Tambwilai Mupashi wa Lesa, Kechi wa Pano pa Ntanda Ne

“Atweba twatambwile, kechi mupashi wa panopantanda ne, poso mupashi ufuma kwi Lesa; amba tuyuke bintu byo twapewatu kwi Lesa.” —1 KO. 2:12.

1, 2. (a) Mu ñanyi jishinda bena Kilishitu bakine mo baikela pa nkondo? (b) Ñanyi mepuzho o tusakwisambapo?

BENA KILISHITU bakine baji pa nkondo! Mulwanyi wetu uji na bulume, mongozhi kabiji jiimba na ngala. Uji na kilwilo kya nkondo kingila bulongo kyo engijisha kongwelamo bantu bavula. Pano bino kechi twakonsha kuzumba nangwa kulanguluka amba twakonsha kukankalwa kumushinda ne. (Isa. 41:10) Tuji na kya kwituzhikijila kyakosa kyakonsha kwitukwasha kumushinda inge ke akebe kwitulukuka.

² Nkondo yetu kechi ya ku mubiji ne, ke ya ku mupashi. Mulwanyi wetu ke Satana Diabola, kabiji kilwilo kikatampe kyo engijisha ke “mupashi wa panopantanda.” (1 Ko. 2:12) Atweba kintu kikatampe kituzhikijila inge keetulukuke ke mupashi wa Lesa. Pa kuba amba tushinde mu ino nkondo ne kutwajijila kukosa ku mupashi, twafwainwa kulomba mupashi wa Lesa ne kumwesha byubilo bya kino kipangwa mu bwikalo bwetu. (Nga. 5:22, 23) Pano nga mupashi wa pano pa ntanda ye mu ka, kabiji watendekele byepi kongolañana? Twakonsha kuyuka byepi amba tubena kutangijilwa na mupashi wa pano pa ntanda nangwa ne? Kabiji twakonsha kufunjilako ka kwi Yesu byo atambwile mupashi wa Lesa ne kukana mupashi wa pano pa ntanda?

Mambo ka Mupashi wa Pano pa Ntanda kyo Akumbena Konse?

3. Mupashi wa pano pa ntanda ye mu ka?

³ Mupashi wa pano pa ntanda wafuma kwi Satana, “mfumu wa panopantanda,” kabiji ubena kwilwisha na mupashi wazhila wa Lesa. (Yoa. 12:31; 14:30; 1 Yoa. 5:19) Uno mupashi ke muchima wakumbana pano pa ntanda, kabiji ulengela bantu kuba bintu bimo. Buno bulume bukatampe bulengela bantu kulengulula kyaswa muchima wa Lesa ne nkebelo yanji.

4, 5. Mupashi wa kwa Satana watendekele byepi kukumbana konse?

⁴ Mupashi wa kwa Satana watendekele byepi kukumbana konse? Kitanshi, Satana wajimbaikile Evwa mu bujimi bwa Edena. Wamujimbaikile kuba amba inge witolwela kufuma kwi Lesa bwikalo bwanji bukakilapo kuwama. (Nte. 3:13) Byo ajingapo wabubela! (Yoa. 8:44) Wajimbaikile mwanamukazhi, na mulanguluko wa kukeba amba Adama abule kwikala wakishinka kwi Yehoba. Na mambo a byafuukwilepo Adama kuba, bantu bebapotesheshe ku bundengamambo kabiji kino kibalengejile kutangijilwa na mupashi wa kwa Satana wa bunsatuki.—Tangai Efisesa 2:1-3.

⁵ Kabiji Satana waongwele ne bamalaika bavula baikele ke bandemona. (Lum. 12:3, 4) Bano bamusatukijile Lesa, Muyulo wa mu moba a kwa Nowa saka akyangye kwiya. Aba bamalaika baketekejile amba bintu bikakilapo kuwama inge basha bifulo byabo byo bebapele mwiulu ne kwikala na bwana bwa bene bwa kukomoka bintu byabujile kwibafwainwa pano pa ntanda. (Yuda 6) Satana ye “mujimbijimbi wa panopantanda ponse” kabiji ubena kwingijila pamo na bano bandemona baleka kuvwala mibiji ya bumuntu. (Lum. 12:9) Kyatamakotu ke kya kuba amba bantu bavula kechi bayuka bandemona byo abena kongola bantu ne.—2 Ko. 4:4.

Nanchi Mutangijilwa na Mupashi wa Pano pa Ntanda Nyi?

6. Mupashi wa pano pa ntanda wakonshatu kwitongola umvwe twauba ka?

⁶ Bantu bavula kechi bayuka Satana byo abena kongola bantu ne, pano bino bena Kilishitu bakine bayukishatu mashinda anji onse a bujimuku. (2 Ko. 2:11) Kwambatu kine, mupashi wa pano pa ntanda kechi wakonsha kwitongola ne, wakonshatu kwitongola umvwe atweba bene twamuswisha. Twayai twisambe pa mepuzho ana asakwitukwasha kuyuka kana tubena kutangijilwa na mupashi wa Lesa nangwa wa pano pa ntanda.

7. Jishinda ka jimo Satana jo akeba kwitongwelamo kufuma kwi Yehoba?

⁷ Nanchi byakisangajimbwe byo natemwa bimwesha ka pe amiwa? (Tangai Yakoba 3:14-18.) Satana ukeba kwitongola kufuma kwi Lesa kupichila mu kwitulengela kwikala na muchima wa kutemwa bukapondo. Diabola wayuka amba Yehoba washikwa yense watemwa bukapondo. (Sala. 11:5) Onkao mambo, Satana weseka kwingijisha mabuku, mafilimu, nyimbo, ne makayo a pa kompyuta, kabiji bino bilengela bantu babena kwibingijisha kwikala na muchima wa kutemwa byubilo bincha ne kukanama. Satana utemwa bingi inge kya kuba ketutemweko bintu bimo byatama nangwa kya kuba twakitemwa byawama.—Sala. 97:10.

8, 9. Mepuzho ka o twafwainwa kwishikisha pa mambo a byakisangajimbwe?

⁸ Pano bino, mupashi wa Lesa ulengela boba bamutambwila kwikala bawamishatu, ba mutende, kabiji bayula lusa. Twafwainwa kwiipuzha amba, ‘Nanchi byakisangajimbwe byo natemwa bintundaika kwikala na byubilo byawama nyi?’ Maana afuma kwiulu “o abula bujimbijimbi.” Aba batangijilwa na mupashi wa Lesa kechi basapwila ku bakwabo pa mambo a kwikala bawamisha ne ba mutende aku na kutamba mu bufyamfya bya bukapondo ne byubilo bincha mu mazubo abo ne.

⁹ Yehoba ukeba atweba kumupopwelatu aye yenka kwapwa. Pano bino, Satana aye ukeba kumupopwelatu nangwa jimo, byonka byo akebele amba Yesu amupopwele. (Luka 4:7, 8) Twakonsha kwishikisha amba: ‘Nanchi byakisangajimbwe byo nevwangamo bindengela kupopwelatu Lesa bunke kwapwa nyi? Nanchi bintu byo mfuukulapo kuba bindengela kukankalwa kukana nangwa kuswa mupashi wa pano pa ntanda nyi? Nanchi nafwainwa kupimpulako byo nkoba kulutwe na lwendo pa mambo a nsajilo ya byakisangajimbwe nyi?’

10, 11. (a) Pa mambo a bintu bya ku mubiji, mupashi wa pano pa ntanda utundaika bantu kwikala na muchima ka? (b) Mambo a Lesa anembwa na mupashi atundaika bantu kwikala na muchima ka?

¹⁰ Nanchi bintu bya ku mubiji nebimona byepi? (Tangai Luka 18:24-30.) Mupashi wa pano pa ntanda ulengela bantu kwikala na “lwiso lwa meso” kupichila mu kwibatundaika kwikala na muchima wa lunkumbwa ne kutemwa bintu bya ku mubiji. (1 Yoa. 2:16) Uno mupashi walengela bantu bavula kwikala na muchima wa kukeba kunonka. (1 Timo. 6:9, 10) Kabiji uno mupashi witulengela kuketekela amba kwikala na bya ku mubiji byavula ko kwakonsha kwituletela lusekelo lwa myaka. (Mana 18:11) Nangwa byonkabyo, umvwe twatemwisha mali kukila byo twatemwa Lesa, Satana uketutola kyangwa. Twafwainwa kwiipuzha amba, ‘Nanchi bwikalo bwami bwaimenatu pa kukeba bunonshi ne makayo nyi?’

¹¹ Kupusanako na bino, Mambo a Lesa anembwa na mupashi etutundaika kwikala na mmweno yawama ya mali ne kwingila na ngovu pa kuba amba tumonenga bya kwikwashishamo na bisemi byetu. (1 Timo. 5:8) Mupashi wa Lesa ukwasha boba bamutambwila kwikala bampanyi byonka biji Yehoba. Banemeka bantu kukila bintu, kabiji bekala ne na lusekelo lwa kupapo bakwabo bintu bya ku mubiji byo baji nabyo. (Mana 3:27, 28) Kabiji kechi baleka muchima wa kukeba mali kwibalengela kukankalwa kwingijila Lesa bulongo ne.

12, 13. Kupusanako na mupashi wa pano pa ntanda, mupashi wa Lesa wakonsha kwitulengela byepi kumwenamo?

¹² Nanchi byubilo byami bimwesha amba ntangijilwa na ñanyi mupashi? (Tangai Kolose 3:8-10, 13.) Mupashi wa pano pa ntanda utundaika mingilo ya buntunshi. (Nga. 5:19-21) Inge bintu bijitu bulongo kechi twakonsha kuyuka mupashi ubena kwitutangijila ne, pano bino twakonshatu kuyuka umvwe bintu kechi biji bulongo ne, nabiji inge mulongo nangwa nyenga yetu mwina Kilishitu keetushibuluke, kwituzhingijisha nangwa kwitulenga mambo. Kunungapo, bintu byo tuba mu bufyamfya byakonsha kuyukanyikisha mupashi witutangijila. Kyakonsha kuwama bingi kwipesapesa atweba bene. Ishikishai anweba bene amba: ‘Pa bañondo batanu na umo bapitapo, nanchi mmwesha byubilo bya kwa Kilishitu nyi, inyi nabwela ku ñambilo ne byubilo byami byatama bimo bya kala?’

¹³ Mupashi wa Lesa wakonsha kwitukwasha ‘kuvujijila bumuntu bwa kala ne byubilo byabo’ ne kuvwala “bumuntu bupya.” Kino kitulengela kutemwa bakwetu ne kwibobila lusa. Kabiji tukakebeshanga kwilekelako mambo atweba bene na bene nangwa kya kuba paji bishinka bibena kumwesha amba paji mambo. Nangwa kya kuba betujiila makusu pa mutwe, kechi tukafikenangatu kumwesha “bululu bonse, ne bukaji, ne kubukabukaji, ne kubwazanga, ne mwenga” ne. Mu kifulo kya kuba bino, tukebikishangako ‘kwikala na michima yanekena.’—Efi. 4:31, 32.

14. Bantu bavula ba mu ntanda bamona byepi Mambo a Lesa?

¹⁴ Nanchi nanemeka ne kutemwa mizhilo ya mu Baibolo yaamba pa byubilo byawama nyi? (Tangai Byambo bya Mana 3:5, 6.) Mupashi wa pano pa ntanda ulengela bantu kubula kulondela Mambo a Lesa. Aba batangijilwa na uno mupashi balengulula byambo bya mu Baibolo bibakanya kuba bintu byo bakeba ne kutemwako mizhilo ne butemwamaana bwa bantu. (2 Timo. 4:3, 4) Bamo balengululatu Mambo a Lesa onse. Bano bazhinauka buneme ne bukine bwa Baibolo kabiji bemona nobe baji bingi na maana. Balengulula mizhilo yawama ijimo yaamba pa bukende, kwilaala kwa banabalume nangwa banabakazhi bakwabo ne pa mambo a kupwisha masongola. Bafunjisha “kyatama amba kyawama, ne kyawama amba kyatama.” (Isa. 5:20) Nanchi ne atweba tutangijilwako na uno mupashi nyi? Abya tuketekela mu maana a bantu ne milanguluko yetu umvwe ketupite mu makatazho nyi? Inyi twibikishako kulondela lujimuno lwa mu Baibolo?

15. Mu kifulo kya kuketekela mu maana etu, twafwainwa kuba ka?

¹⁵ Mupashi wa Lesa witukwasha kunemeka Baibolo. Byonka byajinga nyimbi wa masalamo, ne atweba tumona mambo a Lesa amba ye lampi wa maulu etu kabiji kyo kyeya kya mu jishinda jetu. (Sala. 119:105) Mu kifulo kya kuketekela mu maana etu, tuketekela kya kine Mambo a Lesa anembwa kwitukwasha kuyuka kyawama ne kyatama. Kechi tufundatu bya kunemeka Baibolo ne, bino tufunda ne bya kutemwa mizhilo ya Lesa.—Sala. 119:97.

Funjilainga kwi Yesu

16. Ñanyi bintu byavwangwa mu kwikala na “muchima wa Kilishitu”?

¹⁶ Pa kuba amba tutambwile mupashi wa Lesa, twafwainwa kwikala na “muchima wa Kilishitu.” (1 Ko. 2:16) Kwikala na ‘muchima umo monka mwayila muchima wa Kilishitu Yesu’ kikebewa kuyuka byo alangulukanga, byo aubanga kabiji ne atweba twafwainwa kuba byonkabyo. (Loma 15:5; 1 Pe. 2:21) Akimonai mashinda amo o twakonsha kubilamo bino.

17, 18. (a) Tufunjilako ka kwi Yesu pa mambo a kulomba? (b) Mambo ka o twafwainwa kutwajijila ‘kulomba’?

¹⁷ Lombainga mupashi wa Lesa. Saka akyangye kupita mu meseko, Yesu walombele mupashi wa Lesa kuba amba amukwashe. (Luka 22:40, 41) Ne atweba twafwainwa kulomba Lesa kuba amba etupe mupashi wanji wazhila. Yehoba upana mupashi wanji kya bupetu ku boba bamulomba. (Luka 11:13) Yesu waambile amba: “Lombai, mukekitambula; kebai, mukekimona; konkonshai, bakemushinkwilako: mambo bonse balomba batambula; ukeba naye, wikimona; ukonkonsha naye, bakamushinkwilako.”—Mat. 7:7, 8.

¹⁸ Inge mubena kukeba mupashi wa Yehoba ne bukwasho bwanji, kechi mwafwainwa kulombatu jimo ne. Twakonsha kulomba bimye byavula ne kutoñaminamo mu milombelo. Kimye kimo, Yehoba ukeba kumona byo batesha muchima ku byobyo bintu byo babena kulomba ne kumwesha bukine bwa lwitabilo lwabo saka akyangye kukumbula milombelo yabo.a

19. Yesu waubanga ka kimye kyonse, kabiji mambo ka o twafwainwa kubanga byo aubanga?

¹⁹ Kokelainga Yehoba na muchima yense. Yesu kimye kyonse waubanga bintu byatokeshanga Shanji pa muchima. Pa kimye kimo, ndangulukilo ya kwa Yesu na mo akebelenga kubila na lukatazho yashi ikapusaneko na byakebelenga kuba Shanji. Pano bino waambile na luketekelo kwi Shanji amba: “Kechi kyo aswa muchima wami ne, poso kyo aswa muchima wenu kifike.” (Luka 22:42) Ishikishai anweba bene amba: ‘Nanchi nkokela Lesa nangwa kya kuba bintu byashupa nyi?’ Kukokela Lesa kwanema bingi pa kuba amba twikale na bumi. Twafwainwa kumukokelatu mu byonse mambo ye Mulenga wetu, Nsulo ya bumi kabiji ye Kalama wa bumi. (Sala. 95:6, 7) Kafwako kintu kyanema kukila lukokelo ne. Kwakubula lukokelo kechi twakonsha kutalwa bulongo kwi Lesa ne.

20. Bwikalo bwa kwa Yesu bwaimenejile pa ka, kabiji twakonsha kumulondela byepi?

²⁰ Yukai Baibolo bulongo. Kimye Yesu kyo akainenga lweseko lwafuminenga kwi Satana lwa kuba amba onaune lwitabilo lwanji, Yesu waingijishenga byambo bya mu Binembelo. (Luka 4:1-13) Byo asanzhilengamo bantangi ba mu bupopweshi bamwimenejilenga ku ntundwa, Yesu waingijishenga Mambo a Lesa ne kumwesha amba wianemekele bingi. (Mat. 15:3-6) Bwikalo bwa kwa Yesu bonse bwaimenejile pa kuyuka mizhilo ya Lesa ne kwiilondela. (Mat. 5:17) Ne atweba twafwainwa kuyuzha milanguluko yetu na Mambo a Lesa akosesha lwitabilo lwetu. (Fili. 4:8, 9) Kimye kimo kyakonsha kwitushupa bingi atweba bamo pa kuba amba tumonepo kimye kya kwikelamo na lufunjisho lwa pa bunke ne lwa kisemi. Nangwa byonkabyo, mu kifulo kya kuba amba tupembelelenga kumonapo kimye, kyawama kunengezhezhanga jimo kimye.—Efi. 5:15-17.

21. Lunengezho ka lo twakonsha kwingijisha pa kuba’mba tuyuke bulongo Mambo a Lesa ne kwiengijisha?

²¹ ‘Kalume wakishinka kabiji wa maana’ witukwasha kwikalako na kimye kya lufunjisho lwa pa bunke ne lwa kisemi kupichila mu kunengezha Kupopwela kwa Kisemi kwa mulungu ne mulungu. (Mat. 24:45) Nanchi mubena kwingijisha bulongo luno lunengezho nyi? Pa kuba’mba kimukwasheko kwikala na muchima wa Kilishitu, nanchi pa lufunjisho lwenu lwa kimye kyonse kechi mwakonsha kufundanga ne mitwe yo mwasala anweba bene yaamba pa mitwe yafunjishe Yesu nenyi? Mwakonsha kwingijisha buku wa Watch Tower Publications Index pa kuba amba emukwashengako kutana bishinka byanema byaamba pa mutwe ye mukeba kuyuka. Kyakumwenako, kutendeka mu 2008 kufika mu 2010, mu magazini a kusha mu bujimi mwajinga mitwe 12 yajinga na kishina kya kuba’mba “Byo Tufunjilako kwi Yesu.” Mwakonsha kutemwa kwingijisha ino mitwe kufundamo. Kutendeka mu 2006, mu Awake! munembwa kibaba kya kuba’mba “Musakukumbula’mba Ka?” Mepuzho anembwa mu kino kibaba etukwasha kuyukilako byavula bya mu Mambo a Lesa. Nanchi kechi kyakonsha kuwama kwingijishanga bino bibaba pa Kupopwela kwenu kwa Kisemi bimye bimo nenyi?

Twakonsha Kwipashinda Pano pa Ntanda

22, 23. Twafwainwa kuba byepi pa kuba amba twipashinde pano pa ntanda?

²² Pa kuba amba tutangijilwenga na mupashi wa Lesa, twafwainwa kukana mupashi wa pano pa ntanda. Kechi kyapela kukana uno mupashi ne. Kikebewa kwibikishako bingi. (Yuda 3) Pano bino twakonsha kushinda! Yesu waambijile baana banji ba bwanga amba: “Panopantanda kumanama ko kwenu: byonkabyo koseshai michima yenu; amiwa nepashinda panopantanda.”—Yoa. 16:33.

²³ Ne atweba twakonsha kushinda pano pa ntanda umvwe ketukane mupashi ujipo ne kwibikishako kutambwila mupashi wa Lesa. Kya kine, “umvwe Lesa tuji nanji, ñanyi uketwimena?” (Loma 8:31) Kupichila mu kutambwila mupashi wa Lesa ne kulondela lutangijilo lwa mu Baibolo, tukatondwanga na byo tuji nabyo, kwikala na mutende, lusekelo ne luketekelo lwa kwikala myaka ne myaka mu ntanda ipya ibena kwiya.

[Tubyambo twa mushi]

Mukivuluka Nyi?

• Mambo ka mupashi wa pano pa ntanda kyo akumbena konse?

• Ñanyi mepuzho ana o twafwainwa kwiipuzha?

• Ñanyi bintu bisatu byo tufunjilako kwi Yesu pa mambo a kutambwila mupashi wa Lesa?

[Kipikichala pa peja 8]

Bamalaika bamo baikele byepi ke bandemona?

[Kipikichala pa peja 10]

Satana wingijisha mupashi wa pano pa ntanda kongwelamo bantu, pano bino twakonsha kushinda uno mupashi