Ebaruha Okwa Banya Efeso
5 Busana n’ekyo, mugherereraye Nyamuhanga ng’abaana banzwa, 2 kandi mulhole embere erilendera omo lhwanzo, ngoku Kristo nayu athwanza* n’eriyihayo busana nethu* ng’obuhere kandi kihongo, akakumbo ako Nyamuhanga akatsemera.
3 Eby’obutswatswa* n’obuli mulingo w’obukine kutse omururu isibyahulhawa nahake omo kathi-kathi kenyu, ngoku kitholere okwa babuyirire; 4 kutse emibere eyik’itha esisoni kutse emikanirye y’obukiru kutse erisatha omwa binywe by’esisoni—ebindu ebithatholere—aliwe omwakanya k’ekyo, muhe ewasingya. 5 Kundi munasi kino, eriyiminyirakyo, ngoku sihali oyukakolha eby’obutswatswa* kutse omundu oyuthahenirye kutse ow’omururu, ekikamanyisaya eriramya esyosanamu, oyukendi syasighalya Obwami bwa Kristo kandi obwa Nyamuhanga.
6 Sihabye oyukabatheba omwa binywe ebithawithe mughaso, kundi busana n’emyatsi ng’eyo erihithana lya Nyamuhanga linemwasa okwa baana abathyowa. 7 Busana n’ekyo, isimwasangira haghuma nabo; 8 kundi mwanabya mwirima, aliwe lino muli kyakakalha erikwamana n’Omukama. Mulhole embere erilendera ng’abaana b’ekyakakalha, 9 kundi ebighuma by’ekyakakalha muli obuli mulingo w’obubuya n’ow’erithunganene n’ow’ekwenene. 10 Mulhole embere eriminya ndeke ebya Omukama akaligha; 11 kandi mulekere aho erisangira omwa mibiiri eyithawithe mughaso ey’omwirima; aliwe, mubisuleyo ngoku yiri. 12 Kundi emyatsi eyo bakakolha omwa bubiso-biso yikahemulha nibya n’eryahulhayo. 13 Neryo emyatsi yosi eyikabisulhawa* yikaminyikalha omwa kyakakalha, kundi obuli kindu ekikaminyikalibawa ni kyakakalha. 14 Busana n’ekyo, kikabughawa kithi: “Buka, iwe wuli omwa thulho, kandi hangana omwa baholi na Kristo akendi kukolerya.”
15 Neryo mulhole embere eriyitheya ndeke erilhangira muthi emibere eyo mukalenderamu siyiri ng’ey’abandu abathawithe menge aliwe ng’abawithe amenge, 16 erikolesya ndeke obuthuku* bwenyu, kundi ebiro ni bibi. 17 Busana n’omwatsi oyu mulekere aho eribya bakiru, aliwe mulhole embere eriminya erisonda lya Yehova nga ly’eryahi. 18 Kandi simuthamire omwa vini, kundi kikakolhaya okwa buthya-buthya,* aliwe mulhole embere eryosulhamo omulimu. 19 Mukaniranaye omwa syonyimbo, eripipa Nyamuhanga, n’omwa syonyimbo sy’obunyakirimu, eryimba kandi imunemuwatha omuziki omwa mithima yenyu oku Yehova, 20 mughulhu wosi imunemuha Nyamuhanga wethu kandi Thatha y’ewasingya busana n’obuli kindu omwa lina ly’Omukama wethu Yesu Kristo.
21 Mughonderane omw’ubaha Kristo. 22 Abakali baghondere bira babu ngoku bakaghondera Omukama, 23 kundi omulhume ya muthwe wa mukali wiwe ngoku Kristo ya muthwe w’ekithunga, eribya ini mulhamya w’omubiri oyu. 24 Ngoku ekithunga kikaghondera Kristo, abakali nabo batholere ibaghondera bira babu omwa buli kindu. 25 Abiba, mulhole embere erianza bakali benyu, ngoku Kristo nayu anza ekithunga n’eriyihayo busana nakyo, 26 nuku angakiyira mwa kibuyirire, erikyerya omw’ikyoya omwa maghetse erilhabira omwa kinywe, 27 nuku angahayo ekithunga okw’iyo omwa lhukengerwa lhwakyo, isikiriko karofu kutse omukunyu kutse ekindu kyosi-kyosi ekiri ng’ekyo, aliwe ikinabuyirire kandi isikiriko kahinira.
28 Omwa nzira iyan’eyo, abalhume batholere ibanza bakali babu ngoku banzire emibiri yabu. Omulhume oyuwanzire mukali wiwe akayanza, 29 kundi sihali omulhume oyuwabiripona omubiri* wiwe, aliwe akalisayagho n’erisughagho, ngoku Kristo akakolha ekithunga, 30 kundi thuli bitsuko by’omubiri wiwe. 31 “Busana n’eki, omulhume asyasigha thatha wiwe na mama wiwe n’erimathana* na mukali wiwe, n’ababiri basyabya mubiri mughuma.” 32 Embitha eyibuyirire eyi ni nyikulhu. Lino ng’akanaya oku Kristo n’okwa kithunga. 33 Aliwe, obuli mughuma w’okw’inywe atholere inianza mukali wiwe ngoku ayanzire; n’okwa lhundi lhuhandi, omukali atholere iniasikya kutsibu mwira wiwe.