សំណួរពីយុវវ័យ
តើខ្ញុំគួរធ្វើយ៉ាងណាពេលដល់ភាពពេញវ័យ?
ប្អូនអុកសាណាបានរៀបរាប់ថា៖«សម្រាប់ស្រីៗពេលដល់ភាពពេញវ័យ គឺមិនស្រួលទេ។ វាធ្វើឲ្យពិបាក ធ្វើឲ្យឈឺ និងមានអារម្មណ៍ច្របូកច្របល់។ បើនិយាយឲ្យចំទៅ គឺយ៉ាប់ណាស់!»។
ប្អូនប្រាយអេនបានរៀបរាប់ថា៖«ដំបូងខ្ញុំសប្បាយ តែក្រោយមកពិបាកចិត្ត។ ខ្ញុំមិនដឹងថាក្មេងប្រុសឯទៀតដូចខ្ញុំឬអត់ទេ»។
ភាពពេញវ័យអាចប្រដូចទៅនឹងការជិះរទេះភ្លើងហោះ គឺរំភើបផង ភ័យផង។ តើប្អូនអាចធ្វើយ៉ាងណាពេលមានអារម្មណ៍ម្ដងឡើងម្ដងចុះបែបនេះ?
តើអ្វីទៅជាភាពពេញវ័យ?
បើនិយាយឲ្យចំទៅ ភាពពេញវ័យជាដំណាក់កាលមួយនៃជីវិត ដែលពេលនោះមានការប្រែប្រួលខ្លាំង ទាំងខាងរាយកាយ ទាំងខាងអារម្មណ៍។ ការប្រែប្រួលនោះមានរហូតដល់ប្អូនក្លាយទៅជាមនុស្សពេញវ័យ។ ក្នុងអំឡុងគ្រានៃភាពពេញវ័យ រូបកាយរបស់ប្អូនប្រែប្រួលយ៉ាងលឿន ហើយអ័រម៉ូនក៏ប្រែប្រួលដែរ។ ការប្រែប្រួលនោះត្រៀមលក្ខណៈប្អូនឲ្យបង្កើតមេជីវិតនិងមានកូន។
ប៉ុន្តែ នេះមិនបានន័យថាប្អូនធំល្មមអាចធ្វើជាឪពុកឬម្ដាយទេ។ តែភាពពេញវ័យជាសញ្ញាបញ្ជាក់ថាប្អូនកំពុងធំលូតលាស់ លែងនៅវ័យកុមារទៀតហើយ។ ភាពពេញវ័យអាចនាំឲ្យប្អូនមានអារម្មណ៍រំភើបផង ក្រៀមក្រំផង។
សំណួរនិងចម្លើយជ្រើសរើស៖ តើប្អូនគិតថាក្នុងអាយុខាងក្រោមនេះ អាយុមួយណាដែលចាប់ផ្ដើមភាពពេញវ័យ?
៨
៩
១០
១១
១២
១៣
១៤
១៥
១៦
ចម្លើយ៖ អាយុទាំងអស់នោះបានត្រូវចាត់ទុកជារយៈកាលនៃភាពពេញវ័យ។
នេះមានន័យថា ប្អូនមិនចាំបាច់បារម្ភហួសហេតុពេកទេ បើប្អូនឈានដល់វ័យជំទង់តែមិនទាន់ដល់ភាពពេញវ័យ ឬក៏ប្អូនមានអាយុក្រោម១០ឆ្នាំតែចាប់ផ្ដើមភាពពេញវ័យរួចហើយ។ ភាពពេញវ័យនឹងដំណើរកាលដោយខ្លួនឯង ហើយប្អូនមិនអាចគ្រប់គ្រងវាបានឡើយ។
ភាពពេញវ័យអាចប្រដូចទៅនឹងការជិះរទេះភ្លើងហោះ គឺរំភើបផង ភ័យផង។ តែប្អូនអាចរៀនយកឈ្នះពេលមានអារម្មណ៍ម្ដងឡើងម្ដងចុះបាន
ការប្រែប្រួលខាងរាងកាយ
ការប្រែប្រួលភាគច្រើនប្រហែលជាឃើញយ៉ាងច្បាស់តាមរយៈការលូតលាស់យ៉ាងលឿន។ ប៉ុន្តែ មិនមែនសរីរាង្គទាំងអស់នៃរូបកាយប្អូននឹងលូតលាស់តាមល្បឿនដូចគ្នាទេ។ ដូច្នេះ កុំបារម្ភបើការប្រែប្រួលនោះមើលទៅដូចជាយឺតយ៉ាវ។ សូមចាំថាតែដល់ពេល អ្វីៗនឹងដំណើរកាលតាមសម្រួល។
ការប្រែប្រួលមួយចំនួនពេលដល់ភាពពេញវ័យ។
ភាពពេញវ័យនៃក្មេងប្រុស៖
ប្រដាប់បន្តពូជរីកធំ
ដុះរោមនៅលើមុខ ក្លៀក និងលើថ្ងាសប្រដាប់បន្តពូជ
បែកសំឡេង
បង្កើតនិងបញ្ចេញទឹកកាមនៅពេលយប់
ភាពពេញវ័យនៃក្មេងស្រី៖
ទ្រូងរីកធំ
ដុះរោមនៅក្លៀក និងលើថ្ងាសប្រដាប់បន្តពូជ
មានរដូវ
ភាពពេញវ័យនៃក្មេងប្រុសនិងក្មេងស្រី៖
មានក្លិនខ្លួនដែលបណ្ដាលមកពីបាក់តេរីនិងរន្ធញើស។
យោបល់៖ ប្អូនអាចបំបាត់ក្លិនខ្លួនដោយងូតទឹកញឹកញាប់ និងប្រើប្រដាប់លញ់ក្លៀកឬអ្វីដែលបំបាត់ក្លិនក្លៀក។
កើតមុន ដែលបណ្ដាលមកពីបាក់តេរីជាប់ក្នុងក្រពេញប្រេង។
យោបល់៖ ទោះជាពិបាកបំបាត់មុនក្ដី ការលាងមុខឲ្យបានញឹកញាប់ និងប្រើសាប៊ូលាងមុខក៏អាចជួយផងដែរ។
ការប្រែប្រួលខាងអារម្មណ៍
ដោយសារអ័រម៉ូនមានកាន់តែច្រើនឡើងៗ នោះធ្វើឲ្យមានការប្រែប្រួលខាងរាងកាយ ដែលធ្វើឲ្យប៉ះពាល់យ៉ាងខ្លាំងដល់អារម្មណ៍របស់ប្អូន។ ប្អូនប្រហែលជាមានអារម្មណ៍ឡើងចុះខ្លាំងនិងភ្លាមៗ។
ប្អូនអុកសាណាបានរៀបរាប់ថា៖«ថ្ងៃមួយខ្ញុំយំ ថ្ងៃមួយទៀតខ្ញុំមានអារម្មណ៍ធម្មតា។ ហើយសុខៗខ្ញុំខឹង ក្រោយមកធ្លាក់ទឹកចិត្ត រួចសំងំក្នុងបន្ទប់តែម្នាក់ឯង»។
ក្នុងអំឡុងភាពពេញវ័យ ប្អូនៗវ័យក្មេងជាច្រើនក៏បារម្ភខ្លាចថាអ្នកឯទៀតមើលនិងគិតមិនល្អមកលើខ្លួន។ ម្យ៉ាងទៀត ដោយសាររូបសម្ផស្សរបស់ពួកគេប្រែប្រួលដែរ នោះធ្វើឲ្យពួកគេកាន់តែព្រួយបារម្ភថែមទៀត។
ប្អូនចានអ៊ិសរៀបរាប់ថា៖«ពេលខ្ញុំលូតលាស់ដល់គ្រានោះ ខ្ញុំចាប់ផ្ដើមស្លៀកខោអាវរលុងៗ។ ខ្ញុំដឹងថាហេតុអីរាងកាយខ្ញុំប្រែប្រួល តែខ្ញុំនៅតែមានអារម្មណ៍មិនស្រួលនិងខ្មាសគេ។ បើនិយាយឲ្យចំទៅ គឺអារម្មណ៍ខុសពីធម្មតា»។
ប្រហែលការប្រែប្រួលខ្លាំងជាងគេ គឺការមានទស្សនៈផ្សេងចំពោះភេទផ្ទុយ។
ប្អូនអាឡិចសឺសបានរៀបរាប់ថា៖«ខ្ញុំឈប់គិតថាប្រុសៗគួរឲ្យរំខានទៀតហើយ។ តាមពិតប្រុសខ្លះគួរឲ្យស្រឡាញ់ទៀតផង ហើយការមានស្នេហាមានអីខុសណា។ ហើយខ្ញុំចាប់ផ្ដើមចង់ដឹងចង់ឮថា អ្នកណាចាប់អារម្មណ៍អ្នកណា»។
ពេលដល់ភាពពេញវ័យ ប្អូនៗវ័យក្មេងខ្លះមានចិត្តទៅលើអ្នកដែលមានភេទដូចគ្នា។ បើប្អូនមានអារម្មណ៍បែបនេះមែន សូមកុំសន្និដ្ឋានថាប្អូនជាអ្នកស្រឡាញ់ភេទដូចគ្នាឡើយ។ ក្នុងករណីជាច្រើន អារម្មណ៍បែបនេះអាចបាត់ទៅវិញក្រោយមក។
ប្អូនអាឡិនបានរៀបរាប់ថា៖«ដោយសារខ្ញុំចូលចិត្តប្រៀបធៀបខ្លួនជាមួយនឹងក្មេងប្រុសឯទៀត ខ្ញុំចាប់ផ្ដើមមានចិត្តលើពួកគេ។ តែក្រោយមកខ្ញុំមានអារម្មណ៍ស្រឡាញ់ស្រីវិញ។ បើនិយាយឲ្យចំទៅ អារម្មណ៍ស្រឡាញ់ភេទដូចគ្នានោះគ្រាន់តែមួយរយៈពេលប៉ុណ្ណោះ»។
អ្វីដែលប្អូនអាចធ្វើ
ព្យាយាមមានទស្សនៈត្រឹមត្រូវ។ ថ្វីត្បិតតែភាពពេញវ័យគឺប្រែប្រួលខាងរាងកាយនិងអារម្មណ៍មែន តែប្អូនអាចមានទំនុកចិត្តដូចដាវីឌដែលជាអ្នកតែងចម្រៀងសរសើរព្រះ ដែលនិយាយថា៖«លោកបានបង្កើតខ្ញុំតាមរបៀបដ៏អស្ចារ្យ និងគួរឲ្យស្ញប់ស្ញែង»។—ចម្រៀងសរសើរព្រះ ១៣៩:១៤
កុំប្រៀបធៀបនឹងក្មេងឯទៀត ហើយកុំផ្ដោតអារម្មណ៍ខ្លាំងពេកទៅលើរូបសម្ផស្ស។ គម្ពីរចែងថា៖«មនុស្សមើលតែសម្បកក្រៅ ប៉ុន្តែព្រះយេហូវ៉ាមើលក្នុងចិត្តវិញ»។—សាំយូអែលទី១ ១៦:៧
ហាត់ប្រាណនិងសម្រាកឲ្យបានគ្រប់គ្រាន់។ ការគេងឆ្អែតនឹងជួយប្អូនឲ្យមានអារម្មណ៍ល្អ មិនសូវតានតឹងចិត្ត និងធ្លាក់ទឹកចិត្ត។
យកឈ្នះគំនិតមិនត្រឹមត្រូវ។ តើគ្រប់គ្នាពិតជាកំពុងមើលប្អូនមែនឬ? ទោះជាគេកត់សម្គាល់ឃើញការលូតលាស់របស់ប្អូនក្ដី សូមកុំផ្ដោតអារម្មណ៍ទៅលើនោះពេក។ គម្ពីរចែងថា៖«កុំគិតច្រើនពេកអំពីពាក្យទាំងអស់ដែលមនុស្សនិយាយ»។—អ្នកទូន្មាន ៧:២១
រៀនគ្រប់គ្រងចំណង់ផ្លូវភេទរបស់ប្អូនដើម្បីកុំឲ្យប្អូនបណ្ដោយខ្លួនទៅតាមចំណង់នោះ។ គម្ពីរចែងថា៖«ចូររត់ចេញពីអំពើប្រាសចាកសីលធម៌ខាងផ្លូវភេទ! . . . អ្នកណាដែលប្រព្រឹត្តអំពើប្រាសចាកសីលធម៌ខាងផ្លូវភេទ អ្នកនោះកំពុងធ្វើខុសចំពោះរូបកាយខ្លួន»។—កូរិនថូសទី១ ៦:១៨
និយាយជាមួយឪពុក ឬម្ដាយ ឬមនុស្សពេញវ័យ ដែលប្អូនទុកចិត្ត។ ប្រហែលដំបូងប្អូនមានអារម្មណ៍ខ្មាសប្រាប់ពួកគាត់ តែការនិយាយជាមួយពួកគាត់ជួយប្អូនឲ្យយល់ច្បាស់អំពីភាពពេញវ័យនោះ ហើយមានអារម្មណ៍ស្រួលជាង។—សុភាសិត ១៧:១៧
សរុបសេចក្ដី៖ ពេលប្អូនដល់ភាពពេញវ័យ ប្អូនអាចមានការពិបាកខ្លះ តែនេះបើកឱកាសឲ្យប្អូនចម្រើនលូតលាស់ មិនគ្រាន់តែខាងរាងកាយទេ តែខាងផ្លូវចិត្ត ខាងអារម្មណ៍ និងខាងជំនឿដែរ។—សាំយូអែលទី១ ២:២៦