៥ តើព្រះស្ដាប់និងធ្វើតាមការអធិដ្ឋានឬទេ?
សំណួរខាងលើនេះធ្វើឲ្យយើងរំភើបចិត្តនិងចង់ដឹងយ៉ាងខ្លាំង។ គម្ពីរបង្ហាញថាសព្វថ្ងៃនេះ ព្រះយេហូវ៉ាពិតជាស្ដាប់ការអធិដ្ឋានមែន។ លោកស្ដាប់ឬមិនស្ដាប់ការអធិដ្ឋានរបស់យើង នោះច្រើនតែអាស្រ័យលើយើង។
លោកយេស៊ូបានរិះគន់យ៉ាងខ្លាំងអ្នកដឹកនាំសាសនានៅសម័យលោកដែលអធិដ្ឋានដោយពុតត្បុត។ ពួកគេគ្រាន់តែចង់បង្ហាញឲ្យមនុស្សឃើញថាពួកគេជាមនុស្សសុចរិតប៉ុណ្ណោះ។ លោកមានប្រសាសន៍ថា មនុស្សបែបនេះនឹង«ទទួលរង្វាន់គ្រប់សព្វហើយ»ដែលមានន័យថា ពួកគេនឹងទទួលបានតែអ្វីដែលពួកគេចង់បានបំផុត គឺចំណាប់អារម្មណ៍ពីមនុស្ស តែពួកគេមិនបានទទួលអ្វីដែលពួកគេត្រូវការទេ នោះគឺឲ្យព្រះស្ដាប់ការអធិដ្ឋានរបស់ពួកគេ។ (ម៉ាថាយ ៦:៥) សព្វថ្ងៃក៏ដូចគ្នាដែរ មនុស្សជាច្រើនអធិដ្ឋានស្របតាមបំណងប្រាថ្នារបស់ខ្លួន មិនមែនតាមបំណងប្រាថ្នារបស់ព្រះទេ។ ដោយសារពួកគេមិនយកចិត្តទុកដាក់នឹងគោលការណ៍គម្ពីរដែលយើងបានពិចារណា នោះព្រះមិនស្ដាប់ការអធិដ្ឋានរបស់ពួកគេទេ។
ចុះចំពោះលោកអ្នកវិញ? តើព្រះនឹងស្ដាប់ ហើយធ្វើតាមការអធិដ្ឋានរបស់លោកអ្នកឬទេ? នេះមិនមែនអាស្រ័យលើជាតិសាសន៍ សញ្ជាតិឬឋានៈរបស់លោកអ្នកក្នុងសង្គមឡើយ។ គម្ពីរធានាយើងថា៖ «ព្រះមិនរើសមុខទេ តែនៅគ្រប់ជាតិសាសន៍ លោកពេញចិត្តនឹងអ្នកណាដែលកោតខ្លាចលោក ហើយប្រព្រឹត្តអំពើសុចរិត»។ (សកម្មភាព ១០:៣៤, ៣៥) តើពាក្យទាំងនេះទាក់ទងលោកអ្នកឬទេ? កោតខ្លាចព្រះបានសេចក្ដីថាគោរពព្រះយ៉ាងជ្រាលជ្រៅ ហើយមិនធ្វើអ្វីដែលលោកមិនពេញចិត្ត។ ប្រព្រឹត្តអំពើសុចរិតមានន័យថាខំធ្វើអ្វីដែលព្រះចាត់ទុកថាត្រឹមត្រូវ ជាជាងធ្វើតាមបំណងប្រាថ្នារបស់លោកអ្នក ឬធ្វើតាមបំណងប្រាថ្នារបស់អ្នកឯទៀត។ តើលោកអ្នកពិតជាចង់ឲ្យព្រះស្ដាប់ការអធិដ្ឋានរបស់លោកអ្នកឬទេ? គម្ពីរបង្ហាញពីរបៀបដែលលោកអ្នកគួរអធិដ្ឋានដើម្បីឲ្យព្រះស្ដាប់។a
មនុស្សជាច្រើនចង់ឲ្យព្រះធ្វើតាមការអធិដ្ឋានរបស់ពួកគេដោយធ្វើការអស្ចារ្យ។ ក៏ប៉ុន្តែសូម្បីតែនៅសម័យគម្ពីរ ក៏ព្រះកម្រធ្វើការអស្ចារ្យបែបនេះណាស់។ ជួនកាល ពីការអស្ចារ្យមួយដែលបានកត់ទុកក្នុងគម្ពីរទៅការអស្ចារ្យមួយទៀត មានរយៈពេលច្រើនសតវត្សរ៍។ ម្យ៉ាងទៀត គម្ពីរបង្ហាញថារយៈពេលដែលមានការអស្ចារ្យបានចប់ក្រោយសម័យពួកសាវ័ក។ (កូរិនថូសទី១ ១៣:៨-១០) ដូច្នេះតើនេះមានន័យថាសព្វថ្ងៃនេះព្រះមិនធ្វើតាមការអធិដ្ឋានទេឬ? មិនមែនទេ! សូមពិចារណាការអធិដ្ឋានខ្លះដែលព្រះធ្វើតាម។
ព្រះផ្ដល់ប្រាជ្ញា។ ព្រះយេហូវ៉ាជាប្រភពវិសេសបំផុតនៃប្រាជ្ញាពិតប្រាកដទាំងអស់។ លោកមានចិត្តទូលាយក្នុងការផ្ដល់ប្រាជ្ញា ហើយលោកចែករំលែកប្រាជ្ញានោះដល់ពួកអ្នកដែលចង់បានការណែនាំពីលោក ថែមទាំងប្រព្រឹត្តតាមប្រាជ្ញានោះដែរ។—យ៉ាកុប ១:៥
ព្រះផ្ដល់សកម្មពលបរិសុទ្ធរបស់លោកនិងផ្ដល់ប្រយោជន៍ទាំងអស់ដែលមកពីសកម្មពលនោះ។ គ្មានឫទ្ធានុភាពណាដែលខ្លាំងជាងសកម្មពលបរិសុទ្ធទេ។ សកម្មពលនោះអាចជួយយើងទ្រាំទ្រទុក្ខលំបាកផ្សេងៗ។ ពេលយើងមានបញ្ហា សកម្មពលនោះធ្វើឲ្យយើងមានចិត្តស្ងប់។ សកម្មពលនោះជួយយើងបណ្ដុះគុណសម្បត្ដិឯទៀតដែលទាក់ទាញចិត្ត។ (កាឡាទី ៥:២២, ២៣) លោកយេស៊ូបានធានាពួកអ្នកកាន់តាមលោកថាព្រះនឹងឲ្យអំណោយនេះដោយចិត្តទូលាយ។—លូកា ១១:១៣
ព្រះផ្ដល់ចំណេះដល់ពួកអ្នកដែលស្វះស្វែងរកលោកដោយស្មោះស្ម័គ្រ។ (សកម្មភាព ១៧:២៦, ២៧) នៅជុំវិញពិភពលោក មានមនុស្សដែលស្វែងរកសេចក្ដីពិតយ៉ាងស្មោះត្រង់។ ពួកគេចង់ស្គាល់ព្រះ ពោលគឺចង់ដឹងថាលោកឈ្មោះអ្វី គោលបំណងរបស់លោកចំពោះផែនដីនិងមនុស្សជាតិគឺយ៉ាងណា ហើយពួកគេអាចចូលទៅជិតលោកដោយរបៀបណា។ (យ៉ាកុប ៤:៨) សាក្សីព្រះយេហូវ៉ាជួបមនុស្សបែបនោះជារឿយៗ ហើយពួកគេសប្បាយចិត្តផ្ដល់ចម្លើយពីគម្ពីរចំពោះសំណួរខាងលើនេះ។
តើនេះជាមូលហេតុដែលលោកអ្នកបានទទួលទស្សនាវដ្ដីនេះឬ? តើលោកអ្នកកំពុងស្វែងរកព្រះឬទេ? ប្រហែលនេះជារបៀបដែលព្រះកំពុងធ្វើតាមការអធិដ្ឋានរបស់លោកអ្នក។
a បើលោកអ្នកចង់បានព័ត៌មានបន្ថែមស្តីអំពីរបៀបអធិដ្ឋានដើម្បីព្រះស្ដាប់ សូមអានសៀវភៅតើព្រះគម្ពីរពិតជាបង្រៀនយ៉ាងណា? ជំពូកទី១៧ដែលបោះពុម្ពផ្សាយដោយសាក្សីព្រះយេហូវ៉ា។