មូលហេតុដែលសង្គ្រាមនិងជម្លោះហិង្សានៅតែមាន
គម្ពីរពន្យល់អំពីឫសគល់នៃសង្គ្រាមនិងជម្លោះហិង្សា និងមូលហេតុដែលបញ្ហាទាំងនេះនៅតែបន្តមាន។
ភាពខុសឆ្គង
ព្រះបានបង្កើតឪពុកម្ដាយដំបូងរបស់យើង គឺអាដាមនិងអេវ៉ាឲ្យមានភាពដូចលោក។ (ដើមកំណើត ១:២៧) នេះមានន័យថាពួកគេអាចបង្ហាញគុណសម្បត្តិដូចលោករួមបញ្ចូលការធ្វើឲ្យមានសន្តិភាព និងការបង្ហាញសេចក្ដីស្រឡាញ់។ (កូរិនថូសទី១ ១៤:៣៣; យ៉ូហានទី១ ៤:៨) ប៉ុន្តែ អាដាមនិងអេវ៉ាមិនបានស្ដាប់បង្គាប់ព្រះហើយប្រព្រឹត្តអំពើខុសឆ្គង។ ជាលទ្ធផល ភាពខុសឆ្គងនិងសេចក្ដីស្លាប់បានឆ្លងរាលដាលដល់យើងទាំងអស់គ្នា។ (រ៉ូម ៥:១២) ដោយសារយើងមានភាពខុសឆ្គង នោះនាំឲ្យយើងមានចិត្តគំនិតអាក្រក់ និងប្រព្រឹត្តអំពើហិង្សា។—ដើមកំណើត ៦:៥; ម៉ាកុស ៧:២១, ២២
រដ្ឋាភិបាលរបស់មនុស្ស
ព្រះមិនបានបង្កើតយើងឲ្យគ្រប់គ្រងលើខ្លួនឯងទេ។ គម្ពីរចែងថា៖ ‹មនុស្សគ្មានសមត្ថភាពតម្រង់ជំហានរបស់ខ្លួន›ទេ។ (យេរេមា ១០:២៣) នេះជាមូលហេតុដែលរដ្ឋាភិបាលរបស់មនុស្សមិនអាចបំបាត់ចោលសង្គ្រាមនិងជម្លោះហិង្សាបានឡើយ។
សាថាននិងពួកវិញ្ញាណកំណាចរបស់វា
គម្ពីរប្រាប់ថា៖ «ពិភពលោកទាំងមូលនៅក្រោមអំណាចរបស់មេកំណាច»។ (យ៉ូហានទី១ ៥:១៩) «មេកំណាច»នោះគឺសាថាន ហើយវាគឺជាឃាតករដ៏ឃោរឃៅ។ (យ៉ូហាន ៨:៤៤) វានិងពួកវិញ្ញាណកំណាចរបស់វាគឺជាអ្នកញុះញង់ឲ្យមានសង្គ្រាមនិងអំពើហិង្សា។—ការបើកបង្ហាញ ១២:៩, ១២
យើងមិនអាចបំបាត់ចោលឫសគល់នៃសង្គ្រាមនិងអំពើហិង្សាទេ មានតែព្រះប៉ុណ្ណោះដែលអាចធ្វើបាន។