Tainga Bantu Muchima—Kupichila mu Kwalauka alauka

¹ Mutumwa Paulo wapaine kya kumwenako kyawama kya kwalula bya kwamba mambo awama kwesakana na byajinga bwikalo ne ndangulukilo ya luonde lwanji. (1 Ko. 9:19-23) Ne atweba twafwainwa kwibikangako kuba byonka bino. Kupichila mu kulangulukilapo jimo, twakonsha kwingijisha mashinda aji mu Mwingilo Wetu wa Bufumu, akonsha kwitukwasha kwamba kwesakana na bintu bikeba bantu banji mu nyaunda yetu. Kimye kyo tubena kusolomoka pa nzubo, twakonsha kumona bintu byatemwa mwina nzubo kabiji ne kwibyamba mu mwisambo ye tusakwisambanga. Nangwa byonkabyo, kuji jishinda jikwabo jo twakonsha kwalaukilamo mu mwingilo wetu.

² Pimpulainga Mwisambo Wenu Kwesakana na Bibena Kwambapo Bantu: Kimye kyo tusapwila mambo awama, javula twipuzha bwipuzho kabiji ne kuleka bena nzubo kukumbula. Mumvwa byepi umvwe bakumbula? Abya mwibasanchilatu ne kutwajijila kwamba pa mutwe ye mwanengezhezha jimo wa kwisamba nabo nyi? Inyi byo mwamba bimwesha kuba’mba munemeka bintu byaamba bena nzubo nyi? Umvwe kemute muchima byamba bantu, mwakonsha kwingijisha ne mepuzho akwabo afwainwa kuba’mba muyuke kine kintu kiji mu michima yabo. (Mana. 20:5) Mu jonkajo jishinda mwakonsha kusala mbaji ya mambo a Bufumu yamba kikatakata pa bintu biji ku muchima wa muntu ye mubena kwisamba nanji.

³ Kino kikebewa kwinengezhezha jimo kwamba pa mitwe ikwabo nangwa kya kuba’mba kuji imo yo twaji kunengezhezha jimo kwisambapo. Umvwe twatendeka kwamba pa lukatazho lumo lubena kwambapo bantu bavula kabiji mwina nzubo naye watongola bintu bibena kumwekana mu nyaunda yanji nangwa bintu bimukatazha ku muchima, kukebesha kwetu kwa kukeba kukwasha mwina nzubo, kuketulengela kwisamba nanji mwisambo wa mu Baibolo pa kintu kimukatazha bingi ku muchima.—Fili. 2:4.

⁴ Kupimpula Solomokelo Yetu: Umvwe mwina nzubo waipuzha bwipuzho, kyakonsha kuwama bingi kukesamba pa buno bwipuzho kimye kikwabo panyuma ya kuba twa kipesela peselapo byambo bikwabo pa yewo mutwe. Kabiji twakonsha ne kumushila mabuku alumbulula bulongo yewo mutwe. Abino byonse bimwesha kuba’mba twata kya kine muchima bantu kuba’mba bayuke Yehoba.—2 Ko. 2:17.