Mu Mukwekele ye Banengezha Bulongo Mufuma Byawama

María Isabel ke musapwishi wakyanyike wabambakana bingi mu muzhi wa San Bernardo mu kyalo kya Chile kyaikela ku kabeta ka bulenge bwa South America. Aye ne bansemi banji kubikapo ne kolojanji wamukazhi bamba mulaka wa bantu ba Mapuche. Kisemi kyonse kyaingijile na mukoyo kuba’mba balenge kipwilo kya katataka kya mu mulaka wa Mapuche utelwa jikwabo amba Mapudungun.

Byo babijikile’mba Kivuluko kya lufu lwa Kilishitu kikekalako ne mu mulaka wa Mapudungun kabiji ne kuba’mba bapulinta tupepala twa kwichilapo bantu ku Kivuluko twafika ku 2,000 mu uno mulaka, María Isabel walangulukilepo bingi. Wafwainwe kuba byepi pa kuba’mba engileko? Wavulukile byaubile Bakamonyi bakwabo banyike banembwa mu mabuku etu bamwenejilemo byawama mu kusapwila ku bakwabo mo bafunjila ne bafunjishi. Wabujile bansemi banji kabiji bonse bafuukwilepo kuba’mba María Isabel wafwainwa kumonapo jishinda ja kusampenyamo tupepala twa lwito pa sukulu. Wajinga na ñanyi mulanguluko?

Patanshi, María walombele ku bakulumpe ba sukulu kuba’mba alamike kapepala ka lwito pa kibelo kikatampe kya pa Sukulu. Bamuswishishe kabiji bamusanchijile pa kuleta yewa mulanguluko. Juba jimo lukelo pa kwita mazhina, mukulumpe wa sukulu wabijikile mu kyakwambilamo pa mambo a luno lwito.

Kepo María alombele kuba’mba bamuswishe kuya mu makalashi onse. Bafunjishi byo bamuswishishe, wayile mu makalashi onse na kwipuzha baana ba sukulu bajinga ba Mapuche. Waambile’mba: “Nalangulukilenga’mba pa sukulu kampe pajitu baana ba sukulu 10 nangwa 15 bafuma mu bisemi bya ba Mapuche. Pano bino, nataine kuba’mba bavula bingi kabiji napaine tubipepala twa kwichilapo bantu 150.”

“WAKETEKEJILENGA KUMONA MUKULUMPE”

Mwanamukazhi umo wamwene pa kipabi po balamikile kapepala ka lwito pa kibelo kya sukulu wakebelenga muntu wa kwisamba nanji pa mambo a Kivuluko. Fwanyikizhai byo akuminye pa kumuletela kashimbi wa myaka 10. María Isabel waambile saka abena kumwemwesela amba: “Uno mwanamukazhi waketekejilenga kumona mukulumpe.” Byo amupele kapepala ka kwichilapo bantu ne kumulondolwelako pacheche, María walombele keyala wa uno mwanamukazhi kuba’mba aye ne bansemi banji bakamufwakeshe ne kumubula byavula pa mambo a Bufumu bwa Lesa. Basapwishi 20 bengijila mu nyaunda yamba mulaka wa Mapudungun bafwainwa baumvwine bingi bulongo pa kumona uno mwanamukazhi ne bakwabo ba Mapuche 26 baiya na kutanwa ku Kivuluko. Aluno jino jibumba jibena kwingila bingi bulongo.

Mwikale banyike nangwa bakulumpe, abya ne anweba mwakonsha kumonapo mashinda a kwichilamo baana basukulu bakwenu nangwa bo mwingila nabo ku Kivuluko, ku jashi ja mvula bantu nangwa ku kushonkena kwa nkambi nyi? Mambo ka a kubujila kupesa pesa mu mabuku etu pa kuba’mba mufunjileko ku byaubile bakwenu kuba’mba muyuke byo mwafwainwa kwingilako uno mwingilo? Kabiji lombainga mupashi wazhila wa Yehoba kwimukwasha kubula moyo wa kwamba pe aye. (Luka 11:13) Inge mwauba bino, mwakonsha kukumya bingi ne kutundaikwa pa kumona byawama byafuma mu kwibikako kwenu.