Ikalai na Bukishinka Byonka Byajinga Itai

“ANWEBA Nkambo Lesa, Wa bulume bonse, mingilo yenu yo ikatampe ne ya kukumya; ne anweba Mfumu wa myaka mashinda enu aoloka ne a kine. Nkambo, ñanyi ukabula kwakamwa ne kutumbijika jizhina jenu? mambo anweba yenka mwazhila.” Uno lwimbo ye baimbile mwiulu ku boba “bashinjile awa lukinyama, ne kipashañano kyanji” umwesha bukishinka bwa Lesa. (Lum. 15:2-4) Yehoba ukeba bapopweshi banji kwikala byonka byo aji kupichila mu kumwesha kino kyubilo kyawama.

Pano Satana Diabola aye wingila papelela bulume bwanji mu kwabanya bakalume ba Lesa panopantanda ku butemwe bwa Lesa ye bapopwela. Nangwa kikale byonkabyo, bavula batwajijila kwikala bakishinka kwi Lesa, nangwatu mu bimye byakilamo kutama. Byo tumusanchilapo Yehoba pa kuyuka’mba wanemeka bingi kuno kwipana! Kya kine, betulaya’mba: “Yehoba watemwa buchibamambo bwaoloka, Ne kwibalekelela bazhijikwa banji ne.” (Sala. 37:28) Pa kuba’mba twikale bakishinka, wanemba mu Mambo anji byubilo bya bantu bavula bajinga bakishinka. Jishimikila jimo ke ja kwa Itai mwina Gata.

‘Mwenyi Wapangilwe Kwabo’

Itai wajinga ngikazhi wa mu muzhi wayile bingi nkuwa wa Gata ku Filishitiya, kwaikalanga kiyangala Goliata ne balwanyi bakwabo ba bena Isalela bashinchile bingi. Kimye kitanshi kyo bamwambapo uno Itai muntu wakosele mu nkondo kyajinga kimye Abisalomo kyo amusatukijile Mfumu Davida. Itai ne banabalume 600 bena Filishitiya bamulondejile pa kyokya kimye baikalanga mu buzha ku Yelusalema.

Bintu byapichilemo Itai ne bantu banji byo byalengejile Davida kuvuluka moba anji o ajinga mu buzha kimye aye ne bena Isalela 600 bakosele mu nkondo kyo bayile ku Filishitiya ne kutwela mu bufumu bwa kwa Akishi, mfumu wa bena Gata. (1 Sam. 27:2, 3) Pano nga Itai ne banabalume banji baubilepo ka kimye Davida kyo bamusatukijile ku mwananji Abisalomo? Abya bakonsheshe kumukwashako Abisalomo nyi, nangwa kwikalatu kwa kubula kukwashañana, inyi kumukwashako Davida ne banabalume banji?

Akifwanyikizhai Davida saka abena kunyema mu Yelusalema, waya wakemana pa mpunzha imo itelwa’mba Bete-melihaka, ko kulumbulula’mba, “Nzubo Yapelako.” Kampe yo yajinga nzubo yapeleleko mu Yelusalema kuya ja ku Mutumba wa Olobeta saka mukyangye kwabuka Kakola ka Kidelona. (2 Sam. 15:17) Byo bajinga kuno, Davida watendekele kumona bashilikale banji byo bapichilenga. Wataine kuba’mba kechi wajingatu na bena Isalela bakishinka bonka ne, bino ne bonse bena Keleta ne bonse bena Peleta. Kabiji kwajinga ne bonse bena Gata, ko kuba’mba Itai ne nzhita yanji 600.—2 Sam. 15:18.

Byo amumvwijile lusa, Davida waambijile Itai amba: “Mambo ka obewa o ubenakuyila ne atweba? Bwelanga ukekale ne mfumu Abisalomo; mambo ne obewa wi mwenyi wapangilwe kwenu. Obewa waishiletu kesha, nanchi amiwa ja lelo nkupishengamo byepi kamukuwe pa kuya ne atweba byo nabula kuyuka ne ko ngya? Obewa bwelamo ne balongo bobe pamo; bya lusa ne bya bukishinka bikale pe obewa.”—2 Sam. 15:19, 20.

Itai waambile byambo bya kumwesha bukishinka. Wakumbwile’mba: “Monka mwaikela Yehoba na bumi, kabiji ne monka mo mwaikela anweba nkambo yami mfumu na bumi, kinetu konse ko mukekala anweba nkambo yami mfumu, nangwa mu lufu nangwa mu bumi, i ko ne amiwa kalume wenu ko nkekala.” (2 Sam. 15:21) Kino kyafwainwa kyavulwilemo Davida byambo bimotu byonka byaambile mushakulu wanji Luta. (Luta 1:16, 17) Byambo byaambile Itai byamwikele bingi Davida ku muchima, kepo amwambijile Itai amba: “Nanchi pita, utangileko” ne kwabuka Kakola ka Kidelona. Byo bamwambijile bino byambo, “ponkapo Itai, mwina Gata, watangijileko ne bantu banji bonse, ne twanyike tucheche to ajinga nato pamo.”—2 Sam. 15:22.

“Kufunda Kwetu”

Loma 15:4 waamba’mba: “Byonse byanembelwe kala byanembejilwe kufunda kwetu.” Onkao mambo twafwainwa kwipuzha’mba, Mafunjisho ka o twakonsha kufunda kwi Itai? Akimonai kyamulengejile kwikala wa kishinka kwi Davida. Nangwa kya kuba wajinga mwenyi wapangilwe kwabo ku Filishitiya, Itai wayukile’mba Yehoba ye Lesa mumi, kabiji Davida wajinga mushingwa wa Yehoba. Itai kechi wakebele kumwesha muchima wa bulwanyi wajinga pakachi ka bena Isalela ne bena Filishitiya ne. Kechi watele muchima pa kuba’mba Davida ye waipaile kiyangala mwina Filishitiya aye Goliata ne bantu bavula ba mu ntanda yanji ne. (1 Sam. 18:6, 7) Itai wamwene kuba’mba Davida wajinga muntu watemenwe Yehoba kabiji kwa kubula ne kuzhinaukatu ne, wamwene byubilo byawama byajinga na Davida. Kino kyalengejile Davida kumunemeka bingi Itai. Kya kine, Davida wapaine kipanyi kya busatu kya nzhita kwi “Itai mwina Gata” kimye kyakosele nkondo na nzhita ya kwa Abisalomo!—2 Sam. 18:2.

Ne atweba twafwainwa kweseka na ngovu kubula kuta muchima pa bisho, mutundu, nangwa pa mepatulo a mishobo, ko kuba’mba kubula kwikala na misalululo ne muchima wa bunyama. Twafwainwa kutatu muchima pa byubilo byawama mu bakwetu. Bulunda bwajinga pe Davida ne Itai bumwesha’mba byo twamuyuka ne kumutemwa Yehoba kyakonsha kwitulengela kubula kwikala na ino misalululo.

Inge twavuluka byajinga Itai, twakonsha kwiipuzha atweba bene amba: ‘Nanchi ne amiwa mwesha buno bonka bukishinka kwi Davida Mukatampe, aye Kilishitu Yesu nyi? Abya mwesha bukishinka bwami kupichila mu kuswikwa na mwingilo wa kusapwila Bufumu ne kulenga baana ba bwanga nyi?’ (Mat. 24:14; 28:19, 20) ‘Nafwainwa kuchinchika kufika pepi pa kuba’mba mweshe bukishinka bwami?’

Mitwe ya bisemi nayo imwenamo bingi mu kulanguluka pa byajinga Itai wa kishinka. Bukishinka bwanji kwi Davida ne byo afuukwilepo kuya na mfumu mushingwa wa Lesa bwalengejile ne bantu ba kwa Itai nabo kumwesha bukishinka. Popamotu, ne mitwe ya bisemi bintu byo ifuukulapo kuba mu kutundaika mpopwelo ya kine bilengela ne bisemi byabo nabyo kulondela monkamo kabiji kimo kimye bintu byakonsha ne kumwekana kushupa kimye kicheche. Pano bino betulaya amba: ‘Ku wa lusa [nangwa’mba wa kishinka] mukemwesha anwe bene [Yehoba] ke wa lusa [nangwa’mba wa kishinka].’—Sala. 18:25.

Pa mambo a Davida byo alwile ne Abisalomo, Binembelo kechi byaambapo pe Itai ne. Nangwa byonkabyo, jishimikila jicheche jaamba pe Itai janembwa mu Mambo a Lesa jimwesha byo ajinga wawama kyokya kimye kyakatezhe bwikalo bwa kwa Davida. Byo kiji kuba’mba Itai bamwambapo mu Baibolo, kimwesha’mba Yehoba umona ne kupesha bantu bakishinka.—Hebe. 6:10.