Mfweto ya Mambo Awama

‘Yehoba wanshinga manyi amba: Usapwile mambo awama ku bapelulwa; wantuma mu kwibabuka balajika michima, . . . ne kwibatekenesha bonse baji na bulanda.’—ISAYA 61:1, 2.

1, 2. (a) Yesu wilumbulwile’mba yeñanyi, kabiji muñanyi jishinda? (b) Mambo awama asapwijile Yesu aletele ñanyi mfweto?

PAJUBA jimo ja Sabado kuntendekelo yamwingilo wanji, Yesu, wayile mu nshinagoga mu Nazala. Monka mwaambila jishimikila, “bamupele ne buku wa ngauzhi wa Lesa, Isaya. Byo amuvungulula buku, wataine po kyanembwa’mba, Mupashi wa Nkambo uji pe amiwa, mambo wanshinga manyi amba, usapwile mambo.” Kabiji Yesu watwajijile nakutanga byambo byabungauzhi. Kepo aikele panshi nekwamba’mba: “Lelo kino kinembelo kyafikila ne anweba kasa mumvwa.”—Luka 4:16-21.

² Mujino jishinda, Yesu wilumbulwile aye mwine amba ye iye musapwishi watongwelwe, wakusapwila mambo awama nekutekenesha bantu. (Mateo 4:23) Mambo afunjishenga Yesu kine ajinga mambo awama. Wabujile bantu bamutelekelenga’mba: “Amiwa ne kyeya kya panopantanda: awa undondela amiwa kechi ukenda mu mfishi ne, ukekala na kyeya kya bumi.” (Yoano 8:12) Kabiji waambile’mba: ‘Anweba inge mukelwe monka mu mambo ami, abya kine mwi baana bami babwanga; ne anweba mukebuyuka bukine, ne abo bukine bukemukasulula ke baana babene.’ (Yoano 8:31, 32) Ee kine, Yesu wajinga na “byambo bya bumi bwa myaka.” (Yoano 6:68, 69) Kyeya, bumi, ne bwana bwabene, ke mfweto yanema bingi!

3. Ñanyi mambo awama asapwijilenga baana babwanga bakwa Yesu?

³ Pentekosta wa 33 C.E., byoapichile, baana babwanga batwajijile kwingila mwingilo wakwa Yesu wakusapwila. Basapwijile “mambo awama a Bufumu” kubena Isalela nekubantu bangi. (Mateo 24:14; Byubilo 15:7; Loma 1:16) Aba beomvwijile bamuyukile Yehoba Lesa. Bakujilwe kubuzha bwabupopweshi nekwikala kelubaji lwamukoka mupya wakumupashi, “bena Isalela ba Lesa,” baji naluketekelo lwakwikala bakalama myaka nemyaka pamo ne Nkambo yabo Yesu Kilishitu mwiulu. (Ngalatiya 5:1; 6:16; Efisesa 3:5-7; Kolose 1:4, 5; Lumwekesho 22:5) Ino yajinga mfweto yawama bingi!

Busapwishi Muano Moba Etu Alelo

4. Mwingilo wakusapwila mambo awama ubena kufikizhiwa byepi lelo jino?

⁴ Lelo jino, bena Kilishitu bashingwa, babena kukwashiwa na “jibumba jikatampe” ja ‘mikooko ikwabo’ jibena kuya nakuvujilakotu kikupu, babena kutwajijila nakufikizha mwingilo wabungauzhi wapainwe kwi Yesu waawijilwe jimo. (Lumwekesho 7:9; Yoano 10:16) Kibafumemo, mambo awama abena kusapwilwa bingi kukila nebyokyajinga kala. Mubyalo nemanyaunda 235, Bakamonyi bakwa Yehoba baya na ‘kusapwila mambo awama kubapelulwa . . . , kubuka balajika michima nekusapwila ku bo bakwata mambo akupokolwa, nekubakaili mambo akushinkula tuleya; nekusapwila mwaka wa Yehoba wakwibobila bantu lusa ne juba jakushinkanya kwa Lesa wetu; nekwibatekenesha bonse baji nabulanda.’ (Isaya 61:1, 2) Onkao mambo, mwingilo wabusapwishi bwabena Kilishitu ukitwajijila nakuleta mfweto kubantu bavula nekutekenesha boba baji ‘mu bya malwa byonse.’—2 Kolinda 1:3, 4.

5. Bakamonyi bakwa Yehoba bapusana byepi nabamembala bamu machechi a Kilishitendomu, pamambo akusapwila mambo awama?

⁵ Kyakine machechi a Kilishitendomu nao asapwila mumashinda avula. Bavula batuma bamishonale babo amba bayenga mubyalo bingi nakongola bantu. Kyakumwenako kesawakya umo waamba pamingilo yabamishonale ba Orthodox mu Madagascar, southern Africa, Tanzania, ne Zimbabwe mumagazini wa The Orthodox Christian Mission Center Magazine. Pano bino, mu Chechi ya Orthodox byonkatu biji mumachechi akwabo a Kilishitendomu, bamembala bavula kechi bengila uno mwingilone. Kupusanako nabo, Bakamonyi bakwa Yehoba bonse bepana, bengila mwingilo wabusapwishi. Mambo bayuka kuba’mba kwela mbila yamambo awama kejishinda jimo jakumwesheshamo lwitabilo lwabo. Paulo waambile’mba: “Na muchima muntu witabila ne kumona bololoke; kabiji na kanwa nako witabila ne kumona lupulukilo.” Lwitabilo lubula kutundaika muntu kwingila mingilo, lwafwa.—Loma 10:10; Yakoba 2:17.

Mambo Awama Aleta Mfweto Yamyaka

6. Ñanyi mambo awama abena kusapwilwa lelo jino?

⁶ Bakamonyi bakwa Yehoba basapwila mambo awamisha. Kimye kyobesamba nabantu bakeba kufunda, bazhikula ma Baibolo abo nekwibatangila kuba’mba Yesu walambwile bumi bwanji’mba bantu bamone jishinda mwakusolomokela Lesa, kulekelwa bundengamambo bwabo, nekwikala naluketekelo lwabumi bwamyaka. (Yoano 3:16; 2 Kolinda 5:18, 19) Bela mbila yakuba’mba Bufumu bwa Lesa bwaikajikwa mwiulu mubukalama bwa Mfumu, Yesu Kilishitu, nekuba’mba katatakatu bukafumyepo bubi panopantanda, nekupingizhapo Paladisa. (Lumwekesho 11:15; 21:3, 4) Mukufikizhiwa kwabungauzhi bwakwa Isaya, babulako bakwabo’mba kino kyokimye kya “kusapwila mwaka wa Yehoba wa kwibobila bantu lusa” pobakonsha kumvwa mambo awama. Kabiji bajimunako bakwabo kuba’mba katatakatu “juba ja kushinkanya kwa Lesa wetu” jifike, kimye Yehoba kyoakavizha bangubabibi babula kulapila.—Masalamo 37:9, 11.

7. Kika kyaubiwepo mukyalo kimo kimwesha Bakamonyi bakwa Yehoba byobakwatankana, kabiji mamboka obakwatankena?

⁷ Byotuji muino ntanda yamalwa, twafwainwa kuyuka’mba ano omambo awama akaleta mfweto yamyaka nemyaka. Aba beatambwila bekala kelubaji lwabwanabwankazhi bwantanda yonse bwabena Kilishitu babula kuswisha lupusano lwabyalo, mikoka, nangwa bwikalo bwabo kwibabanya. ‘Bavwala butemwe, mambo ye mukwato ulumbulula byonse.’ (Kolose 3:14; Yoano 15:12) Kino kyamwekeshetu patoka mwaka wapwa mukyalo kimo monka muno mwetu mu Africa. Juba jimo muzhi mukatampe wabukijiletu mukañumbwa-ñumbwa kamata lukelo. Bantu bamo bakebelenga kufumyapo kyalunkanankana kafulumende wajingapo. Kisemi kimo kya Bakamonyi kyasungile Bakamonyi bakwabo bamushobo ungi, nangwa kyakuba bebanenawinenga’mba mwasungilaka bantu bamushobo ungi. Kino kisemi kibabujile’mba: “Tubena kwikala nabakwetu Bakamonyi bakwa Yehoba.” Kupusana mishobo bekumwene’mba kechi kwanemane, butemwe bwabwina Kilishitu bobwanema bwakukwasha baji mulukatazho. Mulongo wabo umo wabula Kamonyi waambile’mba: “Bantu bamu bupopweshitu bonse baalukijilemo bakwabo bapopweshi. Bakamonyi bakwa Yehoba bobonkatu babujile kuba byobyo.” Byubilo byabutemwe byauno mutundu bishimikizhiwa kufuma mubyalo biji namitotololo yamulwabo bimwesha kuba’mba Bakamonyi bakwa Yehoba kyakine ‘batemwa balongo [bonse, NW].’—1 Petelo 2:17.

Mambo Awama Alula Bantu

8, 9. (a) Aba bafunda mambo awama baluka byepi? (b) Bika byaubilepo bantu bamo bibena kumwesha bulume bwa mambo awama?

⁸ Paulo watongwele mambo awama kuba’mba ke a ‘bumi buno, ne abwa bukeya.’ (1 Timoti 4:8) Kechi apanatu luketekelo lwabwikalo bwakulutwetu bonkane, bino akwasha nekwikala mutende ‘mu buno bumi.’ Bakamonyi bakwa Yehoba pamuntu pamuntu, balondela Baibolo, Byambo bya Lesa, pakuba’mba bwikalo bwabo bwikale mwayila kyaswa muchima wa Lesa. (Masalamo 119:101) Bumuntu bwabo bwikala kebupya byobatendeka kwikala nabyubilo nabiji bololoke nebukishinka.—Efisesa 4:24.

⁹ Monai byaubile Franco. Wajinga bingi muntu wabukaji. Umvwetu bamukatazha, wafikenangatu ponkapo kuzhingila nekulalaula bipe. Mwina kwanji wafunjilenga Baibolo na Bakamonyi bakwa Yehoba, nebyubilo byabo byabwina Kilishitu, byamukwashishe Franco kumona’mba wafwainwa kwaluka bukiji-bukiji. Byoamwene kino, naye watatwile kufunda Baibolo, kepo atatwile kumwesha bipangwa byamupashi byamutende nekwikanya. (Ngalatiya 5:22, 23) Naye wajingapo paboba 492 babatizwe mu Belgium mumwaka wamwingilo wa 2001. Nsongwalume wajizhina ja Alejandro naye wipizhizhe bingi bizhima kyakuba waendangatu nakuzhiikaula pabyala amba atolaulepo tubintu twakupotesha amwenemo mali akupotamo bizhima. Alejandro byoafikizhe myaka yakusemwa 22, waswile kufunda Baibolo na Bakamonyi bakwa Yehoba. Watangilenga Baibolo pajuba pajuba nekutanwa kukupwila kwabwina Kilishitu. Watokeshe bwikalo bwanji bingi bukiji kyakuba bañondo batanu naumo kasa bakyangye kupwa, wailenga mumwingilo wakusapwila. Naye wajingapo paboba 10,115 baingijile mwaka wapwa mu Panama.

Mambo Awama—Mfweto Kubapelulwa

10. Bañanyi bomvwa mambo awama, kabiji byubilo byabo byaluka byepi?

¹⁰ Isaya waawile kuba’mba mambo awama akasapwilwa kubapelulwa. Nga bano bapelulwa bobañanyi? Keboba balumbululwa mubuku wa Byubilo bya Batumwa amba ‘batongwelwa bumi bwamyaka.’ (Byubilo 13:48) Bano kebantu bapelulwa baji nabwikalo bwapusana-pusana bashinkula michima yabo kumvwa mambo abukine. Bantu bauno mutundu bafunda’mba kuba kyaswa muchima wa Lesa kuleta mfweto yakila byonse byakonsha kufuma muino ntanda. (1 Yoano 2:15-17) Pano Bakamonyi bakwa Yehoba bafunjisha byepi byambo bizhiikama mumichima yabantu mumwingilo wabo wabusapwishi?

11. Kwesakana nabyaambile Paulo, mambo awama afwainwa kusapwilwa byepi?

¹¹ Kyawama, twayai tumone byaingijile Paulo wanembejile bena Kolinda amba: ‘Amiwa byo naishile kwi anweba na kwimusapwila kushimuna kwa Lesa, kechi naishile na byambo byalambisha nangwa bya maana ne. Mambo napwishishe mu muchima namba, byo nji mukachi kenu kechi ngyuke kintu nangwa kimo ne, poso yenka Yesu Kilishitu, ne byo apopelwe.’ (1 Kolinda 2:1, 2) Paulo kechi wakumishenga bantu bamutelekelenga nabyoafunjilene. Kechi wafunjishepo kingine, posotu bishinka bya Lesa byanembwa lelo jino mu Baibolo. Kabiji monai lutundaiko lwakwa Paulo kumukwabo musapwishi Timoti: “Sapwila mambo kasa utengela.” (2 Timoti 4:2) Timoti bamutundaikilenga kusapwila “mambo” a Lesa. Kabiji Paulo wanembejile Timoti amba: “Kasa uteshakotu muchima ukefikizhe obe mwine kwi Lesa, sa walumbuluka, muntu wa mwingilo wabula ne kya kubilako bumvu, kasa utwalatu bulongo mambo a bukine.”—2 Timoti 2:15.

12. Lelo jino, Bakamonyi bakwa Yehoba bomvwina byambo byakwa Paulo nebyoaingijilenganyi?

¹² Bakamonyi bakwa Yehoba boba byonka byaubanga Paulo, kabiji nebyambo byoabujile Timoti. Bayuka bulume buji mu Mambo a Lesa kabiji beengijisha kimye kyobesamba nabakwabo mambo aluketekelo nealutekenesho. (Masalamo 119:52; 2 Timoti 3:16, 17; Bahebelu 4:12) Kyakine, bengijisha nemabuku akwabo alumbulula Baibolo kuba’mba aba bakeba kufunda bukine bayuke byavula kimye kyobabena kufunda bene Baibolo pabunke. Bino kimye kyonse batangila bantu byanembwa mu Kinembelo. Bayuka kuba’mba Mambo a Lesa anembeshiwa akonsha kukwasha bantu bepelula. Kabiji kwiengijisha mujino jishinda kukosesha nelwitabilo lwabo abo bene.

‘Kutekenesha Bonse Baji na Bulanda’

13. Bintuka bimo byamwekele mumwaka wa 2001, byalengejile’mba pakebewe lutekenesho lwakutekenesha kubajinga nabulanda?

¹³ Mumwaka wa 2001 mwamwekele malwa akatampe bingi, kabiji bantu bavula bakebelenga lutekenesho. Malwa amwekele mwaka wapwa muñondo wa Kainyainya mu United States, ajinga pakishimikwa kya World Trade Center mu New York nekya Pentagon kwipi na Washington, D.C. kimye bambanzhi kyobalukukile bino bishimikwa nekwibikundulatu byonse shata. Buno bumbanzhi bwaletejile bingi bulanda kyalo kyonse. Mubintu byauno mutundu, Bakamonyi bakwa Yehoba bebikako kwingila mwingilo wabo wa ‘kutekenesha bonse baji na bulanda.’ Bantu bamo bacheche bobatekeneshe bamwesha byoboba kino.

14, 15. Bakamonyi baingijishe byepi binembelo pabimye byapusene bibiji mukutekenesha baji nabulanda?

¹⁴ Kamonyi umo musapwishi wakimye kyonse wasolomokelepo mwanamukazhi umo mujishinda nekumwipuzha byoalangulukilengapo pa oa malwa aubile bambanzhi. Uno mwanamukazhi watendekele kujila. Kepo aambile kuba’mba akye kyamweka kyatama bingi, watonga nekuba’mba nanchi umvwe najipo najishinda mwakwikikwashisha amiwa kamulanda. Kamonyi wamubujile kuba’mba atweba bantu bonse Lesa witutemwa, nekumutangila wamutangijile Isaya 61:1, 2. Bino byambo byanembeshiwa kwi Lesa byamulengejile mwanamukazhi kwamba’mba nanchi bonse baji nabulanda. Watambwile talakiti nekulomba uno Kamonyi kumwendela panzubo yanji.

¹⁵ Bakamonyi bakwabo babiji bajinga mumwingilo wabusapwishi, bataine mwanamulume saengila mukishimikwa kyanji. Bamulombele amba besambe nanji byambo byamu Binembelo byalutekenesho pamambo amalwa amwekele pa World Trade Center. Byoaswile batangile 2 Kolinda 1:3-7 muji nebyambo byakuba’mba: “Bya bukwasho . . . bituvujila pamo mwi Kilishitu.” Uno mwanamulume wasanchile bingi kuba’mba Bakamonyi boekala nanji kimasamasa kimo batekeneshengako bakwabo, nekwamba’mba: “Kine Lesa apeshe mwingilo wenu wawama yemubena kwingila.”

16, 17. Bantuka babiji kotwamwena bulume bwa Baibolo bwakukwasha bantu baji nabulanda namambo abyamalwa?

¹⁶ Kamonyi umo kimye kyoailenga nakufwakesha jibiji bantu bamwesheshe lusekelo lwakukeba kufunda wasambakene mwana wamulume wainetu umo wamwesheshe lusekelo lwakukeba kufunda. Wamulumbulwijile kuba’mba naye uji bingi nabulanda pakumona bakwabo mobekela mukimasamasa byobasusuchilenga kimye kyamwekele malwa. Uno wamulume wakuminye bingi pakumona Kamonyi waingijisha kimye kyanji mukufwakesha bantu nakumona byobaji. Waambile’mba waingijilenga kwipi na World Trade Centre nekwimwena aye mwine byoyaponenenga. Byoaipwizhe’mba mamboka Lesa kyoaswishisha lumanamo, Kamonyi watangilepo mavesi amo mu Baibolo kubikapo ne Masalamo 37:39 aamba kuba’mba: “Lupulukilo lwa baoloka lufuma kwi Yehoba: Aye ye nsakwa yabo mu kimye kya malwa.” Wasanchile bingi kufuma mukachi kamuchima wanji pakumufwakashisha, nekwambila Kamonyi amba akemunepo kisemi kyanji, apa bino nekumulomba kubwelako jibiji.

¹⁷ Mukwabo yebatekeneshe Bakamonyi bakwa Yehoba mubyobya biumbi byabantu baubile bulanda panyuma yabobwa bumbanzhi bwaubiwe wajinga, nsongwakazhi yebataine Bakamonyi kimye kyobafwakashijilenga bakwabo mobekela mukimasamasa. Aa malwa amwekele amuzhokolosheshe bingi bongo, kyokyamulengejile nekutelekako kimye kyobatangile Masalamo 72:12-14 aamba’mba: “Aye ukamupokolola wakajilwa pa kujila, ne aye mulanda wabulwa ne wa kumukwasha. Ukebobila lusa bayanji ne bakajilwa, ne myeo ya bakajilwa ukeipulusha. Ukebakula myeo yabo ku kunyantwa ne ku bukapondo; ne mashi abo akekala ke anema ku meso anji.” Bino byambo byobyamutekeneshepo! Awe nsongwakazhi walombele Bakamonyi kutanga mavesi jibiji nekwibeta wibechile munzubo yanji amba batwajijile mwisambo. Lufunjisho lwa Baibolo lwatendekejile ponkapo monka mumwisambo wabo.

18. Kamonyi wakwashishe byepi bakwabo byobamwichile kwibemenako mululombelo?

¹⁸ Kamonyi umo wingila munzubo yobapotesheshamo kajo mukijiiji muji bantu banonka babulanga kala kumwesha lusekelo lwakukeba mambo awama a Bufumu. Kimye kyamwekele bumbanzhi, bantu mukino kijiiji baubile bingi bulanda. Panyuma ya oa malwa, byokyafikile pakitanu mabanga mukulumpe wankito paino nzubo mwakupoteshesha kajo, walombele bonse kuya pangye nekwimana kimpa saka batulumana nzoo nakuvuluka boba bafwa kasa balama tundulu mumaboko abo. Kamonyi walupukile naye waimana byonkabya saka azhindama nzoo. Mukulumpe wankito byoamuyukile kuba’mba Kamonyi wakwa Yehoba, wamulombele kwibemenako mululombelo. Kamonyi wilushibapo nelulombelo. Mululombelo lwanji, watongawilemo bulanda buji nabantu bavula, bino walombele’mba bantu baji nabulanda bafwainwa kwikala naluketekelo. Watongwele nekimye kikabula kwikalako byonse bintu byabumbanzhi, nekwamba’mba bantu bonse babena kujila bakonsha kufwenya kwipi ne Lesa walutekenesho kupichila mukufunda maana alumbuluka aji mu Baibolo. Byoapwishishe kulomba nekwamba’mba “Amena,” mukulumpe wankito nebakwabo bantu 60 bajinga pangye yanzubo mwakupoteshesha kajo bakungulukijile kwi Kamonyi, bamukumbata nekumusanchila, nekumubula amba ukyangye kumvwapo kala lulombelo lwawama bibyene.

Mfweto Kubantu

19. Kika kyamwekele kimwesha bantu bamo byobayuka byubilo bya Bakamonyi bakwa Yehoba?

¹⁹ Muano moba otujimo, bantu baji mubimasamasa mubena kwingijila Bakamonyi bakwa Yehoba babena kumwenamo bingi mfweto —byonka byaamba bavula. Ee kine, bantu bakeba mutende, bukishinka, nebyubilo byatoka too, ke bantu bamo bawama bingi. Mukyalo kimo Kyapakachi ka Asia, Bakamonyi basambakene muntu wajinga mukulumpe wamingilo wakulama mutende mukyalo. Wibabujile kuba’mba kimo kimye bamutuminepo kuya nakupesa-pesa mabumba avula abupopweshi. Kimye apesele-pesele Bakamonyi bakwa Yehoba, wimwenejile byobaji bantu bakishinka kabiji babyubilo byawama. Wakumbilwe bingi lwitabilo lwabo lwakosa lubula kutelengela, nemafunjisho abo afuma mu Binembelo. Uno muntu waswile amba afundenga Baibolo.

20. (a) Mwingilo waingijile Bakamonyi bakwa Yehoba mwaka wapwa umweshaka? (b) Kika kimwesha kuba’mba kukiji mingilo yakwingila yavula, kabiji tumumona byepi mwingilo wetu wakusapwila?

²⁰ Mubyamwekele bimo byashimikizhiwa muuno mutwe byotwatolaulamotu mubyaubiwe byavula, kyamwekeshatu patoka kuba’mba Bakamonyi bakwa Yehoba bapayankene bingi mumwaka wamwingilo wa 2001.a Besambile nabantu bavula bingi, batekeneshe bavula baji nabulanda, nemumwingilo wabo wabusapwishi mwafumine bintu byawama. Bantu bamwesheshe patoka kwipana kwabo kwi Lesa mulubatizhilo, bajinga 263,431. Kuzhokoloka ntanda yonse, kibelengelo kyabasapwishi kyakomenako namapesenti 1.7. Kabiji pakumona bantu 15,374,986 batainwe ku Kivuluko kya lufu lwa Yesu kibena kumwesha kuba’mba mwingilo wabaya koakiji. (1 Kolinda 11:23-26) Onkao mambo, twayai tutwajijile nakukeba bantu bapelulwa bomvwina mambo awama. Kimye kya Yehoba kyakwibobila bantu lusa byokibena kukitwajijila, twayai tutwajijile kutekenesha ‘bapelelwa.’ Uno mwingilo yetujimo byoaletapo lusekelo! Kinetu atweba bonse twamba byambo byakwa Isaya amba: “Amiwa nkasekela mwi Yehoba, ne muchima wami ukasangalela mwi Lesa wami.” (Isaya 61:10) Lesa atwajijile kwitwingijisha byoabena kufikizha bino byambo byabungauzhi: “Nkambo Yehoba ukamwesha bololoke ne lutotelo ku meso a mikoka yonse ya bantu.”—Isaya 61:11.

[Tubyambo twa mushi]

Mukivulukanyi?

• Mambo awama oasapwijilenga Yesu afwetele byepi bantu bapelwilwe?

• Mfwetoka yobamwenejilemo aba baumvwijile mambo awama asapwijilenga baana babwanga bakwa Yesu ba mukitota-myaka kitanshi?

• Mambo awama ebafweta byepi bantu bakeba kufunda bukine lelo jino?

• Jishuko jetu jakwikala basapwishi twijimona byepi?

[Chati pa peja 29-32]

2001 SERVICE YEAR REPORT OF JEHOVAH’S WITNESSES WORLDWIDE

(Monai buku wa Kyamba wa 2002)

[Bipikichala pa peja 25]

Kimye kyonse Bakamonyi bakwa Yehoba bavuluka mwingilo wabo wakusapwila

[Bipikichala pa peja 27]

Aba bomvwina mambo awama baluka kelubaji lwa bwanabwankazhi bwantanda yonse