Tainga Bantu Muchima—Kupichila mu Kwipuzha Mepuzho ne Kutelekesha
1 Bantu bavula bomvwa bingi bulongo kwamba biji milanguluko yabo, pano bino kechi bomvwa bulongo kwibafunjishatu kwakubula kwibapapo kimye kya kwambapo nangwa kwibashikishisha bitaala ne. Byo tuji bamwingilo wa bwina Kilishitu, twafwainwa kwikala na busendwe bwa kukwasha bantu kwiambila bene bintu biji ku michima yabo kupichila mu kwipuzha mepuzho.—Mana. 20:5.
2 Mepuzho etu afwainwa kulengela bantu kwiambila biji ku michima, kechi kwibachinya ne. Pa kusapwila ku nzubo ne nzubo, mulongo umo wipuzha’mba: “Nanchi mulanguluka’mba kukekalapo kimye bantu kyo bakeubilanga bintu na mushingi nyi?” Kwesakanatu na byo akonsha kukumbula, utwajijila’mba, “Mulanguluka amba ki ka kikebewa pa kuba’mba bino bintu bifikizhiwe?” nangwa’mba “Mambo ka o mwalangulukila byobyo?” Kimye kya kusapwila busapwishi bwa kushukilwa nangwa mu mapunzha mutanyiwa bantu bavula, mulongo mukwabo wipuzha aba baji na baana’mba, “Byo muji bansemi, ki ka kyo mwatemwishapo?” Apa bino waipuzha’mba, “Bintu ka bimo byakilapo byo mwateshako muchima?” Monai kuba’mba ano mepuzho alengela bantu kwamba biji ku michima yabo kwakubula kuchibakanya milanguluko yabo. Byo kiji kuba’mba bwikalo bwa bantu bwaenda kupusana pusana, twakonsha kupimpula mutwe ne mwakumwambila mu mepuzho etu afwainwa kwesakana na bantu baji mu nyaunda yetu.
3 Kulengela Bantu Kwamba Biji ku Michima Yabo: Umvwe bantu bakeba kwitubula biji ku michima yabo, mu butekanye batelekeshai bulongo kwakubula kwibachibikizha. (Yako. 1:19) Basanchila pa byambo byabo byo baamba. (Kolo. 4:6) Mwakonsha kwambatu’mba: “Akyo Kyawama bingi. Nasanta bingi pa kumbulako bino.” Umvwe mwakonsha kwikyuba batakaikai kufuma panshi ya muchima. Bepuzhai bulongo mepuzho akwabo pa kuba’mba muyuke byo balanguluka ne ene mambo o balangulukila byobyo. Ambainga pa bintu byo bayuka. Umvwe mubena kukeba amba bate muchima pa kinembelo, mwakonsha kwamba’mba, “Abya mwakilangulukapo kala’mba akye kyakonsha kubiwa nyi?” Chinuzhukainga kuminatu popolo pa kintu kimo nangwa kuvuzha mapata.—2 Timo. 2:24, 25.
4 Bantu byo bakumbula mepuzho etu byakonsha kwesakana na byo tuteleka. Bantu bakonsha kuyuka umvwe kya kine tubena kuteleka na muchima yense. Mukulumpe wenda wamwene’mba, “Umvwe mwamwesha kuta muchima bantu kupichila mu kutelekesha, kilengela bantu kwiambila biji ku michima yabo ne kumwesha patokatu to amba twata bantu muchima.” Umvwe saka tuteleka bantu kimwesha kuba’mba tupa bantu mushingi, kabiji kyakonsha kwibalengela kuteleka ku mambo awama o tukeba kwibasapwila.—Loma 12:10.