July

Byonse Yesu byo aambile ne byo aubile kubikakotu ne bya kukumya byamwesheshenga milanguluko ya Shanji ne byo omvwa ku muchima. (Yoa. 14:9) Tubena kufunjilako ka ku bya kukumya byaubile Yesu? Yesu ne Yehoba betutemwa bingi. Yesu byo ajinga pano pa ntanda, wamwesheshe byo atemwa bantu kimye kyo aubilenga bya kukumya ne kukwasha bamanaminenga. Kimye kimo, banabalume babiji bampofu babijikile’mba Yesu ebakwashe. (Mat. 20:30-34) “Wibobijile lusa” ne kwibabuka. Kyambo kya Kingiliki kyo batuntulula’mba “wibobijile lusa,” kilumbulula kifyele kyo ajinga nakyo. Kifyele kya uno mutundu kyo kyalengejile Yesu kumwesha butemwe, kujisha mabumba ajinga na nzala ne kubuka wakolelwe mbumba. (Mat. 15:32; Mako 1:41) Twakonsha kushiinwa’mba Yehoba, Lesa wa “kifyele” ne mwananji betutemwa bingi. Kabiji kibakola bingi ku muchima inge tubena kumanama. (Luka 1:78; 1 Pe. 5:7) Bakebesha bingi kufumyapo makatazho onse apitamo bantu. w23.04 3 ¶4-5

Kechi twafwainwa kutanganga ne kutelekanga ku bintu byatama biji mu ino ntanda ya kwa Satana ne. Umvwe saka tutanga ne kufunda Baibolo, milanguluko yetu ikekala yawama. Kabiji kutaanwa ku kupwila ne kusapwila kimye kyonse kukazhikijila milanguluko yetu. Yehoba witulaya’mba kechi uketuleka kupita mu lweseko lwakila bulume bwetu ne. (1 Ko. 10:12, 13) Ano moba akatazha, o moba o twafwainwa kulomba na mukoyo atweba bonse pa muntu pa muntu kwi Yehoba pa kuba’mba tutwajijile kwikala ba kishinka. Yehoba ukeba atweba ‘kumubuula biji ku michima yetu.’ (Sala. 62:8) Totainga Yehoba ne kumusanchila pa bintu byonse byo emubila. Umvwe muji mu mwingilo wa kusapwila lombai pa kuba’mba emukwashe kuchinchika. Musashijilai kuba’mba emukwashe kuyuka mwakubila na makatazho onse ne kushinda meseko onse. Kange muleke kintu nangwa muntu kwimulengela kuzhikilwa kwa kubula kwikalapo na kimye kya kulomba kwi Yehoba ne. w23.05 7 ¶17-18

Mambo ka o tuyila ku kupwila? Tuya na kutota Yehoba. (Sala. 26:12; 111:1) Kabiji tutaanwa ku kupwila pa kuba’mba twitundaike atweba bene na bene mu bino bimye byakatazha. (1 Tesa. 5:11) Umvwe twakumbulapo, tutota Lesa ne kutundaika bakwetu. Bino kuji bintu byakonsha kwitulengela kubula kukumbulapo, nabiji kumvwa moyo inge ketukebe kukumbulapo nangwa kampe tukeba kukumbulapo bimye byavula pano bino kechi betutongola ne. Ñanyi kintu kyakonsha kwitukwasha? Mutumwa Paulo waambile’mba twafwainwa kuta muchima pa ‘kwitundaika atweba bene na bene.’ Umvwe twavuluka’mba twakonsha kutundaika bakwetu ne kumwesha lwitabilo lwetu patoka na byambo bicheche, kechi tukomvwanga moyo wa kukumbulapo ne. Kabiji inge kechi twakumbulapo bimye byavula ne, twafwainwa kumvwa bulongo mambo bakwabo mu kupwila bakumbulapo.​—1 Pe. 3:8. w23.04 20 ¶1-3

Myaka 70 byo yapwile, mfumu waambijile Bayudea bajinga mu Babilona kubwela kwabo ku Isalela. (Eze. 1:2-4) Yehoba ye yenkatu wafwainwe kuba kino. Mambo Babilona javula wakananga kukasulula bakaili banji kubwela kwabo. (Isa. 14:4, 17) Bino pa kikye kimye Babilona bamushinjile, kabiji mfumu washinjile wakambizhe Bayudea kubwela. Kino kyalengejile Bayudea bonse kikatakata bansemi kufuukulapo kwikala monka mu Babilona nangwa kubwela kwabo. Kechi kyapeelejile bansemi kufuukulapo kyo bafwainwe kuba ne. Bavula bakonsheshe kukankalwa kwenda museke walepa mambo bakotele. Kabiji Bayudea bavula basemekejilwe mu Babilona. Kafwako kukwabo ko bakikelepo kala ne. Abo kechi balangulukilenga’mba ku Isalela ko kwajinga kwabo ne, pano bino bayukile’mba ko kwafumine bashakulu babo. Bayudea bamo bajinga bingi na bunonshi mu Babilona. Kabiji kampe kyakatezhe bingi kusha mazubo abo awama ne busulu bwabo ne kuya ku mpunzha yo babujile kuyuka. w23.05 14 ¶1-2

Mambo a Lesa etutundaika kutwajijila kuchinchika, kwikala na kifyele ne butemwe. Luka 21:19 waamba’mba: “Umvwe mwachinchika, mukapulusha bumi bwenu.” Kolose 3:12 waamba’mba: “Vwalai . . . kifyele.” Kabiji 1 Tesalonika 4:9, 10 waamba’mba: “Lesa wimufunjisha kwitemwa [anweba] bene na bene. . . . Bino balongo bami, tubena kwimutundaika namba, mukijishemotu kuba kino.” Bino byambo byonse bebinembejile baana ba bwanga bamwesheshenga kuchinchika, kifyele ne butemwe. Nangwa byonkabyo batwajijile kufunda byo bafwainwe kumweshanga bino byubilo. Ne atweba byo byo twafwainwa kubanga. Kuyuka bena Kilishitu batanshi byo bamwesheshe bino byubilo kusakwimukwasha kuyuka ne anweba byo mwafwainwa kuba. Kepo mukamona byo mwafwainwa kulondela byaubile baana ba bwanga ne kumwesha’mba mwinengezhezha jimo malwa akatampe saka akyangye kutendeka. Kepo malwa akatampe byo akatendeka, akataana mwafunda kala kuchinchika kabiji mukatwajijila kuchinchika. w23.07 3 ¶4, 8

Inge twashingwa nangwa twi “mikooko ikwabo,” twafwainwa kutwajijila kwenda mu “Mukwakwa Wazhila.” Kuba bino kuketulengela kutwajijila kupopwela Yehoba byo tubena kutengela Bufumu bwa Lesa kuleta bintu byawama pano pa ntanda. (Yoa. 10:16) Kutendekatu mu 1919 C.E., ma milyonyi a banabalume, banabakazhi ne baana bafuma mu Babilona Mukatampe, ko kuba’mba bupopweshi bwa bubela bwa ntanda yonse kabiji babena kwenda mu mukwakwa wa kifwanyikizho. Yehoba wazhikijile Bayudea bafuminenga mu Babilona ku bintu byafwainwe kwibalengela kubula kwenda bulongo mu jishinda jabo. (Isa. 57:14) Nga Yehoba wauba ñanyi kintu ku “Mukwakwa Wazhila” wa mu ano moba? Pa myaka yavula mwaka wa 1919 saka akyangye kufika, Yehoba watendekele kwingijisha banabalume ba kishinka kukwasha bakwabo kufuma mu Babilona Mukatampe. (Esakanyaiko Isaya 40:3.) Bano banabalume baingijile bingi na ngovu kukwasha bantu bajinga na michima ya bukishinka kufuma mu bupopweshi bwa bubela ne kwibalengela kutendeka kupopwela Yehoba na bantu banji. w23.05 15-16 ¶8-9

Yehoba ukeba atweba kumwingijila na lusekelo ne kwipana. (2 Ko. 9:7) Onkao mambo, nanchi twakonsha kwikanjikizha kufikizha kikonkwanyi kyo twamona’mba kechi twakonsha kwikifikizha nenyi? Langulukai pa byaubile mutumwa Paulo. Waambile’mba: “Mpumapuma mubiji wami ne kumutwala mu buzha.” (1 Ko. 9:25-27) Nangwatu kimye Paulo kyo abujile kizaku kya kuba bintu byakebelenga Yehoba amba obe, wikanjikizhe kuba byo byo bintu. Nanchi Yehoba wamwenejilemo lusekelo mu bintu byamubijile Paulo nyi? Ee. Kabiji Yehoba wamufwetele pa kwibikako kwanji. (2 Timo. 4:7, 8) Kyo kimotu, Yehoba utemwa bingi inge witumona na kwingijila pa kikonkwanyi kyetu nangwatu inge kechi tuji na kizaku kya kuba byobyo ne. Usangalala mambo a kuba’mba nangwa kya kuba bimye bimo kechi tutemwa kintu kyo tubena kuba ne, bino wayuka’mba tubena kwikyuba na mambo a kuba’mba twamutemwa. Byonkatu Yehoba byo apesheshe Paulo, ne atweba uketupesha inge twibikako. (Sala. 126:5) Kabiji inge twimwena Yehoba byo abena kwitupesha, tukekala na kizaku kya kwingila. w23.05 29 ¶9-10

Mutumwa Paulo waesakenye bantu bakabula kupuluka juba ja Yehoba ku bantu balaala. Bano bantu kechi bayuka bintu bibena kubiwa nangwa kimye byo kibena kwenda ne. Onkao mambo, kechi bakwatakanya bintu byanema bimweka nangwa kubapo kintu kimo ne. Bantu bavula bingi lelo jino bajitu nobe bantu balaala tulo. (Loma 11:8) Kechi baswa bishiino bimwesha’mba tubena kwikala mu “moba a kupelako” ne kuba’mba malwa akatampe ajitu pepi ne. (2 Pe. 3:3, 4) Bino kyanema bingi atweba kumvwina lujimuno lwa kutwajijila kwikala balaba. (1 Tesa. 5:6) Onkao mambo, twafwainwa kwikala bajimuka ne kulanguluka bulongo. Mambo ka? Twafwainwa kuba bino pa kuba’mba tubule kwivwanga mu milukuchi ya bumulwila ntanda ne kukeba kupwisha makatazho a bantu. Juba ja Yehoba byo jibena kufwenya pepi, kikakatazha bingi kubula kwivwanga mu bino bintu. Bino kechi twafwainwa kwakamwa pa byo tukakumbulanga ne, mambo mupashi wa Lesa uketukwasha kutekanya, kulanguluka bulongo ne kufuukula bintu bulongo.​—Luka 12:11, 12. w23.06 10 ¶6-7

Ñanyi kintu kiiya mu milanguluko yenu inge mwaumvwa jizhina ja kuba’mba Samisonyi? Kyamweka mulanguluka pa mwanamulume wajinga bingi na bulume. Byo ibyo. Pano bino, kimye kimo Samisonyi wafuukwile kintu kyamulengejile kumanama. Nangwa byonkabyo, Yehoba wateletu muchima pa bintu byawama byaubile Samisonyi byo amwingijilenga mu bukishinka ne kuswisha jishimikila janji kunembwa mu Baibolo kuba’mba tufunjileko. Yehoba waingijishe Samisonyi kwingila mingilo ya kukumya pa kukwasha bantu banji bena Isalela. Byo papichile myaka yavula kufuma pafwijile Samisonyi, Yehoba watangijile mutumwa Paulo kunemba jizhina ja kwa Samisonyi pamo na banabalume bakwabo bajinga bingi na lwitabilo. (Hebe. 11:32-34) Byaubile Samisonyi byafwainwa kwitutundaika. Waketekejile mwi Yehoba nangwatu kimye bintu kyo byakatezhe. Twafwainwa kufunjilako bintu bikwabo kwi Samisonyi. w23.09 2 ¶1-2

Tukatwajijila kuchinchika inge saka tulomba kwi Yehoba javula ne kumubuula bijikila byetu byonse. (1 Tesa. 5:17) Kampe pa kino kimye kechi mubena kupitapo mu lukatazho lukatampe ne. Nangwa byonkabyo, nanchi mulomba kwi Yehoba kuba’mba emukwashe umvwe mwazhingila, kechi mwayuka byo mwafwainwa kuba ne, nangwa inge kimumwekela kimushinka bulaka? Umvwe kimye kyonse mulomba kwi Lesa kuba’mba emukwashe mu bintu bicheche byo mupitamo pa juba pa juba, kechi mukazhinyazhinya kumubuula inge lukatazho lukatampe lwimufikila ne. Kepo mukashiinwa’mba Lesa wayuka kimye kyo afwainwa kwimukwasha kabiji ukemukwasha. (Sala. 27:1, 3) Umvwe luno tuchinchika meseko kiketupeelela bingi kuchinchika malwa akatampe inge akatendeke. (Loma 5:3) Mambo ka o twaambila bino? Balongo ne banyenga bavula bamba’mba kuchinchika lukatazho lumo kwibalenga kuchinchika ne lukwabo. Umvwe bachinchika lukatazho na bukwasho bwa Yehoba, lwitabilo lwabo lukoselako. Kabiji bayuka’mba Yehoba ukeba kwibakwasha. Na mambo a kuba’mba baitabila mwi Yehoba bachinchika lukatazho lukwabo lo bakonsha kupitamo.​—Yako. 1:2-4. w23.07 3 ¶7-8

Kwipelula ne kifyele bilengela Yehoba kubula kumina pa kintutu kimo. Yehoba waambijile Lota kupichila mu bamalaika amba anyemene ku mpunzha ya mitumba, Lota waumvwine bingi moyo. Onkao mambo, waambile’mba aye ne kisemi kyanji banyemene mu muzhi mucheche wa Zoala muzhi Yehoba ye akebelenga konauna. Yehoba kechi wakoselepotu’mba Lota alondele byamubuujile Lesa ne, pakuba waswishishe Lota kuya mu muzhi wa Zoala. Awa muzhi mucheche kechi bamonawine ne. (Nte. 19:18-22) Byo papichile myaka yavula, Yehoba wamwesheshe kifyele ku bangikazhi ba mu Ninevwa. Watumine ngauzhi Yona kuya na kwambila bantu baubilenga byatama kuba’mba Lesa ukonauna muzhi pamo ne abo. Bino bena Ninevwa byo balapijile, Yehoba wapimpwile mulanguluko ne kwibalekelako mambo kabiji kechi wibonawine ne.​—Yona 3:1, 10; 4:10, 11. w23.07 21 ¶5

Tufunjilako ka kwi Yehoashi? Wajinga nobe kichi kyajinga na mizhazhi yakankelwe kuya panshi. Muntu wamukwashishe aye Yehoyada byo afwile, Yehoashi watendekele kumvwina bansatuki kabiji walekele kwikala wa kishinka kwi Yehoba. Kino kibena kwitufunjisha kuba’mba, kechi twafwainwa kwakamwanga Yehoba na mambotu a kuba’mba kisemi kyetu ne bakwetu bena Kilishitu byo byo boba ne. Pa kuba’mba tutwajijile kufwenya kwipi ne Yehoba, twafwainwa kufundanga kimye kyonse, kulanguluka langulukapo ne kulomba. Kuba bino kuketulengela kubayisha butemwe bo twatemwa Lesa ne kumwakamwa. (Yele. 17:7, 8; Kolo. 2:6, 7) Yehoba kechi witukebela bintu byakila pa bulume bwetu ne. Byo akeba bebyambapo pa Musapwishi 12:13, paamba’mba: “Akamwainga Lesa wa kine ne kulama mikambizho yanji, mambo kino kyo kyafwainwa kuba bantu bonse.” Umvwe ke twakamwe Lesa, tukatwajijila kwikala ba kishinka nangwatu mu kimye kya meseko. Kafwako ukonauna bulunda bwetu ne Yehoba ne. w23.06 19 ¶17-19

Kyepelo 5 kyatatula’mba: “Awa waikele pa jitanda waambile’mba.” (Lum. 21:5a) Bino byambo byanema bingi mambo Yehoba mwine ye wibyamba bimye bisatu mu uno buku wa Lumwekesho, kechi muntu mukwabo ne, ko kuba’mba kechi malaika nangwa Yesu waambile bino byambo ne. Bino byambo bitulengela kuketekela byambo byanji byalondelapo. Mambo ka? Mambo Yehoba ke Lesa “ubula kubepa.” (Titu. 1:2) Onkao mambo, twakonsha kuketekela kuba’mba byambo byo tutanga pa Lumwekesho 21:5, 6 kine bikafika.Akilangulukai pa kyambo kya kuba’mba: “Tala!” Kyambo kya Kingiliki kyatuntululwa’mba “tala!” bekingijisha bingi javula mu buku wa Lumwekesho. Ñanyi byambo byaambile Lesa? Lesa waambile’mba: “Mbena kulenga bintu byonse kwikala ke bipya.” Yehoba ukapimpula bintu kulutwe. Na mambo a kuba’mba kechi ubena kuzhinauka ne, ubena kwamba kya kine kuba’mba bintu byo alaya kine ukebyuba. Waamba’mba watendeka kala kupimpula bino bintu.​—Isa. 46:10. w23.11 3-4 ¶7-8

Mutumwa Petelo watwajijile na kulubankanya. Twayai twisambe pa byamumwekejile. Yesu byo alumbulwile’mba bantu basakumumanyika ne kumwipaya kuba’mba afikizhe byaamba Binembelo, Petelo wabuujile Yesu amba kino kechi kisakwimumwekela ne. (Mako 8:31-33) Kabiji Petelo ne batumwa bakwabo bakitwajijiletu na kwipachika pa wajinga mukulumpe pe abo. (Mako 9:33, 34) Juba japeleleko Yesu saka akyangye kufwa, Petelo wakopwele muntu kutwi. (Yoa. 18:10) Pa jonkaja juba bufuku, Petelo na mambo a kuchiina bantu wakaine jisatu amba kechi wamuyuka Yesu ne. (Mako 14:66-72) Byo amwene’mba walenga mambo, Petelo wajijile bingi. Yesu kechi wakaine mutumwa wanji walefwilwe ne. Yesu byo bamusangwile, wakwashishe Petelo kumwesha’mba wamutemwa Yesu. Yesu waambijile Petelo amba afungenga mikooko yanji. (Yoa. 21:15-17) Petelo waswile kwingila mwingilo ye bamupeele. Wajinga mu Yelusalema pa juba ja Pentekosita kabiji wajinga pa bantu batanshi batambwijile mupashi wazhila. w23.09 22 ¶6-7

Mutumwa Petelo watundaikile bakulumpe mu kipwilo bakwabo amba: “Fungainga jitanga ja Lesa.” (1 Pe. 5:1-4) Inge mwi bakulumpe mu kipwilo, twayuka’mba mwatemwa bingi balongo ne banyenga mu kipwilo kabiji mukeba kwibakwasha. Nangwa byonkabyo, kimye kimo mwakonsha kulanguluka’mba mwapayankana bingi nangwa mwakooka kya kuba mwakankalwa ne kwingila uno mwingilo. Ñanyi kintu kyo mwafwainwa kuba? Lombai kwi Yehoba ne kumubuula bijikila byenu byonse. Petelo wanembele’mba: “Umvwe mukwabo wingila, aketekele mu bulume bupana Lesa.” (1 Pe. 4:11) Balongo ne banyenga bakonsha kupita mu makatazho akonsha kubula kupwa mu buno bwikalo. Bino vulukainga’mba “kafunga mwine mukatampe,” aye Yesu Kilishitu ukebakwasha. Wakonsha kwibakwasha luno ne mu ntanda ipya. Yehoba ukeba bakulumpe mu kipwilo kutemwa balongo ne banyenga, kwibakwasha ne kwikala “ba kumwenako jitanga.” w23.09 29-30 ¶13-14

Twafwainwa kuchinuzhuka milanguluko ya bantu babula kunemeka mizhilo ya Yehoba. Inge ke tulanguluke byonka bilanguluka bantu babula kunemeka mizhilo ya Yehoba, twakonsha kuleka kumukookela ne mizhilo yanji. (1 Ko. 3:19) “Maana a ba pano pa ntanda” alengela bantu kubula kukookela Lesa. Bena Kilishitu bamo bajinga mu Pelegamuma ne mu Tiyatila batendekele kuba bintu byatama ne kupopwela bankishi byonka byaubanga bantu bo baikalanga nabo kinkalankulo. Yesu wibajimwineko kyakosa bajinga mu byobya bipwilo bibiji mambo baswishishenga byubilo bya bulalelale. (Lum. 2:14, 20) Lelo jino, bantu ba mu kinkalankulo bakonsha kwitulengela kwikala na milanguluko yatama. Balongo betu ne bayukane bakonsha kutendeka kwitwambila’mba tukosesha bingi mizhilo ne kukeba’mba tubulenga kunemeka mizhilo ya Yehoba. Bakonsha kutendeka kwamba’mba kechi kyawama kutwajijila kwikala na byubilo byawama ne, ne kuba’mba mizhilo ya mu Baibolo yakanya kuba bulalelale ya kala kechi ingila luno ne. Bimye bimo, twakonsha kulanguluka’mba mizhilo ya Yehoba kechi twiyumvwisha ne. Twakonsha ne ‘kupitaila pa bintu byanembwa.’​—1 Ko. 4:6. w23.07 16 ¶10-11

Maliya inanji Yesu, wakebelenga kumukosesha. Kechi wasongwelwepo ne, pano bino, bamwambijile’mba ukemita. Kechi wajingapo na baana ne, pano bino, bamwambijile’mba ukasema mwana wamulume ukekala Mesiasa. Kabiji byo kiji kuba’mba kechi walaajilepo na mwanamulume kala ne, kyakonsheshe kumukatazha bingi kulumbulwila Yosefwa wamwipangwizhe kuba’mba waimita? (Luka 1:26-33) Maliya bamukoseshe byepi? Bamukwashishe ku bakwabo. Kwesakana na mwingilo ye bamupele, Maliya waipwizhe malaika aye Ngabaliela pa kino byo kyafwainwe kubiwa. (Luka 1:34) Palutwe kacheche, wayile ku kyalo kya mitumba kya Yuda na kufwakesha mulongo wanji aye Elisabeta. Elisabeta wasanchijile Maliya kabiji bamutangijile na mupashi wa Yehoba kumutundaika na bungauzhi bwaambile pa mwana wamulume ukasema Maliya. (Luka 1:39-45) Maliya waambijile Yehoba amba: “Wauba bintu bya bulume na kuboko kwanji.” (Luka 1:46-51) Yehoba waingijishe malaika Ngabaliela ne Elisabeta kukosesha Maliya. w23.10 14-15 ¶10-12

Baana ba bwanga ba kwa Kilishitu bashingwa na mupashi wazhila kabiji baji na bulunda bwanema bingi ne Yehoba. Bano ba 144,000 bakengila mwingilo wa buñanga mwiulu pamo ne Yesu. (Lum. 14:1) Kibamba kya Mwazhila kya mu tente wa lusambakeno kilumbulula’mba bashingwa na mupashi wa Lesa bekala baana ba Lesa ba ku mupashi kimye kyo bakiji pano pa ntanda. (Loma 8:15-17) Kibamba kya Mwazhijisha kya mu tente wa lusambakeno kimenako mwiulu mwine mwikala Yehoba. “Kipembe” kyaabenye Mwazhila ne Mwazhijisha kyaimenejilengako mubiji wa kwa Yesu wakonsheshe kumulengela kubula kutwela mwiulu ne kwingila mwingilo wa Buñanga Mwine Mukatampe mu nzubo ya Lesa ya ku mupashi. Yesu byo apaine mubiji wanji kwikala kitapisho kya kukuula bantu, washinkwijile bena Kilishitu bonse bashingwa jishinda ja kuya mwiulu. Nabo bafwainwa kusha mibiji yabo ya mashi pa kuba’mba bakekale bañanga pamo ne Kilishitu mwiulu.​—Hebe. 10:19, 20; 1 Ko. 15:50. w23.10 28 ¶13

Gidiona watekenye kimye bena Isalela kyo bamwambijile byambo byatama. (Mito. 8:1-3) Kechi wibakumbwile na bukaji ne. Wamwesheshe’mba wipelula ne kuteleka byo baambilenga kabiji waambile nabo bulongo ne kino kyafomwene bukaji bo bajinga nabo. Byonka byaubile Gidiona bakulumpe mu kipwilo bateleka ne kukumbula na jiwi jakooka inge bebambila byatama. (Yako. 3:13) Onkao mambo, batundaika mutende mu kipwilo. Gidiona byo bamutakaikile pa kushinda bena Mijanyi, aye wapaine lukumo kwi Yehoba. (Mito. 8:22, 23) Bakulumpe mu kipwilo bakonsha kulondela byepi byaubile Gidiona? Bafwainwa kupana lukumo kwi Yehoba pa byonse byo boba. (1 Ko. 4:6, 7) Umvwe mukulumpe mu kipwilo bamusanchila pa busendwe bwanji bwa kufunjisha, bafwainwa kwamba’mba mafunde onse afuma mu Mambo a Lesa kabiji byonse byo tufunda bifuma ku jibumba ja Lesa. Kimye kimo bakulumpe mu kipwilo bafwainwa kulanguluka pa byo babena kufunjisha inge bibena kuleta munema kwi Yehoba nangwa munema ubena kuya kwi abo bene. w23.06 4 ¶7-8

Umvwe twabula kutambula kintu kyo tubena kulomba, twafwainwa kwiipuzha kuba’mba, ‘Nanchi kintu kyo mbena kulomba kijitu bulongo nyi?’ Javula tulanguluka’mba kintu kyo mbena kulomba kyo kyawama. Pano bino, bintu bimo byo tulomba kechi byakonsha kwitukwasha ne. Inge tubena kulomba pa lukatazho lumo, kwakonsha kwikala jishinda jikwabo jawama kupwishishamo lukatazho kukila jo tubena kulombelamo. Kabiji bintu bimo byo tulomba bipusana na kyaswa muchima wa Yehoba. (1 Yoa. 5:14) Akilangulukai pa bansemi balombelenga kwi Yehoba kuba’mba akwashe mwanabo kutwajijila kumwingijila. Kino kyo balombelepo kyajingatu bulongo. Bino Yehoba kechi ukanjikizha bantu kumwingijila ne. Ukeba atweba bonse, kuvwangakotu ne baana kwifuukwilapo atweba bene kumwingijila. (Mpitu. 10:12, 13; 30:19, 20) Onkao mambo, bansemi bafwainwe kulomba kwi Yehoba kuba’mba ebakwashe kufika mwanabo pa muchima pa kumufunjisha ne kwifuukwilapo aye mwine kutemwa Yehoba ne kwikala mulunda nanji.​—Maana 22:6; Efi. 6:4. w23.11 21 ¶5; 23 ¶12

Mambo ka kutekenesha bakwetu o kwaikela jishinda jimo janema bingi jimwesha’mba twibatemwa? Kwesakana na buku umo waamba pa Baibolo, kyambo kya “kutekenesha” kyaingijishe Paulo kilumbulula “kwikala na muntu kipikipi saka ubena kumutekenesha inge ubena kupita mu lukatazho.” Onkao mambo, inge twatekenesha muntu ubena kupita mu lukatazho, tukamukwasha kutwajijila kwingijila Yehoba mu bukishinka. Kimye kyonse kyo twatekenesha mulongo nangwa nyenga, tumwesha’mba twamutemwa. (2 Ko. 7:6, 7, 13) Kumvwina muntu lusa ne kumutekenesha byendela pamo. Mu ñanyi jishinda? Muntu waumvwina mukwabo lusa ubena kupita mu lukatazho umutekenesha ne kumukwasha. Onkao mambo, tutendekelapo kumvwina muntu lusa apa bino twamutekenesha. Paulo walumbulula’mba Yehoba umvwina bantu lusa kabiji kino kimulengela kwibatekenesha. Paulo walumbulula Yehoba amba ye “Shanji bya lusa kabiji Lesa wa lutekenesho lonse.”​—2 Ko. 1:3. w23.11 9-10 ¶8-10

Baana ba bwanga bonse ba kwa Kilishitu bafwainwa kuketekela kupita mu bya malwa. Akilangulukai pa byamwekejile Paulo. Waambijile bajinga mu Tesalonika amba: “Byo twajinga nenu, twimubuujile jimo namba tukapita mu bya malwa, ne kumweka kyamweka.” (1 Tesa. 3:4) Kabiji wanembejile bena Kolinda amba: “Balongo bami, twakeba’mba twimubuule bya malwa byo twapichilemo . . . Kechi twaketekejile’mba tusakupuluka ne.” (2 Ko. 1:8; 11:23-27) Lelo jino, bena Kilishitu nabo bafwainwa kuketekela’mba bakapitanga mu bya malwa byapusana pusana. (2 Timo. 3:12) Na mambo a kuketekela mwi Yesu ne kumulondela balunda nenu ne bakilongo bakonsha kwimumanyika. Nanchi bakulumpe ba nkito bakimumanyikapo kala na mambo a kukeba kwikala ba kishinka mu bintu byonse nyi? (Hebe. 13:18) Abya ba mu kafulumende bakimukatazhapo kala na mambo a kubuulako bakwenu bintu byo mwaitabilamo nyi? Nangwa kya kuba tubena kupita mu bya malwa byapusana pusana, Paulo waambile’mba twafwainwa kutwajijila kwikala ba lusekelo. w23.12 10-11 ¶9-10

Yakoba wachinchikile makatazho avula bingi. Baana ba kwa Yakoba babiji abo ba Shimeona ne Levi baletele mwenga pa jizhina ja Yehoba mu kisemi. Kunungapo mukazhanji Yakoba ye atemenwe bingi aye Lechela wafwile pa kusema mwana wa bubiji. Kabiji Yakoba wavilukijile ku Ijipita na mambo a kipowe nangwa kya kuba wakotele. (Nte. 35:16-19; 37:28; 45:9-11, 28) Nangwa kya kuba Yakoba wapichilenga mu ano onse makatazho watwajijile na kuketekela mwi Yehoba ne mu milaye Yanji. Kabiji Yehoba wamwesheshe Yakoba amba wamutemwa. Yehoba wamupeele bintu byavula bingi. Yakoba wafwainwa wasanchijile bingi Yehoba byo amonañene jibiji na mwananji Yosefwa ye alangulukilenga kuba’mba wafwiletu kala. Yakoba wajinga na bulunda bwakosa ne Yehoba. Kino kyamulengejile kuchinchika makatazho. (Nte. 30:43; 32:9, 10; 46:28-30) Umvwe twaikala na bulunda bwakosa ne Yehoba, ne atweba tukachinchika makatazho onse o tupitamo. w23.04 15 ¶6-7

Salamo 23 ke lwimbo witulengela kuketekela’mba Yehoba witutemwa kabiji wa kifyele. Davida nembi wa uno Salamo, walumbulwile bulunda bwakosa bo ajinga nabo ne Yehoba Kafunga wanji. Davida waumvwanga kuzhikijilwa na mambo a kumutangijila kwi Yehoba kabiji kino kyamulengejile kuketekela bingi mwi aye. Davida wayukile’mba Yehoba ukatwajijila kumumwesha butemwe mu bwikalo bwanji bonse. Pano ñanyi kintu kyamulengejile kushiinwa’mba Yehoba ukatwajijila kumutemwa? Davida wayukile’mba Yehoba wamutele muchima mambo wamubilanga byonse byo akebanga. Davida wayukile’mba Yehoba wajinga mulunda nanji kabiji wamubilanga bibusa. O ene mambo o ayukijile’mba nangwa bintu bikakatazhepotu byepi kulutwe, Yehoba ukatwajijila kumubila bintu byonse byo akeba. Na mambo a kuba’mba Davida wayukile’mba Yehoba wamutemenwe bingi ne kumuta muchima, kino kyamulengejile kubula kwikala na bijikila ne kutwajijila kwikala wa lusekelo.​—Sala. 16:11. w24.01 29 ¶12-13

Kufumatu kimye kya Nkondo ya Bubiji ya Ntanda Yonse, bantu ba Yehoba bakasuluka kabiji babena kwingila mwingilo wa kusapwila mu byalo byavula. Uno mwingilo ubena kuyilako bingi palutwe. Lelo jino, ba mu Jibumba Jitangijila batwajijila kulondela lutangijilo lwa kwa Kilishitu. Bakeba mikambizho yo bapana mu jibumba jetu kuyila mwayila bikeba Yehoba. Kabiji bengijisha bakalama ba mwanzo ne bakulumpe mu kipwilo kupana mikambizho mu bipwilo. Bakulumpe mu kipwilo bashingwa kuvwangakotu ne bakulumpe mu kipwilo babula bashingwa bonse baji mu ‘kuboko kwa kilujo’ kwa Kilishitu. (Lum. 2:1) Nangwa byonkabyo, bano bakulumpe bonse bambulwa kulumbuluka kabiji nabo balubankanya. Pa bimye bimo, Yoshua ne Mosesa balubankanyanga byonka byaubanga ne batumwa. (Bala. 20:12; Yosh. 9:14, 15; Loma 3:23) Ne lunotu, Yesu ubena kutangijila kalume wa kishinka ne bakulumpe mu bipwilo, kabiji ukatwajijila kwibatangijila. Onkao mambo, tuji na bishinka byavula bya kwitulengela kuketekela mu lutangijilo lwanji kupichila mu boba bo atongola. w24.02 23-24 ¶13-14

Lelo jino, twakonsha kutokesha Yehoba ku muchima inge ketwambe pe aye ne kumwesha’mba tumusanchila kabiji amba twamutemwa bingi. Umvwe tuji mu mwingilo, twafwainwa kuyuka’mba mwingilo wetu mukatampe ke wa kukwasha bantu kufwenya kwipi ne Yehoba ne kwibalengela kutemwa Shetu wa mwiulu byonka byo twamutemwa. (Yako. 4:8) Tumvwa bingi bulongo kubuula bantu pe Yehoba byo bamulumbulula mu Baibolo amba wa butemwe, wa bololoke, wa maana, wa bulume ne byubilo bikwabo byawama. Kabiji tutota Yehoba ne kumutokesha ku muchima inge ketwibikeko kwikala na byubilo byonka byo ajipo nabyo. Umvwe twauba bino, tukapusanako na bantu ba mu ino ntanda yatama. Bantu bakamona’mba twapusanako ne abo. Kabiji bakakeba kuyuka ene mambo o twapusenako. (Mat. 5:14-16) Inge tubena kwisamba nabo nangwa inge tuji nabo pa nkito, twakonsha kwibalumbulwila ene mambo o twapusenako. Kabiji kino kikalengela bantu baji na michima ya kishinka kufwenya kwipi ne Lesa. Umvwe ketutote Yehoba mu ano mashinda, tukasangajika muchima wanji.​—1 Timo. 2:3, 4. w24.02 10 ¶7

Pa kuba’mba mwikale banabalume bena Kilishitu bengijila bulongo Yehoba, mwafwainwa kufundapo bintu byakonsha kwimukwasha kumwingijila bulongo. Bino bintu bikemukwasha kwingila bulongo mingilo mu kipwilo, kutaana nkito ne kwiingila bulongo pa kuba’mba mumwenengamo mali a kwikwashishamo anweba pamo ne kisemi kyenu. Kabiji bikemukwasha kukosesha bulunda bwenu na bakwenu. Fundai kutanga ne kunemba bulongo. Baibolo wamba’mba mwanamulume wa lusekelo kabiji uba bulongo utanga Mambo a Lesa pa juba pa juba ne kulanguluka langulukapo. (Sala. 1:1-3) Kutanga Baibolo pa juba pa juba kukamukwasha kulanguluka pa bintu monka mukebela Yehoba ne kuba bintu kwesakana na byaamba Binembelo. (Maana 1:3, 4) Banabalume bayuka kufunjisha kabiji bengijisha binembelo kutundaika bakwabo, bakebewa mu kipwilo pa kuba’mba bakwashenga balongo ne banyenga. Umvwe mwayuka kutanga ne kunemba bulongo, mukanengezhanga bulongo majashi ne mikumbu ifika bantu pa muchima. Kabiji kikemupelela kunemba bishinka bikemukwasha kukosesha lwitabilo lwenu ne kutundaika bakwenu. w23.12 26-27 ¶9-11

Umvwe mwaumvwa moyo, languluka langulukainga pa bintu biji kulutwe Yehoba byo akoba inge Satana bamuzhiya. Kimwesho kyo twatambile pa kushonkena kwa kijiiji kwa mu 2014 kyamwesheshe nsemi wamulume wisambilenga na kisemi kyanji mo bakonsha kutangila kinembelo kya 2 Timoti 3:1-5 inge twikyesakanya ku bikamweka mu Paladisa. Waambile’mba: “Mu ntanda ipya mukeya bimye byawama. Mambo bantu bakatemwa bakwabo, bakatemwa bukine, bakekala bakimote, bepelula, batota Lesa, bakookela bansemi, basanta, ba kishinka, baji na butemwe, bomvwañana, bamba byawama pa bakwabo, bekanya, ba lusa, batemwa kyawama, baketekelwa, bomvwa, babula kwitota, batemwa Lesa mu kifulo kya kutemwa bya kisangajimbwe, baji na munema wa kunemeka Lesa, kabiji bantu ba uno mutundu upwanañanenga nabo.” Nanchi mwisamba na kisemi kyenu nangwa na bapopweshi bakwenu bikekala bwikalo mu ntanda ipya nyi? w24.01 6 ¶13-14

Kitutekenesha bingi kuyuka’mba Yehoba watemwa bantu banji bonse. Baibolo waamba’mba: “Yehoba usekela mu bantu banji.” (Sala. 149:4) Nangwa byonkabyo, bamo pa bimye bimo balefulwa kabiji kino kibalengela kwiipuzha’mba, ‘Nanchi Yehoba usekela mwi amiwa nyi?’ Bapopweshi ba Yehoba ba kishinka bavula bajingako mu moba a kala nabo baumvwanga bino pa bimye bimo. (1 Sam. 1:6-10; Yoba 29:2, 4; Sala. 51:11) Baibolo umwesha patooka’mba bantu bambulwakulumbuluka bakonsha kwitabilwa kwi Yehoba. Mu ñanyi mashinda? Twafwainwa kwikala na lwitabilo mwi Yesu Kilishitu ne kubatizhiwa. (Yoa. 3:16) Kino kimwesha patooka’mba twalapila kabiji twalaya Lesa amba tukobanga kyaswa muchima wanji. (Byu. 2:38; 3:19) Yehoba utemwa bingi inge twalondela ano mashinda pa kuba’mba twikale balunda nanji. Inge twatwajijila kwingila na ngovu kwesakana na byo twamulayile, Yehoba witubila bibusa ne kwikala balunda nanji.​—Sala. 25:14. w24.03 26 ¶1-2

Umvwe kya kuba kafulumende witukanya kusapwila, twafwainwa kutwajijila kusapwila byonka byaubile baana ba bwanga. Twafwainwa kuketekala’mba Yehoba uketukwasha kwingila bulongo mwingilo wetu wa kusapwila. Onkao mambo, twafwainwa kulombanga kwi Yehoba kuba’mba etupe maana ne kwitukwasha kuchinchika. Lombainga kwi Yehoba kuba’mba emukwashe kuchinchika makatazho. Atweba bavula tubena kumanama na mambo a kukolwa nangwa kwikala na bijikila, kufwisha mulongo nangwa mulunda netu, lukatazho mu kisemi, kwitukanya nangwatu makatazho akwabo. Bintu nabiji myalo ne makondo byalengela ano makatazho kubayilako kya kuba kechi twayuka mwakubila ne. Buulai Yehoba byo mubena kumvwa ku muchima. Mubuulai bintu byonse byo mubena kupitamo byonkatu byo mwakonsha kubuula mulunda nenu. Ketekelai kuba’mba Yehoba ‘ukemukwasha.’ (Sala. 37:3, 5) Kulomba na mukoyo kuketukwasha ‘kuchinchika mu bya malwa.’ (Loma 12:12) Yehoba wayuka bintu bibena kupitamo bapopweshi banji kabiji “umvwa kujila kwabo kwa kukeba bukwasho.”​—Sala. 145:18, 19. w23.05 5-6 ¶12-15

Umvwe tubena kukeba kufuukula bintu byanema, twafwainwa kuyukanga “kyaswa muchima wa Yehoba” ne kubila bintu monka mwayila kyaswa muchima wanji. (Efi. 5:17) Inge twayuka mafunde a mu Baibolo o twakonsha kwingijisha pa kyo tukeba kufuukula, ko kuba’mba tubena kukeba milanguluko ya Lesa pa kintu kyo tubena kufuukula. Inge twaingijisha mafunde anji, tukafuukula bintu bulongo. Mulwanyi wetu “aye mubi” kabiji Satana, ukeba atweba kupayankana na kuba bintu bya mu ino ntanda pa kuba’mba tukankalwenga kwikala na kimye kya kwingijila Lesa. (1 Yoa. 5:19) Mwina Kilishitu wakonsha kwiyeka na kukeba mali, kukeba kufunda kufika palepa nangwa kutwezhamo ne mutwe mu nkito mu kifulo kya kwingijila Yehoba. Inge mwina Kilishitu wauba bino, ko kuba’mba watendeka kulanguluka nobe bantu ba mu ino ntanda babula kwingijila Yehoba. Bino bintu kechi byatama ne, pano bino, kechi byo byo twafwainwa kutangizhako mu bwikalo bwetu ne. w24.03 24 ¶16-17