Ingijishainga Bulongo Kimye Kyenu mu Mwingilo

¹ Kuji bintu byavula bingi bibena kukebewa kwingijiwa mu mwingilo wetu, kabiji kimye kyashalako bekikepesha kala. (Yoa. 4:35; 1 Ko. 7:29) Kupichila mu kwinengezhezha jimo bulongo, twakonsha kwingijisha bulongo kimye kyo twatanchika kwingilako mu mwingilo.

² Inengezhezhainga Jimo: Saka mukyangye kuya ku kupwila kwa kuya mu mwingilo, monai kuba’mba muji na mabuku abena kukebewa kabiji ne kunengezhezha jimo byo musakuya na kwamba. Umvwe kupwila kwa kuya mu mwingilo kwapwa ne kulomba balomba, kange muzhinyezhinyenga ne, yainga mu mwingilo. Kino kikemukwasha anweba pamo ne bo mubena kwingila nabo kwingilako pakatampe mu mwingilo wa mu bujimi mu kimye kyo mwanengezha.

³ Umvwe bakulumpe bemwambila’mba mutangijile kupwila kwa kuya mu mwingilo, tendekai bukiji. Kuno kupwila kwafwainwa kwikala kwipi, mu maminiti 10 kufika ku 15 kwapwa. Saka mukyangye kupalañanya jibumba, monai’mba musapwishi yense uji na wa kwingila nanji kabiji ne kuyuka ko basakuya na kwingijila.

⁴ Inge Muji mu Mwingilo: Umvwe kupwila kwa kuya mu mwingilo kwapwa, kange muzhinyezhinyenga ne, tendekaikotu ponkapo kuya mu nyaunda. Javula kyawama bingi basapwishi kwingila babiji, mambo kipana jishuko ja kwitundaika ne kwifunjisha. Nangwa byonkabyo, mu manyaunda avula kwingila bunke kwawama bingi aku basapwishi bakwabo nabo saka babena kusapwila kipikipi. Kwingila bunke mu mwingilo wa mu bujimi umvwe kyakonsheka, kwitukwasha kwisamba na bantu bavula, kabiji kwitulengela kwinengezhezha jimo ku bimye bya kulutwe umvwe mwingilo wetu wa kusapwila bamukanya. (Monai Kyamba kya Usopa kya Kibemba kya November 15, 1985, peja 13, palagalafu 11.) Kulangulukapo bulongo kabiji ne kwikala na kizaku kya kukeba kwingilako pakatampe, kwafwainwa kwitulengela kutanchika bulongo kimye kyetu.—km-CW 5/99 pe. 7.—Kabokoshi ka Mepuzho.

⁵ Umvwe mukeba kubula kuyekaukangamotu kyatu pa kubwela ku bantu bo mwisambile nabo, mwafwainwa kukitendekelapo kuya na kumona aba baji ku mpunzha imo bino pa mwaya ku baji ku mpunzha ikwabo. Kyakonsha kuwama bingi kukitumako foni ku bantu bamo bo mukeba kubwelako kuba’mba muyuke kana po baji pa nzubo nyi, nangwa ne. (Mana. 21:5) Umvwe mwamona’mba musa kubanda pa kubwela ku bantu bo mwalayañene nabo, mwakonsha kubula bakwenu mo mubena kwingijila’mba bakisapwilengako kipikipi nangwa nabo bakibweleko ku bantu bo balayile kubwelako.

⁶ Tubena kwikala mu kimye kya kunowa kukatampe kwa ku mupashi. (Mat. 9:37, 38) Bukumotu uno mwingilo akapwe. Onkao mambo, twafwainwa kwingijishanga bulongo kimye kyetu mu mwingilo.