Ikomeshainga Anwe Bene na Bene
1 Mutumwa Paulo waingijile papelejile bulume bwanji mu kukosesha bakwabo ba mu lwitabilo. (Byubilo 14:19-22) Mu jishinda jimotu, ne atweba tuta muchima balongo betu umvwe baji na makatazho kabiji ne kukeba mashinda a kwibakwashishamo. Baibolo wamba’mba kechi bakulumpetu mu kipwilo bo bafwainwa kuta muchima bakwabo baji mu kipwilo ne. (Loma 15:1, 2) Akilangulukai pa mashinda abiji o twakonsha kulondelamo mukambizho wa butemwe wa kuba’mba: ‘Ikoseshainga anwe bene na bene, ne kwikomesha anwe bene na bene.’—1 Tesa. 5:11.
2 Yukai Bikeba Bakwenu: Mambo a Lesa amba kuba’mba Dokasi “wavujile mingilo yawama ne kupana wapaine bya bupe byavula.” (Byubilo 9:36, 39) Wayukilenga boba bakajijilwe kabiji ne kwibakwasha po akonsheshe kupelela. Ee kine witupa kya kumwenako kyawama bingi! Kimye kimo mwakonsha kuyuka’mba wakikulumpe ubena kukeba wa kumutwalako ku kipwilo. Nangwa kampe kwakonsha kwikala painiya wabula wa kwingila nanji mu mwingilo mukachi ka mulungu. Inge mwamonapo muntu uji bino kabiji mwamukwasha, wakonsha kutundaikwa bingi!
3 Misambo ya ku Mupashi: Twakonsha ne kukomesha bakwetu kupichila mu byo twamba. (Efi. 4:29) Mukulumpe mu kipwilo wafikapo waambile’mba: “Umvwe mukeba kutundaika bakwenu, ambainga misambo ya ku mupashi. Umvwe mukeba kutendeka mwisambo ukomeshañana, mwakonsha kwipuzha bwipuzho bwapela, nabiji bwa kuba’mba ‘Mwafunjile byepi bukine?’” Tai muchima bakyanyike baji mu kipwilo. Yai ku boba bapopomenwa ne boba baji na bumvu. (Mana. 12:25) Kange muleke misambo ya ino ntanda kwimutaila kimye kya kwisamba pa bintu bya ku mupashi na bakwenu ba mu lwitabilo ne.—Loma 1:11, 12.
4 Pano ñanyi misambo yo mwafwainwa kwisambangapo kuba’mba mukomeshe bakwenu? Nanchi mu kutanga kwenu kwa Baibolo kwa pa bunke, mwatainemo byambo byawama bimulengejile kutemwa Yehoba ne kumusanchila nyi? Abya mwatundaikilwepo na kishinka kyo mwaumvwine mu jashi ja mvula bantu nangwa mu Kyamba kya Usopa nyi? Inyi kampe mwatundaikilwe na kya kumwenako kimo? Umvwe saka munemeka bintu bya ku mupashi, mukekalanga jonse na bintu bya kukosesha bakwenu.—Mana. 2:1; Luka 6:45.
5 Twayai twikomeshenga atwe bene na bene kupichila mu kwikwasha ne kwingijisha bulongo lujimi wetu.—Mana. 12:18.