Belambwile Saka Baswa abo Bene—Mu Ecuador
MULONGO wakyanyike mu kyalo kya Italy kyamukatezhe bingi. Po po apwishishetu sukulu kabiji waubile bingi bulongo kukila bakwabo bonse mo bafunjilanga, pano balongo banji ne bafunjishi bamutundaikilenga kufunda kufika palepa. Bino byonse saka bikyangye kubiwa, Bruno wipaine kwi Yehoba ne kumulaya’mba ukatangizhangako kuba kyaswa muchima wanji mu bwikalo bwanji. Pano wasajilepo kyepi? Walumbulula’mba: “Namulayile Yehoba mu lulombelo kuba’mba nkekelanga monka mwayila kwipana kwami kwi aye ne kutangizhako bintu byo akeba. Pano bino, mu lulombelo lwami naambile ne kuba’mba mu bwikalo bwami mbena kukeba kwikala na bya kuba byavula mu mwingilo wa Yehoba.”
Byo papichile myaka icheche, Bruno wayile ku Ecuador, mu South America. Waamba’mba: “Yehoba wakumbwile lulombelo lwami mu jishinda jo nabujiletu ne kuketekela ne.” Kyamukumishe ke kya kuba’mba, byo afikile mu Ecuador, wataine bakyanyike bavula bingi baishile mu kino kyalo na kwingilako pakatampe mu mwingilo wa Yehoba.
BAKYANYIKE ‘BAMWESEKA YEHOBA’
Byonkatu byuba bakyanyike bavula kuzhokoloka ntanda yonse, Bruno naye waswile lwito lwa Yehoba lwa kuba’mba: “Ngesekai mumone, . . . ne amiwa nkemushinkwila bipenze bya mwiulu ne kwimwitulwila bibusa.” (Mala. 3:10) Na mambo a kutemwa Lesa, bafuukwilepo ‘kumweseka Yehoba’ kupichila mu kwipana kwingijisha kimye kyabo, bulume ne nsabo yabo mu kutundaika mwingilo wanji pa kuya na kwingijila ku kyalo kubena kukebewa basapwishi ba Bufumu.
Bano bamwingilo bepana byo batendekeletu mwingilo wabo wakatataka, bemwenejile bene kuba’mba “bujimi kine bwabaya, pakuba bamingilo bakepa.” (Mat. 9:37) Kyakumwenako, Jaqueline mwanamukazhi wafumine ku Germany wajinga bingi na lusekelo byo anembele nkalata ku ofweshi wa musampi wa mu Ecuador amba: “Naingijila muno mu Ecuador pa myakatu ibiji, kabiji bantu 13 bo bo mbena kufunjisha Baibolo. Pa bano, paji banga 4 batanwa ku kupwila kimye kyonse. Kino kintu kyawama bingi.” Chantal wafumine ku Canada washimikizha’mba: “Mu 2008, navilukijile ku mpuzha yaikela ku kitulu mu Ecuador ako kwajingatu kipwilo kimo. Pano luno kuji bipwilo bisatu ne bapainiya kukila pa 30. Kafwako kintu kileta lusekelo nobe kumona bakatataka saka babena kuba bulongo ne!” Wanungilepo amba: “Po po navilukijiletu mu muzhi mukatampe palepa makilomita 2.7, waikela mu Mitumba ya Andes. Mu uno muzhi muji bangikazhi kukila pa 75,000, pano mujitu kipwilo kimo. Ke nyaunda yawama bingi kwingijilamo. Mbena kwiyowa bingi mwingilo wa kusapwila!”
MAKATAZHO AJIMO
Pano bino, kwingijila mu kyalo kingi kechi kwapela ne. Bakyanyike bamo bajinga na mikiika saka bakyangyetu ne kuviluka ne. Kayla wafumine ku United States waambile’mba: “Byaubilenga balongo bamo mu kipwilo kyo najingamo saka nkyangye kuviluka byandefwilenga bingi. Bakankelwe kuyuka ene mambo o nakebejilenga kuya na kwingijila bupainiya ku kyalo kingi. Bimye bimo, nazhinaukanga namba: ‘Kana nafuukulapo bulongo nyi?’” Nangwa byonkabyo, Kayla wafuukwilepo kuviluka. Waamba’mba: “Kulomba kwi Yehoba ne kwisamba na balongo ne banyenga bakoma ku mupashi kwankwashishe kuyuka’mba Yehoba ukwasha boba baji na muchima wa kwipana.”
Kufunda mulaka mukwabo ke kintu kikatazha bantu bavula bingi. Siobhan wafumine ku Ireland uvuluka’mba: “Kyankatazhanga bingi kwamba saka nakasuluka bulongo. Nafunjile kutekanya, kutako muchima pa kufunda mulaka ne kwiseka amiwa mwine inge nalubankanya.” Anna wafumine ku Estonia wanungilepo amba: “Kyuya kiji mu ino mpunzha, lukungu, ne kubula mipompi ya mema a kyuya a kowa kechi kwaesakene pamo na kufunda mulaka wa bena Spain ne. Bimye bimo nakebanga ne kwikileka. Kyankwashishe ke kuta muchima pa mbaji yo naubilenga bulongo, kechi pa byo nalubankenyenga ne.”
Lukatazho lukwabo ke kuvuluka ku nzubo. Jonathan wafumine ku United States waambile’mba: “Byo nafikiletu, nalefwilwe bingi na mambo a kwabenamo na balunda nami ne kisemi kyami. Bino nashinjile ino milanguluko kupichila mu kuta muchima pa lufunjisho lwami lwa Baibolo ne mwingilo wa kusapwila. Kechi papichile ne moba avula ne, bintu byawama byo nataine mu bujimi ne balunda bakatataka bo naikele nabo mu kipwilo, byankwashishe kwikala na lusekelo jikwabo.”
Lukatazho lukwabo ke bwikalo. Bwikalo bwa ku kyalo kingi kechi bwakonsha kwesakana na mpunzha yo wapijilwa ne. Beau wafumine ku Canada witubula’mba: “Mu kyalo kyenu wakonsha kwingijisha malaichi ne mema a mu mipompi. Pano kuno, bino bintu kuba wibingijisha kwesakana na mo ukebela ne.” Buyanji, ñendelo yabula kulumbuluka ne kubula kufunda, byo bintu byavula mu byalo bikikoma. Ines wafumine ku Austria uchinchika bino bintu kupichila mu kuta muchima pa byubilo byawama bya bantu ba mu kyalo kyo engijilamo. Waamba’mba: “Baji na muchima wa kutambwila benyi, batekanya, bakwashañana, kabiji kechi belundumika ne. Bavula bakebesha bingi kufunda byavula pe Lesa.”
‘BIBUSA BYA KUBA’MBA KECHI MUKAMONA MWA KWIBILONGA NE’
Nangwa kya kuba bano bakyanyike babena kwingijila mu Ecuador basankijilepo bintu bimo mu bwikalo, batana kuba’mba Yehoba wibobila “bintu byavula kukila pa bintu byonse” byo baketekejilenga. (Efi. 3:20) Kya kine, bamona’mba batambula ‘bibusa bya kuba’mba kafwako ne mwa kwibilonga ne.’ (Mala. 3:10) Abino byo byo bomvwa pa mambo a mwingilo wabo:
Bruno: “Natendekejile mwingilo wami muno mu Ecuador mu kibunji kya Amazon. Mu kuya kwa kimye, naingijileko mwingilo wa kubayishako ofweshi wa musampi wa mu Ecuador. Aluno ñingijila pa Betele. Kimye kyo najinga mu Italy, nafuukwilepo kutangizhako Yehoba mu bwikalo bwami, kabiji kine ubena kumpa bintu byo nkeba, bwikalo bwa lusekelo ne bintu byapusana pusana mu mwingilo wanji.”
Beau: “Bulunda bwami na Yehoba bwakosa bingi mambo a kuba’mba muno mu Ecuador kimye kyami kyonse mbena kwikingijishatu mu mwingilo wanji. Kikwabo, nji na jishuko ja kufwakesha mapunzha awama, kintu kyo nakebeshanga kuba.”
Anna: “Na mambo a kuba ne muzhike, kechi nalangulukangapo kuba’mba nakonsha kwikala nobe mishonale ne. Pano nayuka’mba kechi kyakatazha ne. Mbena kumusanchila Yehoba pa byo ampesha, kabiji nji na lusekelo pa kwingilako mwingilo wa kulenga baana ba bwanga, kushimika Mazubo a Bufumu ne kwikala na balunda bakatataka.”
Elke: “Mu kyalo kyetu kya Austria, nalombanga kwi Yehoba kuba’mba ngikalepo na muntu umo wa kufunjisha Baibolo. Pano kuno, mfunjisha Baibolo bantu 15! Nsangalala bingi pa kumona lusekelo luji na bantu bomfunjisha Baibolo.”
Joel: “Ke kintu kyawama bingi kwingijila Yehoba ku mpunzha yo wabula kuyuka. Kabiji ufunda kuketekela mwi aye na muchima yense, kabiji kileta bingi lusekelo pa kumona byo abena kupesha kwibikako kobe. Mwaka mutanshi muno kufuma mu United States, jibumba jo naingijilenga najo jakomejileko kufuma pa 6 kufika ku basapwishi 21. Bantu batainwe ku Kivuluko bajinga 110.”
NGA ANWEBA KIJI BYEPI?
Anweba balongo ne banyenga bakyanyike, abya bwikalo bwenu bwakonsha kwimuswisha kuya na kwingijila ku kyalo kubena kukebewa basapwishi ba Bufumu nyi? Kya kine, kufuukulapo kuya na kwingijila ku kyalo kingi kukebewa kulangulukapo bulongo. Kyakila pa byonse, kutemwa Yehoba ne bakwetu ko kukebewa pa kufuukulapo kuba bino. Inge kya kuba muji na buno butemwe, kabiji mwafikilamo, lombeshaipo kwi Yehoba pa mambo a kuya na kwingijila ku kyalo kingi. Kunungapo, isambai na bansemi benu bena Kilishitu ne na bakulumpe mu kipwilo pa kintu kyo mukeba kuba. Umvwe mwauba bino, mwakonsha kutana kuba’mba ne anweba mwakonsha kwingilako uno mwingilo wazhila uleta lusekelo.
[Mabulañano pa peja 3]
“Milombelo kwi Yehoba ne misambo na balongo ne banyenga bakoma ku mupashi yankwasha kumona kuba’mba Yehoba upesha muchima wa kwipana.”—Kayla wafumine ku United States
[Kitenguluzha/Kipikichala pa peja 6]
Bya kwinengezha pa kuya na kwingijila mu kyalo kingi
• Ikalai na lufunjisho lwakosa lwa pa bunke
• Pitulukai mu byambo biji mu Mwingilo Wetu wa Bufumu wa August 2011, mapa 4-6
• Isambai na boba baingijilapo kala ku kyalo kingi
• Pesapesai bwikalo ne kisho kya bantu ba ku kyalo ko mukeba kuya na kwingijila
• Fundaiko byambo bimo bya mu mulaka ye bamba mu kyokyo kyalo
[Kitenguluzha/Kipikichala pa peja 6]
Bamo baya na kwingijila mu byalo bingi balama mali a kwikwashishamo kupichila mu . . .
• kwingilako nkito pa bañondo bacheche mu kyalo kyabo
• kusonkesha mazubo abo
• kushila muntu mukwabo busulu bwabo kuba’mba akatwajijile na kwibamwenako
• kwingila nkito kwingijisha Intaneti
[Bipikichala pa peja 4, 5]
1 Jaqueline wafumine ku Germany
2 Bruno wafumine ku Italy
3 Beau wafumine ku Canada
4 Siobhan wafumine ku Ireland
5 Joel wafumine ku United States
6 Jonathan wafumine ku United States.
7 Anna wafumine ku Estonia
8 Elke wafumine ku Austria
9 Chantal wafumine ku Canada
10 Ines wafumine ku Austria