Mary_Ukraine/stock.adobe.com
ចូរចាំយាម!
ប្រជាជនកំពុងបាត់បង់ទំនុកចិត្តចំពោះអ្នកនយោបាយ តើគម្ពីរចែងយ៉ាងណា?
នៅឆ្នាំ២០២៤ នឹងមានការបោះឆ្នោតច្រើនជាងឆ្នាំណាៗទាំងអស់នៅទូទាំងពិភពលោក។ ប៉ុន្តែ ប្រជាជនជាច្រើនបានបាត់បង់ទំនុកចិត្តលើអ្នកនយោបាយ។
តាមការស្ទង់មតិរបស់វិទ្យាស្ថានស្រាវជ្រាវមួយ បានឃើញថាប្រជាជនភាគច្រើននៅសហរដ្ឋអាម៉េរិកមានទស្សនៈថា៖«ពួកអ្នកនយោបាយច្រើនតែបំពេញភារកិច្ចដើម្បីប្រយោជន៍ខ្លួនប៉ុណ្ណោះ» មិនមែនដោយសារចង់ជួយប្រជាជនទេ(Pew Research Center)។a ចុះថ្ងៃទី១៩ ខែកញ្ញា ឆ្នាំ២០២៣។
ឯពួកយុវវ័យវិញ ពួកគេក៏បាត់បង់ទំនុកចិត្តចំពោះអ្នកនយោបាយដែរ។
សារព័ត៌មានមួយរៀបរាប់ថា៖«ពួកយុវវ័យនៅសព្វថ្ងៃនេះខ្វល់អំពីការរកដំណោះស្រាយចំពោះបញ្ហាផ្សេងៗ ដែលតាមត្រូវគឺជាពួកអ្នកនយោបាយទេដែលគួរខ្វល់។ ប៉ុន្តែ តាមការស្ទង់មតិពីពួកយុវវ័យទាំងនេះ ពួកគេប្រាប់ថាពួកអ្នកនយោបាយមិនខំប្រឹងស្វែងរកដំណោះស្រាយទាល់តែសោះ»(The New York Times)។ ចុះថ្ងៃទី២៩ ខែមករា ឆ្នាំ២០២៤។
សារព័ត៌មានមួយរៀបរាប់ថា៖«ពួកយុវវ័យទុកចិត្តពួកអ្នកធ្វើមាតិកាយូធូប(YouTubers) ជាងទុកចិត្តពួកអ្នកនយោបាយ»(The Korea Times)។ ចុះថ្ងៃទី២២ ខែមករា ឆ្នាំ២០២៤។
តើយើងអាចទុកចិត្តពួកអ្នកនយោបាយថាពួកគេនឹងធ្វើឲ្យមានអនាគតប្រសើរជាងទេ? តើយើងអាចទុកចិត្តអ្នកណាបាន?
សូមប្រយ័ត្ននឹងបុគ្គលដែលអ្នកទុកចិត្ត
គឺជាការល្អដែលយើងប្រយ័ត្នចំពោះអ្នកដែលយើងទុកចិត្ត។ គម្ពីរចែងថា៖«មនុស្សឆោតជឿគ្រប់ពាក្យទាំងអស់ តែមនុស្សឈ្លាសវៃរមែងគិតពិចារណាជាមុនសិន»។—សុភាសិត ១៤:១៥
ដើម្បីស្វែងរកយោបល់ល្អៗដែលអាចជួយយើងឲ្យដឹងថាព័ត៌មានដែលយើងទទួលនោះត្រឹមត្រូវឬមិនត្រឹមត្រូវ សូមអានអត្ថបទដែលមានចំណងជើងថា«ចូរការពារខ្លួនពីព័ត៌មានមិនត្រឹមត្រូវ»។
មិនត្រឹមតែប៉ុណ្ណោះ សូម្បីតែអ្នកនយោបាយដ៏ស្មោះត្រង់បំផុតនិងមានចេតនាល្អក៏ដោយ ក៏ពួកគេនៅតែមានកម្រិតចំពោះអ្វីដែលពួកគេអាចធ្វើដែរ។ ហេតុនេះហើយបានជាគម្ពីរព្រមានថា៖
«កុំទុកចិត្តពួកមានឋានៈខ្ពស់ កុំទុកចិត្តមនុស្ស ព្រោះពួកគេមិនអាចជួយសង្គ្រោះបានឡើយ»។—ចម្រៀងសរសើរព្រះ ១៤៦:៣
អ្នកដឹកនាំមួយរូបដែលលោកអ្នកអាចទុកចិត្តបាន
គម្ពីរពន្យល់ថាព្រះបានតែងតាំងអ្នកដឹកនាំមួយរូបដែលមានសមត្ថភាពនិងគួរឲ្យទុកចិត្តបំផុតគឺលោកយេស៊ូគ្រិស្ត។ (លូកា ១:៣២, ៣៣) លោកយេស៊ូជាស្ដេចនៃរាជាណាចក្រព្រះដែលជារដ្ឋាភិបាលមួយ ហើយរដ្ឋាភិបាលនេះគ្រប់គ្រងពីស្ថានសួគ៌។—ម៉ាថាយ ៦:១០
សូមស្វែងយល់អំពីមូលហេតុដែលលោកអ្នកអាចទុកចិត្តលោកយេស៊ូនិងអ្វីដែលលោកនឹងធ្វើដើម្បីដោះស្រាយបញ្ហាដែលយើងជួបប្រទះ។ សូមមើលអត្ថបទដែលមានចំណងជើងថា«តើអ្នកណាជាស្ដេចនៃរាជាណាចក្ររបស់ព្រះ?» និង«តើរាជាណាចក្ររបស់ព្រះនឹងសម្រេចអ្វីខ្លះ?»។
a វិទ្យាស្ថានស្រាវជ្រាវនេះបានប្រាប់ថា៖«ប្រជាជនអាម៉េរិកមិនមានទស្សនៈល្អចំពោះនយោបាយក្នុងប្រទេសរបស់ពួកគេទេ»។ ចុះនៅខែកញ្ញា ឆ្នាំ២០២៣។