Juba ja Kupwila Kwiikajila Kubena Kwiya

Mu ano moba etu a lelo kusunga bulongo muchima wetu amba twikale na butuntulu bwawama ne kwikala moba avula kubena kwambiwapo bingi. Kyakilamo kunema ke kumona byafwainwa kwikala muchima wetu wa kifwanyikizho. Kino kyakwatankana bingi na mutwe wa kupwila kwiikajila kukatendeka mu September 2003 waamba’mba: ‘Kwingijila Yehoba na Muchima Yense.’ (1 Moba. 28:9) Bika byo tusakutengelanga kukafunda?

Mukulumpe wa kijiiji ukamba jashi ja kuba’mba: “Kukwasha Bakwetu Kwingijila Yehoba na Muchima wa Lusekelo.” Misambo ya mepuzho ikalumbulula bishinka bikatampe byaamba pa mambo a lusekelo lufuma mu kwikala na kizaku ne kufunjisha mafunjisho a Baibolo ku bantu bakeba kwingijila Yehoba. Bonse mu luonde bakatekeneshiwa bingi ne kutundaikwa na jashi jitanshi joakamba ñambi mwenyi jaamba’mba, “Kulama Michima Yetu mu ino Ntanda ya Makatazho.” Kipungu kya lukelo kikapezhako na jashi ja lubatizho.

Mu kipungu kya mute, jashi ja kuba’mba: “Kukwashañana” jikamba pa byo twakonsha kukwasha bakwetu. Nanchi bansemi bakonsha kuba byepi pa kuba’mba bazhikijile baana babo ku byubilo byatama ne kwiba kwasha kufwenya kwipi ne Yehoba? Jashi ja kuba’mba, “Kwashai Baana Benu Kusangalela mwi Yehoba” jikamba pa mashinda awama a kubilamo bino ne kulumbulula kino byo kyakonsha kubiwa.

Abya twingijisha bulongo lunengezho lonse Yehoba lo etupa kuba’mba tusungijile muchima wetu wa kifwanyikizho kwikala mutuntulu kabiji wakosa nyi? Jashi ja kupelako ja kwa ñambi mwenyi jiji na mutwe waamba’mba, “Twajijilai Kwingijila Yehoba na Muchima Yense,” jikamba pa mbaji ina yanema ya byo twafwainwa kusunga bumupashi bwetu bulongo. Tutayapo kimye ne ngovu yabaya byepi pa kulomba lulombelo na mukoyo, kufunda Byambo bya Lesa, kusapwila na mukoyo, ne kupwañena pamo na bakwetu bena Kilishitu? Nanchi twakonsha kuwamishapo mumo mumo mu ino mbaji nyi?

Yehoba witwita’mba: ‘Tesha muchima wobe ku byo bakufunda, ne matwi obe ku byambo bya maana.’ (Mana. 23:12) Tendekelaiko jimo kwinengezha kukatanwako ku jino juba ja lufunjisho lwa mu Binembelo mufuma mfweto. Kuba bino kukemukosesha kutwajijila kwingijila Yehoba na muchima wenu ne mweo wenu yense.