សំណួរពីអ្នកអាន
អ្នកសរសេរសុភាសិត ៣០:១៨, ១៩និយាយថា៖ «ការប្រព្រឹត្តរបស់បុរសជាមួយនឹងស្ត្រីវ័យក្មេង»គឺ«ហួសពីសមត្ថភាពយល់ដឹង»។ តើគាត់ចង់មានន័យយ៉ាងណា?
ពាក្យទាំងនេះធ្វើឲ្យអ្នកខ្លះឆ្ងល់ រួមទាំងបណ្ឌិតគម្ពីរមួយចំនួនដែរ។ ខគម្ពីរនេះទាំងមូលនៅក្នុងសេចក្ដីបកប្រែពិភពលោកថ្មីចែងថា៖ «មានអ្វីបីយ៉ាងដែលហួសពីសមត្ថភាពយល់ដឹងរបស់ខ្ញុំ[ឬ«ដែលអស្ចារ្យពេក» កំ.ស.] ក៏មានដល់ទៅបួនផងដែលខ្ញុំមិនអាចយល់គឺ៖ ការហោះហើររបស់សត្វឥន្ទ្រីនៅលើមេឃ ការលូនវាររបស់សត្វពស់នៅលើផ្ទាំងថ្ម ការធ្វើដំណើររបស់សំពៅនៅមហាសមុទ្រ និងការប្រព្រឹត្តរបស់បុរសជាមួយនឹងស្ត្រីវ័យក្មេង»។—សុភ. ៣០:១៨, ១៩
ពីមុនយើងយល់ថា ពាក្យ«ការប្រព្រឹត្តរបស់បុរសជាមួយនឹងស្ត្រីវ័យក្មេង»សំដៅទៅលើអ្វីដែលអាក្រក់។ ហេតុអ្វី? ពីព្រោះខផ្សេងទៀតក្នុងជំពូកនេះ លើកឡើងអំពីអ្វីដែលអវិជ្ជមាន ដែលមិនពោលថា៖ «គ្រប់គ្រាន់!»ឡើយ។ (សុភ. ៣០:១៥, ១៦) ម្យ៉ាងទៀត នៅខ២០រៀបរាប់អំពី«ស្ត្រីផិតក្បត់»ដែលអះអាងថា គាត់មិនបានធ្វើអ្វីខុសទេ។ ដូច្នេះ យើងបានវែកញែកថា ដូចសត្វឥន្ទ្រីដែលហោះហើរនៅលើមេឃ សត្វពស់ដែលលូនវារនៅលើផ្ទាំងថ្ម ឬសំពៅនៅសម័យបុរាណដែលធ្វើដំណើរនៅលើមហាសមុទ្រដែលមិនបានបន្សល់ទុកនូវទីសំអាងដែលបង្ហាញថាវាធ្លាប់នៅទីនោះ នោះបុរសប្រហែលជាធ្វើអ្វីមួយដែលគ្មានអ្នកណាដឹង។ តាមការវែកញែកនោះយើងយល់ថា ពាក្យ«ការប្រព្រឹត្តរបស់បុរសជាមួយនឹងស្ត្រីវ័យក្មេង»សំដៅទៅលើអ្វីដែលអាក្រក់ ពោលគឺសំដៅទៅលើបុរសវ័យក្មេងដែលបោកបញ្ឆោតស្ត្រីវ័យក្មេងឲ្យរួមដំណេកជាមួយគាត់។
ប៉ុន្តែ មានហេតុឲ្យយើងយល់ថាខគម្ពីរនេះរៀបរាប់អំពីអ្វីដែលល្អវិញ។ អ្នកសរសេរខនេះគ្រាន់តែរៀបរាប់អំពីអ្វីមួយចំនួនដែលធ្វើឲ្យគាត់កោតស្ងើច និងនឹកអស្ចារ្យប៉ុណ្ណោះ។
ពាក្យដើមជាភាសាហេប្រឺក៏បង្ហាញដែរថា ខនេះចង់និយាយអំពីអ្វីដែលល្អ។ យោងទៅតាមឯកសារមួយ ពាក្យភាសាហេប្រឺដែលបានត្រូវបកប្រែថា«ហួសពីសមត្ថភាពយល់ដឹងរបស់ខ្ញុំ»នៅសុភាសិត ៣០:១៨ «បង្ហាញអំពីអ្វីដែលអស្ចារ្យឬថែមទាំងមើលទៅមិនអាចទៅរួច»(Theological Lexicon of the Old Testament)។
សាស្ត្រាចារ្យម្នាក់ឈ្មោះក្រូហ្វឺត ថយពីសកលវិទ្យាល័យហាវើដ នៅសហរដ្ឋអាម៉េរិកក៏សន្និដ្ឋានថា ខគម្ពីរនេះមិនបានរៀបរាប់អំពីអ្វីដែលអាក្រក់ទេ។ គាត់និយាយថា៖ «អ្នកសរសេរគម្ពីរព្យាយាមរៀបរាប់អំពីភាពអស្ចារ្យនៃអ្វីទាំងអស់នេះ»។
ដូច្នេះតាមមើលទៅ គឺសមហេតុសមផលឲ្យយើងយល់ថា ពាក្យដែលបានកត់ទុកនៅសុភាសិត ៣០:១៨, ១៩រៀបរាប់អំពីអ្វីដែលពិតជាអស្ចារ្យ ហើយថែមទាំងហួសពីសមត្ថភាពយល់ដឹងរបស់យើង។ ដូចអ្នកសរសេរគម្ពីរ យើងកោតស្ងើចអំពីរបៀបដែលសត្វឥន្ទ្រីអាចហោះហើរនៅលើមេឃ របៀបដែលសត្វពស់ធ្វើដំណើរយ៉ាងលឿននៅលើផ្ទាំងថ្ម ទោះជាវាមិនមានជើងក៏ដោយ របៀបដែលសំពៅដ៏ធ្ងន់ធ្វើដំណើរឆ្លងកាត់មហាសមុទ្រ ហើយរបៀបដែលបុរសវ័យក្មេងនិងស្ត្រីវ័យក្មេងអាចចាប់ចិត្តស្រឡាញ់គ្នានិងមានជីវិតដែលមានសុភមង្គល។