ពួកអ្នកដែលមានវ័យចាស់ផ្សាយដ៏ឥតឈប់ឈរ
១ ពេលដែលមនុស្សកាន់តែចាស់ទៅ ពួកគេជាច្រើនរង់ចាំពេលចូលនិវត្តន៍ពីការងាររបស់គេ ហើយសប្បាយនឹងជីវិតដ៏ឥតកង្វល់ក្នុងកំឡុងអាយុទាំងប៉ុន្មានដែលគេមាន។ ពួកគេប្រហែលមានអារម្មណ៍ថា គេបានខំធ្វើការគ្រប់គ្រាន់ហើយ ហើយឥឡូវនេះសមនឹងទទួលការសំរាកម្ដង។ ឬក៏ពួកគេគ្រាន់តែចង់បានសប្បាយក្នុងមួយជីវិតរបស់គេ។—លូកា ១២:១៩
២ ជាអ្នកថ្វាយខ្លួនបំរើរបស់ព្រះយេហូវ៉ា យើងមានទស្សននិស័យផ្សេងចំពោះជីវិត។ យើងដឹងថាគឺគ្មានការចូលនិវត្តន៍ពីកិច្ចបំរើព្រះឡើយ។ ទស្សននិស័យរបស់យើងគឺវិជ្ជមាន ពីព្រោះយើងទុក‹ជីវិតដ៏អស់កល្បជានិច្ចនៅខាងមុខជានិច្ច›។ (យូដាស ២១) ចំណេះនិងការពិសោធដែលមានជាច្រើនឆ្នាំមកនេះ ប្រហែលអាចចំរើនការចេះវិនិច្ឆ័យនិងការយល់ធ្លុះជ្រៅរបស់បុគ្គលម្នាក់។ នេះអាចធ្វើឲ្យបុគ្គលម្នាក់មានប្រាជ្ញា ហើយចេះថ្លឹងថ្លែងថែមទៀត ហើយសម្ដែងនូវការអបអរដ៏ជ្រាលជ្រៅចំពោះជីវិត។ លក្ខណៈទាំងអស់នេះមានប្រយោជន៍ច្រើនចំពោះអ្នកបំរើនៃដំណឹងល្អ។
៣ ការមានវ័យចាស់មិនគ្រាន់តែចាស់ខាងរូបកាយទេ គឺទាក់ទងដល់ចិត្តគំនិតរបស់បុគ្គលម្នាក់ដែរ។ ប្រសិនបើអ្នកចង់រស់នៅឲ្យបានយូរ ហើយខំប្រឹងឲ្យមានទស្សននិស័យជាក្មេង អ្នកប្រហែលជាអាចរស់នៅបានយូរ ហើយរក្សាទស្សននិស័យវ័យក្មេង។ ពួកអ្នកដែលមានវ័យចាស់អាចធ្វើឲ្យជីវិតមានខ្លឹមសារឡើង ដោយបង្កើនចំណេះខាងវិញ្ញាណរបស់គេ ហើយផ្សាយដំណឹងល្អទៅអ្នកដទៃ។—កូរិនថូសទី១ ៩:២៣
៤ ការពិសោធពិត៖ បងស្រីអាយុ៨៦បាននិយាយថា៖ «ពេលខ្ញុំរំពឹងគិតក្នុង៦០ឆ្នាំដែលបានកន្លងទៅនេះ តាំងពីខ្ញុំបានសេចក្ដីពិត សេចក្ដីសន្យារបស់ព្រះដែលគួរទុកចិត្តធ្វើឲ្យខ្ញុំរំភើបចិត្តយ៉ាងខ្លាំង។ ត្រូវហើយ ព្រះយេហូវ៉ាទ្រង់ដែលនឹងប្រព្រឹត្តដោយសេចក្ដីស្មោះត្រង់ចំពោះពួកអ្នកស្មោះត្រង់ កំពុងតែប្រទានអំណរដ៏ហូរហៀរដល់យើង»។ (ទំនុកដំកើង ១៨:២៥) បងប្រុសវ័យចាស់ម្នាក់នឹកឃើញដល់មរណភាពនៃប្រពន្ធរបស់គាត់ ធ្វើឲ្យគាត់ស្លុតយ៉ាងខ្លាំង ក្រោយមកសុខភាពរបស់គាត់ក៏បានដុនដាបយ៉ាងខ្លាំង។ គាត់មានប្រសាសន៍ថា៖ «ប៉ុន្តែ ដោយព្រះគុណដែលគ្មានសិទ្ធិទទួលរបស់ព្រះយេហូវ៉ា ខ្ញុំបានធូរស្បើយគ្រប់គ្រាន់ក្នុងការធ្វើជាអ្នកត្រួសត្រាយពីរឆ្នាំក្រោយមក។ ខ្ញុំដឹងគុណណាស់ចំពោះព្រះយេហូវ៉ា ដែលសុខភាពរបស់ខ្ញុំបានប្រសើរឡើង ដោយមានការបង្កើនក្នុងសកម្មភាពផ្សាយនេះ»!
៥ ជាការគួរឲ្យសរសើរមែន ដែលពួកអ្នកមានវ័យចាស់ជាច្រើនបានតស៊ូ ដើម្បីបន្តការផ្សាយតាមសុខភាពនិងកម្លាំងអនុញ្ញាតឲ្យធ្វើទៅបាន—ដ៏ឥតឈប់ឈរ! ពួកគេមានមូលហេតុល្អក្នុងការស្រែកអបអរសាទរ៖ «ឱព្រះអង្គអើយ ទ្រង់បានបង្ហាត់បង្រៀនទូលបង្គំតាំងតែពីក្មេងមក ហើយដរាបដល់ឥឡូវនេះ ទូលបង្គំបានសំដែង ពីអស់ទាំងការអស្ចារ្យរបស់ទ្រង់»។—ទំនុកដំកើង ៧១:១៧