អត្ថបទសិក្សា ៤៦
ចម្រៀងលេខ៤៩ ធ្វើឲ្យព្រះយេហូវ៉ាមានចិត្តត្រេកអរ
បងប្អូនប្រុស តើអ្នកកំពុងព្យាយាមឲ្យបានមុខងារជាជំនួយការខាងកិច្ចបម្រើឬទេ?
«ការឲ្យគេ នោះមានសុភមង្គលច្រើនជាងការទទួល»។—សកម្ម. ២០:៣៥
ចំណុចផ្ដោត
ដើម្បីលើកទឹកចិត្តបងប្អូនប្រុសដែលទទួលការជ្រមុជទឹកហើយ ឲ្យព្យាយាមមានគុណសម្បត្តិគ្រប់គ្រាន់បម្រើជាជំនួយការខាងកិច្ចបម្រើ។
១. តើសាវ័កប៉ូលមានអារម្មណ៍យ៉ាងណាចំពោះជំនួយការខាងកិច្ចបម្រើ?
ជំនួយការខាងកិច្ចបម្រើធ្វើកិច្ចការសំខាន់នៅក្នុងក្រុមជំនុំ។ ម្ល៉ោះហើយ សាវ័កប៉ូលបានឲ្យតម្លៃចំពោះបុរសស្មោះត្រង់ទាំងនេះ។ ជាឧទាហរណ៍ ពេលប៉ូលសរសេរសំបុត្រទៅកាន់គ្រិស្តសាសនិកនៅក្រុងភីលីព គាត់ផ្ដាំសួរសុខទុក្ខជាពិសេសដល់អ្នកចាស់ទុំនិងជំនួយការខាងកិច្ចបម្រើ។—ភី. ១:១
២. ពេលបងលូអ៊ីសបានត្រូវតែងតាំងជាជំនួយការខាងកិច្ចបម្រើ តើគាត់មានអារម្មណ៍យ៉ាងណា?
២ បងប្អូនជាច្រើននាក់សប្បាយចិត្តជាខ្លាំង ដោយសារបម្រើជាជំនួយការខាងកិច្ចបម្រើ មិនថាពួកគាត់ក្មេងឬចាស់ទេ។ ជាឧទាហរណ៍ ប្អូនប្រុសឈ្មោះដេវ៉ាន បានត្រូវតែងតាំងជាជំនួយការខាងកិច្ចបម្រើនៅអាយុ១៨ឆ្នាំ។ រីឯបងប្រុសលូអ៊ីស គាត់បានត្រូវតែងតាំងជាជំនួយការខាងកិច្ចបម្រើនៅអាយុជាង៥០ឆ្នាំ។ តើបងលូអ៊ីសមានអារម្មណ៍យ៉ាងណា? គាត់និយាយថា៖ «ខ្ញុំសប្បាយចិត្តណាស់ដែលខ្ញុំមានឯកសិទ្ធិធ្វើជាជំនួយការខាងកិច្ចបម្រើ ជាពិសេសពេលខ្ញុំឃើញបងប្អូនបង្ហាញសេចក្ដីស្រឡាញ់ចំពោះខ្ញុំ នោះជំរុញចិត្តខ្ញុំឲ្យចង់បង្ហាញសេចក្ដីស្រឡាញ់ចំពោះពួកគាត់វិញ!»។ ជំនួយការខាងកិច្ចបម្រើជាច្រើននាក់ក៏មានអារម្មណ៍ដូច្នេះដែរ។
៣. តើយើងនឹងពិចារណាសំណួរអ្វីខ្លះ?
៣ បើអ្នកបានទទួលការជ្រមុជទឹករួចហើយ តែមិនទាន់ទៅជាជំនួយការខាងកិច្ចបម្រើទេ តើអ្នកចង់មានគោលដៅដូចនោះឬទេ? តើអ្វីអាចជំរុញចិត្តអ្នកឲ្យធ្វើដូច្នោះ? តើអ្នកត្រូវមានគុណសម្បត្តិអ្វីខ្លះដើម្បីទៅជាជំនួយការខាងកិច្ចបម្រើ? ក្នុងអត្ថបទនេះ យើងនឹងពិចារណាចម្លើយចំពោះសំណួរទាំងនេះ។ ប៉ុន្តែជាដំបូង សូមយើងពិនិត្យមើលថា តើជំនួយការខាងកិច្ចបម្រើធ្វើអ្វីខ្លះ?
តើជំនួយការខាងកិច្ចបម្រើធ្វើកិច្ចការអ្វីខ្លះ?
៤. តើជំនួយការខាងកិច្ចបម្រើធ្វើកិច្ចការអ្វីខ្លះ? (សូមមើលរូបភាពផងដែរ)
៤ ពេលបងប្អូនប្រុសទទួលការជ្រមុជទឹក ហើយមានគុណសម្បត្តិគ្រប់គ្រាន់ នោះគាត់នឹងត្រូវតែងតាំងជាជំនួយការខាងកិច្ចបម្រើក្រោមការដឹកនាំរបស់ឫទ្ធានុភាពបរិសុទ្ធ។ ដូច្នេះ តើជំនួយការខាងកិច្ចបម្រើធ្វើកិច្ចការអ្វីខ្លះ? ពួកគាត់ជួយអ្នកចាស់ទុំធ្វើកិច្ចការផ្សេងៗក្នុងក្រុមជំនុំដូចជា ជួយរៀបចំផែនទី ជួយរៀបចំសៀវភៅសម្រាប់អ្នកផ្សព្វផ្សាយ ជួយសម្អាត ជួយថែទាំសាលប្រជុំ ធ្វើជាឆ្មាំ ធ្វើខាងប្រព័ន្ធសំឡេង និងចាក់វីដេអូក្នុងអំឡុងកិច្ចប្រជុំជាដើម។ យើងទទួលប្រយោជន៍ខ្លាំងណាស់ពីកិច្ចការដ៏ច្រើនរបស់ជំនួយការខាងកិច្ចបម្រើ។ ប៉ុន្តែអ្វីដែលសំខាន់បំផុត ជំនួយការខាងកិច្ចបម្រើត្រូវស្រឡាញ់ព្រះយេហូវ៉ា និងត្រូវរស់នៅស្របតាមខ្នាតតម្រារបស់លោក។ មិនត្រឹមតែប៉ុណ្ណោះ ពួកគាត់ក៏ត្រូវស្រឡាញ់បងប្អូនយ៉ាងខ្លាំងដែរ។ (ម៉ាថ. ២២:៣៧-៣៩) តើបងប្អូនប្រុសត្រូវធ្វើអ្វីខ្លះដើម្បីទៅជាជំនួយការខាងកិច្ចបម្រើ?
ជំនួយការខាងកិច្ចបម្រើធ្វើតាមគំរូលោកយេស៊ូ ដោយធ្វើកិច្ចការផ្សេងៗអស់ពីសមត្ថភាពដើម្បីបម្រើអ្នកឯទៀត (សូមមើលវគ្គ៤)
៥. ដើម្បីបានមុខងារជាជំនួយការខាងកិច្ចបម្រើ តើបងប្អូនប្រុសត្រូវធ្វើអ្វី?
៥ គម្ពីរប្រាប់អំពីតម្រូវការផ្សេងៗដើម្បីទៅជាជំនួយការខាងកិច្ចបម្រើ។ (១ធី. ៣:៨-១០, ១២, ១៣) ដូច្នេះ បើអ្នកចង់បានមុខងារនេះ សូមពិចារណាអំពីតម្រូវការទាំងនោះ បន្ទាប់មកសូមខំប្រឹងធ្វើតាម។ ប៉ុន្តែ ជាដំបូងសូមគិតអំពីមូលហេតុដែលអ្នកចង់ទៅជាជំនួយការខាងកិច្ចបម្រើ។
ហេតុអ្វីអ្នកចង់ធ្វើជាជំនួយការខាងកិច្ចបម្រើ?
៦. តើអ្វីជំរុញចិត្តអ្នកឲ្យចង់បម្រើបងប្អូន? (ម៉ាថាយ ២០:២៨; សូមមើលរូបភាពផងដែរ)
៦ លោកយេស៊ូជាគំរូល្អបំផុត ពីព្រោះលោកធ្វើអ្វីៗទាំងអស់ដោយសារលោកស្រឡាញ់បិតានិងមនុស្ស។ សេចក្ដីស្រឡាញ់ជំរុញចិត្តលោកឲ្យខំព្យាយាមធ្វើកិច្ចការផ្សេងៗ សូម្បីតែកិច្ចការដែលអ្នកឯទៀតមិនសូវឲ្យតម្លៃ។ (សូមអាន ម៉ាថាយ ២០:២៨; យ៉ូន. ១៣:៥, ១៤, ១៥) ស្រដៀងគ្នាដែរ បើអ្នកធ្វើកិច្ចការផ្សេងៗដោយផុសចេញពីសេចក្ដីស្រឡាញ់ នោះព្រះយេហូវ៉ានឹងឲ្យពរអ្នក ហើយជួយអ្នកឲ្យមានគុណសម្បត្តិគ្រប់គ្រាន់ទៅជាជំនួយការខាងកិច្ចបម្រើ។—១កូ. ១៦:១៤; ១ពេ. ៥:៥
លោកយេស៊ូបានទុកគំរូដោយបង្រៀនពួកសាវ័កឲ្យបម្រើអ្នកឯទៀតដោយចិត្តរាបទាប ជាជាងស្វែងរកឋានៈឬមុខមាត់ (សូមមើលវគ្គ៦)
៧. ហេតុអ្វីបងប្អូនប្រុសធ្វើកិច្ចការណាមួយមិនមែនដោយសារចង់បានមុខមាត់?
៧ មនុស្សក្នុងពិភពលោកធ្វើកិច្ចការណាមួយច្រើនតែដើម្បីឲ្យគេកោតសរសើរខ្លួន តែរាស្ត្ររបស់ព្រះយេហូវ៉ាមិនមែនដូច្នេះទេ។ ដូចលោកយេស៊ូដែរ ពួកគេធ្វើកិច្ចការណាមួយដោយសារសេចក្ដីស្រឡាញ់ មិនមែនដោយសារចង់បានមុខមាត់ តួនាទី ឬអំណាចដើម្បីគ្រប់គ្រងលើបងប្អូនឯទៀតឡើយ។ ឧបមាថា បើបុគ្គលដែលមានមហិច្ឆតាបានត្រូវតែងតាំងជាជំនួយការខាងកិច្ចបម្រើ នោះគាត់ទំនងជាចង់ធ្វើតែកិច្ចការដែលលេចធ្លោ ឬកិច្ចការដែលផ្ដល់ប្រយោជន៍ដល់ខ្លួន ជាជាងដល់ចៀមដ៏មានតម្លៃរបស់ព្រះយេហូវ៉ា។ ដូច្នេះ គាត់ប្រហែលជាមិនចង់ធ្វើកិច្ចការដែលមិនសូវលេចមុខលេចមាត់ទេ ហើយចាត់ទុកថាកិច្ចការនោះមិនសមនឹងគាត់។ (យ៉ូន. ១០:១២) ព្រះយេហូវ៉ានឹងមិនឲ្យពរដល់ការខំប្រឹងប្រែងរបស់បុគ្គលបែបនោះឡើយ។—១កូ. ១០:២៤, ៣៣; ១៣:៤, ៥
៨. តើលោកយេស៊ូបានឲ្យឱវាទអ្វីដល់សាវ័ករបស់លោក?
៨ ជួនកាលសូម្បីតែមិត្តជិតស្និទ្ធរបស់លោកយេស៊ូ ក៏ចង់បានឯកសិទ្ធិដោយបំណងចិត្តមិនត្រឹមត្រូវដែរ។ ជាឧទាហរណ៍ យ៉ាកុបនិងយ៉ូហានដែលជាសាវ័ករបស់លោក បានសុំលោកឲ្យផ្ដល់តួនាទីពិសេសក្នុងរាជាណាចក្រដល់ពួកគាត់។ ពេលឮដូច្នេះ លោកយេស៊ូមិនបានសរសើរពួកគាត់ទេ។ ផ្ទុយទៅវិញ លោកបានឆ្លៀតយកឱកាសនោះដើម្បីឲ្យឱវាទដល់សាវ័កទាំង១២នាក់ថា៖ «អ្នកណាដែលចង់ធ្វើជាអ្នកធំក្នុងចំណោមអ្នករាល់គ្នា អ្នកនោះត្រូវបម្រើអ្នករាល់គ្នា ហើយអ្នកណាដែលចង់ធ្វើជាអ្នកនាំមុខក្នុងចំណោមអ្នករាល់គ្នា អ្នកនោះត្រូវបម្រើអ្នកឯទៀតវិញ»។ (ម៉ាក. ១០:៣៥-៣៧, ៤៣, ៤៤) ដូច្នេះ បុគ្គលដែលមានបំណងចិត្តត្រឹមត្រូវ ពោលគឺចង់បម្រើបងប្អូនឯទៀត គាត់នឹងខំព្យាយាមជួយក្រុមជំនុំតាមរបៀបជាច្រើន។—១ថែ. ២:៨
តើអ្វីអាចជំរុញចិត្តអ្នកឲ្យកាន់តែចង់បម្រើបងប្អូន?
៩. តើអ្វីអាចជំរុញចិត្តអ្នកឲ្យកាន់តែចង់បម្រើបងប្អូន?
៩ យើងដឹងថាអ្នកស្រឡាញ់ព្រះយេហូវ៉ានិងចង់បម្រើបងប្អូនឯទៀត។ ប៉ុន្តែ ចុះយ៉ាងណាបើអ្នកមិនសូវចង់ទទួលភារកិច្ចថែមទៀតដើម្បីទៅជាជំនួយការខាងកិច្ចបម្រើ? តើអ្វីអាចជួយអ្នកឲ្យមានសន្ទុះចិត្តខ្លាំងជាងមុន? សូមគិតអំពីអំណរដែលមកពីការបម្រើបងប្អូន។ តើលោកយេស៊ូបានមានប្រសាសន៍យ៉ាងណាអំពីរឿងនេះ? លោកថា៖ «ការឲ្យគេ នោះមានសុភមង្គលច្រើនជាងការទទួល»។ (សកម្ម. ២០:៣៥) លោកមិនគ្រាន់និយាយតែមាត់ប៉ុណ្ណោះទេ តែលោកក៏ធ្វើដូច្នេះដែរ។ លោកមានអំណរជាខ្លាំងដែលមកពីការបម្រើអ្នកឯទៀត។ អ្នកក៏អាចទទួលអំណរដូចលោកដែរ!
១០. តើលោកយេស៊ូបានធ្វើអ្វីដែលបង្ហាញថាលោកសប្បាយចិត្តជួយអ្នកឯទៀត? (ម៉ាកុស ៦:៣១-៣៤)
១០ សូមស្រមៃគិតថា លោកយេស៊ូសប្បាយខ្លាំងយ៉ាងណាពេលបម្រើអ្នកឯទៀត។ (សូមអាន ម៉ាកុស ៦:៣១-៣៤) ជាឧទាហរណ៍ នៅពេលមួយលោកយេស៊ូនិងពួកសាវ័ករបស់លោកអស់កម្លាំងជាខ្លាំង បានជាពួកគាត់ទៅរកកន្លែងឆ្ងាយពីគេដើម្បីសម្រាក។ ប៉ុន្តែ ពេលទៅដល់ទីនោះ ពួកគាត់ឃើញបណ្ដាជនមួយក្រុមធំកំពុងរង់ចាំដើម្បីទទួលការបង្រៀនពីលោកយេស៊ូ។ ពេលនោះលោកអាចបដិសេធបង្រៀនពួកគេ ដោយសារលោកនិងពួកសាវ័ក«គ្មានពេលទំនេរសោះ សូម្បីតែរកពេលបរិភោគក៏មិនបានផង»។ ឬក៏លោកគ្រាន់តែបង្រៀនពួកគេមួយចំណុចឬពីរចំណុចក៏បានដែរ។ ប៉ុន្តែ ដោយសារលោកស្រឡាញ់ពួកគេ លោក«ចាប់ផ្ដើមបង្រៀនពួកគេអំពីអ្វីៗជាច្រើន» ហើយលោកបន្តបង្រៀនពួកគេរហូតដល់«ថ្ងៃកាន់តែជ្រេទៅ»។ (ម៉ាក. ៦:៣៥) លោកធ្វើដូច្នេះ មិនមែនដោយសារលោកត្រូវតែធ្វើទេ ប៉ុន្តែដោយសារលោក«មានចិត្តក្ដួលអាណិតពួកគេ»។ លោកចង់បង្រៀនពួកគេ ព្រោះលោកស្រឡាញ់ពួកគេ។ ពេលលោកធ្វើអ្វីដើម្បីជាប្រយោជន៍អ្នកឯទៀត លោកមានអំណរក្រៃលែង។
១១. លោកយេស៊ូមិនគ្រាន់តែបង្រៀនប៉ុណ្ណោះទេ តើលោកបានធ្វើអ្វីទៀត? (សូមមើលរូបភាពផងដែរ)
១១ លោកយេស៊ូមិនគ្រាន់តែបង្រៀនប៉ុណ្ណោះទេ តែលោកក៏បំពេញសេចក្ដីត្រូវការខាងរូបកាយរបស់ពួកគេដែរ។ ដោយអព្ភូតហេតុ លោកបានធ្វើឲ្យមានអាហារ រួចឲ្យពួកអ្នកកាន់តាមជាអ្នកចែក។ (ម៉ាក. ៦:៤១) ពេលលោកធ្វើដូច្នេះ លោកកំពុងបង្រៀនពួកអ្នកកាន់តាមអំពីរបៀបបម្រើអ្នកឯទៀត។ លោកក៏បង្ហាញដែរថាកិច្ចការនោះគឺសំខាន់។ នៅសព្វថ្ងៃនេះ ជំនួយការខាងកិច្ចបម្រើច្រើនតែធ្វើកិច្ចការដែលបម្រើអ្នកឯទៀត។ សូមស្រមៃគិតថា ពួកសាវ័កសប្បាយចិត្តខ្លាំងប៉ុនណាដែលបានរួមចំណែកជាមួយលោកយេស៊ូក្នុងការចែកអាហារដល់បណ្ដាជន រហូតដល់«គ្រប់គ្នាបានបរិភោគឆ្អែត»។ (ម៉ាក. ៦:៤២) នេះគ្រាន់តែជាឧទាហរណ៍មួយដែលបង្ហាញថា លោកយេស៊ូគិតប្រយោជន៍អ្នកឯទៀតច្រើនជាងខ្លួនលោក។ តាមពិត លោកបានបម្រើអ្នកឯទៀតពេញមួយជីវិតរបស់លោក។ (ម៉ាថ. ៤:២៣; ៨:១៦) ពេលដែលលោកបង្រៀននិងបំពេញសេចក្ដីត្រូវការរបស់អ្នកឯទៀត នោះលោកមានអំណរនិងស្កប់ចិត្តជាខ្លាំង។ អ្នកក៏នឹងមានអំណរជាខ្លាំងដែរ បើអ្នកព្យាយាមលះបង់ប្រយោជន៍ខ្លួនដើម្បីឲ្យបានមុខងារជាជំនួយការខាងកិច្ចបម្រើ។
ពេលអ្នកស្រឡាញ់ព្រះយេហូវ៉ាហើយចង់បម្រើអ្នកឯទៀត នោះអ្នកនឹងព្យាយាមអស់ពីសមត្ថភាពដើម្បីជួយបងប្អូនរួមជំនឿ (សូមមើលវគ្គ១១)a
១២. ហេតុអ្វីអ្នកមិនគួរគិតថាអ្នកគ្មានសមត្ថភាពជួយក្រុមជំនុំ?
១២ បើអ្នកមានអារម្មណ៍ថាខ្លួនគ្មានសមត្ថភាពណាមួយទេ កុំធ្លាក់ទឹកចិត្តឡើយ។ ហេតុអ្វី? ដោយសារអ្នកមុខជាមានគុណសម្បត្តិដែលអាចជួយក្រុមជំនុំបាន។ ដូច្នេះ សូមអធិដ្ឋាន ហើយគិតពិចារណាអំពីពាក្យសម្ដីរបស់ប៉ូលនៅកូរិនថូសទី១ ១២:១២-៣០។ ពាក្យរបស់ប៉ូលបញ្ជាក់យ៉ាងច្បាស់ថា អ្នកក៏ដូចជាអ្នកបម្រើឯទៀតរបស់ព្រះយេហូវ៉ាដែរ គឺមានតម្លៃនិងតួនាទីសំខាន់នៅក្នុងក្រុមជំនុំ។ បើអ្នកមិនទាន់មានគុណសម្បត្តិគ្រប់គ្រាន់ធ្វើជាជំនួយការខាងកិច្ចបម្រើនៅឥឡូវនេះទេ សូមបន្តព្យាយាមទៀត។ សូមធ្វើអ្វីដែលអ្នកអាចធ្វើបានដើម្បីបម្រើព្រះយេហូវ៉ានិងជួយបងប្អូនរួមជំនឿ។ សូមជឿជាក់ថាអ្នកចាស់ទុំនឹងឲ្យភារកិច្ចដែលសមស្របតាមសមត្ថភាពរបស់អ្នក។—រ៉ូម ១២:៤-៨
១៣. គុណសម្បត្តិភាគច្រើនដែលជំនួយការខាងកិច្ចបម្រើគួរមាន តើអ្នកណាក៏គួរមានដែរ?
១៣ សូមគិតអំពីចំណុចនេះ គុណសម្បត្តិភាគច្រើនដែលជំនួយការខាងកិច្ចបម្រើគួរមាន ក៏ជាគុណសម្បត្តិដែលគ្រិស្តសាសនិកទាំងអស់គួរមានដែរ។ ជាឧទាហរណ៍ គ្រិស្តសាសនិកទាំងអស់គួរមានចំណងមិត្តភាពជិតស្និទ្ធជាមួយព្រះយេហូវ៉ា សប្បាយក្នុងការឲ្យអ្នកឯទៀត និងមានរបៀបរស់នៅដែលលោកពេញចិត្ត។ តាមមើលទៅអ្នកទំនងជាមានគុណសម្បត្តិទាំងនោះរួចហើយ។ ប៉ុន្តែ ដើម្បីទៅជាជំនួយការខាងកិច្ចបម្រើ តើអ្នកត្រូវមានគុណសម្បត្តិអ្វីថែមទៀត?
តើអ្នកត្រូវធ្វើអ្វីដើម្បីទៅជាជំនួយការខាងកិច្ចបម្រើ?
១៤. តើ«មនុស្សនឹងធឹង»ជាមនុស្សបែបណា? (ធីម៉ូថេទី១ ៣:៨-១០, ១២)
១៤ សូមយើងគិតអំពីគុណសម្បត្តិមួយចំនួនដែលបានរៀបរាប់នៅធីម៉ូថេទី១ ៣:៨-១០, ១២។ (សូមអាន) ជាឧទាហរណ៍ ជំនួយការខាងកិច្ចបម្រើត្រូវជា«មនុស្សនឹងធឹង»។ ពាក្យនេះក៏អាចត្រូវបកប្រែថា«មនុស្សដែលគួរឲ្យគោរព» ឬ«មនុស្សដែលមានភាពថ្លៃថ្នូរ»។ នេះមិនមានន័យថាអ្នកមិនចេះសើចសប្បាយឬនិយាយលេងនោះទេ។ (អទ. ៣:១, ៤) ក៏ប៉ុន្តែ នេះមានន័យថាអ្នកព្យាយាមបំពេញភារកិច្ចរបស់ខ្លួនដោយការទទួលខុសត្រូវខ្ពស់។ ដូច្នេះ បើអ្នកមានកេរ្តិ៍ឈ្មោះជាមនុស្សដែលគួរឲ្យទុកចិត្តនិងអាចពឹងពាក់បាន នោះបងប្អូនក្រុមជំនុំនឹងមានទំនុកចិត្តលើអ្នក។
១៥. តើការ«មិននិយាយសម្ដីពីរ»និង«មិនលោភលន់ដោយរកតែប្រយោជន៍ផ្ទាល់ខ្លួន»មានន័យយ៉ាងណា?
១៥ «មិននិយាយសម្ដីពីរ» មានន័យថាអ្នកជាមនុស្សស្មោះត្រង់ ទៀងត្រង់ និងគួរឲ្យទុកចិត្ត។ អ្នកធ្វើតាមពាក្យសម្ដីរបស់ខ្លួន ហើយមិននិយាយបោកបញ្ឆោតអ្នកឯទៀត។ (សុភ. ៣:៣២) «មិនលោភលន់ដោយរកតែប្រយោជន៍ផ្ទាល់ខ្លួន» មានន័យថាអ្នកទៀងត្រង់ក្នុងរឿងលុយកាក់ មិនថាក្នុងរបររកស៊ីឬការងារទេ។ អ្នកនឹងមិនកេងប្រយោជន៍ឬខ្សែលើបងប្អូនរួមជំនឿឡើយ។
១៦. (ក) តើការ«មិនពិសាស្រាច្រើន»មានន័យយ៉ាងណា? (ខ) តើការ«មានសមត្ថភាពវិនិច្ឆ័យដែលមិនផ្ដន្ទាទោស»មានន័យយ៉ាងណា?
១៦ «មិនពិសាស្រាច្រើន» មានន័យថាអ្នកប្រយ័ត្នមិនផឹកស្រាហួសប្រមាណ ឬមានកេរ្តិ៍ឈ្មោះថាជាមនុស្សលើកដាច់ៗ។ ចំណែកឯការ«មានសមត្ថភាពវិនិច្ឆ័យដែលមិនផ្ដន្ទាទោស» មានន័យថាអ្នករស់នៅស្របតាមខ្នាតតម្រារបស់ព្រះយេហូវ៉ា។ ដូច្នេះ អ្នកមានចំណងមិត្តភាពល្អជាមួយនឹងលោក ហើយនេះនាំឲ្យអ្នកមានសេចក្ដីសុខសាន្តនៅក្នុងចិត្ត ទោះជាអ្នកជាមនុស្សមិនល្អឥតខ្ចោះក៏ដោយ។
១៧. តើការ«ល្បងមើលអ្នកទាំងនោះឲ្យដឹងថាពួកគាត់សមនឹងទទួលឯកសិទ្ធិនេះឬក៏មិនសម»មានន័យអ្វី? (ធីម៉ូថេទី១ ៣:១០; សូមមើលរូបភាពផងដែរ)
១៧ «ល្បងមើលអ្នកទាំងនោះឲ្យដឹងថាពួកគាត់សមនឹងទទួលឯកសិទ្ធិនេះឬក៏មិនសម» មានន័យថាអ្នកបានបង្ហាញរួចហើយថាអ្នកជាមនុស្សដែលអាចទុកចិត្តបាន។ ដូច្នេះ ពេលអ្នកចាស់ទុំប្រគល់ភារកិច្ចឲ្យអ្នក សូមធ្វើតាមការណែនាំរបស់ពួកគាត់និងរបស់អង្គការយ៉ាងដិតដល់។ សូមព្យាយាមយល់ឲ្យច្បាស់ថាអ្នកត្រូវធ្វើអ្វីក្នុងភារកិច្ចនោះ ហើយពេលណាត្រូវបញ្ចប់វា។ ពេលអ្នកព្យាយាមបំពេញភារកិច្ចនីមួយៗដោយចិត្តខ្នះខ្នែង នោះបងប្អូនក្នុងក្រុមជំនុំនឹងកត់សម្គាល់ឃើញការរីកចម្រើននិងទំនួលខុសត្រូវរបស់អ្នក។ អ្នកចាស់ទុំទាំងឡាយ សូមកុំភ្លេចបង្ហាត់បង្រៀនបងប្អូនប្រុសដែលបានទទួលការជ្រមុជទឹកហើយនោះឡើយ។ (សូមអាន ធីម៉ូថេទី១ ៣:១០) តើក្នុងក្រុមជំនុំរបស់អ្នកមានបងប្អូនវ័យជំទង់ដែលបានទទួលការជ្រមុជទឹកហើយឬទេ? តើពួកគាត់មានទម្លាប់ល្អក្នុងការសិក្សាផ្ទាល់ខ្លួននិងក្នុងការរៀបចំកិច្ចប្រជុំឬទេ? តើគាត់លើកដៃឆ្លើយ និងចូលរួមកិច្ចផ្សព្វផ្សាយជាទៀងទាត់ឬទេ? បើមែន សូមឲ្យភារកិច្ចស្របតាមអាយុនិងស្ថានភាពរបស់ពួកគាត់។ តាមវិធីនេះ បងប្អូនប្រុសវ័យក្មេងអាចត្រូវ‹ល្បងមើលឲ្យដឹងថាសមនឹងទទួលឯកសិទ្ធិនេះឬក៏មិនសម›។ យ៉ាងនេះ ទោះជាពួកគាត់មិនទាន់ឈានដល់អាយុ២០ឆ្នាំក្ដី ពួកគាត់ទំនងជាមានគុណសម្បត្តិគ្រប់គ្រាន់ទៅជាជំនួយការខាងកិច្ចបម្រើ។
ពេលអ្នកចាស់ទុំប្រគល់ភារកិច្ចឲ្យបងប្អូនប្រុសដែលទទួលការជ្រមុជទឹកហើយ នោះគាត់អាចល្បងមើលថាពួកគាត់‹សមនឹងទទួលឯកសិទ្ធិឬក៏មិនសម› (សូមមើលវគ្គ១៧)
១៨. តើការ«គ្មានកន្លែងចាប់កំហុស»មានន័យយ៉ាងណា?
១៨ «គ្មានកន្លែងចាប់កំហុស» មានន័យថាគ្មានអ្នកណាម្នាក់មានហេតុអាចចោទប្រកាន់ថា អ្នកបានធ្វើខុសធ្ងន់ធ្ងរនោះទេ។ ប៉ុន្តែ ជួនកាលគ្រិស្តសាសនិកប្រហែលជាត្រូវគេចោទប្រកាន់មិនពិត។ សូម្បីតែលោកយេស៊ូ ក៏ត្រូវគេចោទប្រកាន់មិនពិតដែរ។ ហេតុនេះហើយបានជាលោកប្រាប់ទុកជាមុនថា ពួកអ្នកកាន់តាមលោកនឹងជួបរឿងបែបនេះ។ (យ៉ូន. ១៥:២០) ទោះជាយ៉ាងនោះក៏ដោយ បើអ្នករក្សាភាពស្អាតស្អំដូចលោកយេស៊ូ នោះអ្នកនឹងមានកេរ្តិ៍ឈ្មោះល្អក្នុងក្រុមជំនុំ។—ម៉ាថ. ១១:១៩
១៩. តើការ«មានប្រពន្ធតែមួយ»មានន័យយ៉ាងណា?
១៩ «មានប្រពន្ធតែមួយ» មានន័យថាបើអ្នករៀបការហើយ អ្នកត្រូវកាន់តាមខ្នាតតម្រាអាពាហ៍ពិពាហ៍ដែលព្រះយេហូវ៉ាបានរៀបចំតាំងពីដំបូង ពោលគឺរវាងបុរសម្នាក់និងស្ត្រីម្នាក់។ (ម៉ាថ. ១៩:៣-៩) បុរសដែលជាអ្នកកាន់តាមគ្រិស្ត មិនត្រូវប្រព្រឹត្តអំពើប្រាសចាកសីលធម៌ខាងផ្លូវភេទឡើយ។ (ហេ. ១៣:៤) បន្ថែមទៅទៀត អ្នកក៏មិនត្រូវបង្ហាញចំណាប់អារម្មណ៍ក្នុងន័យស្នេហាទៅលើស្ត្រីឯទៀតដែរ គឺអ្នកត្រូវស្មោះត្រង់ចំពោះប្រពន្ធរបស់អ្នក។—យ៉ូប ៣១:១
២០. តើមេគ្រួសារត្រូវធ្វើអ្វីខ្លះដើម្បីដឹកនាំពួកអ្នកផ្ទះរបស់ខ្លួន«យ៉ាងល្អប្រសើរ»?
២០ «ដឹកនាំកូននិងពួកអ្នកផ្ទះរបស់ខ្លួនយ៉ាងល្អប្រសើរ» មានន័យថាបើអ្នកជាមេគ្រួសារ អ្នកត្រូវបំពេញភារកិច្ចរបស់អ្នកឲ្យបានល្អបំផុត។ ជាឧទាហរណ៍ អ្នកត្រូវដឹកនាំការគោរពប្រណិប័តន៍ជាក្រុមគ្រួសារឲ្យបានទៀងទាត់ និងឧស្សាហ៍ផ្សព្វផ្សាយជាមួយប្រពន្ធកូនតាមដែលអាចធ្វើបាន។ ម្យ៉ាងទៀត អ្នកត្រូវជួយកូនឲ្យមានចំណងមិត្តភាពផ្ទាល់ខ្លួនជាមួយព្រះយេហូវ៉ា។ (អេភ. ៦:៤) សរុបទៅ បើបុរសណាម្នាក់អាចមើលថែក្រុមគ្រួសាររបស់ខ្លួនបានយ៉ាងល្អ បុរសនោះក៏អាចមើលថែក្រុមជំនុំបានយ៉ាងល្អដែរ។—សូមពិនិត្យបន្ថែម ធីម៉ូថេទី១ ៣:៥
២១. បើអ្នកមិនទាន់ទៅជាជំនួយការខាងកិច្ចបម្រើទេ តើអ្នកអាចធ្វើអ្វីខ្លះ?
២១ បងប្អូនប្រុសទាំងឡាយ បើអ្នកមិនទាន់ទៅជាជំនួយការខាងកិច្ចបម្រើទេ សូមអានអត្ថបទនេះយ៉ាងយកចិត្តទុកដាក់ ហើយអធិដ្ឋានអំពីរឿងនេះ។ សូមអ្នកសិក្សាគុណសម្បត្តិផ្សេងៗដើម្បីទៅជាជំនួយការខាងកិច្ចបម្រើ ហើយព្យាយាមបណ្ដុះគុណសម្បត្តិទាំងនោះ។ បន្ទាប់មក សូមគិតអំពីទំហំនៃក្ដីស្រឡាញ់ដែលអ្នកមានចំពោះព្រះយេហូវ៉ានិងបងប្អូនរួមជំនឿ។ ក្រោយមក សូមគិតអំពីមូលហេតុដែលជំរុញចិត្តអ្នកឲ្យកាន់តែចង់បម្រើបងប្អូន។ (១ពេ. ៤:៨, ១០) បើអ្នកព្យាយាមឲ្យបានមុខងារជាជំនួយការខាងកិច្ចបម្រើ នោះអ្នកនឹងមានអំណរកាន់តែខ្លាំងពីការបម្រើអ្នកឯទៀត។ សូមព្រះយេហូវ៉ាផ្ដល់ពរជាបរិបូរដល់អ្នក កាលដែលអ្នកខំព្យាយាមទៅជាជំនួយការខាងកិច្ចបម្រើ!—ភី. ២:១៣
ចម្រៀងលេខ១៧ ចូរបង្ហាញចិត្តមេត្តាដូចគ្រិស្ត
a ការពណ៌នាអំពីរូបភាព៖ នៅខាងឆ្វេង លោកយេស៊ូបម្រើពួកអ្នកកាន់តាមដោយចិត្តរាបទាប។ នៅខាងស្ដាំ ជំនួយការខាងកិច្ចបម្រើកំពុងជួយបងប្រុសវ័យចាស់ម្នាក់ក្នុងក្រុមជំនុំ។