របៀបបំបាត់ចោលការស្អប់គ្នា
៤ | យកឈ្នះការស្អប់ដោយទទួលជំនួយពីព្រះ
សេចក្ដីបង្រៀនក្នុងគម្ពីរ:
«ផលដែលបង្កើតដោយឫទ្ធានុភាពរបស់ព្រះគឺ សេចក្ដីស្រឡាញ់ អំណរ សេចក្ដីសុខសាន្ត ចិត្តអត់ធ្មត់ សេចក្ដីសប្បុរស គុណធម៌ ជំនឿ ចិត្តស្លូតបូត ការចេះទប់ចិត្ត»។—កាឡាទី ៥:២២, ២៣
នេះមានន័យថា:
យើងអាចបំបាត់ការស្អប់បាន ដោយមានជំនួយពីព្រះ។ ឫទ្ធានុភាពបរិសុទ្ធរបស់លោកអាចជួយយើងឲ្យបង្កើតគុណសម្បត្តិផ្សេងៗ ដែលយើងប្រហែលជាមិនអាចបង្កើតបានដោយខ្លួនឯង។ ជាជាងពឹងផ្អែកលើកម្លាំងរបស់ខ្លួនដើម្បីយកឈ្នះការស្អប់ គឺជាការល្អដែលយើងពឹងផ្អែកលើជំនួយដែលព្រះផ្ដល់ឲ្យ។ បើយើងធ្វើដូច្នេះ យើងអាចមានអារម្មណ៍ដូចសាវ័កប៉ូលដែលបានសរសេរថា៖ «ខ្ញុំមានកម្លាំងសម្រាប់អ្វីៗទាំងអស់ ដោយសារលោកដែលផ្ដល់កម្លាំងឲ្យខ្ញុំ»។ (ភីលីព ៤:១៣) ដូច្នេះយើងអាចនិយាយថា៖ «ជំនួយរបស់ខ្ញុំមកពីព្រះយេហូវ៉ា ជាព្រះដែលបានបង្កើតមេឃនិងផែនដី»។—ចម្រៀងសរសើរព្រះ ១២១:២
របៀបដែលខគម្ពីរនេះអាចជួយអ្នក:
«ព្រះយេហូវ៉ាបានផ្លាស់ប្ដូរខ្ញុំពីមនុស្សដែលឃោរឃៅទៅជាមនុស្សដែលធ្វើឲ្យមានសន្តិភាព»។—វ៉ាលដូ
អធិដ្ឋានដោយស្មោះទៅព្រះយេហូវ៉ា ដើម្បីសុំឫទ្ធានុភាពបរិសុទ្ធរបស់លោក។ (លូកា ១១:១៣) សុំលោកឲ្យជួយអ្នកចេះបង្ហាញគុណសម្បត្តិល្អៗក្នុងជីវិតរស់នៅរបស់អ្នក។ រៀនពីអ្វីដែលគម្ពីរចែងស្ដីអំពីគុណសម្បត្តិផ្សេងៗដែលអាចយកឈ្នះការស្អប់ដូចជា សេចក្ដីស្រឡាញ់ សេចក្ដីសុខសាន្ត ចិត្តអត់ធ្មត់ និងការចេះទប់ចិត្ត។ សូមព្យាយាមស្វែងរករបៀបដែលជួយអ្នកឲ្យបណ្ដុះគុណសម្បត្តិទាំងនោះក្នុងជីវិតរបស់អ្នក។ ហើយសូមសេពគប់ជាមួយអស់អ្នកដែលព្យាយាមបណ្ដុះឲ្យមានគុណសម្បត្តិទាំងនោះ។ ពួកគេទាំងនោះអាចជួយ«លើកទឹកចិត្ត[អ្នក]ឲ្យមានសេចក្ដីស្រឡាញ់ និងការប្រព្រឹត្តដែលល្អប្រសើរ»។—ហេប្រឺ ១០:២៤