តើពិធីអាពាហ៍ពិពាហ៍របស់សាក្សីព្រះយេហូវ៉ាធ្វើឡើងយ៉ាងដូចម្ដេច?
ជាទូទៅ ពិធីរៀបការរបស់សាក្សីព្រះយេហូវ៉ាគឺសាមញ្ញ តែមានភាពថ្លៃថ្នូរ ហើយមានសុន្ទរកថាខ្លីមួយដែលមានមូលដ្ឋានក្នុងគម្ពីរ។ ជួនកាលក្រោយចប់ពិធីនោះ ក៏មានពិធីជប់លៀងទទួលភ្ញៀវដែលមានអាហារផងដែរ។a លោកយេស៊ូក៏ធ្លាប់ចូលរួមពិធីរៀបការដែរគឺនៅក្រុងកាណា ក្នុងអំឡុងដើមកិច្ចបម្រើរបស់លោក។—យ៉ូហាន ២:១-១១
តើក្នុងពិធីរៀបការរបស់សាក្សីព្រះយេហូវ៉ាគេធ្វើអ្វីខ្លះ?
តើភ្ញៀវត្រូវបាចអង្ករឬផ្កាទៅលើកូនកំលោះកូនក្រមុំឬទេ?
តើក្នុងពិធីរៀបការរបស់សាក្សីព្រះយេហូវ៉ាគេធ្វើអ្វីខ្លះ?
ក្នុងពិធីអាពាហ៍ពិពាហ៍នោះ មានសុន្ទរកថាមួយមានរយៈពេលប្រហែល៣០នាទី ដែលថ្លែងឡើងដោយអ្នកចាស់ទុំម្នាក់ដែលជាសាក្សីព្រះយេហូវ៉ា។ គាត់ថ្លែងដោយកក់ក្ដៅនិងគួរឲ្យលើកទឹកចិត្ត ដែលលើកបញ្ជាក់ពីដំបូន្មានពីគម្ពីរស្ដីអំពីជីវិតអាពាហ៍ពិពាហ៍ ដើម្បីជួយឲ្យគូស្វាមីភរិយាថ្មីថ្មោងនោះមានសេចក្ដីស្រឡាញ់និងសុភមង្គលជារៀងរហូត។—អេភេសូរ ៥:៣៣
ក្នុងប្រទេសជាច្រើន រដ្ឋាភិបាលអនុញ្ញាតឲ្យអ្នកចាស់ទុំសាក្សីព្រះយេហូវ៉ាខ្លះមានសិទ្ធិធ្វើសំបុត្រអាពាហ៍ពិពាហ៍ឲ្យគូស្វាមីភរិយាថ្មីថ្មោងបាន។ បើមានករណីនេះមែន នៅចុងសុន្ទរកថាអាពាហ៍ពិពាហ៍ គូស្វាមីភរិយានោះអាចស្បថចំពោះគ្នា។ រួចពួកគេពាក់ចិញ្ចៀនដល់គ្នាទៅវិញទៅមក។ បន្ទាប់មក អ្នកចាស់ទុំនោះប្រកាសថាពួកគេទាំងពីរនាក់ជាស្វាមីភរិយា។
នៅប្រទេសផ្សេងទៀត ច្បាប់តម្រូវឲ្យគូស្វាមីភរិយានោះទៅចុះសំបុត្រអាពាហ៍ពិពាហ៍នៅការិយាល័យរដ្ឋាភិបាល។ ពួកគេអាចចុះសំបុត្រនោះបន្តិចមុនសុន្ទរកថាពិធីរៀបការ។ បើប្ដីនិងប្រពន្ធមិនបានស្បថចំពោះគ្នានៅពេលធ្វើសំបុត្រអាពាហ៍ពិពាហ៍ទេ នោះពួកគេអាចស្បថមុនចប់សុន្ទរកថា។ បើពួកគេបានស្បថរួចហើយ ពួកគេអាចសម្រេចចិត្តស្បថម្ដងទៀតក៏បាន។ ក្រោយសុន្ទរកថានោះ មានការអធិដ្ឋានសុំព្រះឲ្យផ្ដល់ពរដល់គូស្វាមីភរិយាថ្មី។
តើពិធីនោះធ្វើនៅឯណា?
សាក្សីព្រះយេហូវ៉ាជាច្រើនបានសម្រេចចិត្តធ្វើពិធីរៀបការនៅសាលប្រជុំ បើសាលប្រជុំទំនេរ។b តែបើពួកគេមានពិធីពិសាអាហារក្រោយមក ពួកគេសម្រេចចិត្តធ្វើនៅកន្លែងផ្សេង។
តើអ្នកណាខ្លះអាចចូលរួម?
បើពិធីនោះធ្វើឡើងនៅសាលប្រជុំ តាមធម្មតាគ្រប់គ្នាអាចចូលរួមបាន មិនថាជាសាក្សីព្រះយេហូវ៉ាឬមិនមែនក៏ដោយ។ តែបើស្វាមីភរិយានោះមានពិធីពិសាអាហារ ពួកគេអាចសម្រេចចិត្តថានឹងអញ្ជើញអ្នកណាខ្លះឲ្យចូលរួម។
តើភ្ញៀវគួរស្លៀកពាក់បែបណា?
ថ្វីត្បិតតែនៅសាលប្រជុំមិនតម្រូវឲ្យស្លៀកសម្លៀកបំពាក់ពិសេសណាមួយក៏ពិតមែន តែសាក្សីព្រះយេហូវ៉ាខំព្យាយាមធ្វើតាមគោលការណ៍គម្ពីរឲ្យស្លៀកពាក់សមរម្យនិងថ្លៃថ្នូរ។ ពួកគេដឹងគុណណាស់ពេលអ្នកឯទៀតធ្វើតាមគោលការណ៍ដូចគ្នានោះ។ (ធីម៉ូថេទី១ ២:៩) រីឯសម្លៀកបំពាក់នៅពិធីពិសាអាហារវិញ ក៏ទាក់ទងនឹងគោលការណ៍ដូចគ្នាដែរ។
តើភ្ញៀវគួរតែឲ្យអំណោយឬទេ?
គម្ពីរលើកទឹកចិត្តយើងឲ្យមានចិត្តទូលាយ។ (ចម្រៀងសរសើរព្រះ ៣៧:២១) សាក្សីព្រះយេហូវ៉ាសប្បាយទទួលនិងឲ្យអំណោយក្នុងពិធីរៀបការ។ (លូកា ៦:៣៨) ប៉ុន្តែ ពួកគេមិនទាមទារអំណោយពីភ្ញៀវ ឬប្រកាសឈ្មោះរបស់អ្នកដែលឲ្យអំណោយនោះដែរ។ (ម៉ាថាយ ៦:៣, ៤; កូរិនថូសទី២ ៩:៧; ពេត្រុសទី១ ៣:៨) ទោះជាទម្លាប់បែបនោះមិនខុសនឹងគោលការណ៍គម្ពីរក៏ដោយ តែនេះអាចធ្វើឲ្យអ្នកដែលមកចូលរួមមានអារម្មណ៍មិនស្រួល។
តើមានការលើកកែវអបអរទេ?
គម្ពីរមិនហាមឃាត់ការលើកកែវឬជល់កែវទេ។ តែគូស្វាមីភរិយាថ្មីខ្លះប្រហែលសំណូមពរភ្ញៀវមិនលើកកែវអបអរ ដើម្បីកុំឲ្យអ្នកឯទៀតមានគំនិតអវិជ្ជមានឬមានទស្សនៈមិនល្អចំពោះយើង។—រ៉ូម ១៤:២១
តើភ្ញៀវត្រូវបាចអង្ករឬផ្កាទៅលើកូនកំលោះកូនក្រមុំឬទេ?
អត់ទេ។ នៅប្រទេសខ្លះ គេបាចអង្ករ ផ្កា ឬអ្វីផ្សេងៗដែលស្រដៀងនោះ ទៅលើគូស្វាមីភរិយាថ្មី។ ពួកគេជឿថាការបាចនោះ នឹងធ្វើឲ្យគូស្វាមីភរិយាថ្មីមានលាភសំណាង មានសុភមង្គល និងអាយុវែង។ ប៉ុន្តែ សាក្សីព្រះយេហូវ៉ាមិនធ្វើតាមទំនៀមទម្លាប់នេះទេ ព្រោះទាក់ទងនឹងអបិយជំនឿ។ ណាមួយទៀត សាក្សីព្រះយេហូវ៉ាមិនជូនពរអ្នកណាឲ្យមានសំណាងល្អដែរ ព្រោះនេះខុសនឹងគោលការណ៍គម្ពីរ។—អេសាយ ៦៥:១១
តើមានអាហារនិងភេសជ្ជៈនៅក្នុងពិធីនោះឬទេ?
ពិធីរៀបការនៅសាលប្រជុំមិនរួមបញ្ចូលការជូនអាហារឬភេសជ្ជៈឡើយ។ ក្រោយចប់ពិធីនៅសាលប្រជុំ គូខ្លះសម្រេចចិត្តមានពិធីពិសាអាហារនៅកន្លែងណាមួយ។ (អ្នកទូន្មាន ៩:៧) បើពួកគេសម្រេចចិត្តដាក់ស្រាក្នុងពិធីនោះ ពួកគេត្រូវប្រាកដថាមិនដាក់ច្រើនពេក ហើយភ្ញៀវដែលពិសានោះត្រូវគ្រប់អាយុតាមច្បាប់តម្រូវ។—លូកា ២១:៣៤; រ៉ូម ១៣:១, ១៣
តើមានតន្ត្រីកំដរឬរាំរែកឬទេ?
បើស្វាមីភរិយានោះមានពិធីពិសាអាហារ ពួកគេអាចសម្រេចចិត្តថាគួរមានតន្ត្រីកំដរឬរាំរែកឬយ៉ាងណា។ (អ្នកទូន្មាន ៣:៤) ពួកគេអាចជ្រើសរើសបទចម្រៀងដែលសមរម្យស្របទៅតាមវប្បធម៌ឬចំណង់ចំណូលចិត្តរបស់ខ្លួន។ ជារឿយៗ ពិធីរៀបការក្នុងសាលប្រជុំក៏រួមបញ្ចូលបទចម្រៀងដែលមានមូលដ្ឋានក្នុងគម្ពីរដែរ។
តើសាក្សីព្រះយេហូវ៉ាធ្វើខួបអាពាហ៍ពិពាហ៍ឬទេ?
គោលការណ៍គម្ពីរមិនគាំទ្រ តែក៏មិនហាមធ្វើខួបអាពាហ៍ពិពាហ៍ដែរ។ ដូច្នេះ គូស្វាមីភរិយាដែលជាសាក្សីព្រះយេហូវ៉ាអាចសម្រេចចិត្តផ្ទាល់ខ្លួន។ បើពួកគេសម្រេចចិត្តធ្វើ ពួកគេប្រហែលជាធ្វើតែពីរនាក់ឬជាមួយមិត្តភក្តិនិងក្រុមគ្រួសារ។
a ទំនៀមទម្លាប់ឬប្រពៃណីមួយចំនួន និងការចុះសំបុត្រអាពាហ៍ពិពាហ៍ប្រហែលជាខុសគ្នាទៅតាមតំបន់។
b អ្នកចាស់ទុំដែលថ្លែងសុន្ទរកថានោះមិនទារសេវាសម្រាប់ការថ្លែងពិធីរៀបអាពាហ៍ពិពាហ៍នោះទេ ហើយក៏គ្មានការបង់ប្រាក់សម្រាប់ប្រើសាលប្រជុំដែរ។