Ubainga Byawama ne Kupapo Bakwenu
1 Dokasi ‘wavujile mingilo yawama ne bya bupe byavula.’ (Byubilo 9:36, 39) Muchima wanji wa bupanyi wamulengejile kumutemwa bingi ku bantu bamuyukile kabiji ne kwi Yehoba Lesa. Bahebelu 13:16 baamba’mba: “Kuba byawama ne kupana bya kupana kwikuvulama ne: mambo bitapisho bya byonka bino byo bimutokesha Lesa ku muchima.” Twakonsha kuba byepi byawama ne kupapo bakwetu lelo jino?
2 Jishinda jimo jo twakonsha kukwashishamo bakwetu ke kwibapapo “bintu” byetu. (Mana. 3:9) Bupe bwetu bo tupana ku mwingilo wa ntanda yonse bulengela kutunga Mazubo a Bufumu, Mazubo a Kupwilamo Kukatampe, ne bishimikwa bya misampi mwaya ntanda yonse. Bupanyi bwetu bwakwasha bantu bavula kumwenamo mu mafunjisho a teokalasi kabiji ne kupwanañana kwa ku mupashi kukomeshañana.
3 Kutekenesha Bakwetu: Inge kwapona bya malwa, bantu ba Yehoba benengezha kubila “byawama” bakwabo ba mu lwitabilo kubikapotu ne boba babula kwitabila. (Nga. 6:10) Panyuma ya kutubika kwa bintu bimo pa kampanyi kalenga bya michi mu France, bamulume ne mukazhi baikelanga kwaubiwe kino baambile’mba: “Balongo betu ba bwina Kilishitu baishile bukiji bukiji na kukwashañana ne kuwamisha kibamba kyetu ne bya bakwetu mu kishimikwa. Bo twikala nabo kipikipi bakuminye bingi pa kumona kiombe kya bantu kyaishile na kukwashañana.” Nyenga mukwabo wanungilepo’mba: “Bakulumpe mu kipwilo baishile na kwitukwasha kabiji ne kwitutekenesha. Akino kyokyo twakebelenga kukilatu ne bukwasho bwa bintu bya ku mubiji.”
4 Byo kiji kuba’mba kuji mashinda avula bingi o twakonsha kubilamo byawama ku bakwetu, jishinda jakijishapo kunema ja kwibakwashishamo ke kwibabulako maana anema a bukine, avwangamo “luketekelo lwa bumi bwa myaka” bo alaya Yehoba. (Titu. 1:1, 2) Byambo bya mu Baibolo bipana lutekenesho lwa kine ku boba babena kujila na mambo a kutama kwa byubilo biji panopantanda kabiji ne na mambo a bundengamambo bwabo. (Mat. 5:4) Twayai tubenga byawama ne kupapo bakwetu umvwe tuji na bulume bwa kuba byobyo.—Mana. 3:27.