សំណួរពីយុវវ័យ
ការវិវត្តន៍ឬមានអ្នកបង្កើត? ភាគទី៤: តើខ្ញុំអាចពន្យល់អំពីជំនឿរបស់ខ្ញុំយ៉ាងណាថាជីវិតទាំងឡាយមានអ្នកបង្កើត?
ប្អូនជឿថាជីវិតទាំងឡាយមានព្រះដែលបានបង្កើត តែប្អូនមិនហ៊ានប្រាប់សិស្សឯទៀតនៅសាលាទេ។ ម្យ៉ាងទៀត សៀវភៅអំពីទ្រឹស្ដីវិវត្តន៍ក៏មានការពន្យល់ដែលមើលទៅដូចជាសមហេតុសមផលដែរ។ ដូច្នេះ ប្អូនប្រហែលជាខ្លាចថាបើប្អូនប្រាប់អំពីជំនឿរបស់ប្អូននៅមុខគ្រូនិងសិស្សរួមថ្នាក់ ពួកគេប្រហែលជាសើចចំអកឲ្យប្អូនមិនខាន។ តើតាមរបៀបណាប្អូនអាចនិយាយយ៉ាងក្លាហានដើម្បីពន្យល់ប្រាប់ជំនឿរបស់ប្អូន?
ប្អូនអាចធ្វើបាន!
ប្អូនប្រហែលគិតថា៖ ‹ខ្ញុំមិនសូវមានចំណេះគ្រប់គ្រាន់ដើម្បីបកស្រាយជាមួយគេអំពីរឿងវិទ្យាសាស្ត្រនិងទ្រឹស្ដីវិវត្តន៍ទេ›។ ប្អូនដាញែលបានប្រាប់ថា៖«ខ្ញុំតានតឹងចិត្តណាស់ ពេលដឹងថាខ្ញុំត្រូវពន្យល់អំពីជំនឿរបស់ខ្ញុំដែលផ្ទុយពីអ្វីដែលគ្រូបង្រៀននិងសិស្សរួមថ្នាក់ជឿ»។ ប្អូនដាយអាណានិយាយថា៖«ខ្ញុំមិនសូវស្គាល់ច្បាស់ពាក្យខាងវិទ្យាសាស្ត្រប៉ុន្មានទេ ដូច្នេះពេលគេជជែកវែកញែកដោយប្រើពាក្យទាំងនោះ ខ្ញុំមិនមានទំនុកចិត្តបកស្រាយជាមួយពួកគេឡើយ»។
ប៉ុន្តែ គោលដៅរបស់ប្អូនមិនមែនចង់ជជែករកឈ្នះរកចាញ់នោះទេ។ ហើយប្អូនក៏មិនចាំបាច់មានចំណេះច្រើនខាងវិទ្យាសាស្ត្រ ទើបអាចវែកញែកហេតុផលដែលបញ្ជាក់ថាជីវិតទាំងឡាយមានអ្នកបង្កើតនោះដែរ។
យោបល់៖ សូមប្រើពាក្យសាមញ្ញនិងសមហេតុផលពីគម្ពីរ។ ឧទាហរណ៍ នៅហេប្រឺ ៣:៤ ថា៖«ពិតមែនតែផ្ទះទាំងអស់មានអ្នកសង់ ប៉ុន្តែអ្នកដែលបានសង់អ្វីៗទាំងអស់គឺព្រះ»។
យុវនារីម្នាក់ឈ្មោះខារ៉ិល បានវែកញែកហេតុផលពីហេប្រឺ ៣:៤ តាមរបៀបនេះថា៖«សូមស្រមៃថាយើងកំពុងដើរកាត់ព្រៃក្រាស់មួយ ហើយយើងគិតថាគ្មានអ្នកណានៅក្នុងព្រៃនេះទេ។ តែពេលយើងមើលទៅដី យើងឃើញមានឈើចាក់ធ្មេញមួយ។ តើយើងនឹងសន្និដ្ឋានយ៉ាងណា? មនុស្សភាគច្រើននឹងសន្និដ្ឋានថា‹មានមនុស្សឆ្លងកាត់ទីនេះ ព្រោះឈើចាក់ធ្មេញនេះមិនអាចលេចមកដោយឯកឯងទេ គឺត្រូវមានអ្នកបង្កើតវា›។ ដូច្នេះ បើវត្ថុតូចតាចដូចជាឈើចាក់ធ្មេញជាភ័ស្តុតាងដែលបញ្ជាក់ថាមានមនុស្សបានបង្កើតវា នោះសកលលោកនិងអ្វីៗនៅក្នុងនោះក៏ច្បាស់ជាមានព្រះបានបង្កើតដែរ មែនទេ?»។
បើអ្នកណាម្នាក់និយាយថា៖ «បើជីវិតទាំងឡាយមានព្រះជាអ្នកបង្កើតមែន តើអ្នកណាបានបង្កើតព្រះ?»។
ប្អូនអាចឆ្លើយថា៖ «ដោយសារយើងមិនយល់ទាំងស្រុងអំពីព្រះដែលជាអ្នកបង្កើត នោះមិនបានន័យថាគ្មានព្រះជាអ្នកបង្កើតទេ។ ឧទាហរណ៍ អ្នកប្រហែលជាមិនស្គាល់ប្រវត្តិរបស់បុគ្គលដែលបានបង្កើតទូរស័ព្ទដៃរបស់អ្នកទេ តែអ្នកនៅតែជឿថា ច្បាស់ជាមានបុគ្គលម្នាក់បានគ្រោងបង្កើតវាឡើង មែនទេ? [ទុកឲ្យគាត់ឆ្លើយ] ការពិតមានអ្វីជាច្រើនដែលយើងអាចរៀនអំពីព្រះដែលជាអ្នកបង្កើត។ បើអ្នកចង់ដឹង ខ្ញុំសប្បាយចែករំលែកព័ត៌មានដែលខ្ញុំបានរៀនអំពីព្រះដល់អ្នកបាន»។
ត្រៀមទុកជាមុន
គម្ពីរលើកទឹកចិត្តប្អូនឲ្យត្រៀមទុកជាមុន ដោយប្រាប់ថា ចូរ«ប្រុងប្រៀបជានិច្ចដើម្បីនិយាយការពារសេចក្ដីសង្ឃឹមរបស់អ្នករាល់គ្នានៅចំពោះមុខមនុស្សទាំងអស់ ដែលទាមទារឲ្យអ្នករាល់គ្នាប្រាប់អំពីមូលហេតុដែលអ្នករាល់គ្នាមានសេចក្ដីសង្ឃឹមនោះ តែចូរធ្វើដូច្នេះដោយចិត្តស្លូតបូតនិងដោយការគោរពដ៏ជ្រាលជ្រៅ»។ (ពេត្រុសទី១ ៣:១៥) ដូច្នេះ សូមគិតអំពីកត្តាពីរយ៉ាងគឺ អ្វីដែលប្អូនគួរនិយាយ និងរបៀបដែលប្អូនគួរនិយាយ។
១. អ្វីដែលប្អូនគួរនិយាយ។ ពិតមែនថាសេចក្ដីស្រឡាញ់របស់ប្អូនចំពោះព្រះគឺសំខាន់ ហើយអាចជំរុញចិត្តប្អូនឲ្យនិយាយការពារជំនឿ។ ប៉ុន្តែ បើប្អូនគ្រាន់តែប្រាប់អ្នកឯទៀតថាប្អូនស្រឡាញ់ព្រះខ្លាំងប៉ុនណា នោះប្រហែលជាមិនធ្វើឲ្យគេជឿថាជីវិតទាំងឡាយមានព្រះបានបង្កើតនោះទេ។ ប្រហែលជាល្អជាងបើប្អូនប្រើឧទាហរណ៍ខ្លះៗពីធម្មជាតិដើម្បីបង្ហាញភ័ស្តុតាងដែលបញ្ជាក់ថាមានព្រះបានបង្កើតមែន។
២. របៀបដែលប្អូនគួរនិយាយ។ សូមនិយាយដោយជឿជាក់ តែបែបគួរសម និងដោយមិននិយាយដូចជាយើងចេះជាងគេ។ អ្នកឯទៀតទំនងជាគិតពិចារណាអំពីទស្សនៈរបស់ប្អូនជាង បើប្អូននិយាយដោយគោរពចំពោះជំនឿរបស់ពួកគេ និងទទួលស្គាល់ថាពួកគេមានសិទ្ធិក្នុងការជឿឬមិនជឿ។
ប្អូនអ៊ីឡេនបានរៀបរាប់ថា៖ «ខ្ញុំគិតថាគឺសំខាន់ដែលយើងមិននិយាយមើលងាយគេ ឬថាយើងចេះទាំងអស់នោះដែរ។ ម្យ៉ាងទៀត យើងចង់ជៀសវាងប្រើតុងសំឡេងដែលបញ្ជាក់ថាយើងឆ្លាតជាងគេ»។
ជំនួយផ្សេងៗដែលជួយប្អូនឲ្យពន្យល់ជំនឿរបស់ខ្លួន
ការត្រៀមទុកជាមុននូវអ្វីដែលយើងចង់និយាយដើម្បីការពារជំនឿ នោះប្រៀបដូចជាការត្រៀមខ្លួនទុកជាមុនពេលអាកាសធាតុប្រែប្រួល
ប្អូនអាលីស្យាបាននិយាយថា៖ «បើយើងមិនបានត្រៀមទុកជាមុនទេ យើងគ្រាន់តែចង់នៅស្ងៀមដើម្បីកុំឲ្យនិយាយខុសខ្មាសគេ»។ ដូចប្អូនអាលីស្យាបានបញ្ជាក់ ការត្រៀមទុកជាមុននូវអ្វីដែលយើងចង់និយាយ ជួយយើងឲ្យបញ្ជាក់ហេតុផលដែលនាំឲ្យគេជឿបាន។ ប្អូនជេនើបានរៀបរាប់ថា៖«ពេលខ្ញុំគិតទុកជាមុនអំពីឧទាហរណ៍សាមញ្ញមួយដែលបញ្ជាក់ថាមានព្រះដែលជាអ្នកបង្កើត នោះខ្ញុំស្រួលវែកញែកហេតុផលអំពីរឿងនោះជាមួយពួកគេជាង»។
តើប្អូនអាចរកឃើញឧទាហរណ៍បែបនោះនៅឯណា? យុវវ័យជាច្រើនបានប្រើព័ត៌មាននៅខាងក្រោមនេះដោយមានប្រសិទ្ធភាព ដូចជា៖
សៀវភៅតើជីវិតទាំងឡាយមានអ្នកបង្កើតឬទេ?
សៀវភៅដើមកំណើតនៃជីវិត សំណួរទាំងប្រាំដែលយើងគួរឆ្ងល់
វីដេអូអ្វីៗដ៏អស្ចារ្យដែលព្រះបានបង្កើតបង្ហាញអំពីសិរីរុងរឿងរបស់លោក
អត្ថបទតភាគ«តើមានអ្នកគ្រោងបង្កើតឬទេ?»ពីទស្សនាវដ្ដីភ្ញាក់រឭក! (សូមវាយពាក្យ[រួមទាំងសញ្ញាអព្ភន្តរផងដែរ]«តើមានអ្នកគ្រោងបង្កើតឬទេ?»ក្នុងប្រអប់ស្វែងរក ពីបណ្ណាល័យអ៊ីនធឺណិតរបស់ប៉មយាម)។
សូមប្រើបណ្ណាល័យអ៊ីនធឺណិតរបស់ប៉មយាមដើម្បីស្រាវជ្រាវបន្ថែម។
ប្អូនក៏អាចរកមើលពីក្នុងអត្ថបទមុនៗនៃអត្ថបទតភាគនេះ«ការវិវត្តន៍ឬមានអ្នកបង្កើត?»។
ភាគទី២: ហេតុអ្វីទ្រឹស្ដីវិវត្តន៍មានចំណុចគួរឲ្យសង្ស័យ?
ភាគទី៣: ហេតុអ្វីគួរជឿថាអ្វីៗទាំងអស់មានអ្នកបង្កើត?
យោបល់៖ សូមជ្រើសរើសឧទាហរណ៍ណាដែលធ្វើឲ្យប្អូនជឿជាក់ថាមានព្រះដែលបានបង្កើត។ ព្រោះបើប្អូនជឿ នោះប្អូនស្រួលចាំជាង ហើយប្អូនអាចវែកញែកហេតុផលតាមឧទាហរណ៍នោះដោយមានទំនុកចិត្ត។ បន្ទាប់មក សូមហាត់របៀបពន្យល់អំពីជំនឿរបស់ប្អូន។