Mashinda a Kwisambilamo

Kutatula Mafunjisho a Baibolo pa Kibelushi Kitanshi mu February

“Bantu bavula bayuka kuba’mba Diabola ye ubena kulengela makatazho mu ntanda. Pano bino bakumya amba: ‘Nanchi Satana wafumine pi? Nanchi Lesa ye wamulengele nyi?’ Mwayukapo amba ka? [Lekai akumbule.] Akimonai byo baamba pa po.” Mu mweshai kibaba kiji pa jipa japelako mu Kyamba kya Usopa kya February 1, isambai nanji jifuka jitanshi ne kutanga kinembelo kyo bamwesha. Mushilai magazini ne kwisamba nanji kimye kyo mukabwelako na kwisamba bwipuzho bwalondelapo.

Kyamba kya Usopa February 1

“Mulangulukapo amba ka pa muntu ye banemeka ku bena Kilishitu, Bayudea, ne ba Muzilimu. Uno muntu ke Mosesa. Mulangulukapo amba ka umvwe mwaumvwa jino jizhina? [Lekai akumbule.] Nangwa kya kuba waubile bilubo, Baibolo waambapo bintu byawama Mosesa byo aubile. [Tangai Mpitulukilo ya mu mizhilo 34:10-12.] Uno magazini waamba pa byubilo byanji bisatu byawama ne byo twakosha kumulondela.”

Labainga! January

“Tubena kwisamba na bisemi byambo byakonsha kwibakwasha mu bwikalo. Nanchi mulanguluka amba kyanema bisemi kwingijisha bino byambo byaambile Yesu nyi? [Tangai Byubilo 20:35. Lekai akumbule.] Kyakatazha bingi kufunjisha baana kwikala na muchima wa kulangulukilako mu ntanda muji bantu betemwatu abo bene. Kino kibaba kyaamba pa bintu byakonsha kukwasha bansemi kufunjisha baana kwikala na muchima wa kulangulukilako bakwabo.”