Temwai Bololoke Na Muchima Wenu Yense

“Anweba mwatemwa bololoke”—SALA. 45:7.

1. Ki ka kyakonsha kwitukwasha kulondela “mashinda a bololoke”?

KUPICHILA mu Mambo anji ne mupashi wanji wazhila, Yehoba ubena kutangijila bantu banji mu “mashinda a bololoke.” (Sala. 23:3) Byo tuji bambulwa kulumbuluka, twakonsha kusensuka mu jino jishinda. Pa kuba amba tutendeke jibiji kuba byawama kikebewa kwibikishako bingi. Ki ka kiketukwasha kuba bino? Byonka byajinga Yesu, twafwainwa kutemwa kuba byawama.—Tangai Salamo 45:7.

2. “Mashinda a bololoke” o aka?

² Nga “mashinda a bololoke o aka”? Jishinda ke kalolo nangwa mukwakwa mupita bantu. Ano “mashinda” emenako bipimo byaoloka bya kwa Yehoba. Mu Kihebelu ne Kingiliki, kyambo kya “bololoke” kilumbulula kintu “kyaluñama,” ko kuba amba kulondela kya kine mafunde aoloka. Yehoba byo aikala “kipaka kyabo kya kine [bololoke],” bapopweshi banji batala kwi aye na lusekelo kwibamwena jishinda jawama jo bafwainwa kuyamo.—Yele. 50:7.

3. Twakonsha kufunda byepi byavula pa mambo a bololoke bwa Lesa?

³ Tukakonshatu kutokesha Lesa pa muchima inge kya kuba ketwibikisheko kulondela na muchima yense bipimo byaoloka bya kwa Yehoba. (Mpitu. 32:4) Kyakonsha kwitukwasha kuba bino ke kumona amba tubena kufunda byavula pe Yehoba Lesa mu Mambo anji Baibolo. Kufunda byavula pe aye, ne kufwenya kwipi ne aye pa juba pa juba, kuketulengela kutwajijila kutemwa bololoke bwanji. (Yako. 4:8) Twafwainwa ne kuswa lutangijilo lwa Mambo a Lesa anembwa na mupashi inge ketufuukule pa mambo a bintu byanema mu bwikalo.

Kebeshainga Bololoke bwa Lesa

4. Bi ka byavwangwa mu kukebesha bololoke bwa Lesa?

⁴ Tangai Mateo 6:33. Kukebesha bololoke bwa Lesa kwavwangamo byavula kechi kwingijishatu kimye kyetu kusampenyamo mambo awama a Bufumu ne. Pa kuba amba mwingilo wetu wazhila etabilwe kwi Yehoba, byubilo byetu byo tumwesha pa juba pa juba byafwainwa kwikela mwayila bipimo byanji. Aba bonse bakebesha bololoke bwa kwa Yehoba bafwainwa kuba ka? Bafwainwa “kuvwala bumuntu bupya bwalengwa mu bololoke ne buzhile bwa bukine monka mwaikajila Lesa.”—Efi. 4:24.

5. Ki ka kyakonsha kwitukwasha kushinda lukatazho lwa kulefulwa?

⁵ Byo twibikishako kulondela bipimo byaoloka bya Lesa, kimye kimo twakonsha kulefulwa na mambo a bilubo byetu. Ki ka kyakonsha kwitukwasha kushinda luno lukatazho lwa kulefulwa ne kwitulengela kutemwañana kabiji ne kuba bololoke? (Mana. 24:10) Twafwainwa kulombanga kimye kyonse kwi Yehoba “na muchima wa kine wayula lwitabilo lwa kubula kuzhinauka.” (Hebe. 10:19-22) Kikale twibena Kilishitu bashingwa nangwa tuji na luketekelo lwa kwikala pano pa ntanda, twafwainwa kwikala na lwitabilo mu kitapisho kya bukuzhi bwa kwa Yesu Kilishitu pa kwingila mingilo yanji byo aji mwine Ñanga Mukatampe. (Loma 5:8; Hebe. 4:14-16) Buneme bwa ñingijilo ya mashi a kwa Yesu aichikile bwamwekejile mu kishimpi kyanembelwe mu mutwe mutanshi wa ino magazini. (1 Yoa. 1:6, 7) Kino kibaba kyaambile amba: “Kintu kikumisha ke kya kuba amba umvwe muntu waingijisha kilola kumwenamo kintu kyachilatu ngee ku kyeya, akyo kintu kyakonsha kumweka kyatoka; onkao mambo nangwa kya kuba mambo etu amwekepotu byepi nobe kintu kichila, inge kya kuba twaimena ku mpunzha Lesa ko amwena ano mambo kwingijisha mashi a kwa Kilishitu, mambo etu ekala ke atoka.” (July 1879, jipa 6) Luno byo lwaikalapo lunengezho lwawama Yehoba lo abikako kupichila mu kitapisho kya bukuzhi bwa mwananji ye atemwisha!—Isa. 1:18.

Monainga Biji bya Kuvwala Byenu bya Nkondo ya ku Mupashi

6. Mambo ka o kyanemena kumona biji bya kuvwala byetu bya nkondo ya ku mupashi?

⁶ Kimye kyonse, twafwainwa kuvwala “kyela kya pa kyaji kya bololoke,” mambo kino ke kivwalo kya ku mupashi kyanema bingi kyafuma kwi Lesa. (Efi. 6:11, 14) Kikale po twipainetu kwi Yehoba nangwa twaingila myaka yavula mu mwingilo wazhila, kyanema bingi kumona biji bivwalo byetu bya nkondo ya ku mupashi pa juba pa juba. Mambo ka? Mambo Diabola ne bandemona banji bebataya pano pa ntanda. (Lum. 12:7-12) Satana wazhingila bingi kabiji wayuka amba kimye kyanji bekikepesha kala. Onkao mambo, ukebesha bingi kulukuka bantu ba kwa Lesa. Nanchi tusanta pa buneme bwa kwikala na “kyela kya pa kyaji kya bololoke”?

7. Byubilo byetu bikekala byepi inge kya kuba ketumweshe lusanchilo pa kwikala na “kyela kya pa kyaji kya bololoke”?

⁷ Kyela kya pa kyaji kizhikijila muchima. Na mambo a bumbulwa kulumbuluka bwetu, muchima wetu wakonsha kwitujimbaika ne kwitulengela kwiumvwa kupelelwa. (Yele. 17:9) Byauba muchima wetu ukeba kuba byatama, kyakonsha kuwama kumufunjisha bingi. (Nte. 8:21) Inge kya kuba ketumweshe lusanchilo pa kwikala na “kyela kya pa kyaji kya bololoke” kechi tukeseka kwikivula nangwa pa kimye kicheche kupichila mu kusala byakisangajimbwe muji bintu byatama byashikwa Lesa ne; kabiji kechi tukalangulukanga kuba byubilo bincha ne. Kechi tukatayanga kimye kyetu kyanema ku bya kutambatamba bya pa malangalanga ne. Mu kifulo kya kuba bino tukebikishangako kutokesha Yehoba pa muchima. Nangwa kya kuba twituntula pa kimye kicheche na mambo a kutwalwa mungi ku ndangulukilo yatama ya bumuntu, Lesa uketukwasha kubukapo jikwabo.—Tangai Byambo bya Mana 24:16.

8. Mambo ka o tukebewa kwikala na “jikebo ja lwitabilo”?

⁸ Pa bivwalo byonse bya nkondo ya ku mupashi paji ne “jikebo ja lwitabilo.” Jino jitukwasha “kuleyelamo miketo ya mujilo yonse ya kwa aye mubi.” (Efi. 6:16) Kabiji luketekelo ne kutemwa Yehoba na muchima yense kwitukwasha kuba bololoke ne kutwajijila kwendanga mu jishinda ja ku bumi bwa myaka. Inge twatwajijila na kufunda pa butemwe bwa Yehoba, kiketulengela kuyuka buneme bwa kuba bololoke bwanji. Pano ibyepi pa mambo a jiwi jetu ja mu muchima? Jitukwasha byepi byo twibikishako kutemwa bololoke?

Twajijilai Kwikala na Jiwi ja mu Muchima Jawama

9. Tumwenamo byepi mu kutwajijila kulama jiwi ja mu muchima jawama?

⁹ Pa kimye kya kubatizhiwa kwetu, twalombele kwi Yehoba kwitupa “muchima wawama ubula kwizhachisha.” (1 Pe. 3:21) Na mambo a kwikala na lwitabilo mu bukuzhi, mashi a kwa Yesu avweta pa bubi bwetu kabiji kino kitulengela kwikala na bulunda bwawama ne Lesa. Pano bino, pa kuba amba tutwajijile na buno bulunda bwawama, twafwainwa kutwajijila kwikala na jiwi ja mu muchima jawama. Inge kya kuba jiwi jetu ja mu muchima pa kimye kimo kejituzhachishe ne kwitujimunako, twafwainwa kusanta mambo kino kimwesha amba jiwi jetu ja mu muchima jibena kwingila bulongo. Kuno kwituvululamo kulumbulula amba jiwi jetu ja mu muchima kechi jakoka kulondela mashinda aoloka a Yehoba ne. (1 Timo. 4:2) Jiwi jetu ja mu muchima jakonsha kwingila ne mwingilo mukwabo ku boba bakeba kutemwa bololoke.

10, 11. (a) Shimikizhaipo kyakumwenako kimwesha ene mambo o kyamena kumvwina jiwi jetu ja mu muchima jafunjishiwa bulongo. (b) Mambo ka kutemwa bololoke o kwituletela lusekelo lukatampe?

¹⁰ Inge twalenga mambo, jiwi jetu ja mu muchima jakonsha kwituzhachisha nangwa kwitukatazha. Wakyanyike umo wasendukile mu jishinda ja bololoke. Kino kyamulengejile kwitumpa mu kisela kya kutamba bya mulekese kabiji ne kutendeka kupepa jamba. Wiumvwanga bingi bulanda kimye kyo ayanga ku kupwila kabiji wimonanga nobe kamfutumfutu kimye kyo ayanga mu mwingilo, kino kyamulengejile kuleka kwingila mingilo ya bwina Kilishitu. Waambile amba: “Kechi nayukilepo amba jiwi jami ja mu muchima jikandengela kubula kutwajijila kwikala wabambakana ne.” Wanungilepo kuba baamba “naikele buno bwikalo buncha pa myaka ina.” Kabiji watendekele kulanguluka bya kubwela mu bukine. Nangwa kya kuba walangulukilenga amba Yehoba kechi wakonsheshe kuteleka ku lulombelo lwanji ne, pano bino walombele kumulekelako mambo. Byo papichile maminiti pepi na jikumi, bainanji bayile na kumumona ne kumutundaika kutendeka kupwila jibiji. Wayile ku Nzubo ya Bufumu kabiji walombele mukulumpe mu kipwilo kuba amba amufunjishenga Baibolo. Mukuya kwa kimye wabatizhiwe kabiji usanchila bingi Yehoba pa kulama bumi bwanji.

¹¹ Nanchi kechi twayuka amba lusekelo lukatampe lufuma mu kuba byawama nenyi? Byo tufunda kutemwa bololoke ne kwibulondela bulongo, tukekala na lusekelo lukatampe pa kuba bintu bitokesha Shetu wa mwiulu pa muchima. Kabiji akilangulukishaipotu pa kino! Juba jibena kwiya bantu bonse jo bakekelamo balusekelo na mambo a jiwi jabo ja mu muchima, kino kyo kimye kyo bakamwesheshamo kya kine kwikala ba mu kipasha kya Lesa. Twayai atweba bonse twikale na butemwe bukatampe bwa kutemwa bololoke mu michima yetu ne kusangajika muchima wa Yehoba.—Mana 23:15, 16.

12, 13. Twakonsha kufunjisha byepi jiwi jetu ja mu muchima?

¹² Twakonsha kuba byepi pa kuba amba tufunjishe jiwi jetu ja mu muchima? Kimye kyo tufunda Binembelo ne mabuku etu alumbulula Baibolo, kyanema kuvulukanga amba: “Muchima wa waoloka ulanguluka mwa kukumbwila.” (Mana 15:28) Akilangulukai kuba bino byo kwitukwasha inge kya kuba betwipuzha mepuzho pa mambo a nkito ya ku mubiji. Umvwe nkito imo kechi yayilamo na byaamba Binembelo ne, atweba bavula tupelawizha kulondela lutangijilo lwa jibumba ja kalume wakishinka kabiji wa maana. Pano bino, umvwe ketuzhinauke pa mambo a nkito, kyawama kuvulukanga mafunde a mu Baibolo ne kulombelapo.a Kino kyendela pamo na jifunde ja kuchinuzhuka kukatazha jiwi ja mu muchima ja bakwetu. (1 Ko. 10:31-33) Twafwainwa kuta bingi muchima kikatakata ku mafunde aamba pa bulunda bwetu ne Lesa. Inge kya kuba Yehoba wa kine kwi atweba, twafwainwa kwishikisha atweba bene amba, ‘Nanchi kwingila ino nkito kwakonsha kufichisha Yehoba ku muchima nyi?’—Sala. 78:40, 41.

¹³ Kimye kyo tubena kunengezha Kyamba kya Usopa nangwa lufunjisho lwa Baibolo lwa kipwilo, twafwainwa kulanguluka pa bintu byo tufunda. Nanchi tushabaulatu kya lubilo lubilo mikumbu ya mepuzho a lufunjisho ne kunyemena mu jifuka jikwabo nyi? Nengezhezho ya uno mutundu kechi yakonsha kwitulengela kutemwisha bololoke nangwa kwikala na jiwi ja mu muchima jawama ne. Inge tukeba kutemwa bololoke, twafwainwa kwikala na mukoyo wa kufunda ne kulanguluka pa byo tutanga mu Mambo a Lesa anembwa. Kafwako kwingijisha mashinda a kuchibijila inge tukeba kufunda kutemwa bololoke na muchima wetu yense ne!

Nzala ne Kilaka kya Kukebesha Bololoke

14. Yehoba Lesa ne Yesu Kilishitu bakeba amba twiumvwenga byepi pa mambo a mwingilo wazhila?

¹⁴ Yehoba Lesa ne Yesu Kilishitu bakeba amba twikalenga balusekelo kimye kyo tubena kwingila mwingilo wazhila. Ki ka kiketulengela kutwajijila kwikala na butemwe? Ke kutemwa bololoke. Mu jashi janji ja pa Mutumba, Yesu waambile amba: “Baumvwa nzala ne kilaka kya kusakisha bololoke bo batokwa: mambo bakekuta.” (Mat. 5:6) Abino byambo byanema byepi ku boba bakeba kutemwa bololoke?

15, 16. Nzala ne kilaka kya ku mupashi bikakonsha kupwa mu ñanyi mashinda?

¹⁵ Ntanda yo tubena kwikalamo ibena kulamwa ne aye mubi. (1 Yoa. 5:19) Inge twatola pepala wa byambo wa mu kyalo kiji kyonse, tutanamo masawakya aamba pa kuyilako palutwe kwa bantu bashinta ne boba batundaika bukapondo. Aba bakebesha kuba bololoke bakumya bingi pa kumona bantu byo babena kumanyika bantu bakwabo. (Sapwi. 8:9) Byo twatemwa Yehoba, twayuka kuba amba aye bunketu ye wakonsha kwikuchisha baji na nzala ya ku mupashi ne kupwisha kilaka kya boba bakebesha kufunda bololoke. Bantu bakana Lesa katatakatu bakebafumyepo, kabiji aba batemwa bololoke kechi bakatalañanapo na bya bulanda byo bapitamo na mambo a bantu babula kulondela mafunde ne byubilo byabo bincha ne. (2 Pe. 2:7, 8) Kino byo kiketusangajikapo!

¹⁶ Byo tuji bakalume ba kwa Yehoba kabiji baana ba bwanga ba kwa Yesu Kilishitu, twayuka amba baji na nzala ne kilaka kya bololoke “bakekuta.” Bakekuta mu luno lunengezho lwa Lesa lwa meulu apya ne ntanda apya ‘mukekala bololoke.’ (2 Pe. 3:13) Onkao mambo kechi twafwainwa kulefulwa nangwa kukumya pa kumona lumanamo ne bukapondo byo bwalengela bololoke kubula kwikalako mu ino ntanda ya kwa Satana ne. (Sapwi. 5:8) Yehoba aye Mwine Wakila, wayuka bibena kubiwa kabiji katatakatu akapulushe boba batemwa bololoke.

Mwenaingamo mu Kutemwa Bololoke

17. Mfweto ka iji mu kutemwa bololoke?

¹⁷ Salamo 146:8 waamba pa mfweto iji mu kwenda mu jishinda ja bololoke. Nyimbi wa masalamo waimbile amba: “Yehoba wibatemwa baoloka.” Akifwanyikizhai kino! Mfumu wa bilengwa byonse witutemwa na mambo a kuba twatemwa bololoke! Na mambo a butemwe bwa Yehoba, tuji na luketekelo lwa kuba amba uketupa byonse byo tukeba byo tutangizhako Bufumu bwanji mu bwikalo bwetu. (Tangai Salamo 37:25; Byambo bya Mana 10:3.) Panyuma ya bino, pano pa ntanda pakakumbana bantu batemwa bololoke. (Mana 13:22) Bakalume ba Lesa boba bololoke bakekala bingi na lusekelo kabiji ne bumi bwa myaka mu paladisa wawama pano pa ntanda. Ne lelo jino, aba batemwa bololoke bwa Lesa bamwenamo bingi mutende wibalengela kukwatankana mu bisemi ne mu bipwilo.—Fili. 4:6, 7.

18. Bintu ka byawama byo twakonsha kuba kimye kyo tubena kupembelela juba ja Yehoba?

¹⁸ Byo tubena kupembelela kufika kwa juba jikatampe ja Yehoba, twafwainwa kutwajijila kukebesha bololoke bwanji. (Zefwa. 2:2, 3) Onkao mambo, twayai tutwajijile kumwesha amba twatemwa kya kine mashinda aoloka a Yehoba Lesa. Kino kyavwangamo kuvwala “kyela kya pa kyaji kya bololoke” pa kuba amba tuzhikijile muchima wetu wakifwanyikizho. Kabiji twafwainwa ne kutwajijila kwikala na jiwi ja mu muchima jawama jituletela lusekelo ne kutokesha muchima wa Lesa.—Mana 27:11.

19. Twafwainwa kukebeshanga kuba ka, kabiji mu mutwe walondelapo tukesamba pa ka?

¹⁹ “Meso a Yehoba apitañana pano pa ntanda ponse amba: Nebamweshe bulume bwami abo banketekela na muchima yensetu.” (2 Moba 16:9) Bino byambo bitutekenesha bingi byo tuba byawama mu ino ntanda mwayula bukapondo ne bubi! Kya kine, bulumbuluke bwetu bwakonsha kulengela bantu bavula bepatula kwi Lesa kukumya bingi. Pano bino tumwenamo pakatampe mu kumvwina bololoke bwa Yehoba. (Isa. 48:17; 1 Pe. 4:4) Onkao mambo, twayai tutwajijile kwikala ba lusekelo kupichila mu kutemwa bololoke na muchima wetu yense. Nangwa byonkabyo, kwikala na muchima wawama kwavwangamo ne kushikwa bubi. Mutwe walondelapo uketukwasha kuyuka kino byo kilumbulula.

[Tubyambo Twa Munshi]

Musakukumbula’mba Ka?

• Mambo ka o twafwainwa kusanchila pa bukuzhi bulengela kuba amba tutemwe bololoke?

• Mambo ka o kyanemena kuvwala “kyela kya pa kyaji kya bololoke”?

• Twakonsha kufunjisha byepi jiwi jetu ja mu muchima?

[Kipikichala pa peja 26]

Kufunjisha bulongo jiwi jetu ja mu muchima kwitukwasha bya kuba na mepuzho aamba pa nkito ya ku mubiji