មេរៀនទី៩
តើក្រុមគ្រួសាររបស់លោកអ្នកអាចមានសុភមង្គលយ៉ាងដូចម្ដេច?
១. ហេតុអ្វីការរៀបការតាមច្បាប់ជាអ្វីដែលចាំបាច់ដើម្បីឲ្យមានសុភមង្គលក្នុងក្រុមគ្រួសារ?
ព្រះយេហូវ៉ាជាព្រះដែលមានសេចក្ដីសប្បាយ លោកមានដំណឹងល្អសម្រាប់យើង គឺលោកចង់ឲ្យក្រុមគ្រួសារទាំងឡាយមានសុភមង្គល។ (ធីម៉ូថេទី១ ១:១១) លោកជាអ្នកផ្សំផ្គុំឲ្យមានអាពាហ៍ពិពាហ៍ជាលើកដំបូង។ ការរៀបការតាមច្បាប់ជាអ្វីដែលចាំបាច់ដើម្បីឲ្យមានសុភមង្គលក្នុងក្រុមគ្រួសារ ពីព្រោះនេះធ្វើឲ្យកូនៗធំឡើងក្នុងបរិយាកាសដែលប្រកបដោយសុវត្ថិភាព។ គ្រិស្តសាសនិកគួរគោរពច្បាប់ ដោយចុះសំបុត្រអាពាហ៍ពិពាហ៍តាមផ្លូវច្បាប់។—សូមអាន លូកា ២:១, ៤, ៥
តើព្រះមានទស្សនៈយ៉ាងណាចំពោះអាពាហ៍ពិពាហ៍? លោកចង់ឲ្យបុរសនិងស្ត្រីរួមសុខរួមទុក្ខជាមួយគ្នាជារៀងរហូត។ ព្រះយេហូវ៉ាចង់ឲ្យប្ដីប្រពន្ធស្មោះត្រង់នឹងគ្នា។ (ហេប្រឺ ១៣:៤) លោកស្អប់ការលែងលះគ្នា។ (ម៉ាឡាគី ២:១៦) ប៉ុន្តែ លោកអនុញ្ញាតឲ្យគ្រិស្តសាសនិកលែងលះគ្នា ហើយរៀបការម្ដងទៀតបាន បើគូរបស់ខ្លួនប្រព្រឹត្តអំពើផិតក្បត់។—សូមអាន ម៉ាថាយ ១៩:៣-៦, ៩
២. តើប្ដីប្រពន្ធគួរប្រព្រឹត្តយ៉ាងណាចំពោះគ្នា?
ព្រះយេហូវ៉ាបានបង្កើតបុរសនិងស្ត្រីឲ្យមានតួនាទីដើម្បីបង្គ្រប់គ្នាទៅវិញទៅមក។ (លោកុប្បត្តិ ២:១៨) ក្នុងនាមជាមេគ្រួសារ ប្ដីគួរជាអ្នកនាំមុខក្នុងការទំនុកបម្រុងក្រុមគ្រួសារ និងបង្រៀនពួកគេអំពីព្រះ។ គាត់គួរបង្ហាញសេចក្ដីស្រឡាញ់ដល់ប្រពន្ធរបស់គាត់ដោយលះបង់ប្រយោជន៍ខ្លួន។ ប្ដីប្រពន្ធគួរស្រឡាញ់និងគោរពគ្នាទៅវិញទៅមក។ ប្ដីប្រពន្ធទាំងឡាយជាមនុស្សមិនល្អឥតខ្ចោះ។ ដូច្នេះ ដើម្បីមានសុភមង្គលក្នុងក្រុមគ្រួសារ នោះពួកគាត់ត្រូវរៀនឲ្យចេះអត់ឱនទោសគ្នាទៅវិញទៅមក។—សូមអាន អេភេសូរ ៤:៣១, ៣២; ៥:២២-២៥, ៣៣; ពេត្រុសទី១ ៣:៧
៣. បើលោកអ្នកគ្មានសុភមង្គលក្នុងជីវិតអាពាហ៍ពិពាហ៍ តើលោកអ្នកគួរចុះចោលគូរបស់ខ្លួនឬទេ?
បើលោកអ្នកមានបញ្ហាក្នុងជីវិតអាពាហ៍ពិពាហ៍ លោកអ្នកនិងគូរបស់លោកអ្នកគួរព្យាយាមបង្ហាញសេចក្ដីស្រឡាញ់ចំពោះគ្នាទៅវិញទៅមក។ (កូរិនថូសទី១ ១៣:៤, ៥) បណ្ដាំរបស់ព្រះមិនលើកទឹកចិត្តប្ដីប្រពន្ធឲ្យរស់នៅដាច់ពីគ្នា ដើម្បីជាវិធីដោះស្រាយបញ្ហាដែលមានជាទូទៅក្នុងជីវិតអាពាហ៍ពិពាហ៍ឡើយ។—សូមអាន កូរិនថូសទី១ ៧:១០-១៣
៤. កូនៗ តើព្រះចង់ឲ្យអ្នកមានជីវិតបែបណា?
ព្រះយេហូវ៉ាចង់ឲ្យអ្នកមានជីវិតសប្បាយ។ លោកបានឲ្យដំបូន្មានល្អបំផុតស្តីអំពីរបៀបដែលអ្នកអាចសប្បាយនៅគ្រាយុវវ័យ។ លោកចង់ឲ្យអ្នកទទួលប្រយោជន៍ពីប្រាជ្ញានិងបទពិសោធន៍របស់ឪពុកម្ដាយអ្នក។ (កូឡុស ៣:២០) បន្ថែមទៅទៀត ព្រះយេហូវ៉ាចង់ឲ្យអ្នកមានអំណរដែលមកពីការធ្វើតាមបំណងប្រាថ្នារបស់ព្រះដែលជាអ្នកបង្កើតយើងនិងរបស់បុត្រលោក។—សូមអាន សាស្ដា ១១:៩–១២:១; ម៉ាថាយ ១៩:១៣-១៥; ២១:១៥, ១៦
៥. ឪពុកម្ដាយ តើកូនៗរបស់អ្នកត្រូវធ្វើអ្វីដើម្បីមានសុភមង្គល?
លោកអ្នកគួរខំប្រឹងធ្វើការយ៉ាងនឿយហត់ដើម្បីផ្គត់ផ្គង់គ្រួសារ ដូចជាផ្ដល់ចំណីអាហារ សម្លៀកបំពាក់ និងទីលំនៅ។ (ធីម៉ូថេទី១ ៥:៨) ប៉ុន្តែ ដើម្បីជួយកូនៗឲ្យមានសុភមង្គល លោកអ្នកក៏ត្រូវអប់រំពួកគេឲ្យស្រឡាញ់ព្រះ និងឲ្យរៀនពីលោកដែរ។ (អេភេសូរ ៦:៤) គំរូរបស់លោកអ្នកក្នុងការបង្ហាញសេចក្ដីស្រឡាញ់ចំពោះព្រះ អាចមានឥទ្ធិពលខ្លាំងទៅលើចិត្តរបស់កូន។ ពេលលោកអ្នកបង្ហាត់បង្រៀនកូនដោយផ្អែកលើបណ្ដាំរបស់ព្រះ នោះលោកអ្នកអាចអប់រំចិត្តគំនិតរបស់កូនឲ្យគិតតាមផ្លូវដែលត្រឹមត្រូវបាន។—សូមអាន ចោទិយកថា ៦:៤-៧; សុភាសិត ២២:៦
ពេលលោកអ្នកលើកទឹកចិត្តនិងសរសើរកូន នោះជួយពួកគេឲ្យទទួលប្រយោជន៍។ ពួកគេក៏ត្រូវការការកែតម្រង់និងការប្រៀនប្រដៅដែរ។ ការបង្ហាត់បង្រៀនបែបនេះការពារពួកគេកុំឲ្យប្រព្រឹត្តអំពើដែលអាចធ្វើឲ្យពួកគេលែងមានសុភមង្គល។ (សុភាសិត ២២:១៥) ប៉ុន្តែ ឪពុកម្ដាយមិនគួរប្រៀនប្រដៅតាមរបៀបឃោរឃៅឬគ្មានមេត្ដាឡើយ។—សូមអាន កូឡុស ៣:២១
សាក្សីព្រះយេហូវ៉ាបោះពុម្ពសៀវភៅមួយចំនួន ដែលបានរៀបចំឡើងជាពិសេសដើម្បីជួយឪពុកម្ដាយនិងកូនៗ។ សៀវភៅទាំងនេះមានមូលដ្ឋានលើគម្ពីរ។—សូមអាន ទំនុកតម្កើង ១៩:៧, ១១