Buku wa Baibolo Ufunjisha—Kyo Kine Kingijisho Kyetu Kikatampe kya Kufunjishishamo Baibolo
1 Byo twasangalelepo kimye kyafumine buku wa Nanchi Baibolo Kine Ufunjisha’mba Ka? pa Kupwila kwa Nkambi kwa “Kukokela Lesa”! Batainweko basangalele bingi pa kutambulako kope wa kyabo kyabo pa kupwisha pologalamu wa kupwila kwa juba ja bubiji. Nanchi kino kingijisho kya bukumo kya kufunjishishamo kikengijishiwanga byepi? Kyanengezhiwa kwikala kingijisho kyetu kikatampe kya kufunjishishamo Baibolo. Nangwa kya kuba’mba uno buku wa bukumo tukatendeka kumusha mu bujimi mu March, basapwishi batundaikwa kutendeka lonka luno kwingijisha uno buku kutendekelamo ne kufunjisha mafunjisho a Baibolo.
2 Mafunjisho a Baibolo Abena Kufunjishiwa: Basapwishi babena kufunjisha mafunjisho a Baibolo mu buku wa Kuyuka nangwa mu buloshuwa wa Nanchi Lesa Ukebaka bafwainwa kulangulukishapo bulongo pa kusala bya kutendeka ne kimye kyo bafwainwa kutendekelamo kwingijisha buku wa bukumo pa lufunjisho. Umvwe lufunjisho po po lwatendekatu, mwakonsha kutendekelatu ku ntendekelo ya uno buku wa bukumo. Umvwe mwafika palepa mu buku wa Kuyuka, mwakonsha kutwajijila lufunjisho mu kitango kyaesakana na kiji mu buku wa Baibolo Ufunjisha. Inge muji kwipi na kupwisha buku wa Kuyuka, mwakonsha kusalapo kupwisha uno buku.
3 Kwakubula nangwa kuzhinaukatu ne, atweba bonse twayuka bantu bavula bakamwenamo mu kufunda mu buku wa Baibolo Ufunjisha. Mambo ka a kubujila kutendeka lufunjisho lwa Baibolo na muntu uji yense mu kikye kingijisho kifunjisha bulongo? Kya kumwenako, aba bafundapo kala buloshuwa wa Nanchi Lesa Ukebaka nangwa buku wa Kuyuka babujile kukomenako kya kuba bepana ne kubatizwa, bakonsha kutemwa kutendeka jikwabo lufunjisho lwabo kwingijisha buku wa bukumo. Bansemi bakonsha kusalapo kwingijisha uno buku kimye kyo babena kufunjisha baana babo maana alumbuluka a kuyukisha kyaswa muchima wa Lesa.—Kolo. 1:9, 10.
4 Kufunda Buku wa Bubiji: Abya kujipo lunengezho lwa ubena kufunda Baibolo kufunda buku wa bubiji panyuma ya kupwisha buku wa Nanchi Baibolo Kine Ufunjisha’mba Ka? Ee. Umvwe kyamweka kuba’mba ufunda ubena kukomenako nangwa pachepache, kabiji ubena kumwesha kusanta pa bintu byo abena kufunda, lufunjisho lwakonsha kutwajijila mu buku wa Popwelai Lesa Yenka Wakine. Twaketekela kuba’mba buku wa Baibolo Ufunjisha ukekala kingijisho kiji na bulume akyo kiji mu maboko etu byo tubena kwingila mwingilo wa kulenga baana ba bwanga.—Mat. 28:19, 20.