‘Jimukai’
1 Pa nyuma ya kulondolola byubilo bikatampe bikamwesha kayukilo ka moba akupelako a byubilo bya bino bintu, Yesu wakambizhe bana banji ba bwanga ‘kujimuka.’ (Mako 13:33) Mambo ka Bena Kilishitu o bafwainwa kujimukila? Mambo tubena kwikala mu bimye byakilamo kutama mu mpito ya bantu. Kechi kyawama kukunuka lwa ku mupashi mu bino bimye bya kupelako ne. Kukunuka kwakonsha kwitulengela kukankalwa kusanchila mwingilo ye etupa Yehoba. Nanchi ñanyi mwingilo Yehoba ye etupa mu ano moba a kupelako?
2 Yehoba ubena kulengela bantu banji kutaya mbila ya mambo awama a Bufumu bwanji pano pa ntanda ponse pakuba ano mambo awama lo luketekelotu lwa bantu. Kwingijila pamo na jibumba ja kwa Lesa kwituyukisha kwikala bena Kilishitu bakine bayuka kimye kyo tujimo ne byo twakonsha kukwasha bakwabo kumvwa “byambo bya bumi bwa myaka.” (Yoano 6:68) Pa kwikala na kizaku kya kwikalamo na lubaji mu uno mwingilo wanema, tumwesha kiyukilo kya kuba’mba twajimuka lwa ku mupashi.
3 Bitulengela Kusapwila: Byo tuji Bakamonyi ba kwa Yehoba, twafwainwa kutemwa butumwa bwetu. Butemwe bwetu pe Lesa ne pa bakwetu bwafwainwa kwitulengela kwikalamo na lubaji mu mwingilo wa busapwishi. (1 Ko. 9:16, 17) Mambo mu kuba kino, tukepulusha atweba bene ne boba betumvwa pamo. (1 Timo. 4:16) Lekai kwikalamo na lubaji kimye kyonse ne kwingila maola avula papelela bulume bwetu mu kusapwila pa mambo a kamfulumende wawama bantu ye bakyangye kumonapo kala bwikale bukose bwetu —Uno kamfulumende bo Bufumu bwa kwa Lesa!
4 Paji kishinka kimo kyanema kitulengela kumona buneme bwa kukoselamo mu butumwa bwetu. Malwa akatampe akeya kimye kyo tukingila uno mwingilo. Mambo akuba kechi twayuka jine juba ne kimye ne, twafwainwa kwikala bajimuka kimye kyonse, sa tulomba ne kuketekela Yehoba. (Efi. 6:18) Jishuko ja mwingilo wa kusapwila jibena kutwajijila kununguluka. Bino nangwa byonkabyo juba jimo mu kimye kicheche, uno mwingilo mukatampe wa busapwishi wayukanyikwa mu mpito ya bantu ukapwa.
5 Na lwitabilo umvwinai mukambizho wa kwa Yesu wa kwikala ‘bajimuka.’ Kumvwina uno mukambizho kubena kukebewa bingi kukila byo kyajinga kala. Twayai tumvwine uno mukambizho na kizaku. Lelo jino, kabiji ne pa juba pa juba, twayai tutwajijile kwikala batako mana, bajimuka, ne babambakana lwa ku mupashi mu mwingilo wa kwa Yehoba. Ee, twayai “tulabenga ne kukenkenta kasa tutekanya.”—1 Tesa. 5:6.