អត្ថបទសិក្សា ៥៣
ប្អូនៗប្រុសវ័យក្មេង ចូរទៅជាបុរសគ្រិស្តសាសនិកដែលមានភាពចាស់ទុំ
«[ចូរ]មានភាពជាបុរសពេញវ័យ ហើយស្មើកម្រិតកម្ពស់របស់គ្រិស្ត»។—អេភ. ៤:១៣
ចម្រៀងលេខ១៣៥ ពាក្យអង្វររបស់ព្រះយេហូវ៉ា៖ «កូនអើយ ចូរមានប្រាជ្ញា»
សេចក្ដីសង្ខេបa
១. តើបុរសគ្រិស្តសាសនិកត្រូវធ្វើអ្វីដើម្បីទៅជាគ្រិស្តសាសនិកដែលមានភាពចាស់ទុំ?
សាវ័កប៉ូលបានលើកទឹកចិត្តគ្រិស្តសាសនិកនៅក្រុងអេភេសូរថា ចូរ«មានភាពជាបុរសពេញវ័យ ហើយស្មើកម្រិតកម្ពស់របស់គ្រិស្ត»។ (អេភ. ៤:១៣) បុរសគ្រិស្តសាសនិកទាំងអស់នៅសព្វថ្ងៃនេះក៏គួរធ្វើតាមដំបូន្មាននេះដែរ។ ដើម្បីធ្វើដូច្នេះ ពួកគេត្រូវរៀនធ្វើតាមច្បាប់របស់ព្រះនិងអនុវត្តគោលការណ៍គម្ពីរក្នុងគ្រប់សកម្មភាពរបស់ពួកគេ។ (លូក. ២:៥២) ហេតុអ្វីគឺសំខាន់ម្ល៉េះឲ្យប្អូនប្រុសវ័យក្មេងទៅជាបុរសគ្រិស្តសាសនិកដែលមានភាពចាស់ទុំ?
២-៣. ហេតុអ្វីសំខាន់ឲ្យប្អូនប្រុសវ័យក្មេងទៅជាគ្រិស្តសាសនិកដែលមានភាពចាស់ទុំ?
២ បុរសគ្រិស្តសាសនិកបំពេញតួនាទីសំខាន់ក្នុងក្រុមគ្រួសារនិងក្នុងក្រុមជំនុំ។ ប្អូនប្រុសវ័យក្មេង ប្អូនច្បាស់ជាបានគិតអំពីភារកិច្ចដែលប្អូនអាចមាននៅថ្ងៃអនាគត។ ប្អូនប្រហែលជាមានគោលដៅទៅជាអ្នកបម្រើពេញពេល ជំនួយការខាងកិច្ចបម្រើ និងក្រោយមកទៅជាអ្នកចាស់ទុំក្នុងក្រុមជំនុំ។ ប្អូនក៏ប្រហែលជាចង់រៀបការនិងមានកូនដែរ។ (អេភ. ៦:៤; ១ធី. ៣:១) ដើម្បីសម្រេចគោលដៅទាំងនេះនិងទទួលជោគជ័យ ប្អូនត្រូវមានភាពចាស់ទុំជាគ្រិស្តសាសនិក។b
៣ តើអ្វីអាចជួយប្អូនឲ្យទៅជាគ្រិស្តសាសនិកដែលមានភាពចាស់ទុំ? មានជំនាញសំខាន់ផ្សេងៗដែលប្អូនត្រូវបណ្ដុះឲ្យមាន។ តើប្អូនត្រូវធ្វើអ្វីនៅឥឡូវនេះដើម្បីត្រៀមខ្លួនឲ្យបានជោគជ័យក្នុងការបំពេញតួនាទីដែលប្អូនប្រហែលជានឹងមាននៅថ្ងៃខាងមុខ?
ជំហានដើម្បីទៅជាគ្រិស្តសាសនិកដែលមានភាពចាស់ទុំ
ការមានគុណសម្បត្តិដ៏ថ្លៃថ្លាដូចលោកយេស៊ូអាចជួយប្អូនឲ្យទៅជាបុរសគ្រិស្តសាសនិកដែលមានភាពចាស់ទុំ (សូមមើលវគ្គ៤)
៤. តើប្អូនអាចរកឃើញគំរូល្អនៅឯណា? (សូមមើលរូបភាពផងដែរ)
៤ ចូរជ្រើសរើសគំរូល្អដើម្បីយកតម្រាប់។ គម្ពីរពេញទៅដោយគំរូល្អសម្រាប់បុរសវ័យក្មេងឲ្យយកតម្រាប់។ បុរសទាំងនោះពីអតីតកាលស្រឡាញ់ព្រះ និងបានបំពេញភារកិច្ចផ្សេងៗក្នុងការមើលថែរាស្ត្ររបស់លោក។ ប្អូនក៏អាចរកឃើញគំរូល្អក្នុងចំណោមបុរសគ្រិស្តសាសនិកដែលមានភាពចាស់ទុំនៅក្នុងក្រុមគ្រួសាររបស់ប្អូនផ្ទាល់និងក្នុងក្រុមជំនុំរបស់ប្អូន។ (ហេ. ១៣:៧) ម្យ៉ាងទៀត ប្អូនមានគំរូដ៏ល្អឥតខ្ចោះ គឺលោកយេស៊ូគ្រិស្ត។ (១ពេ. ២:២១) កាលដែលប្អូនសិក្សាគំរូទាំងនេះយ៉ាងយកចិត្តទុកដាក់ សូមពិចារណាអំពីគុណសម្បត្តិដ៏ថ្លៃថ្លារបស់ពួកគេ។ (ហេ. ១២:១, ២) ក្រោយមក សូមសម្រេចចិត្តអំពីរបៀបដែលប្អូននឹងយកតម្រាប់បុរសទាំងនោះ។
៥. តើប្អូនអាចបណ្ដុះសមត្ថភាពរិះគិតតាមរបៀបណា ហើយហេតុអ្វីនេះសំខាន់? (ចម្រៀងសរសើរព្រះ ១១៩:៩)
៥ ចូរបណ្ដុះនិង«ការពារសមត្ថភាពរិះគិត»។ (សុភ. ៣:២១) បុរសដែលមានសមត្ថភាពរិះគិតមិនឆាប់ប្រព្រឹត្ត តែគាត់គិតយ៉ាងដិតដល់មុនគាត់សម្រេចចិត្តធ្វើអ្វីមួយ។ ដូច្នេះ ចូរខំព្យាយាមរក្សាសមត្ថភាពនេះ។ ហេតុអ្វី? ពីព្រោះពិភពលោកនេះពោរពេញទៅដោយបុរសវ័យក្មេងដែលឲ្យទស្សនៈរបស់ខ្លួនដឹកនាំពួកគេ ឬចេះតែប្រព្រឹត្តតាមអារម្មណ៍។ (សុភ. ៧:៧; ២៩:១១) ប្រព័ន្ធផ្សាយព័ត៌មានក៏អាចមានឥទ្ធិពលយ៉ាងខ្លាំងទៅលើប្អូន។ ប៉ុន្តែ តើប្អូនអាចបណ្ដុះសមត្ថភាពរិះគិតយ៉ាងដូចម្ដេច? ជាដំបូង សូមចាប់ផ្ដើមដោយរៀនគោលការណ៍គម្ពីរ ហើយគិតពិចារណាថាហេតុអ្វីគោលការណ៍ទាំងនោះមានប្រយោជន៍។ រួចមក សូមប្រើគោលការណ៍ទាំងនោះដើម្បីជួយប្អូនឲ្យធ្វើការសម្រេចចិត្តដែលនាំឲ្យព្រះយេហូវ៉ាពេញចិត្ត។ (សូមអាន ចម្រៀងសរសើរព្រះ ១១៩:៩) បើប្អូនបណ្ដុះឲ្យមានសមត្ថភាពនេះ នោះនឹងជួយប្អូនឲ្យទៅជាបុរសគ្រិស្តសាសនិកដែលមានភាពចាស់ទុំ។ (សុភ. ២:១១, ១២; ហេ. ៥:១៤) សូមគិតពិចារណាអំពីរបៀបដែលសមត្ថភាពរិះគិតនឹងផ្ដល់ប្រយោជន៍ដល់ប្អូនក្នុងស្ថានភាពពីរយ៉ាងគឺ៖ (១) ការប្រព្រឹត្តចំពោះបងប្អូនស្រី និង(២) ការសម្រេចចិត្តអំពីអាការក្រៅរបស់ខ្លួន។
៦. តើសមត្ថភាពរិះគិតនឹងជួយប្អូនប្រុសវ័យក្មេងយ៉ាងដូចម្ដេចឲ្យបង្ហាញការគោរពចំពោះបងប្អូនស្រី?
៦ សមត្ថភាពរិះគិតនឹងជួយប្អូនឲ្យចេះបង្ហាញការគោរពចំពោះស្ត្រី។ គឺជារឿងធម្មតានិងសមត្រឹមត្រូវដែលប្អូនប្រុសវ័យក្មេងចាប់អារម្មណ៍បង្កើតទំនាក់ទំនងស្នេហាជាមួយប្អូនស្រីគ្រិស្តសាសនិក។ ប៉ុន្តែ បុរសវ័យក្មេងដែលមានសមត្ថភាពរិះគិតនឹងមិននិយាយ សរសេរ ឬធ្វើអ្វីដែលបង្ហាញថាគាត់ចង់ស្វែងយល់ចិត្តគ្នាជាមួយប្អូនស្រីណាម្នាក់បើគាត់គ្មានបំណងយកនាងធ្វើជាគូអនាគតឡើយ។ (១ធី. ៥:១, ២) បើគាត់ស្វែងយល់ចិត្តគ្នាជាមួយប្អូនស្រីណាម្នាក់ គាត់នឹងការពារកេរ្តិ៍ឈ្មោះល្អរបស់នាង ដោយមិននៅតែពីរនាក់នាង លុះត្រាតែបានសុំអ្នកណាម្នាក់ឲ្យទៅកំដរដើម្បីជួយមើលការខុសត្រូវ។—១កូ. ៦:១៨
៧. តើសមត្ថភាពរិះគិតនឹងជួយប្អូនប្រុសវ័យក្មេងយ៉ាងណាពេលគាត់ធ្វើការសម្រេចចិត្តស្ដីអំពីរបៀបស្លៀកពាក់និងសម្អិតសម្អាងខ្លួន?
៧ របៀបមួយទៀតដែលបុរសវ័យក្មេងបង្ហាញថាគាត់បានបណ្ដុះឲ្យមានសមត្ថភាពរិះគិត គឺដោយធ្វើការសម្រេចចិត្តល្អអំពីរបៀបស្លៀកពាក់និងសម្អិតសម្អាងខ្លួន។ ម៉ូដពេញនិយមភាគច្រើនបានត្រូវរចនាឡើងឬក៏លើកស្ទួយ ដោយមនុស្សដែលមិនគោរពព្រះយេហូវ៉ា ឬដោយមនុស្សដែលមានរបៀបរស់នៅប្រាសចាកសីលធម៌។ គំនិតដែលប្រាសចាកសីលធម៌របស់ពួកគេស្ដែងចេញតាមរយៈម៉ូដសម្លៀកបំពាក់ដែលរឹប ឬដែលឲ្យបុរសអាចមើលទៅដូចស្រី។ ពេលជ្រើសរើសអ្វីស្លៀកពាក់ បុរសវ័យក្មេងដែលកំពុងព្យាយាមឲ្យមានភាពចាស់ទុំនឹងឲ្យគោលការណ៍គម្ពីរដឹកនាំ ហើយធ្វើតាមគំរូល្អក្នុងក្រុមជំនុំ។ គាត់អាចសួរខ្លួនគាត់ថា ‹តើជម្រើសរបស់ខ្ញុំបង្ហាញថាខ្ញុំដឹងខុសត្រូវនិងគិតដល់អ្នកឯទៀតឬទេ? តើរបៀបដែលខ្ញុំស្លៀកពាក់ងាយឲ្យអ្នកឯទៀតជឿថាខ្ញុំជាអ្នកបម្រើព្រះឬទេ?›។ (១កូ. ១០:៣១-៣៣; ទីត. ២:៦) បុរសវ័យក្មេងដែលមានសមត្ថភាពរិះគិតមិនគ្រាន់តែនឹងទទួលការគោរពឲ្យតម្លៃពីបងប្អូនរួមជំនឿប៉ុណ្ណោះទេ ប៉ុន្តែគាត់ក៏មានតម្លៃចំពោះបិតារបស់គាត់នៅស្ថានសួគ៌ផងដែរ។
៨. តើបុរសវ័យក្មេងអាចរៀនឲ្យទៅជាបុគ្គលដែលអាចពឹងពាក់បានយ៉ាងដូចម្ដេច?
៨ ចូរធ្វើជាមនុស្សដែលពឹងពាក់បាន។ បុរសវ័យក្មេងដែលពឹងពាក់បាន បំពេញភារកិច្ចទាំងអស់របស់គាត់ដោយចិត្តខ្នះខ្នែង។ (លូក. ១៦:១០) សូមគិតអំពីគំរូដ៏ល្អឥតខ្ចោះរបស់លោកយេស៊ូ។ លោកមិនដែលធ្វេសប្រហែសឬមិនទទួលខុសត្រូវឡើយ។ ផ្ទុយទៅវិញ លោកបំពេញភារកិច្ចដែលព្រះយេហូវ៉ាបានផ្ដល់ឲ្យលោក ទោះជាភារកិច្ចនោះពិបាកក្ដី។ លោកស្រឡាញ់មនុស្ស ជាពិសេសពួកអ្នកកាន់តាមលោក ហើយលោកសុខចិត្តលះបង់ជីវិតដើម្បីពួកគេ។ (យ៉ូន. ១៣:១) ដោយយកតម្រាប់លោកយេស៊ូ សូមខំប្រឹងបំពេញភារកិច្ចណាក៏ដោយដែលប្អូនបានទទួល។ បើប្អូនមិនច្បាស់អំពីរបៀបធ្វើភារកិច្ចនោះទេ សូមមានចិត្តរាបទាបនិងសុំជំនួយពីបងប្រុសដែលមានភាពចាស់ទុំ។ សូមកុំព្យាយាមធ្វើលំៗឡើយ។ (រ៉ូម ១២:១១) ផ្ទុយទៅវិញ សូមបង្ហើយភារកិច្ចរបស់ប្អូន ដោយ«ធ្វើដើម្បីព្រះយេហូវ៉ា មិនមែនដើម្បីមនុស្សទេ»។ (កូឡ. ៣:២៣) ប្អូនមិនមែនជាមនុស្សល្អឥតខ្ចោះឡើយ ដូច្នេះសូមមានចិត្តសុភាព ហើយសារភាពកំហុសពេលប្អូនធ្វើខុស។—សុភ. ១១:២
ចូរបណ្ដុះជំនាញដែលមានប្រយោជន៍
៩. ហេតុអ្វីប្អូនប្រុសវ័យក្មេងត្រូវបណ្ដុះជំនាញដែលមានប្រយោជន៍?
៩ ដើម្បីទៅជាបុរសដែលមានភាពចាស់ទុំ ប្អូននឹងត្រូវបណ្ដុះជំនាញដែលមានប្រយោជន៍។ ជំនាញទាំងនេះនឹងជួយប្អូនឲ្យទទួលភារកិច្ចក្នុងក្រុមជំនុំ រកការងារដើម្បីផ្គត់ផ្គង់ខ្លួនឯងឬក្រុមគ្រួសារ ហើយមានទំនាក់ទំនងល្អជាមួយអ្នកឯទៀត។ សូមគិតអំពីជំនាញសំខាន់ចាំបាច់ទាំងនេះខ្លះ។
ការអាននិងការសរសេរឲ្យបានស្ទាត់នឹងផ្ដល់ប្រយោជន៍ដល់ប្អូននិងក្រុមជំនុំ (សូមមើលវគ្គ១០-១១)
១០-១១. តើការរៀនឲ្យចេះអាននិងសរសេរយ៉ាងស្ទាត់នឹងផ្ដល់ប្រយោជន៍យ៉ាងណាដល់ប្អូនប្រុសវ័យក្មេងផ្ទាល់និងក្រុមជំនុំរបស់គាត់? (ចម្រៀងសរសើរព្រះ ១:១-៣) (សូមមើលរូបភាពផងដែរ)
១០ ចូរអាននិងសរសេរឲ្យបានស្ទាត់។ គម្ពីរចែងថាបុរសជោគជ័យដែលសប្បាយរីករាយ ចំណាយពេលរាល់ថ្ងៃដើម្បីអាននិងរំពឹងគិតអំពីបណ្ដាំព្រះ។ (សូមអាន ចម្រៀងសរសើរព្រះ ១:១-៣) ដោយអានគម្ពីររាល់ថ្ងៃ គាត់នឹងស្គាល់របៀបគិតគូររបស់ព្រះយេហូវ៉ាដែលនឹងជួយគាត់ឲ្យគិតយ៉ាងច្បាស់និងវែកញែកយ៉ាងល្អ។ (សុភ. ១:៣, ៤) ក្រុមជំនុំត្រូវការបុរសបែបនេះ។ ហេតុអ្វី?
១១ បងប្អូនរបស់យើងត្រូវការជំនួយពីបុរសដែលអាចបង្រៀននិងឲ្យឱវាទពីគម្ពីរ។ (ទីត. ១:៩) បើប្អូនអាចអាននិងសរសេរយ៉ាងស្ទាត់ ប្អូននឹងអាចរៀបចំសុន្ទរកថានិងចម្លើយដែលមានប្រយោជន៍ដល់អ្នកឯទៀត ហើយពង្រឹងជំនឿពួកគេ។ ប្អូនក៏អាចកត់កំណត់ដែលមានប្រយោជន៍កាលដែលប្អូនសិក្សានិងកាលដែលប្អូនស្ដាប់សុន្ទរកថានៅកិច្ចប្រជុំក្រុមជំនុំ សន្និបាត និងមហាសន្និបាត។ កំណត់ទាំងនេះនឹងជួយប្អូនឲ្យពង្រឹងជំនឿរបស់ខ្លួន ហើយលើកទឹកចិត្តអ្នកឯទៀត។
១២. តើអ្វីនឹងជួយប្អូនឲ្យចេះប្រាស្រ័យទាក់ទងល្អ?
១២ ចូរចេះប្រាស្រ័យទាក់ទងល្អ។ បុរសគ្រិស្តសាសនិកត្រូវរៀនឲ្យចេះប្រាស្រ័យទាក់ទងឲ្យបានល្អ។ បុរសដែលចេះប្រាស្រ័យទាក់ទងល្អ ស្ដាប់និងយល់គំនិតព្រមទាំងអារម្មណ៍របស់អ្នកឯទៀត។ (សុភ. ២០:៥) គាត់អាចរៀនឲ្យចេះយល់អំពីអ្នកឯទៀតដោយស្ដាប់តុងសំឡេង មើលទឹកមុខនិងកាយវិការរបស់អ្នកនោះ។ ប្អូនមិនអាចរៀនឲ្យចេះធ្វើដូច្នេះដោយមិនចំណាយពេលជាមួយអ្នកឯទៀតឡើយ។ បើប្អូនតែងតែប្រើគ្រឿងអេឡិចត្រូនិកដើម្បីប្រាស្រ័យទាក់ទងគ្នាដូចជាអ៊ីមែលនិងសារជាដើម នេះអាចធ្វើឲ្យការប្រាស្រ័យទាក់ទងដោយផ្ទាល់របស់ប្អូនជាមួយអ្នកឯទៀតចុះខ្សោយ។ ដូច្នេះ សូមបង្កើតឱកាសដើម្បីនិយាយជាមួយអ្នកឯទៀតដោយផ្ទាល់។—២យ៉ូន. ១២
គឺជាការល្អឲ្យរៀនជំនាញមួយដែលនឹងជួយប្អូនឲ្យទទួលការងារ (សូមមើលវគ្គ១៣)
១៣. តើបុរសវ័យក្មេងត្រូវរៀនអ្វីទៀត? (ធីម៉ូថេទី១ ៥:៨) (សូមមើលរូបភាពផងដែរ)
១៣ ចូររៀនរកលុយដោយខ្លួនឯង។ បុរសគ្រិស្តសាសនិកដែលមានភាពចាស់ទុំត្រូវចេះផ្គត់ផ្គង់ខ្លួនឯងនិងក្រុមគ្រួសាររបស់គាត់។ (សូមអាន ធីម៉ូថេទី១ ៥:៨) ក្នុងប្រទេសខ្លះ ប្អូនប្រុសវ័យក្មេងប្រហែលជារៀនជំនាញការងារណាមួយពីឪពុករបស់គាត់ឬពីសាច់ញាតិឯទៀត។ រីឯនៅប្រទេសផ្សេង បុរសវ័យក្មេងប្រហែលជារៀនជំនាញមួយឬការងារផ្សេងទៀតពេលគាត់រៀននៅវិទ្យាល័យ។ ទោះជាយ៉ាងណាក៏ដោយ គឺជាការល្អឲ្យរៀនជំនាញមួយដែលនឹងជួយប្អូនឲ្យទទួលការងារ។ (សកម្ម. ១៨:២, ៣; ២០:៣៤; អេភ. ៤:២៨) ចូរមានកេរ្តិ៍ឈ្មោះជាអ្នកដែលខំប្រឹងធ្វើការនិងដែលជាប់នឹងកិច្ចការណាមួយរហូតដល់វាហើយរួចរាល់។ បើប្អូនធ្វើដូច្នេះ ប្អូននឹងទំនងជាងាយរកការងារនិងរក្សាការងារនោះ។ គុណសម្បត្តិនិងជំនាញដែលយើងបានពិចារណាក៏សំខាន់សម្រាប់គ្រិស្តសាសនិកដើម្បីគាត់អាចបំពេញតួនាទីនៅថ្ងៃខាងមុខ។ សូមយើងពិចារណាតួនាទីខ្លះ។
ចូរត្រៀមខ្លួនសម្រាប់តួនាទីខាងមុខ
១៤. តើប្អូនប្រុសវ័យក្មេងអាចត្រៀមខ្លួនដើម្បីទៅជាអ្នកបម្រើពេញពេលយ៉ាងដូចម្ដេច?
១៤ អ្នកបម្រើពេញពេល។ បុរសគ្រិស្តសាសនិកជាច្រើននាក់ដែលមានភាពចាស់ទុំ ចាប់ផ្ដើមកិច្ចបម្រើពេញពេលកាលដែលពួកគេនៅវ័យក្មេង។ ការត្រួសត្រាយជួយបុរសវ័យក្មេងឲ្យចេះសហការជាមួយមនុស្សដែលមានបុគ្គលិកលក្ខណៈខុសៗគ្នា។ នេះក៏ជួយគាត់ឲ្យចាយវាយដោយចេះគិត ហើយមិនចំណាយលើសពីចំណូលរបស់ខ្លួន។ (ភី. ៤:១១-១៣) របៀបល្អមួយដើម្បីចាប់ផ្ដើមកិច្ចបម្រើពេញពេលគឺដោយត្រួសត្រាយជំនួយ។ បងប្អូនជាច្រើននាក់បម្រើជាអ្នកត្រួសត្រាយជំនួយអស់មួយរយៈពេល ហើយនោះជួយពួកគេឲ្យត្រៀមខ្លួនដើម្បីចាប់ផ្ដើមត្រួសត្រាយពេញពេល។ ការត្រួសត្រាយប្រហែលជាបើកឱកាសឲ្យចូលរួមកិច្ចបម្រើពេញពេលផ្សេងទៀត រួមមានការធ្វើជាអ្នកបម្រើផ្នែកសាងសង់ឬសមាជិកបេតអែល។
១៥-១៦. តើតាមរបៀបណាប្អូនប្រុសវ័យក្មេងអាចមានគុណសម្បត្តិគ្រប់គ្រាន់ដើម្បីបម្រើក្នុងក្រុមជំនុំ?
១៥ ជំនួយការខាងកិច្ចបម្រើឬអ្នកចាស់ទុំ។ បុរសគ្រិស្តសាសនិកគួរមានគោលដៅបណ្ដុះគុណសម្បត្តិគ្រប់គ្រាន់ឲ្យទៅជាអ្នកចាស់ទុំដើម្បីបម្រើបងប្អូនក្នុងក្រុមជំនុំ។ គម្ពីរចែងថាបុរសដែលព្យាយាមឲ្យបានតួនាទីនេះ«ចង់បានកិច្ចការដ៏ល្អប្រសើរ»។ (១ធី. ៣:១) មុនបម្រើជាអ្នកចាស់ទុំ បងប្អូនប្រុសត្រូវមានគុណសម្បត្តិគ្រប់គ្រាន់ដើម្បីបម្រើជាជំនួយការខាងកិច្ចបម្រើ។ ជំនួយការខាងកិច្ចបម្រើជួយពួកអ្នកចាស់ទុំតាមរបៀបផ្សេងៗជាច្រើន។ ទាំងពួកអ្នកចាស់ទុំទាំងជំនួយការខាងកិច្ចបម្រើ បម្រើបងប្អូនដោយចិត្តរាបទាប និងចូលរួមយ៉ាងខ្នះខ្នែងក្នុងកិច្ចបម្រើផ្សាយ។ ប្អូនប្រុសវ័យក្មេងអាចមានគុណសម្បត្តិគ្រប់គ្រាន់ដើម្បីបម្រើជាជំនួយការខាងកិច្ចបម្រើ ទោះជាពួកគេមានអាយុជិត២០ឆ្នាំក្ដី។ ម្យ៉ាងទៀត ជំនួយការខាងកិច្ចបម្រើដែលមានគុណសម្បត្តិគ្រប់គ្រាន់ដែលមានអាយុ២០ឆ្នាំស្ដើង អាចទទួលការតែងតាំងជាអ្នកចាស់ទុំ។
១៦ គុណសម្បត្តិដែលសំខាន់ចាំបាច់សម្រាប់ជំនួយការខាងកិច្ចបម្រើនិងអ្នកចាស់ទុំបានត្រូវកត់ទុកក្នុងគម្ពីរ ហើយមានមូលដ្ឋានលើសេចក្ដីស្រឡាញ់ចំពោះព្រះយេហូវ៉ា ក្រុមគ្រួសារ និងក្រុមជំនុំរបស់ប្អូន។ (១ធី. ៣:១-១៣; ទីត. ១:៦-៩; ១ពេ. ៥:២, ៣) តើតាមរបៀបណាប្អូនអាចមានគុណសម្បត្តិគ្រប់គ្រាន់ដើម្បីសម្រេចគោលដៅនេះ? សូមព្យាយាមយល់អំពីគុណសម្បត្តិនីមួយៗ។ សូមអធិដ្ឋានសុំជំនួយពីព្រះយេហូវ៉ាដើម្បីមានគុណសម្បត្តិទាំងនេះ។c
ព្រះយេហូវ៉ាចង់ឲ្យប្ដីស្រឡាញ់ប្រពន្ធកូន ហើយផ្គត់ផ្គង់ពួកគេ យកចិត្តទុកដាក់ពួកគេខាងផ្លូវចិត្ត និងសំខាន់បំផុតខាងការគោរពប្រណិប័តន៍ព្រះ (សូមមើលវគ្គ១៧)
១៧. តើប្អូនប្រុសវ័យក្មេងអាចត្រៀមខ្លួនយ៉ាងដូចម្ដេចដើម្បីទៅជាប្ដីនិងប្រមុខគ្រួសារ? (សូមមើលរូបភាពផងដែរ)
១៧ ប្ដីនិងប្រមុខគ្រួសារ។ ដូចលោកយេស៊ូបានលើកឡើង បុរសគ្រិស្តសាសនិកខ្លះបន្តនៅលីវ។ (ម៉ាថ. ១៩:១២) ក៏ប៉ុន្តែ បើប្អូនសម្រេចចិត្តរៀបការ ប្អូននឹងមានតួនាទីថែមទៀតជាប្ដីនិងជាប្រមុខគ្រួសារ។ (១កូ. ១១:៣) ព្រះយេហូវ៉ាតម្រូវឲ្យប្ដីស្រឡាញ់ប្រពន្ធ ហើយបំពេញសេចក្ដីត្រូវការប្រចាំថ្ងៃរបស់នាង ធ្វើជាមិត្តល្អនឹងនាង ព្រមទាំងជួយនាងឲ្យរក្សាខ្លួននៅជិតស្និទ្ធនឹងព្រះយេហូវ៉ា។ (អេភ. ៥:២៨, ២៩) គុណសម្បត្តិនិងជំនាញដែលយើងទើបតែបានពិចារណាក្នុងអត្ថបទនេះដូចជាការបណ្ដុះឲ្យមានសមត្ថភាពរិះគិត ការគោរពស្ត្រី និងការធ្វើជាមនុស្សពឹងពាក់បាន នឹងជួយប្អូនទៅជាប្ដីល្អ។ ប្អូននឹងត្រៀមខ្លួនយ៉ាងល្អសម្រាប់តួនាទីជាប្ដីនិងជាប្រមុខគ្រួសារ។
១៨. តើប្អូនប្រុសវ័យក្មេងអាចត្រៀមខ្លួនទៅជាឪពុកយ៉ាងដូចម្ដេច?
១៨ ឪពុក។ ក្រោយពីប្អូនបានរៀបការ ប្អូនប្រហែលជានឹងទៅជាឪពុកគេ។ តើប្អូនអាចរៀនអ្វីពីព្រះយេហូវ៉ាអំពីការធ្វើជាឪពុកល្អ? មានមេរៀនជាច្រើន។ (អេភ. ៦:៤) ព្រះយេហូវ៉ាប្រាប់លោកយេស៊ូដែលជាបុត្ររបស់លោកដោយឥតលាក់លៀមថា លោកស្រឡាញ់និងពេញចិត្តបុត្រលោក។ (ម៉ាថ. ៣:១៧) បើថ្ងៃក្រោយប្អូនទៅជាឪពុក សូមធ្វើឲ្យប្រាកដថាប្អូនពង្រឹងទំនុកចិត្តកូនរបស់ប្អូនជារឿយៗថាប្អូនស្រឡាញ់ពួកគេ។ សូមសរសើរពួកគេជាញឹកញាប់ចំពោះអ្វីល្អដែលពួកគេធ្វើ។ ឪពុកដែលធ្វើតាមគំរូរបស់ព្រះយេហូវ៉ាជួយកូនរបស់ពួកគេឲ្យទៅជាបុរសស្ត្រីគ្រិស្តសាសនិកដែលមានភាពចាស់ទុំ។ ប្អូនអាចត្រៀមខ្លួនឥឡូវសម្រាប់តួនាទីនេះ ដោយស្រឡាញ់សមាជិកក្រុមគ្រួសាររបស់ប្អូននិងអ្នកឯទៀតក្នុងក្រុមជំនុំ ព្រមទាំងដោយយកចិត្តទុកដាក់ចំពោះពួកគេ ហើយដោយរៀនប្រាប់ពួកគេថាប្អូនស្រឡាញ់ពួកគេនិងថាពួកគេមានតម្លៃចំពោះប្អូន។ (យ៉ូន. ១៥:៩) នេះនឹងជួយប្អូនឲ្យបំពេញតួនាទីដែលប្អូនប្រហែលជានឹងមាននៅថ្ងៃខាងមុខដើម្បីធ្វើជាប្ដីនិងឪពុក។ ទម្រាំដល់ពេលនោះ ប្អូននឹងមានតម្លៃណាស់ចំពោះព្រះយេហូវ៉ា ក្រុមគ្រួសារ និងក្រុមជំនុំរបស់ប្អូន។
តើប្អូននឹងធ្វើអ្វីនៅឥឡូវនេះ?
បុរសវ័យក្មេងជាច្រើននាក់ដែលទទួលការបង្ហាត់បង្រៀនពីបទគម្ពីរនិងបានធ្វើតាមអ្វីដែលពួកគេរៀន បានទៅជាគ្រិស្តសាសនិកដែលមានភាពចាស់ទុំ (សូមមើលវគ្គ១៩-២០)
១៩-២០. តើអ្វីនឹងជួយប្អូនប្រុសវ័យក្មេងឲ្យទៅជាបុរសគ្រិស្តសាសនិកដែលមានភាពចាស់ទុំ? (សូមមើលរូបភាពនៅក្រប)
១៩ ប្អូនប្រុសវ័យក្មេងទាំងឡាយ ប្អូនត្រូវខំប្រឹងព្យាយាមដើម្បីទៅជាបុរសគ្រិស្តសាសនិកដែលមានភាពចាស់ទុំ។ ប្អូនត្រូវជ្រើសរើសគំរូល្អដើម្បីយកតម្រាប់ បណ្ដុះសមត្ថភាពរិះគិត ធ្វើជាមនុស្សដែលអាចពឹងពាក់បាន បណ្ដុះបណ្ដាលជំនាញដែលមានប្រយោជន៍សម្រាប់ជីវិតប្អូន ហើយត្រៀមខ្លួនសម្រាប់តួនាទីនៅថ្ងៃក្រោយ។
២០ ពេលប្អូនគិតអំពីអ្វីទាំងអស់ដែលប្អូនត្រូវធ្វើនៅថ្ងៃខាងមុខ ប្អូនប្រហែលជាមានអារម្មណ៍ថានោះគឺពិបាកពេក។ ប៉ុន្តែ ប្អូនអាចធ្វើបាន! សូមចាំថា ព្រះយេហូវ៉ាពិតជាចង់ជួយប្អូន។ (អេ. ៤១:១០, ១៣) បងប្អូនក្នុងក្រុមជំនុំនឹងជួយប្អូនដែរ។ ពេលប្អូនទៅជាបុរសដែលព្រះយេហូវ៉ាចង់ឲ្យប្អូនក្លាយទៅជា ជីវិតរបស់ប្អូននឹងអរសប្បាយ ហើយស្កប់ចិត្ត។ ប្អូនប្រុសវ័យក្មេងទាំងឡាយ យើងស្រឡាញ់ប្អូន! សូមឲ្យព្រះយេហូវ៉ាផ្ដល់ពរជាបរិបូរដល់ប្អូន កាលដែលប្អូនខំប្រឹងនៅឥឡូវនេះដើម្បីទៅជាបុរសគ្រិស្តសាសនិកដែលមានភាពចាស់ទុំ។—សុភ. ២២:៤
ចម្រៀងលេខ៦៥ ឈានទៅមុខ!
a ក្រុមជំនុំគ្រិស្តសាសនិកត្រូវការបុរសដែលមានភាពចាស់ទុំ។ ក្នុងអត្ថបទនេះ យើងនឹងពិចារណាអំពីរបៀបដែលប្អូនៗវ័យក្មេងអាចទៅជាបុរសគ្រិស្តសាសនិកដែលមានភាពចាស់ទុំ។
b សូមមើល«ការពន្យល់ពាក្យ»ក្នុងអត្ថបទមុន។
c សូមមើលសៀវភៅអង្គការមួយដើម្បីធ្វើតាមបំណងប្រាថ្នាព្រះយេហូវ៉ា ជំ.៥-៦។