-
ហេតុអ្វីគួរអានគម្ពីរ?ទស្សនាវដ្ដីប៉មយាម (សម្រាប់ផ្សព្វផ្សាយ) (២០១៧) | លេខ១
-
-
អត្ថបទអំពីក្របទស្សនាវដ្ដី | តើការអានគម្ពីរមានប្រយោជន៍អ្វី?
ហេតុអ្វីគួរអានគម្ពីរ?
ជូវីប្រាប់ថា៖ «ខ្ញុំគិតថាគម្ពីរពិបាកយល់ណាស់»។
ឃ្វីនីនិយាយថា៖ «ខ្ញុំមានអារម្មណ៍ថាគម្ពីរមិនគួរឲ្យចាប់អារម្មណ៍ទេ»។
អេសេគាលរៀបរាប់ថា៖ «ពេលខ្ញុំឃើញកម្រាស់គម្ពីរ នោះខ្ញុំលែងចង់អានតែម្ដង»។
តើលោកអ្នកធ្លាប់ចង់អានគម្ពីរឬទេ? ប៉ុន្តែ លោកអ្នកប្រហែលជាលែងចង់អានគម្ពីរ ដោយសារមានទស្សនៈដូចបានរៀបរាប់ខាងលើ មែនទេ? ចំពោះមនុស្សភាគច្រើន ការអានគម្ពីរគឺពិបាកសម្រាប់ពួកគេ។ ចុះបើលោកអ្នកដឹងថាគម្ពីរអាចជួយលោកអ្នកឲ្យមានសុភមង្គលនិងមានការស្កប់ចិត្តក្នុងជីវិត? ចុះយ៉ាងណាវិញបើលោកអ្នកដឹងថាមានវិធីផ្សេងៗដែលធ្វើឲ្យការអានគម្ពីរទៅជាអ្វីដែលគួរឲ្យចាប់អារម្មណ៍? ដូច្នេះ តើលោកអ្នកចង់អានអ្វីដែលបានចែងក្នុងគម្ពីរឬទេ?
ឥឡូវសូមពិចារណាពាក្យសម្ដីរបស់មនុស្សខ្លះដែលបានទទួលប្រយោជន៍ជាច្រើន ក្រោយពីពួកគេបានចាប់ផ្ដើមអានគម្ពីរ។
អេសេគាលដែលមានអាយុ២០ឆ្នាំប្លាយនិយាយថា៖ «ពេលមុន ជីវិតខ្ញុំប្រៀបដូចជាអ្នកបើកបរដែលគ្មានគោលដៅ។ ប៉ុន្តែ ក្រោយពីបានអានគម្ពីរ ជីវិតខ្ញុំមានន័យខ្លឹមសារ។ គម្ពីរមានឱវាទល្អៗដែលខ្ញុំអាចយកមកប្រើរាល់ថ្ងៃ»។
ហ្វ្រីដាដែលមានអាយុជាង២០ឆ្នាំពន្យល់ថា៖ «ខ្ញុំធ្លាប់ជាមនុស្សឆាប់ខឹង។ ប៉ុន្តែ ដោយសារខ្ញុំបានអានគម្ពីរ ខ្ញុំបានរៀនចេះគ្រប់គ្រងអារម្មណ៍ខ្ញុំ។ ដូច្នេះ ខ្ញុំទៅជាមនុស្សដែលគេស្រួលប្រស្រ័យទាក់ទងជាង។ ជាលទ្ធផល ឥឡូវខ្ញុំមានមិត្តភក្ដិច្រើនជាងមុន»។
ស្ត្រីម្នាក់អាយុ៥០ឆ្នាំប្លាយឈ្មោះយូនឺស បានរៀបរាប់អំពីគម្ពីរថា៖ «គម្ពីរជួយខ្ញុំឲ្យទៅជាមនុស្សល្អជាង ដោយកែប្រែទម្លាប់មិនសូវល្អរបស់ខ្ញុំ»។
អ្នកទាំងនេះនិងមនុស្សរាប់លាននាក់ទៀតបានដឹងថា ការអានគម្ពីរអាចជួយអ្នកអានឲ្យមានសុភមង្គលច្រើនជាងក្នុងជីវិត។ (អេសាយ ៤៨:១៧, ១៨) បន្ថែមទៅទៀត គម្ពីរអាចជួយលោកអ្នក (១) ធ្វើការសម្រេចចិត្តល្អ (២) រកឃើញមិត្តភក្ដិពិត (៣) សម្រាលការតានតឹងចិត្ត និង(៤) រៀនសេចក្ដីពិតអំពីព្រះ ហើយនេះជាអ្វីដ៏អស្ចារ្យបំផុត។ ឱវាទក្នុងគម្ពីរគឺមកពីព្រះ ដូច្នេះបើលោកអ្នកធ្វើតាមឱវាទពីគម្ពីរ នោះលោកអ្នកនឹងមិនខកចិត្តឡើយ។ ព្រះមិនដែលផ្ដល់ឱវាទអាក្រក់ទេ។
អ្វីដែលសំខាន់នោះគឺចាប់ផ្ដើមអានគម្ពីរ។ តើមានយោបល់អ្វីខ្លះដែលអាចធ្វើឲ្យលោកអ្នកស្រួលចាប់ផ្ដើមអានគម្ពីរ និងមានអំណរក្នុងការអាន?
-
-
តើអ្វីអាចជួយខ្ញុំឲ្យចាប់ផ្ដើមអានគម្ពីរ?ទស្សនាវដ្ដីប៉មយាម (សម្រាប់ផ្សព្វផ្សាយ) (២០១៧) | លេខ១
-
-
អត្ថបទអំពីក្របទស្សនាវដ្ដី | តើការអានគម្ពីរមានប្រយោជន៍អ្វី?
តើអ្វីអាចជួយខ្ញុំឲ្យចាប់ផ្ដើមអានគម្ពីរ?
តើមានវិធីណាខ្លះដែលនឹងជួយលោកអ្នកឲ្យចូលចិត្តអានគម្ពីរ ហើយទទួលប្រយោជន៍ច្រើនបំផុត? សូមកត់សម្គាល់យោបល់ប្រាំយ៉ាងដែលបានជួយមនុស្សជាច្រើន។
រកកន្លែងដែលមានបរិយាកាសល្អ។ សូមព្យាយាមរកកន្លែងស្ងាត់ ដើម្បីងាយស្រួលឲ្យលោកអ្នកប្រមូលអារម្មណ៍ទៅលើអ្វីដែលលោកអ្នកកំពុងអាន។ ម្យ៉ាងទៀត កន្លែងដែលមានពន្លឺគ្រប់គ្រាន់និងមានខ្យល់បរិសុទ្ធ ក៏អាចជួយលោកអ្នកឲ្យទទួលប្រយោជន៍កាន់តែច្រើនពីការអានដែរ។
មានចិត្តគំនិតត្រឹមត្រូវ។ ដោយសារគម្ពីរមកពីបិតាស្ថានសួគ៌ នោះលោកអ្នកនឹងទទួលប្រយោជន៍ច្រើនបំផុត បើលោកអ្នកត្រៀមខ្លួនដូចកូនៗដែលចង់រៀនពីឪពុកម្ដាយជាទីស្រឡាញ់។ បើលោកអ្នកមានទស្សនៈមិនត្រឹមត្រូវ ឬវាយតម្លៃគម្ពីរទុកជាមុន សូមទុកទស្សនៈនោះមួយឡែកសិន ដើម្បីឲ្យព្រះអាចបង្ហាត់បង្រៀនលោកអ្នក។—ទំនុកតម្កើង ២៥:៤
អធិដ្ឋានមុនអាន។ ដោយសារគម្ពីរមានទស្សនៈរបស់ព្រះ ដូច្នេះមិនមែនជាការចម្លែកទេដែលយើងត្រូវការជំនួយពីលោកដើម្បីយល់គម្ពីរ។ ព្រះសន្យាថានឹងផ្ដល់«សកម្មពលបរិសុទ្ធរបស់លោកដល់អ្នកដែលសុំពីលោក»។ (លូកា ១១:១៣) សកម្មពលបរិសុទ្ធអាចជួយលោកអ្នកយល់គំនិតនិងទស្សនៈរបស់ព្រះ។ ក្រោយមក សកម្មពលនោះនឹងបើកបង្ហាញឲ្យលោកអ្នកយល់«សូម្បីតែសេចក្ដីជ្រាលជ្រៅរបស់ព្រះ»។—កូរិនថូសទី១ ២:១០
អានដើម្បីយល់។ សូមកុំអានត្រួសៗឡើយ។ ផ្ទុយទៅវិញ សូមរំពឹងគិតអំពីអ្វីដែលលោកអ្នកកំពុងអាន។ ពេលអានសូមសួរខ្លួនលោកអ្នកថា: ‹តើបុគ្គលដែលខ្ញុំកំពុងអាននេះមានគុណសម្បត្ដិអ្វីខ្លះ? តើតាមរបៀបណាខ្ញុំអាចធ្វើតាមមេរៀននេះ?›។
មានគោលដៅជាក់លាក់។ ដើម្បីទទួលប្រយោជន៍ពីការអានគម្ពីរ លោកអ្នកគួរព្យាយាមរៀននូវចំណុចណាដែលនឹងជួយឲ្យជីវិតលោកអ្នកប្រសើរជាង។ ជាឧទាហរណ៍ លោកអ្នកអាចមានគោលដៅដូចជា: ‹ខ្ញុំចង់រៀនថែមទៀតអំពីព្រះ› ឬ‹ខ្ញុំចង់ទៅជាមនុស្សល្អជាង ប្ដីល្អជាង ឬប្រពន្ធល្អជាង›។ រួចមក សូមជ្រើសរើសអានផ្នែកខ្លះក្នុងគម្ពីរដែលនឹងជួយឲ្យលោកអ្នកសម្រេចគោលដៅដូចនោះ។a
យោបល់ទាំងប្រាំនោះនឹងជួយឲ្យលោកអ្នកចាប់ផ្ដើមអានគម្ពីរ។ ប៉ុន្តែ តើមានអ្វីខ្លះអាចធ្វើឲ្យលោកអ្នកចូលចិត្តអានគម្ពីរ? អត្ថបទបន្ទាប់មានយោបល់ខ្លះៗ។
a ស្តីអំពីរឿងនេះ បើលោកអ្នកមិនប្រាកដថាគួរអានផ្នែកណាមួយក្នុងគម្ពីរទេ សាក្សីព្រះយេហូវ៉ាសប្បាយចិត្តជួយលោកអ្នក។
-
-
តើអ្វីខ្លះនឹងធ្វើឲ្យលោកអ្នកចូលចិត្តអានគម្ពីរ?ទស្សនាវដ្ដីប៉មយាម (សម្រាប់ផ្សព្វផ្សាយ) (២០១៧) | លេខ១
-
-
អត្ថបទអំពីក្របទស្សនាវដ្ដី | តើការអានគម្ពីរមានប្រយោជន៍អ្វី?
តើអ្វីខ្លះនឹងធ្វើឲ្យលោកអ្នកចូលចិត្តអានគម្ពីរ?
ពេលលោកអ្នកអានគម្ពីរ តើលោកអ្នកមានអារម្មណ៍ថាអផ្សុកឬក៏សប្បាយ? តើលោកអ្នកចូលចិត្តអានគម្ពីរតាមរបៀបណា? ការធ្វើឲ្យអំណានគម្ពីរគួរឲ្យចាប់អារម្មណ៍ គឺអាស្រ័យទៅលើវិធីដែលលោកអ្នកអានគម្ពីរ។ សូមពិចារណាអំពីអ្វីដែលលោកអ្នកអាចធ្វើ ដើម្បីជួយឲ្យលោកអ្នកកាន់តែចូលចិត្តអានគម្ពីរ។
សូមជ្រើសរើសសេចក្ដីបកប្រែដែលទាន់សម័យនិងគួរឲ្យទុកចិត្ត។ បើលោកអ្នកអានសេចក្ដីបកប្រែគម្ពីរដែលមានពាក្យពិបាកយល់ ឬហួសសម័យ នោះលោកអ្នកទំនងជាមិនចូលចិត្តអានគម្ពីរទេ។ ដូច្នេះ សូមស្វែងរកគម្ពីរមួយដែលប្រើពាក្យសាមញ្ញនិងស្រួលយល់ ពីព្រោះនេះនឹងមានឥទ្ធិពលល្អមកលើចិត្តលោកអ្នក។ ក៏ប៉ុន្តែ ដំណាលគ្នានោះ គម្ពីរនោះគួរតែបានត្រូវបកប្រែយ៉ាងហ្មត់ចត់និងត្រឹមត្រូវ។a
សូមប្រើបច្ចេកវិទ្យាទំនើប។ សព្វថ្ងៃនេះ គម្ពីរមិនគ្រាន់តែមានជាឯកសារបោះពុម្ពប៉ុណ្ណោះទេ តែក៏មានជាឯកសារអេឡិចត្រូនិកដែរ។ លោកអ្នកអាចអានគម្ពីរតាមគេហទំព័រ ឬថតចម្លងទុកអានក្នុងកុំព្យូទ័រ កុំព្យូទ័របន្ទះស្តើង ឬទូរស័ព្ទដៃ។ សេចក្ដីបកប្រែគម្ពីរខ្លះជាឯកសារអេឡិចត្រូនិកមានកម្មវិធីដែលអនុញ្ញាតឲ្យមើលខគម្ពីរឯទៀត ដែលនិយាយអំពីប្រធានបទដូចគ្នា ឬថែមទាំងប្រៀបធៀបខគម្ពីរជាមួយនឹងសេចក្ដីបកប្រែគម្ពីរផ្សេងៗ។ បើលោកអ្នកចូលចិត្តស្ដាប់ជាជាងអាន នោះលោកអ្នកក៏អាចស្ដាប់អំណានគម្ពីរជាឯកសារសំឡេងដែរ។ មនុស្សជាច្រើនចូលចិត្តស្ដាប់អំណានគម្ពីរពេលពួកគេកំពុងធ្វើដំណើរ បោកខោអាវ ឬធ្វើកិច្ចការណាទៀតដែលពួកគេអាចស្ដាប់បាន។ សូមសាកល្បងរបៀបណាមួយដែលសមនឹងកាលៈទេសៈរបស់លោកអ្នក។
សូមប្រើជំនួយសិក្សាគម្ពីរ។ ជំនួយសិក្សាគម្ពីរអាចជួយលោកអ្នកទទួលប្រយោជន៍ជាច្រើនពីការអានគម្ពីរ។ មានផែនទីអំពីកន្លែងផ្សេងៗនៅសម័យគម្ពីរ ដែលនឹងជួយលោកអ្នកឲ្យស្គាល់ទីកន្លែងក្នុងកំណត់ហេតុគម្ពីរ។ ដូច្នេះ លោកអ្នកអាចស្រមៃឃើញទិដ្ឋភាពក្នុងកំណត់ហេតុដែលលោកអ្នកកំពុងអាន។ អត្ថបទផ្សេងៗក្នុងទស្សនាវដ្ដីនេះ ឬក្នុងគេហទំព័រjw.org អាចជួយលោកអ្នកឲ្យយល់អត្ថន័យនៃផ្នែកជាច្រើនក្នុងគម្ពីរ។
សូមប្រើវិធីផ្សេងៗ។ បើការអានគម្ពីរពីសៀវភៅមួយទៅសៀវភៅមួយធ្វើឲ្យលោកអ្នកអផ្សុក នោះសូមធ្វើឲ្យការអាននោះទៅជាអ្វីដែលគួរឲ្យចាប់អារម្មណ៍ជាង ដោយចាប់ផ្ដើមអានផ្នែកណាមួយដែលទាក់ទាញអារម្មណ៍លោកអ្នក។ បើលោកអ្នកចង់ដឹងអំពីមនុស្សល្បីល្បាញក្នុងគម្ពីរ លោកអ្នកអាចចាប់ផ្ដើមអានអំពីពួកគេម្ដងម្នាក់ៗ។ ឧទាហរណ៍ វិធីនោះមានក្នុងប្រអប់«ស្វែងយល់គម្ពីរយ៉ាងស៊ីជម្រៅដោយស្គាល់បុរសស្ត្រីក្នុងគម្ពីរ»។ ឬមួយក៏លោកអ្នកប្រហែលជាចង់អានគម្ពីរតាមប្រធានបទ ឬតាមលំដាប់លំដោយនៃព្រឹត្ដិការណ៍។ សូមសាកល្បងធ្វើតាមវិធីណាមួយ។
a មនុស្សជាច្រើនបានឃើញថាសេចក្ដីបកប្រែពិភពលោកថ្មីពីបទគម្ពីរបរិសុទ្ធ (New World Translation of the Holy Scriptures) គឺត្រឹមត្រូវ គួរឲ្យទុកចិត្ត និងស្រួលអាន។ គម្ពីរនេះបានត្រូវបោះពុម្ពដោយសាក្សីព្រះយេហូវ៉ា និងមានជាង១៣០ភាសា។ លោកអ្នកអាចថតចម្លងគម្ពីរនេះពីគេហទំព័រ jw.orgឬថតចម្លងកម្មវិធី JW បណ្ណាល័យ។ បើលោកអ្នកចង់បានគម្ពីរ សាក្សីព្រះយេហូវ៉ាអាចយកគម្ពីរមួយក្បាលទៅជូនលោកអ្នកដល់ផ្ទះ។
-
-
តើគម្ពីរអាចធ្វើឲ្យជីវិតខ្ញុំប្រសើរជាងយ៉ាងដូចម្ដេច?ទស្សនាវដ្ដីប៉មយាម (សម្រាប់ផ្សព្វផ្សាយ) (២០១៧) | លេខ១
-
-
អត្ថបទអំពីក្របទស្សនាវដ្ដី | តើការអានគម្ពីរមានប្រយោជន៍អ្វី?
តើគម្ពីរអាចធ្វើឲ្យជីវិតខ្ញុំប្រសើរជាងយ៉ាងដូចម្ដេច?
គម្ពីរបរិសុទ្ធខុសពីសៀវភៅឯទៀត ពីព្រោះគម្ពីរមានឱវាទរបស់ព្រះដែលជាអ្នកបង្កើត។ (ធីម៉ូថេទី២ ៣:១៦) ដំណឹងក្នុងគម្ពីរអាចមានឥទ្ធិពលយ៉ាងខ្លាំងមកលើយើង។ គម្ពីរចែងថា៖ «បណ្ដាំរបស់ព្រះគឺមានជីវិតរស់នៅ ហើយមានឫទ្ធានុភាព»។ (ហេប្រឺ ៤:១២) គម្ពីរមានឫទ្ធានុភាពធ្វើឲ្យជីវិតយើងប្រសើរជាងតាមរយៈវិធីពីរយ៉ាងគឺ ផ្ដល់ការណែនាំដល់យើងក្នុងជីវិតប្រចាំថ្ងៃ ហើយជួយឲ្យយើងស្គាល់ព្រះនិងសេចក្ដីសន្យារបស់លោក។—ធីម៉ូថេទី១ ៤:៨; យ៉ាកុប ៤:៨
ធ្វើឲ្យជីវិតលោកអ្នកប្រសើរជាងនៅសព្វថ្ងៃនេះ។ គម្ពីរអាចជួយដោះស្រាយបញ្ហាផ្ទាល់ខ្លួន ព្រមទាំងផ្ដល់ឱវាទល្អៗស្តីអំពី:
ទំនាក់ទំនងជាមួយនឹងអ្នកឯទៀត។—អេភេសូរ ៤:៣១, ៣២; ៥:២២, ២៥, ២៨, ៣៣
អារម្មណ៍និងសុខភាព។—ទំនុកតម្កើង ៣៧:៨; សុភាសិត ១៧:២២
គោលការណ៍សីលធម៌។—កូរិនថូសទី១ ៦:៩, ១០
ជីវភាព។—សុភាសិត ១០:៤; ២៨:១៩; អេភេសូរ ៤:២៨a
ប្ដីប្រពន្ធវ័យក្មេងមួយគូនៅអាស៊ី បានឲ្យតម្លៃយ៉ាងខ្លាំងទៅលើឱវាទក្នុងគម្ពីរ។ ដូចប្ដីប្រពន្ធថ្មោងថ្មីជាច្រើនដែរ ពួកគេពិបាកយល់ចិត្តគ្នា ហើយពិបាកនិយាយជាមួយគ្នាអស់ពីចិត្ត។ ប៉ុន្តែ ពួកគេចាប់ផ្ដើមធ្វើតាមឱវាទដែលបានអានពីគម្ពីរ។ តើពួកគេបានទទួលលទ្ធផលអ្វី? វីសេនដែលជាប្ដីនិយាយថា៖ «អ្វីដែលខ្ញុំអានក្នុងគម្ពីរជួយខ្ញុំឲ្យចេះដោះស្រាយបញ្ហាក្នុងជីវិតអាពាហ៍ពិពាហ៍តាមរបៀបដែលបង្ហាញសេចក្ដីស្រឡាញ់។ ការធ្វើតាមយោបល់ពីគម្ពីរក្នុងជីវិតប្រចាំថ្ងៃ នាំឲ្យយើងមានសុភមង្គល»។ ប្រពន្ធគាត់ឈ្មោះអាណឺលូ យល់ស្របថា៖ «ការអានគំរូក្នុងគម្ពីរពិតជាបានជួយយើងមែន។ សព្វថ្ងៃនេះ ជីវិតគូរបស់យើងពេញទៅដោយសុភមង្គលនិងការស្កប់ចិត្ត ហើយយើងមានគោលដៅដែលយើងពេញចិត្ត»។
នាំឲ្យស្គាល់ព្រះ។ ក្រោយពីវីសេនប្រាប់អំពីអាពាហ៍ពិពាហ៍របស់គាត់ គាត់និយាយថែមទៀតថា៖ «ដោយអានគម្ពីរ ខ្ញុំមានអារម្មណ៍ជិតស្និទ្ធជាមួយនឹងព្រះយេហូវ៉ាខ្លាំងជាងមុន»។ ពាក្យសម្ដីរបស់វីសេនបង្ហាញនូវចំណុចដ៏សំខាន់មួយគឺ គម្ពីរអាចជួយលោកអ្នកឲ្យស្គាល់ព្រះ។ បើលោកអ្នកអានគម្ពីរ លោកអ្នកនឹងទទួលប្រយោជន៍ពីឱវាទរបស់ព្រះ មិនត្រឹមតែប៉ុណ្ណោះ លោកអ្នកអាចស្គាល់ព្រះដូចជាមិត្តសម្លាញ់។ ម្យ៉ាងទៀត លោកអ្នកនឹងឃើញថាព្រះបានប្រាប់អំពីអនាគតដ៏ភ្លឺស្វាង នៅពេលនោះលោកអ្នកអាចមាន«ជីវិតដ៏ពិតប្រាកដ» ពោលគឺជីវិតជារៀងរហូត។ (ធីម៉ូថេទី១ ៦:១៩) គ្មានសៀវភៅណាទៀតដែលផ្ដល់នូវសេចក្ដីសន្យាដ៏អស្ចារ្យដូចនេះទេ។
បើលោកអ្នកព្យាយាមអានគម្ពីរហើយធ្វើតាម លោកអ្នកអាចទទួលប្រយោជន៍ដោយធ្វើឲ្យជីវិតលោកអ្នកកាន់តែប្រសើរនៅសព្វថ្ងៃនេះ ហើយលោកអ្នកក៏ស្គាល់ព្រះដែរ។ ក៏ប៉ុន្តែ ពេលដែលលោកអ្នកអានគម្ពីរ លោកអ្នកទំនងជាមានចម្ងល់ជាច្រើន។ បើដូច្នោះ សូមលោកអ្នកចាំអំពីគំរូល្អរបស់មន្ត្រីជនជាតិអេចូពីម្នាក់ ដែលរស់នៅ២.០០០ឆ្នាំមុន។ គាត់មានសំណួរជាច្រើនអំពីគម្ពីរ។ ពេលភីលីពជាអ្នកកាន់តាមលោកយេស៊ូសួរគាត់ថាយល់អ្វីដែលកំពុងអានទេ មន្ត្រីនោះឆ្លើយថា៖ «តើខ្ញុំអាចយល់យ៉ាងដូចម្ដេចបាន ប្រសិនបើគ្មានអ្នកណាបង្រៀនខ្ញុំ?»។b រួចមក មន្ត្រីនោះបានអង្វរសុំភីលីពដែលមានសមត្ថភាពបង្រៀនគម្ពីរ ឲ្យជួយពន្យល់បទគម្ពីរដល់គាត់។ (សកម្មភាព ៨:៣០, ៣១, ៣៤) ស្រដៀងគ្នាដែរ បើលោកអ្នកចង់ដឹងថែមទៀតអំពីគម្ពីរ យើងសូមអញ្ជើញលោកអ្នកចូលគេហទំព័រ www.pr418.com/km ដើម្បីស្នើសុំរៀនគម្ពីរ ឬសរសេរទាក់ទងអាសយដ្ឋានណាមួយក្នុងទស្សនាវដ្ដីនេះ។ លោកអ្នកប្រហែលជាអាចទាក់ទងសាក្សីព្រះយេហូវ៉ា ឬទៅសាលប្រជុំដែលនៅជិតតំបន់លោកអ្នក។ សូមចាប់ផ្ដើមអានគម្ពីរនៅថ្ងៃនេះ ហើយអនុញ្ញាតឲ្យគម្ពីរជួយលោកអ្នកមានជីវិតប្រសើរជាង។
បើលោកអ្នកចង់ដឹងថាលោកអ្នកអាចទុកចិត្តគម្ពីរបានឬមិនបាន សូមអញ្ជើញមើលវីដេអូខ្លីមួយចំណងជើងថាហេតុអ្វីយើងអាចប្រាកដថាគម្ពីរបរិសុទ្ធគឺមកពីព្រះ? លោកអ្នកអាចស្វែងរកវីដេអូនោះ ដោយថតបារកូដ ឬចូល jw.org/km ▸ ស្វែងរកវីដេអូ ▸ គម្ពីរ
a ដើម្បីបានព័ត៌មានថែមទៀតអំពីយោបល់ល្អៗក្នុងគម្ពីរ សូមចូលគេហទំព័រjw.org/km ▸ សៀវភៅផ្សេងៗ។
b សូមអញ្ជើញមើលអត្ថបទក្នុងទស្សនាវដ្ដីនេះ ចំណងជើងថា «តើការភាន់ច្រឡំជារឿងតូចតាចឬ?»។
-