Kusapwila Mambo Awama a Bufumu Kukwasha Bantu Kupuluka!
1 Yemwingilo wakilamo kunema ubena kwingijiwa panopantanda ponse pakino kimye. Yehoba Lesa, Yesu Kilishitu, nebiumbi nabiumbi byaba malaika babena kutangijila uno mwingilo. Mwingiloka, kabiji wanemenaka? Kemwingilo wakusapwila Bufumu, kabiji ukwasha bantu kupuluka!—Loma 1:16; 10:13, 14.
2 Bantu bamo bakonsha kulanguluka’mba twakonsha kukwasha bakwetu umvwe twitumpa mumukwekele wakuwamisha bintu panopantanda. Bavula beyeka’mba balete mutende, bino mutende ufwapo, kabiji beyeka kupwisha bikola, nekuwamisha bwikalo. Pano bino kika kikakwasha bantu?
3 Mwingilo Wanema: Mambo a Bufumu oonkatu alondolola nkebelo yabumi, kyalengela bantu kuyanda, neluketekelo lwakine luji kulutwe. Mambo awama alengela bantu kwikala balunda na Yehoba nemujino jishinda batambula “mutende wa Lesa ubula kuyukanyika.” (Fili. 4:7) Mambo awama a Bufumu oonkatu apana maana akukwasha bantu mwakubila namakatazho aano moba nekulumbulula byakukazhikijilwa kimye ntanda yatama kyoikonaunwa mukimye kyakulutwe. (1 Yoa. 2:17) Twafwainwa kwibikishako kusapwila mambo awama a Bufumu.
4 Kyakumwenako: Ñanyi jishinda jawama jakukwashishamo bantu balaala bufuku mumuzhi wazhokolokwa nakizhiba kibena kukeba kupomoka? Nanchi kupila mema aji mukizhiba kibena kukeba kupomokanyi, inyi kuwamisha yewa muzhi usaka konaika? Kafwako nangwa kimo pabinone! Kyafwainwa, kekubusha bantu bamuyewa muzhi, kwibajimunako paoa malwa abena kukeba kumwekana, nekwibakwasha kuba’mba bafumemo! Neboba baji mutulo twakumupashi lelo jino baji mukizumba kyamama nafwa. (Luka 21:34-36) Pakuba buno bwikalo byobuji pepi nakupita, twayai nanchi tusapwile bukiji-bukiji kubonse botwakonsha kufikako!— 2 Timo. 4:2; 2 Pe. 3:11, 12.
5 Koselai Muuno Mwingilo: Twayai tumonepo mashinda akufikizhizhamo mambo awama kubantu bamichima yakishinka—pamazubo abo, mumikwakwa, palamya, nemubusapwishi bwakushukilwa. Mwingilo yeetupa Yehoba kwingila keumo wanema bingi yetwakonsha kwingila. Umvwe twaingila nakizaku, ‘tusakukepulusha atwe bene ne aba betumvwa pamo.’—1 Timo. 4:16.