៉ានឹងយកពួកអ្នកស្ដាប់បង្គាប់ធ្វើជាសមាជិកក្រុមគ្រួសារលោកដែលជាអ្នកគោរពប្រណិប័តន៍នៅទូទាំងពិភពលោក។—ចសព. ១៥:១, ២
១៤. តើយើងអាចបង្ហាញសេចក្ដីស្រឡាញ់ចំពោះអ្នកឯទៀតយ៉ាងដូចម្ដេច? (ម៉ាថាយ ៩:៣៦-៣៨; រ៉ូម ១២:១០)
១៤ ចូរបង្ហាញសេចក្ដីស្រឡាញ់ចំពោះអ្នកឯទៀត។ សេចក្ដីស្រឡាញ់គឺជាគុណសម្បត្តិដ៏សំខាន់បំផុតរបស់ព្រះយេហូវ៉ា។ (១យ៉ូន. ៤:៨) ព្រះយេហូវ៉ាបានបង្ហាញសេចក្ដីស្រឡាញ់ចំពោះយើងមុនដែលយើងស្គាល់លោក។ (១យ៉ូន. ៤:៩, ១០) យើងយកតម្រាប់លោក ពេលយើងបង្ហាញសេចក្ដីស្រឡាញ់ចំពោះអ្នកឯទៀត។ (អេភ. ៥:១) របៀបដ៏ល្អបំផុតមួយដែលយើងអាចបង្ហាញសេចក្ដីស្រឡាញ់ចំពោះអ្នកឯទៀត គឺដោយជួយពួកគេឲ្យរៀនអំពីព្រះយេហូវ៉ា កាលដែលនៅមានពេលនៅឡើយ។ (សូមអាន ម៉ាថាយ ៩:៣៦-៣៨) ដោយធ្វើដូច្នេះ យើងបើកឱកាសឲ្យពួកគេរៀនអំពីអ្វីដែលពួកគេត្រូវធ្វើ ដើម្បីទៅជាសមាជិកក្រុមគ្រួសាររបស់ព្រះ។ បន្ទាប់ពីបុគ្គលណាម្នាក់ទទួលការជ្រមុជទឹក យើងក៏ត្រូវបន្តស្រឡាញ់និងគោរពគាត់ដែរ។ (១យ៉ូន. ៤:២០, ២១) តើការធ្វើដូច្នេះរួមបញ្ចូលអ្វីខ្លះ? គឺយើងត្រូវមានទំនុកចិត្តថាគាត់មានបំណងចិត្តល្អ។ ជាឧទាហរណ៍ យើងមិនសង្ស័យអំពីបំណងចិត្តរបស់គាត់ ឬគិតគាត់ក្នុងផ្លូវអាក្រក់ឡើយ។ ផ្ទុយទៅវិញ យើងលើកកិត្តិយសបងប្អូននោះ ដោយចាត់ទុកគាត់ថាប្រសើរជាងខ្លួន។—សូមអាន រ៉ូម ១២:១០; ភី. ២:៣
១៥. តើយើងគួរបង្ហាញសេចក្ដីមេត្តាករុណានិងសេចក្ដីសប្បុរសចំពោះអ្នកណាខ្លះ?
១៥ ចូរបង្ហាញសេចក្ដីមេត្តាករុណានិងសេចក្ដីសប្បុរសដល់មនុស្សទាំងអស់។ បើយើងចង់ធ្វើជាសមាជិកក្រុមគ្រួសាររបស់ព្រះយេហូវ៉ាជារៀងរហូត យើងត្រូវធ្វើតាមបណ្ដាំរបស់ព្រះនៅក្នុងជីវិតយើង។ ជាឧទាហរណ៍ លោកយេស៊ូបង្រៀនថា យើងគួរបង្ហាញសេចក្ដីមេត្តាករុណានិងសេចក្ដីសប្បុរសដល់មនុស្សទាំងអស់ រួមទាំងពួកសត្រូវរបស់យើងផងដែរ។ (លូក. ៦:៣២-៣៦) ជួនកាល យើងប្រហែលជាពិបាកធ្វើដូច្នេះ។ នៅពេលនោះយើងត្រូវរៀនឲ្យគិតនិងប្រព្រឹត្តដូចលោកយេស៊ូ។ កាលដែលយើងខំអស់ពីសមត្ថភាពដើម្បីស្ដាប់បង្គាប់ព្រះយេហូវ៉ានិងយកតម្រាប់លោកយេស៊ូ យើងបង្ហាញបិតារបស់យើងនៅស្ថានសួគ៌ថាយើងចង់ធ្វើជាសមាជិកក្រុមគ្រួសាររបស់លោកជារៀងរហូត។
១៦. តើយើងអាចការពារកេរ្តិ៍ឈ្មោះក្រុមគ្រួសាររបស់ព្រះយេហូវ៉ាតាមរបៀបណា?
១៦ ចូរការពារកេរ្តិ៍ឈ្មោះរបស់ក្រុមគ្រួសារព្រះយេហូវ៉ា។ ក្នុងក្រុមគ្រួសារ តាមធម្មតាក្មេងប្រុសធ្វើតាមគំរូរបស់បងប្រុសគាត់។ បើបងប្រុសនោះធ្វើតាមគោលការណ៍គម្ពីរក្នុងជីវិត គាត់នឹងធ្វើជាគំរូល្អសម្រាប់ប្អូនប្រុសគាត់។ តែបើបងប្រុសនោះបែរជាធ្វើខុសទៅវិញ ប្អូនប្រុសគាត់ក៏ប្រហែលជាធ្វើតាមគំរូមិនល្អរបស់គាត់ដែរ។ ក្នុងក្រុមគ្រួសាររបស់ព្រះយេហូវ៉ាក៏មានស្ថានភាពស្រដៀងនឹងនេះ។ បើគ្រិស្តសាសនិកម្នាក់ដែលធ្លាប់ស្មោះត្រង់ទៅជាអ្នកក្បត់ជំនឿ ឬប្រព្រឹត្តអំពើប្រាសចាកសីលធម៌ឬខូចអាក្រក់ អ្នកឯទៀតប្រហែលជាធ្វើតាមគាត់ ហើយប្រព្រឹត្តអំពើអាក្រក់ដែរ។ ពួកអ្នកដែលធ្វើដូច្នេះ បង្ខូចកេរ្តិ៍ឈ្មោះនៃក្រុមគ្រួសាររបស់ព្រះយេហូវ៉ាដែលជាអ្នកគោរពប្រណិប័តន៍លោក។ (១ថែ. ៤:៣-៨) យើងមិនត្រូវធ្វើតាមគំរូមិនល្អ ហើយយើងមិនគួរអនុញ្ញាតឲ្យអ្វីណាក៏ដោយធ្វើឲ្យយើងឃ្លាតចេញពីបិតារបស់យើងនៅស្ថានសួគ៌ដែលស្រឡាញ់យើងឡើយ។
១៧. តើយើងគួរជៀសវាងពីការគិតគូរបែបណា ហើយហេតុអ្វី?
១៧ ចូរទុកចិត្តព្រះយេហូវ៉ាជាជាងទ្រព្យសម្បត្តិ។ ព្រះយេហូវ៉ាសន្យាថាលោកនឹងផ្ដល់ឲ្យយើងនូវអាហារ សម្លៀកបំពាក់ និងជម្រក បើយើងស្វែងរករាជាណាចក្ររបស់ព្រះជាមុន និងរស់នៅសមស្របតាមខ្នាតតម្រាដ៏សុចរិតរបស់លោក។ (ចសព. ៥៥:២២; ម៉ាថ. ៦:៣៣) បើយើងទុកចិត្តសេចក្ដីសន្យានេះ យើងនឹងមិនគិតថាទ្រព្យសម្បត្តិរបស់ពិភពលោកនេះអាចការពារយើង ហើយធ្វើឲ្យយើងសប្បាយចិត្តទេ។ យើងដឹងថាវិធីតែមួយគត់ដែលយើងអាចមានសេចក្ដីសុខសាន្តក្នុងចិត្ត គឺដោយធ្វើតាមបំណងប្រាថ្នារបស់ព្រះយេហូវ៉ា។ (ភី. ៤:៦, ៧) ទោះជាយើងមានលទ្ធភាពទិញអ្វីៗជាច្រើនក្ដី យើងត្រូវពិចារណាថា តើយើងពិតជាមានពេលឬកម្លាំងដើម្បីប្រើប្រាស់និងថែទាំអ្វីទាំងនោះឬទេ? តើយើងឲ្យតម្លៃខ្លាំងពេកចំពោះទ្រព្យសម្បត្តិរបស់យើងឬ? យើងត្រូវចាំថាព្រះបានឲ្យយើងកិច្ចការដែលយើងត្រូវធ្វើក្នុងក្រុមគ្រួសាររបស់លោក។ យ៉ាងនេះ យើងមិនគួរអនុញ្ញាតឲ្យអ្វីណាក៏ដោយបំបែរអារម្មណ៍របស់យើងទេ។ យើងប្រាកដជាមិនចង់ធ្វើដូចបុរសវ័យក្មេងម្នាក់ដែលបាត់បង់ឱកាសបម្រើព្រះយេហូវ៉ានិងក្លាយទៅជាកូនរបស់លោកទេ ដោយសារគាត់ឲ្យតម្លៃខ្លាំងពេកទៅលើទ្រព្យសម្បត្តិរបស់គាត់។—ម៉ាក. ១០:១៧-២២
អ្វីដែលកូនរបស់ព្រះយេហូវ៉ានឹងមានជារៀងរហូត
១៨. តើមនុស្សដែលស្ដាប់បង្គាប់ព្រះនឹងមានកិត្តិយសនិងពរអ្វីខ្លះជារៀងរហូត?
១៨ មនុស្សដែលស្ដាប់បង្គាប់ព្រះនឹងមានកិត្តិយសដ៏ធំបំផុត គឺឯកសិទ្ធិស្រឡាញ់និងគោរពប្រណិប័តន៍ព្រះយេហូវ៉ាជារៀងរហូត។ មនុស្សដែលមានសេចក្ដីសង្ឃឹមរស់នៅផែនដី ក៏នឹងមានអំណរដែលមកពីការថែរក្សាផែនដីដ៏ស្រស់ស្អាតនេះដែលព្រះយេហូវ៉ាបានរៀបចំយ៉ាងល្អឥតខ្ចោះឲ្យធ្វើជាទីលំនៅរបស់ពួកគេ។ មិនយូរទៀត រាជាណាចក្ររបស់ព្រះនឹងធ្វើឲ្យផែនដី និងអ្វីៗនៅលើផែនដីស្រស់ស្អាតឡើងវិញ។ លោកយេស៊ូនឹងដោះស្រាយបញ្ហាទាំងអស់ដែលបណ្ដាលមកពីការដែលអាដាមនិងអេវ៉ាសម្រេចចិត្តចាកចេញពីក្រុមគ្រួសារព្រះ។ ព្រះយេហូវ៉ានឹងប្រោសមនុស្សស្លាប់រាប់លាននាក់ឲ្យរស់ឡើងវិញ ហើយផ្ដល់ឱកាសឲ្យពួកគេរស់ជារៀងរហូតដោយមានសុខភាពល្អឥតខ្ចោះនៅលើផែនដីដែលបានក្លាយទៅជាសួនឧទ្យាន។ (លូក. ២៣:៤២, ៤៣) ពេលសមាជិកក្រុមគ្រួសាររបស់ព្រះយេហូវ៉ាដែលជាអ្នកគោរពប្រណិប័តន៍លោកនៅផែនដីក្លាយទៅជាមនុស្សល្អឥតខ្ចោះ ពួកគេម្នាក់ៗនឹងមាន«កិត្តិយសនិងសិរីរុងរឿង»ដូចដែលដាវីឌបានសរសេរ។—ចសព. ៨:៥
១៩. តើយើងគួរចងចាំអំពីអ្វីខ្លះ?
១៩ បើអ្នកនៅក្នុងចំណោម«មនុស្សមួយក្រុមធំ» អ្នកមានសេចក្ដីសង្ឃឹមដ៏អស្ចារ្យ។ ព្រះស្រឡាញ់អ្នក ហើយចង់ឲ្យអ្នកធ្វើជាសមាជិកក្រុមគ្រួសាររបស់លោក។ ដូច្នេះ ចូរខំអស់ពីសមត្ថភាពដើម្បីធ្វើឲ្យលោកពេញចិត្ត។ ចូរមានរបៀបរស់នៅប្រចាំថ្ងៃដែលបង្ហាញថា អ្នកនឹកចាំអំពីសេចក្ដីសន្យារបស់ព្រះ។ ចូរឲ្យតម្លៃចំពោះឯកសិទ្ធិដែលអ្នកមាន ដើម្បីគោរពប្រណិប័តន៍បិតាជាទីស្រឡាញ់របស់យើងនៅស្ថានសួគ៌ ហើយយល់ថាសេចក្ដីសង្ឃឹមដើម្បីសរសើរលោកជារៀងរហូតជាអ្វីមួយដែលពិតជាមានតម្លៃ!
ចម្រៀងលេខ១០៧ គំរូរបស់ព្រះអំពីការបង្ហាញសេចក្ដីស្រឡាញ់
a ដើម្បីឲ្យក្រុមគ្រួសារមានសុភមង្គល សមាជិកម្នាក់ៗត្រូវដឹងអំពីតួនាទីរបស់ខ្លួន ហើយត្រូវសហការជាមួយសមាជិកឯទៀតក្នុងក្រុមគ្រួសារ។ ជាឧទាហរណ៍ ឪពុកនាំមុខដោយសេចក្ដីស្រឡាញ់ ម្ដាយគាំទ្រគាត់ ហើយកូនៗស្ដាប់បង្គាប់ឪពុកម្ដាយ។ នេះគឺស្រដៀងនឹងក្រុមគ្រួសាររបស់ព្រះយេហូវ៉ា។ ព្រះរបស់យើងមានគោលបំណងសម្រាប់យើង ហើយបើយើងរស់នៅសមស្របតាមគោលបំណងនោះ យើងនឹងធ្វើជាសមាជិកក្រុមគ្រួសាររបស់ព្រះយេហូវ៉ាជារៀងរហូត។
b ការពណ៌នាអំពីរូបភាព: ដោយសារព្រះយេហូវ៉ាបានបង្កើតមនុស្សឲ្យមានភាពដូចលោក ប្ដីប្រពន្ធមួយគូរនេះអាចបង្ហាញចិត្តអាណិតមេត្តានិងសេចក្ដីស្រឡាញ់ចំពោះគ្នាទៅវិញទៅមកនិងចំពោះកូនរបស់ពួកគេ។ ប្ដីប្រពន្ធនោះស្រឡាញ់ព្រះយេហូវ៉ា។ ពួកគេបង្ហាញថាពួកគេឲ្យតម្លៃចំពោះសមត្ថភាពបង្កើតកូនដែលជាអំណោយពីព្រះដោយចិញ្ចឹមអប់រំកូនឲ្យស្រឡាញ់និងបម្រើព្រះយេហូវ៉ា។ ឪពុកម្ដាយនោះប្រើវីដេអូមួយដើម្បីពន្យល់កូនៗអំពីមូលហេតុដែលព្រះយេហូវ៉ាឲ្យលោកយេស៊ូជាថ្លៃលោះ។ ពួកគេក៏បង្រៀនកូនថា ក្នុងសួនឧទ្យានខាងមុខនេះ យើងនឹងថែរក្សាផែនដីនិងសត្វជារៀងរហូត។