‘Ambainga Mambo a Lesa kwa Kubula Moyo’
1 Nanchi kimye kimo mukankazhama kwamba pa lwitabilo lwenu umvwe mwashukilwapo wa kwisamba nanji pa sukulu nangwa pa nkito nyi? Nanchi kimukatazha kusapwila busapwishi bwa kushukilwa ku balongo benu, ku bakinkalankulo nangwa kampe ku bantu bo mwabula kuyuka nyi? Ki ka kiketukwasha atweba bonse kushukilwapo bimye bya ‘kwambilamo mambo a Lesa kwa kubula moyo’?—Fili. 1:14.
2 Kukankazhamanga Ne: Nanchi mwakonsha kukankazhama kwimenako mulunda nenu wa pa muchima nangwa mulongo wenu ye babepela nyi? Mulunda netu wa pa muchima, aye Yehoba, bamubepela kyatama bingi pa myaka nobe kajo. Tuji na jishuko jikatampe bingi ja kwimenako Lesa wetu mukatampe! (Isa. 43:10-12) Butemwe bukatampe pe Yehoba bwakonsha kwitukwasha kubula bumvu nangwa moyo kabiji ne kwitulengela kushimuna bukine na kuchinchika kwa kubula kukankazhama.—Byubilo 4:26, 29, 31.
3 Vulukai kuba’mba, mambo etu ke mambo awama. Akaleta mfweto ya myaka ku boba beomvwa. Umvwe twata maana ku buneme bwa mwingilo wa kusapwila mu kifulo kya kwikala ba bumvu nangwa kuchina betwimena kuntundwa, kiketukwasha kusapwila na kuchinchika.
4 Kumwena ku Bantu Bakwabo: Twakonsha kwikala bakosa kupichila mu kumwena ku byaubile bantu ba bukishinka baambilenga mambo a Lesa kwa kubula moyo. Kya kumwenako, Enoka wasapwijilenga na kuchinchika buchibamambo bwa Yehoba ku bantu babujile kwakamwa Lesa. (Yu 14, 15) Nowa mu bukishinka wasapwijilenga ku bantu bamilengulwila. (Mat. 24:37-39) Bena Kilishitu ba mu myaka kitota kitanshi ‘babujile kufunda kabiji bajinga bantutu’ batwajijile na kusapwila nangwa kya kuba bamanyikilwenga bingi. (Byubilo 4:13, 18-20) Mu mabuku etu javula mutanyiwa mashimikila a bantu ba mu ano moba bachinchikile ne kwikala basapwishi bakosa na mambo a kwikala na lwitabilo mwi Yehoba.
5 Twakonsha kwikala bakosa umvwe ketulanguluke pa bya kumwenako bya bakalume ba kukala batalañenepo na makatazho akatampe. (1 Mfu. 19:2, 3; Mako 14:66-71) ‘Bachinchikile mwi Lesa wetu’ kabiji baambilenga kwa kubula moyo. Ne atweba twakonsha kuba byonkabyo.—1 Tesa. 2:2.