Abya Musanchila Bupe bwa Yehoba Nyi?

¹ Tuji na kintu kimo kyanema bingi kyo twafwainwa kusanchila. Ñanyi kintu? Baibolo ikitongola byo yamba’mba: “Mizhilo ifuma mu kanwa kenu, kwi amiwa yakila mu kuwama kwa biumbi ne biumbi bya ngolode ne siliva.” (Sala. 119:72; Mana. 8:10) Nangwa ngolode iwame byepi, mizhilo ya Yehoba ayo yakila mu kuwama. Kuyuka bulongo mizhilo yanji pamo ne maana Yehoba o apana ku bantu bakishinka bakeba bukine, byo bintu byo twafwainwa kulama. Bitukwasha bingi mu kwizhikijila atweba bene, kuyuka bya kwingila na bimye byakatazha, bya kupwisha makatazho bulongo, ne kwikala basangalala.

² Kutatula pa January 1, 2000 Yehoba wapa bantu bonse ‘mizhilo [yanema] ifuma mu kanwa kanji’ kupichila mu lunengezho lwa bupe. Kino kibena kwingila bingi bulongo mambo bakalume ba Yehoba bonse, kikale baji na mali nangwa ne, babena kutambulako bupe bwa ku mupashi bwibafwainwa bo bakeba. Mabuku kechi atutu ne, mambo pataiwa mali pa kuba beapulinte ne kwiatuma mu bipwilo. Nangwa byonkabyo, aba babula pa kupuma kuboko bakonsha kutambulako magazini ne mabuku o bakeba, bino tusanchila bingi bupe bwabo bucheche bo bapana bwa kukwasha mwingilo wa ntanda yonse.

³ Nangwa kya kuba bamo basanchila bingi luno lusa lwa Yehoba, bamo kechi belusanchila ne. Kubula kusanta nanchi kumweka byepi? Kitanshi, bupe butumwa ku Sosaiti bwabwela bingi panshi. Bantu botutambikako mabuku bapana bupe, abya nanchi atweba bene yetu tukankalwa kusanchila ano mabuku anema o tutambula a kwingijisha atwe bene nyi? Kya bubiji, bamo baoda bipe bya oda wiikajila byo bakankalwanga kupota kala. Bamo baoda mavidyo tepu bino sababula televizhonyi! Kitokesha bingi Yehoba pa muchima kupa musapwishi umo byamufwainwatu kwapwa, nabiji Kyamba kya Usopa, buku wa pa lufunjisho lwa buku ne Baibolo. Umvwe kala twakankalwanga kupota bino bipe bya oda wiikajila kechi kyawama kuoda milumba ya bino bipe ne. Kya busatu, pa kupwila kwa Nkambi kwa “Ba Kuba Kyambo kya kwa Lesa” mabuku alupwilwe kimye kitanshi pa lunengezho lwa bupe. Bena Kilishitu baimene bulongo mu minongo sabatekanya na kupembelela kutambulako ano mabuku apya. Bino, twatambwile masawakya a bulanda a kuba’mba bamo beshindaikilenga mu bakwabo’mba baye kulutwe kabiji bakwabo nabo balwilenga ne kulwa na mambo a kukebatu’mba abo bapelawizhe kutambula mabuku bunke.

⁴ Kubula lusanchilo kyo kiyukilo kimo kya kuyukilako’mba tuji mu ‘moba apelako.’ Mutumwa Paulo wajimwine’mba: “Mu moba akapelako kukeya bimye byakatazha. Mambo bantu bakekala ba kwitemwa abo bene, ... ba kubula kusanta.” (2 Timo. 3:1, 2) Byo baji baana bafuma kwi ndengamambo Adama, bantu bonse baji na kisemwa kya kichima ne kubula kusanta. (Loma 5:12) Kubula lusanchilo ke kyubilo kimwesha amba muntu uji na kichima kiji na bantu ba ku kyalo. Kino kyubilo kijitu konse konse byonka byakumbana mwela ye tupema, kabiji kitulamata. (Efi. 2:1, 2) Onkao mambo, twafwainwa kwikala na muchima wa lusanchilo. Twakonsha kuba byepi byo byo? Kupichila mu kulanguluka pa bitubila Yehoba. Kya kumwenako, Lahaba mwanamukazhi pite wamwesheshe lusa pa kufya bena Isalela baendejile ntanda. Bena Isalela nabo bamwesheshe lusa pa kumupulusha aye pamo ne ba mu kisemi kyanji, kimye muzhi wa Yeliko kyo a onawinwe. (Yosh. 2:1-21; 6:20-23) Byo kyaikalapo kya kumwenako kibena kumwesha amba inge twaubilwa lusa netuwa twafwainwa kumwesha lusa ne kulangulukilako bakwetu!

⁵ Abya mumwesha lusa kwi Yehoba kupichila mu kumusanchila aye pamo ne jibumba janji pa bupe bonse bo mubena kutambwila pa kino kimye nyi? Yehoba waamba amba, “Awa ulambula kitapisho kya kusanta ye untumbijika amiwa; Ne kwi aye unengezha jishinda janji bulongo amiwa nkamumwesha lupulukilo.” Ikalai na lusekelo lufuma mu kusanchila Lesa.—Sala. 50:23; 100:2.

⁶ Pa kupwila kwa nkambi kubena kwiya kwa “Bafunjishi ba Mambo a Lesa” nanchi tukoba byepi pa kutambula mabuku akalupulwa? ‘Atweba bonse, pa muntu pa muntu twafwainwa kusekesha bakwetu ku michima na kwibobila byawama byakonsha kwibakomesha. Ambai na muchima umo ne na kanwa kamo mukatumbijike Lesa Shanja Nkambo yetu Yesu Kilishitu.’ (Loma 15:2,6) Byubilo byetu pa bimye bya uno mutundu byakonsha kuletela Yehoba lukumo nangwa bumvu. Onkao mambo, atweba bonse twafwainwa kumwesha byubilo byafwainwa bantu bapopwela Lesa wakine pa kumwesha butemwe ku bakwetu. Bakulumpe ne bankwasho mu bipwilo pamo ne baana babo bafwainwa kwikala ba kumwenako mu kwimana bulongo mu munongo pa kutambula mabuku apya. Kafwako wafwainwa kushindaika bakwabo amba aye ekale mutanshi ne. Bantu ba ku kyalo baiya na kupwila bakonsha kwishindaika ne kwipachika mu bakwabo, bino inge bamona byo twaimana bulongo mu munongo: ‘bayuka jibiji mo bapusena baoloka ne babi, ne aye umwingijila Lesa, ne yewa ubula kumwingijila.’—Mala. 3:18.

⁷ Byonkabyo, twayai tulangulukenga byo tukamwesha lusanchilo pa bintu byanema byo tukatambwila. Yehoba wakoseshe bakalume banji’mba, “Mukajenga bijilo byami bisatu pa mwaka pa mwaka... . Kechi mukamweke ku meso ami mabokotu ne.” (Lupu. 23:14, 15) Atweba bonse twayai tumweshe kuba’mba tubena kusanchila bupe bwitupa Yehoba pa kuba’mba tumuyuke ne kumutemwa.