ជំនួយសម្រាប់ក្រុមគ្រួសារ | ឪពុកម្ដាយ
ហេតុអ្វីការអានគឺសំខាន់សម្រាប់កូនៗ ភាគទី២៖ តាមឯកសារបោះពុម្ពឬគ្រឿងអេឡិចត្រូនិក?
តើកូនរបស់អ្នកចូលចិត្តអានពីឯកសារបោះពុម្ពឬគ្រឿងអេឡិចត្រូនិក?
យុវវ័យជាច្រើននឹងជ្រើសរើសគ្រឿងអេឡិចត្រូនិក។ សាស្ត្រាចារ្យម្នាក់ឈ្មោះជីន ត្វីងជី បានសរសេរថា៖«សម្រាប់ជំនាន់មួយដែលច្រើនតែរៀនដោយចុចលើតំណភ្ជាប់ឬអូសទៅទំព័រមួយៗយ៉ាងលឿន ការអានសៀវភៅប្រហែលជាអ្វីដែលគួរឲ្យអផ្សុកទៅវិញ»។a
ការអានតាមគ្រឿងអេឡិចត្រូនិកពិតជាមានប្រយោជន៍ជាច្រើន។ យុវវ័យម្នាក់ឈ្មោះចន បានរៀបរាប់ថា៖«សាលាដែលខ្ញុំរៀន ប្រើឯកសារអេឡិចត្រូនិក ហើយនោះបានជួយខ្ញុំឲ្យរកឃើញព័ត៌មានដែលខ្ញុំត្រូវការលឿនជាង»។
អ្នកដែលអានពីគ្រឿងអេឡិចត្រូនិកមានអ្វីៗជាច្រើនដែលមានប្រយោជន៍សម្រាប់ពួកគេ ដោយគ្រាន់តែប្រើចុងម្រាមដៃរបស់ពួកគេប៉ុណ្ណោះ។ ជាឧទាហរណ៍ គ្រាន់តែចុចប៉ុណ្ណោះ អ្នកអានអាចស្វែងរកអត្ថន័យនៃពាក្យណាមួយ អាចស្ដាប់ឯកសារសំឡេង ឬមើលវីដេអូដែលទាក់ទងនឹងនោះ ឬមួយក៏មើលព័ត៌មានបន្ថែមដែលមានក្នុងតំណភ្ជាប់។ ដូច្នេះ តើមានន័យថាការអានពីឯកសារបោះពុម្ពមិនសូវមានប្រយោជន៍ឬ?
អ្នកខ្លះចូលចិត្តអានពីឯកសារបោះពុម្ព ពេលដែលសិក្សាជ្រាលជ្រៅជាង។ ហេតុអ្វី?
ការផ្ដោតអារម្មណ៍។ យុវវ័យម្នាក់ឈ្មោះណេថិន បាននិយាយថា៖«ពេលខ្ញុំអានតាមគ្រឿងអេឡិចត្រូនិក មានសេចក្ដីជូនដំណឹងនិងការផ្សាយពាណិជ្ជកម្មលោតចេញមក ហើយនោះបង្វែរអារម្មណ៍ខ្ញុំពីអ្វីដែលខ្ញុំកំពុងអាន»។
យុវនារីម្នាក់ឈ្មោះខារិនដែលមានអាយុ២០ឆ្នាំ ក៏មានបញ្ហាស្រដៀងនោះដែរ។ គាត់ប្រាប់ថា៖«ពេលខ្ញុំអានតាមទូរស័ព្ទដៃឬកុំព្យូទ័របន្ទះស្ដើង ខ្ញុំស្រួលបង្វែរអារម្មណ៍ទៅមើលកម្មវិធីផ្សេងៗ ឬចេះតែចង់បើកលេងហ្គេមវីដេអូ»។
គោលការណ៍គម្ពីរ៖ «ចូរប្រើគ្រប់ឱកាសឲ្យកើតប្រយោជន៍ច្រើនបំផុត»។—កូឡុស ៤:៥
សូមគិតអំពីនេះ៖ កាលដែលកូនរបស់អ្នកអានឬសិក្សាតាមគ្រឿងអេឡិចត្រូនិក តើពួកគេចេះទប់ចិត្តកុំឲ្យបង្វែរអារម្មណ៍ឬទេ? បើពួកគេមិនចេះទេ តើអ្នកអាចធ្វើអ្វីខ្លះដើម្បីជួយពួកគេឲ្យរៀនផ្ចង់អារម្មណ៍?
យោបល់៖ សូមជួយកូនឲ្យយល់ថាបើគាត់បង្វែរអារម្មណ៍ពីអ្វីៗដែលមាននៅក្នុងគ្រឿងអេឡិចត្រូនិក នោះគាត់នឹងចំណាយយពេលច្រើនជាងដើម្បីធ្វើកិច្ចការសាលាដែលគ្រូដាក់ឲ្យ ហើយគាត់នឹងមិនសូវមានពេលធ្វើអ្វីផ្សេងទៀតដែលគាត់ចង់ធ្វើនោះទេ។
ការយល់។ សៀវភៅមួយបានរៀបរាប់ថា៖«ការស្រាវជ្រាវជាច្រើនបានបង្ហាញថា ពេលដែលមនុស្សអានអ្វីមួយតាមគ្រឿងអេឡិចត្រូនិក ពួកគេមិនយល់អ្វីដែលពួកគេអានដូចពេលដែលពួកគេអានតាមឯកសារបោះពុម្ពទេ»(Be the Parent, Please)។
មូលហេតុមួយគឺថាមនុស្សដែលអានតាមគ្រឿងអេឡិចត្រូនិកច្រើនតែអានលឿនៗ ពួកគេមិនបានគិតយ៉ាងជ្រាលជ្រៅអំពីនោះទេ។ អ្នកនិពន្ធម្នាក់ឈ្មោះនីកូឡាស ខារ បានរៀបរាប់ថា៖«តាមអ៊ីនធឺណិត យើងចង់ទទួលព័ត៌មានឲ្យបានច្រើននិងយ៉ាងលឿនតាមដែលយើងអាចធ្វើបាន»។b
ពិតមែន ពេលខ្លះការអានលឿនមានប្រយោជន៍ដែរ។ ប៉ុន្តែ អ្នកនិពន្ធនោះកត់សម្គាល់ថា បញ្ហាគឺថានោះ«នឹងក្លាយជារបៀបអានរបស់យើង»។ ជាលទ្ធផល កូនរបស់អ្នកនឹងមានទម្លាប់អានលឿន ហើយមិនសូវយល់អ្វីដែលពួកគេអានទេ។
គោលការណ៍គម្ពីរ៖ «ក្រៅពីអ្វីទាំងអស់ដែលកូនខំរក កូនក៏ត្រូវខំរកឲ្យបានការយល់ដឹងដែរ»។—សុភាសិត ៤:៧
សូមគិតអំពីនេះ៖ មិនថាអានតាមឯកសារបោះពុម្ពឬឯកសារអេឡិចត្រូនិក តើតាមរបៀបណាអ្នកអាចជួយកូនរបស់អ្នកឲ្យរៀនស្រាវជ្រាវអំពីប្រធានបទមួយឲ្យបានជ្រាលជ្រៅជាង?
យោបល់៖ សូមមានតុល្យភាព។ អ្នកមិនត្រូវប្រើតែឯកសារបោះពុម្ពឬតែឯកសារអេឡិចត្រូនិកនោះទេ។ ទាំងពីរមានប្រយោជន៍។ តាមពិត លក្ខណៈពិសេសខ្លះនៃឯកសារអេឡិចត្រូនិកអាចជួយឲ្យយើងស្រួលយល់ជាង។ ដូច្នេះ ជាការសមហេតុសមផលឲ្យអ្នកពន្យល់ប្រាប់កូនអំពីអត្ថប្រយោជន៍និងគុណវិបត្តិនៃការអានតាមវិធីទាំងពីរនោះ។ សូមចាំដែរថា កូនម្នាក់ៗគឺខុសៗគ្នា។
ចងចាំអ្វីដែលអ្នកអាន។ អត្ថបទមួយក្នុងទស្សនាវដ្ដី(Scientific American) បុរសម្នាក់ឈ្មោះហ្វឹរឹស ចាបឹ បានប្រៀបធៀបការអានពីឯកសារបោះពុម្ពនិងពីឯកសារអេឡិចត្រូនិកថា ការអានពីឯកសារអេឡិចត្រូនិក«ធ្វើឲ្យខួរក្បាលយើងអស់កម្លាំងជាង . . . ហើយពិបាកឲ្យយើងចងចាំព័ត៌មានដែលយើងអានជាងដែរ»។
ជាឧទាហរណ៍ ការអានតាមឯកសារបោះពុម្ពអាចជួយអ្នកឲ្យចាំចំណុចណាមួយ ដោយសារអ្នកចាំកន្លែងដែលអ្នកបានឃើញ។ នេះអាចប្រដូចទៅនឹងប្រដាប់ខ្ទាស់សៀវភៅ ដើម្បីជួយអ្នករកឃើញចំណុចនោះម្ដងទៀត។
បន្ថែមទៅទៀត អ្នកស្រាវជ្រាវខ្លះបានរកឃើញថាអស់អ្នកដែលអានតាមឯកសារបោះពុម្ពច្រើនតែចងចាំព័ត៌មានបានល្អជាង។ ពួកគេអាចនឹកចាំព័ត៌មានទាំងនោះ ដោយសារពួកគេរៀនអំពីនោះបានប្រសើរជាង។
គោលការណ៍គម្ពីរ៖ «ចូររក្សាទុកប្រាជ្ញា ហើយការពារសមត្ថភាពរិះគិត»។—សុភាសិត ៣:២១
សូមគិតអំពីនេះ៖ តើកូនៗរបស់អ្នកពិបាកយល់ឬចងចាំអ្វីដែលគាត់បានអានឬសិក្សាឬទេ? បើមែន តើតាមរបៀបណាអ្នកអាចជួយឲ្យកូនរបស់អ្នកមានទម្លាប់សិក្សាកាន់តែប្រសើរជាង? តើការប្រើឯកសារបោះពុម្ពនឹងជួយគាត់ឬទេ?
យោបល់៖ សូមពិចារណាមើលថាតើវិធីណាដែលកូនរបស់អ្នករៀនបានល្អជាង មិនមែនអាស្រ័យទៅលើចំណង់ចំណូលចិត្តរបស់កូនទេ។ មនុស្សស្រួលនិយាយថាពួកគេអាចអានបានល្អជាងពីគ្រឿងអេឡិចត្រូនិក តែមិនមែនដូច្នោះទេ។