Kyo Ikyo kya Kufundamo!
Twapimpula mwekelo ya kyamba kya kufundamo pa kuba’mba kikale na buya kabiji kimupezhezheko kufunda Mambo a bukine a Yehoba.—Sala. 1:2; 119:97.
Papita myaka ina kufuma po twatendekejile kunemba Kyamba kya Usopa, kya kusha mu bujimi ne kya kufundamo Bakamonyi ba kwa Yehoba ne boba bafunda Baibolo babena kununguluka bulongo.
Mulongo waingijila Yehoba myaka yavula waambile pa kya kufundamo kitanshi amba: “Kyamba kya Usopa kya kufundamo kyawama bingi kabiji kyamfika pa muchima. Byambo bya ku mupashi byazhika bijimo bimfika bingi pa muchima. Nsanta bingi pa luno lunengezho lwawama lwakatataka.” Mulongo mukwabo wanembele’mba: “Natemwa bingi kunengezha Kyamba kya Usopa kya kufundamo aku saka ntanga binembelo mu Baibolo wa New World Translation of the Holy Scriptures—With Reference.” Twaketekela ne anweba byobyo mwiumvwa.
Byonka byo mwayukila jimo, Kyamba kya Usopa kyatendekele kunembwa mu 1879, kabiji kikinembwa kufika ne lelo jino na mambo a bukwasho bwa mupashi wa Yehoba. (Zeka. 4:6) Mu myaka 133 yapitapo, paubiwa lupimpu lwavula pa nkupiko ya uno magazini. Mu mwaka wa 2012, kyamba kya kufundamo kikekalanga na kipikichala kyanengela kya bantu babena kusapwila. Kwituvululako pa mwingilo witupa Lesa wa kusapwila Bufumu bwa Yehoba. (Byu. 28:23) Pa jipa ja bubiji pakekalanga kipikichala kiji pa nkupiko ne byambo bibena kulumbulula kibena kubiwa ne kobebakopejile. Bino bipikichala, biketuvululangako atweba bonse mwaka yense kuba’mba bantu ba Yehoba babena kusapwila mambo awama “pano pa ntanda ponse.”—Mat. 24:14.
Ñanyi lupimpu lukwabo lwaubiwa ku uno magazini? Mepuzho a mu kakitenguluzha ka kupitulukamo akekelanga ku ntendekelo ya kibaba kya kufundamo. Ano akemumweshanga bishinka bikatampe byo mwafwainwa kutana kimye kyo mubena kutanga kyokyo kibaba. Batangijila Kyamba kya Usopa bakonsha kutwajijila kwingijisha ano mepuzho a kupitulukamo ku mpelo ya lufunjisho. Musakumona kuba’mba mpunzha iji kwapela jipa beibaishako pacheche kabiji manambala a mafuka ne mapa nao abena kumwekanyikisha.
Byonka byo kyalumbululwa mu uno magazini, kibaba kya katataka kya kuba’mba, “Kufuma mu Butala Bwetu,” kyanungwako mukekalanga bintu byaubiwa mwapita mpopwelo ya Bakamonyi ba kwa Yehoba ba ano moba. Kabiji mashimikila a bwikalo bwa bantu akekalangamo ja kamo kamo mu mutwe wa kuba’mba, “Belambwile Saka Baswa abo Bene.” Ano mashimikila akambanga kikatakata pa lusekelo ne pa bintu byawama bimona balongo ne banyenga bengijila kuji kukajilwa kukatampe kwa basapwishi ba Bufumu.
Twaketekela kuba’mba mukeyowanga kufunda Mambo a Lesa kwingijisha uno magazini.
Banembi
[Kipikichala pa peja 3]
1879
[Kipikichala pa peja 3]
1895
[Kipikichala pa peja 3]
1931
[Kipikichala pa peja 3]
1950
[Kipikichala pa peja 3]
1974
[Kipikichala pa peja 3]
2008