Kutana Bukine

PAJINGA pa December 18, 1810. Ajinga mabanga ene a bufuku. Bwato bwa nzhita ya pa mema ya bena British butelwa’mba HMS Pallas bwalubijilemo pa kalunga kaubile bingi manyaki kwalepa na kitulu kyaikela ku kabeta ka ku bulenge musela bwa Scotland. Byo bwayijile, kibashupile bingi pa kuba’mba bayuke kwaikejile nzubo mwajinga malaichi ebakwashanga kuyuka’mba pano balubuka. Baumvwine bingi bulongo byo bamwene kikela kya malaichi! Beanankamine amba kwapwa pano bapuluka. Pano bino, ano kechi ajinga malaichi a kwibatangijila ne. Ajinga malaichi a bamwingilo atemenenga kwipi na kitulu. Abwa bwato bwa Pallas bwakeshachile ku mabwe ne konaika bwaonaikile. Bantu jikumi na umo bajinga mu bobwa bwato bafwile. Kino kintu byo kyataminepo!

Bantu bajinga mu bwato bwa Pallas bafwile mambo a kulubilamo. Pano bino javujishatu bakañenda ba mu mato balobanga na mambo a kwibabepa ku bantu babikanga malaichi a kwibongola. Buku wa Wrecks, Wreckers and Rescuers waamba’mba: Ano malaichi beabikanga kuba’mba akumpulenga mato ne kwiatwala mu mabwe kuba’mba umvwe aonaika abo baangatako bipe.

‘Binembelo Byazhila Byakonsha Kwimutangijila ku Lupulukilo’

Byo mukeba bukine, mupita mu makatazho aji nobe oa apichilemo boba baendelenga mu mato. Mwakonsha kulondela byambo bya bubela, nangwa kwimubepela bubela bwafitatu bwii. Bino byonse byakonsha kuleta malwa. Pano mwakonsha kuba byepi pa kuba’mba mwizhikijile? Monai kuba’mba bukine bo mubena kukeba kine boibo kabiji bwaketekelwa bulongo. Kukila pa myaka 125, ino magazini ifunjisha kuba’mba Baibolo, ke Mambo a Lesa kabiji mo muji bukine, mambo ke ‘binembelo byazhila byakonsha kwimupa maana a kumona lupulukilo.’—2 Timoti 3:15-17.

Pano bino pa kuba’mba muketekele Baibolo amba kyo kyeya kyakonsha kwimutangijila, kyawama patanshi kukimona bukine bwayo. (Masalamo 119:105; Byambo bya Mana 14:15) Umvwe mukeba kuyukilako byavula nembelai bene bena ino magazini kuba’mba bemubule bukine bwakwasha bantu bavula kushiinwa’mba Baibolo kine wanembeshiwa na Lesa. Kya kumwenako, tangai buloshuwa uji na mutwe wa kuba’mba A Book for All People.a Muji bishinka byavula bingi byaamba amba Baibolo wa kine, waluñama, kabiji wanembeshiwa na mupashi.

Bukine

Pano nga bukine buji mu bino “binembelo byazhila” bo bwepi? Akimonai bya kumwenako byalondelapo.

Kujitu Lesa Wa bulume bonse umo yenka walengele bintu byonse. (Ntendekelo 1:1) Atweba kotuji ‘mambo [Lesa] walengele bintu byonse’ ne kwitupa bumi. (Lumwekesho 4:11) O ene mambo aye bunketu ye ye twafwainwa kupopwela. Mulenga wetu ye Nsulo ya bukine. (Masalamo 36:9; Isaya 30:20, 21; 48:17, 18) Uji na jizhina jo akeba’mba atweba bonse twijingijishenga. (Kulupuka 3:15) Jino jizhina janembwa mu bisopelo bya Kihebelu ne kutuntululwa amba YHWH, jitanwa bimye nobe 7,000 mu Baibolo. Pa myaka yavula yapitapo jinembwa mu Kikaonde amba “Yehoba.”—Masalamo 83:18.

Yehoba walengele bantu amba bakekalenga mu Paladisa panopantanda myaka ne myaka. Wapele bano bantu byubilo bya ku mupashi byamwesheshe aye mwine byo aji. Wibapele bya bupe ne maana a kuba’mba beyowenga bwikalo panopantanda. (Ntendekelo 1:26-28) Kechi walengele ino ntanda amba ya kwesekelapo bantu bino inge baikala na byubilo byawama baya mwiulu uba nobe mo monka mo bafwainwa kwikala balunda nanji ne.

Mu bilengwa byonse bya Lesa kechi mwajingapo bubi ne. Bubi bwaishile kwikalako kimye bilengwa bimo bya Lesa bya mupashi ne bya panopantanda kyo byabujile kwingijisha bulongo lūsa lwabyo lwa kwifukwila ne kusatukila Lesa. (Mpitulukilo ya mu mizhilo 32:5) Bansemi betu batanshi bajinga na lūsa lwa kwifukwila kyawama ne kyatama. (Ntendekelo 2:17; 3:1-5) Kino kyaletele lufu ku bantu. (Ntendekelo 3:19; Loma 5:12) Pa kuba’mba aa mambo akolomwenwe na mambo a bunsatuki apwe, Yehoba waswishishe bubi kutwajijila pa ka kimye kacheche. Pano bino nkebelo yanji ku ino ntanda ne bantu kechi yapimpulwa ne. (Isaya 45:18) Bantu bakekalanga myaka ne myaka mu Paladisa panopantanda.—Mateo 6:10; Lumwekesho 21:1-5.

Yesu Kilishitu kechi ye Lesa Wa bulume bonse ne, ke Mwana Lesa. Yesu Kilishitu wafunjishe baana banji ba bwanga kulomba amba: “Tata wetu wa mwiulu, Jizhina jenu jizhile.” (Mateo 6:9) Kechi waambilepo amba waesakana na Lesa ne. Bino aye waambile’mba: “Batata bo bankila.”—Yoano 14:28.

Yesu wingila mwingilo wa Lesa wanema bingi. Lesa wamutumine kwikala ‘kyeya kya panopantanda, amba awa wamwitabila aye kechi akelwe mu mfishi ne.’ (Yoano 12:46) Mutumwa Petelo waambile’mba, “Lupulukilo kechi luji mu mukwabo nangwa umo ne.” (Byubilo 4:12) Kino kya kine mambo mashi a kwa Kilishitu o etulengela amba tukapuluke. (1 Petelo 1:18, 19) Yesu Kilishitu wapaine bumi bwanji kwikala kitapisho kya bukuzhi bwa kukula bantu ku bundengamambo bwaletele bansemi betu batanshi ba Adama ne Evwa. (Mateo 20:28; 1 Timoti 2:6) Kabiji Yesu bamwingijishe kwi Lesa kuba’mba asolole kyaswa muchima ne nkebelo ya Lesa.—Yoano 8:12, 32, 46, 47; 14:6; Byubilo 26:23.

Lesa waikajika Bufumu, nangwa’mba kafulumende wa mwiulu, walengwa na Yesu Kilishitu ne boba basalululwa mu bantu. Kino kyo kishina kitanwa mu Baibolo yense. Lesa wapana uno kafulumende mu kukeba kuba’mba kyaswa muchima wanji kyubiwe pano panshi, byonka byo kyubiwa mwiulu. (Mateo 6:10) Nkebelo ya Lesa itanshi kechi yajinga ya kuba’mba muntu uji yense akaye mwiulu ne. Bantu bafwainwe kwikala panopantanda. Pano bantu byo balengele mambo, Lesa wafukwilepo kuba kintu kikwabo. Wanengezhezhe kusala ‘bantu ba mu bisaka byonse, ne ba mu njimi yonse, ne ba mu mitundu yonse, ne ba mu mikoka yonse . . . kuba’mba bakekale ke bamfumu’ pamo ne Kilishitu mwiulu. (Lumwekesho 5:9, 10) Buno Bufumu katatakatu ‘bukalalaule ne kupwishatu shata’ bufumu bonse bwa bantu bwaleta bulanda ne misongo ku bantu.—Danyela 2:44

Mweo ufwa. Buno bukine bwa mu Baibolo bwaamba bingi pa muntu byo aji ne luketekelo lo aji nalo. Kabiji bwalumbulula bulongo mafunjisho a bubela atwala bantu mungi pa mambo a bikala bafu.

Buku mutanshi wa mu Baibolo witubula’mba: ‘Yehoba Lesa wabumbile muntu na lukungu lwa panshi, kabiji wapuyile ne muya wa bumi mu myona yanji, byonkabyo ne muntu waalukile ke mumi.’ (Ntendekelo 2:7) Nanchi mwayuka kino byo kilumbulula nyi? Mweo kechi kintu kimo kiji mu mubiji wa muntu ne. Muntu kechi uji na mweo ne. Aye mwine ye mweo, mambo Lesa wabumbile muntu na “lukungu lwa panshi” ne kupuyila muya wa bumi mwi aye. Mweo ufwa. Umvwe muntu wafwa, ko kuba’mba mweo ye wafwa.—Ntendekelo 3:19; Musapwishi 9:5, 10.

Aba bafwa bakonsha kusangulwa jibiji ne kwikala na bumi. Umvwe kimye kicheche Lesa kyo aswisha bubi kwikalako kyapwa, ‘bonse baji mu bilende bakomvwa jiwi janji [Yesu], kepo bakafumamo; baubilenga byawama, ku lusanguko lwa bumi; aba baubilenga byatama, ku lusanguko lwa kije.’ (Yoano 5:28, 29; Byubilo 24:15) Bantu bakasangulwa ne kwikala mu paladisa panopantanda, bakekala bwikalo bonka Lesa bo akebele’mba bantu bekale mu ntendekelo.

Balaulainga Binembelo pa Juba pa Juba

Abya mwamona buno bukine byo bwakonsha kwimukwasha inge mwibuyuka nyi? Mu bino bimye byakatazha, buno bukine bwakonsha kwimuzhikijila ku ‘o batela mu bubela’mba maana’ a kwa Satana Diabola. Aye wialula nobe “malaika wa kyeya,” kabiji ne ba mingilo yanji bealula nobe “ba mingilo ya bololoke.” (1 Timoti 6:20; 2 Kolinda 11:13-15) Kufunda maana alumbuluka a mu Baibolo kwakonsha kwimuzhikijila ku bo batela amba bukine bwa butemwamaana bwa ino ntanda ya ‘ba maana ne ku ba milangwe,’ aba “bakana byambo bya Yehoba.”—Mateo 11:25; Yelemiya 8:9.

Mutumwa Yoano byo amwene’mba mafunjisho a bubela ne butemwamaana bwavula, wajimwine bena Kilishitu ba mu myaka kitota kitanshi amba: ‘Kechi mwitabe byambo byonse ne.’ Waambile’mba: “Esekai [byambo kana byo bya, NW] kwa Lesa; mambo bangauzhi ba bubela bavula bapalañena panopantanda.” (1 Yoano 4:1) Akimonai kya kumwenako. Umvwe bemubulapo byambo bimo byalamata bumi bwenu, nanchi mukafikenatu ponkapo mwibyumvwina na mambotu a kuba’mba nsulo ko byafuma ya kine nyi? Ine. Mwafwainwa kuyuka bulongo nsulo ine ne kumona kana abyo byambo bya kine saka mukyangye kumona mwakubila.

Lesa byo apana byambo bya bukine byanembeshiwa na mupashi wanji, wimulengela anweba ‘kweseka’ ne kumona kana akyo kyeya kyo mubena kulondela kya kine. (1 Tesalonika 5:21) Bantu ba maana bajingako mu myaka kitota kitanshi bebatakaikile bingi byo ‘babalawilebalawilenga mu binembelo pa juba pa juba’ amba bamone kana bintu byo bafunjilenga byajinga bya kine. (Byubilo 17:11) Ne anweba mwakonsha kuba byonkabye. Mwane kine lekai Baibolo emutangijilenga, mambo ye uji nobe “lampi utema pafita.” (2 Petelo 1:19-21) Umvwe mwauba bino, ‘mukamona maana a kumuyuka Lesa,’ onka ayukanyikisha bukine.—Byambo bya Mana 2:5.

[Tubyambo twa mushi]

[Kipikichala pa peja 4]

Mambo a Lesa aji nobe lampi

[Kipikichala pa peja 5]

Lesa jizhina janji ñanyi?

[Kipikichala pa peja 5]

Bantu bakekala byepi kulutwe na lwendo?

[Kipikichala pa peja 6]

Nanchi Yesu ye Lesa Wa bulume bonse nyi?

[Kipikichala pa peja 6]

Bafu baji pi?

[Kipikichala pa peja 7]

Lusanguko lwa bafu bo bukine bumo bufunjishiwa mu Baibolo