လါယူၤလံ

တၢ်လၢယ့ၣ်ၡူးတဲဝဲ ဒီးမၤဝဲကိးမံၤဒဲးန့ၣ် အကွၢ်လိဝဲအပါအဃိ ယ့ၣ်ၡူးအတၢ်ပာ်သူၣ်ပာ်သးဖဲ အမၤတၢ်လီၤလးအခါန့ၣ် မၤစၢၤပှၤလၢ ပကသ့ၣ်ညါဘၣ် ယဟိဝၤယွၤ အတၢ်ဆိကမိၣ် ဒီးအတၢ်တူၢ်ဘၣ်စ့ၢ်ကီး. (ယိၤ ၁၄:၉) တၢ်လီၤလးလၢ ယ့ၣ်ၡူးမၤဝဲန့ၣ် ပန့ၢ်ဘၣ်တၢ်မၤလိ မနုၤလဲၣ်. ယ့ၣ်ၡူးဒီးအပၢ် အဲၣ်ပှၤဒိၣ်မး. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အပာ်ဖျါထီၣ်လၢ အအဲၣ်ပှၤဟီၣ်ခိၣ်ဖိ ခီဖျိအမၤတၢ်လီၤလး လၢကမၤစၢၤ ပှၤလၢအထံၣ်ဘၣ် တၢ်ကီတၢ်ခဲ. ဘၣ်တဘျီန့ၣ် ပှၤမဲာ်တထံၣ်တၢ်ခံဂၤ ကိးပသူထီၣ်ဒီးဃ့ကညး ယ့ၣ်ၡူးလၢ ကမၤစၢၤအဝဲသ့ၣ်. (မး ၂၀:၃၀-၃၄) ဖဲန့ၣ်ပထံၣ်ဘၣ်လၢ ယ့ၣ်ၡူး “သးကညီၤ” အဝဲသ့ၣ် ဒီးယ့ၣ်ၡူးမၤစၢၤအဝဲသ့ၣ် ဒ်သိး အဝဲသ့ၣ် ကထံၣ်ထီၣ်က့ၤတၢ်. ကြံးအတၢ်ကတိၤလၢအမ့ၢ် “သးကညီၤ” န့ၣ်ဘၣ်သးတဲဝဲ အခီပညီ တၢ်သးကညီၤလၢ အဟဲထီၣ်လၢ ပှၤသးပူၤနီၢ်ကီၢ်. ယ့ၣ်ၡူး သးကညီၤပှၤဂၤနီၢ်ကီၢ်အဃိ အပာ်ဖျါထီၣ်တၢ်အဲၣ် ခီဖျိအဒုးအီၣ်ဒုးအီ ပှၤလၢတၢ်သၣ်ဝံၤအသး ဒီးမၤဘျါပှၤဘၣ်တၢ်ဆါအၢ. (မး ၁၅:၃၂; မၢ် ၁:၄၁) ပသ့ၣ်ညါဘၣ်လၢ ယဟိဝၤယွၤန့ၣ် အကဲကစၢ်ယွၤလၢအ “အိၣ်ဒီးတၢ်သးကညီၤ,” အီၤဒီးအဖိခွါန့ၣ် အဲၣ်ပှၤဒိၣ်မး ဒီးဖဲပထံၣ်ဘၣ် တၢ်ကီတၢ်ခဲအခါန့ၣ် အဝဲသ့ၣ်သးဘၣ်ဒိညါ. (လူၤ ၁:၇၈; ၁ ပ့း ၅:၇) အဃိ အဝဲသ့ၣ် ဘၣ်သး မၤလီၤမၢ်ကွံာ် တၢ်ကီတၢ်ခဲခဲလၢာ်လၢ ပှၤဟီၣ်ခိၣ်ဖိထံၣ်ဘၣ်ဝဲ သပှၢ်တၢၢ်. တၢး၂၃.၀၄ ၃ ¶၄-၅

တၢ်မၤမုာ်မၤဖှံသးလၢ ပှၤအါဂၤဘၣ်သူၣ်ဘၣ်သးဝဲ လၢဆၢကတီၢ်ခဲအံၤန့ၣ် ပကဘၣ်ကျဲးစၢး ဟးဆှဲးအီၤသပှၢ်တၢၢ်. ဒီးဒ်သိးပဆိမိၣ်တၢ်လၢ အဂ့ၤကသ့အဂီၢ် ပကဘၣ် ဖးလံာ်စီဆှံ, မၤနီၢ်ကစၢ်တၢ်မၤလိလံာ်စီဆှံ, ထီၣ်တၢ်အိၣ်ဖှိၣ် ဒီးဟးစံၣ်တဲၤတဲလီၤတၢ်ထီဘိ. တကးဒံးဘၣ် ယဟိဝၤယွၤ အၢၣ်လီၤပှၤလၢ အတဟ့ၣ်အခွဲးလၢ တၢ်ကမၤကွၢ်ပှၤ တုၤလၢပတူၢ် တကဲလၢၤဘၣ်န့ၣ်ဘၣ်. (၁ ကရံၣ် ၁၀:၁၂, ၁၃) ပအိၣ်မူဘၣ်လၢ မုၢ်နံၤခံကတၢၢ် အဆၢကတီၢ်အဃိ ဒ်သိးပကသးတီဒီး ယဟိဝၤယွၤအဂီၢ် ပကဘၣ်ဃ့ထုကဖၣ် ဆူၣ်ဒိၣ်န့ၢ်ဒံးလၢညါ. ဖဲပဃ့ထုကဖၣ်တၢ်အခါ ယဟိဝၤယွၤ ဘၣ်သးလၢပက ‘တဲဖျါထီၣ် ပတၢ်တူၢ်ဘၣ်ခဲလၢာ် လၢအအိၣ်.’ (စံး ၆၂:၈) ဒီးပကဘၣ် စံးထီၣ်ပတြၢၤ ယဟိဝၤယွၤ ဒီးစံးဘျုးစံးဖှိၣ်အီၤလၢ တၢ်လၢအမၤန့ၢ်ပှၤ. ဒီးဖဲပဟးစံၣ်တဲၤတဲလီၤတၢ်အခါ ပကဘၣ်ဃ့ ယဟိဝၤယွၤလၢ အကမၤစၢၤပှၤဒ်သိး ပကအိၣ်ဒီးတၢ်သးဒူ. တကးဒံးဘၣ် ဒ်သိးပလဲၤခီဖျိ တၢ်ကီတၢ်ခဲ ဒီးတၢ်လ့ပစီ တမံၤဂ့ၤတမံၤဂ့ၤ ကန့ၢ်အဂီၢ် ပကဘၣ်ဃ့ကညးအီၤလၢ အကမၤစၢၤပှၤ. ဒီးဒ်သိး ပကဆဲးဃ့ထုကဖၣ်လၢ ယဟိဝၤယွၤအအိၣ် ထီဘိအဂီၢ် ပတဘၣ်ပျဲ ပှၤတဂၤဂ့ၤတဂၤဂ့ၤ ဒီးတၢ်တမံၤဂ့ၤတမံၤဂ့ၤ မၤတံာ်တာ်ပှၤဘၣ်. တၢး၂၃.၀၅ ၇ ¶၁၇-၁၈

ဘၣ်မနုၤအဃိ ပထီၣ်တၢ်အိၣ်ဖှိၣ်လဲၣ်. တၢ်ဂ့ၢ်အရ့ဒိၣ်ကတၢၢ်လၢ ပထီၣ်တၢ်အိၣ်ဖှိၣ်န့ၣ် မ့ၢ်ဝဲဒ်သိး ပကစံးထီၣ်ပတြၢၤ ယဟိဝၤယွၤ. (စံး ၂၆:၁၂; ၁၁၁:၁) ဒီးခဲအံၤန့ၣ် ပအိၣ်မူဘၣ်လၢ တၢ်ဆၢကတီၢ်ကီခဲအဃိ ပလဲၤထီၣ်တၢ်အိၣ်ဖှိၣ် ဒ်သိးပကဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤအဂီၢ်စ့ၢ်ကီး. (၁ သ့း ၅:၁၁) အဃိ ဖဲပထီၣ်တၢ်အိၣ်ဖှိၣ်အခါ ပမ့ၢ်ယူာ်ထီၣ်စု ဒီးဟ့ၣ်တၢ်စံးဆၢန့ၣ် ကဲဝဲ ပစံးထီၣ်ပတြၢၤ ယဟိဝၤယွၤ ဒီးဟ့ၣ်ဂံၢ်ဟ့ၣ်ဘါ ပဒီပုၢ်ဝဲၢ်မုၣ်ခွါ. ဘၣ်ဆၣ် ပကစံးဆၢတၢ်အဂီၢ် တဘျီတခီၣ် တညီဘၣ်. အဒိ ပကစံးဆၢတၢ်အဂီၢ် ဘၣ်သ့ၣ်သ့ၣ် ပသးကနိး မ့တမ့ၢ် ပဘၣ်သးစံးဆၢတၢ် ဘၣ်ဆၣ် ဖဲပယူာ်ထီၣ်စုအခါ ဒီပုၢ်ဝဲၢ်ခွါ တကိးပှၤဘၣ်. ပမ့ၢ်ထံၣ်ဘၣ် တၢ်အိၣ်သးဒ်အံၤန့ၣ် ပကဘၣ်မၤဒ်လဲၣ်. တၢ်မၢဖိပီလူး တဲဝဲလၢ ပကဘၣ် “ဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ.” ဒ်သိး ပယူာ်ထီၣ်စု ဒီးဟ့ၣ်တၢ်စံးဆၢ ကဘူၣ်အဂီၢ် ပကဘၣ် သ့ၣ်နီၣ်ထီၣ်လၢ ပမ့ၢ်ဟ့ၣ်တၢ်စံးဆၢ ယိယိဖိနာ်က့ အကဲဘျုးဝဲလၢ ပဒီပုၢ်ဝဲၢ်မုၣ်ခွါအဂီၢ်. ဒီးဖဲပယူာ်ထီၣ်စုအခါ ပှၤမ့ၢ်တကိးပှၤနာ်က့ ပဒီပုၢ်ဝဲၢ်မုၣ်ခွါအဂၤ မ့ၢ်စံးဆၢဘၣ်တၢ်န့ၣ် ပသးခု.—၁ ပ့း ၃:၈. တၢး၂၃.၀၄ ၂၀ ¶၁-၃

ပှၤယူဒၤဖိတဖၣ် လဲၤအိၣ်လၢ ဘၤဘူၤလိၣ် ပှဲၤထီၣ်အနံၣ် ၇၀ ဘျီ စီၤပၤဟ့ၣ်လီၤတၢ်ကလုၢ်လၢ အဝဲသ့ၣ်က့ၤကဒါလၢ အနီၢ်ကစၢ်ထံကီၢ် လၢကီၢ်အံၣ်စရ့လးသ့လံ. (ဧ့ ၁:၂-၄) ဒ်သိး ပှၤယူဒၤဖိ ကဟးထီၣ်ဘၣ်လၢ ဘၤဘူၤလိၣ်ပူၤအဂီၢ် ပှၤလၢအမၤဝဲသ့န့ၣ် မ့ၢ်ထဲယဟိဝၤယွၤတဂၤလီၤ. ပသ့ၣ်ညါဘၣ်လၢ ပှၤဘၤဘူၤလိၣ်ဖိတဖၣ်န့ၣ် ညီနုၢ်အဝဲသ့ၣ်တပျၢ်က့ၤ ပှၤလၢအဖီၣ်န့ၢ်ဝဲတဖၣ် ညီညီဘၣ်. (ၡါ ၁၄:၄, ၁၇) ဘၣ်ဆၣ် ဘၤဘူၤလိၣ်န့ၣ် စီၤပၤအဂၤတဂၤ မၤနၢၤကွံာ်ဝဲ ဒီးစီၤပၤတဂၤအံၤ တဲဘၣ် ပှၤယူဒၤဖိလၢ အဝဲသ့ၣ် ဟးထီၣ်လၢ ဘၤဘူၤလိၣ်အပူၤသ့လံ. အဃိ ပှၤယူဒၤဖိ ကိးဂၤဒဲး လီၤဆီဒၣ်တၢ် ပှၤလၢအကဲဟံၣ်ခိၣ်န့ၣ် ကဘၣ်ဆၢတဲာ် တၢ်လၢအရ့ဒိၣ်တခါ. အဝဲသ့ၣ် ကဘၣ်ဆၢတဲာ်ဝဲလၢ မ့ၢ်အဝဲသ့ၣ် ကဟးထီၣ်လၢ ဘၤဘူၤလိၣ်ဧါ မ့တမ့ၢ် ကဆဲးအိၣ်ဒံးလၢ ဘၤဘူၤလိၣ်ဧါ. ဒီးအဝဲသ့ၣ် ကဆၢတဲာ်တၢ်ဒ်အံၤန့ၣ် တညီလၢအဝဲသ့ၣ်အဂီၢ်ဘၣ်. ဘၣ်မနုၤအဃိလဲၣ်. ပှၤယူဒၤဖိတနီၤန့ၣ် သးပှၢ်ထီၣ်ဒိၣ်မးအဃိ အဝဲသ့ၣ် ကဘၣ်က့ၤလၢကျဲ ဖးယံၤန့ၣ် တညီလၢအဝဲသ့ၣ်အဂီၢ်ဘၣ်. ဒီးပှၤယူဒၤဖိအါတက့ၢ်န့ၣ် အဝဲသ့ၣ် အိၣ်ဖျဲၣ်ထီၣ်လၢ ဘၤဘူၤလိၣ်အဃိ အဝဲသ့ၣ်တအိၣ်ဘၣ်လၢ တၢ်လီၢ်အဂၤနီတဘျီဘၣ်. တကးဒံးဘၣ် ကီၢ်အံၣ်စရ့လးန့ၣ် အဝဲသ့ၣ် ထံၣ်ဝဲဒ်သိးဒီး အမိၢ်ပၢ်ဖံဖုလၢပျၢၤ အထံကီၢ်. မ့မ့ၢ်ပှၤယူဒၤဖိလၢ အဂၤတနီၤန့ၣ် ကဲဒိၣ်ထီၣ်အဃိ ဘၣ်သ့ၣ်သ့ၣ် အဝဲသ့ၣ်တဘၣ်သးပာ်တ့ၢ်ကွံာ် အဟံၣ်အဃီ ဒီးအတၢ်ဖံးတၢ်မၤ လၢဘၤဘူၤလိၣ် ဒီးလဲၤအိၣ်လၢ ကီၢ်လၢအဝဲသ့ၣ် တသ့ၣ်ညါဝဲ အပူၤန့ၣ်ဘၣ်. တၢး၂၃.၀၅ ၁၄ ¶၁-၂

လံာ်စီဆှံဟ့ၣ်ဂံၢ်ဟ့ၣ်ဘါပှၤလၢ ပကဆဲးမၤအါထီၣ် တၢ်တူၢ်န့ၢ်ခီၣ်ကဲ, တၢ်သးကညီၤ ဒီးတၢ်အဲၣ်. လူၤကၣ် ၂၁:၁၉ တဲဝဲလၢ “ခီဖျိလၢ သုတၢ်တူၢ်န့ၢ်ခီၣ်ကဲအဃိ သုကအုၣ်က့ၤခီၣ်က့ၤ သုသးသမူ.” ကလီးစဲ ၃:၁၂ တဲဝဲလၢ “ပာ်ဖျါထီၣ် တၢ်သးကညီၤ.” ဒီး ၁ သ့းစၤလနံ ၄:၉, ၁၀ တဲဝဲလၢ “ကစၢ်ယွၤ သိၣ်လိသုလၢ သုကအဲၣ်လိာ်သုသး တဂၤဒီးတဂၤလံ. . . . ဘၣ်ဆၣ် ဒီပုၢ်ဝဲၢ်သ့ၣ်ဧၢ, ပဟ့ၣ်သဆၣ်ထီၣ် သုလၢ သုကမၤဒ်အံၤ အါန့ၢ်အလီၢ်.” လံာ်စီဆှံအဆၢတဖၣ်အံၤ ပှၤကွဲးန့ၢ်ဝဲလၢ ယ့ၣ်ၡူးအပျဲၢ်အဘီၣ်တဖၣ်အဂီၢ်. ပမ့ၢ်ကွၢ် ယ့ၣ်ၡူးအပျဲၢ်အဘီၣ်တဖၣ်အံၤ အဝဲသ့ၣ်အိၣ်ဒီး တၢ်တူၢ်န့ၢ်ခီၣ်ကဲ, တၢ်သးကညီၤ ဒီးတၢ်အဲၣ်လံ ဘၣ်ဆၣ် အဝဲသ့ၣ် ကဘၣ်ဆဲးမၤအါထီၣ် တၢ်ဂ့ၤတၢ်ဝါတဖၣ်အံၤဒံး. ပဝဲစ့ၢ်ကီး ပကဘၣ်မၤ ဒ်သိးဒီးအဝဲသ့ၣ်. နမၤဒ်သိး အဝဲသ့ၣ် ကသ့အဂီၢ် နကဘၣ်ဆိကမိၣ်ထံ ဘၣ်ဃးဒီး ခရံာ်ဖိလၢညါတဖၣ် ပာ်ဖျါထီၣ်ဝဲ တၢ်ဂ့ၤတၢ်ဝါတဖၣ်အံၤဒ်လဲၣ်. နကွၢ်လိ အဝဲသ့ၣ်ကသ့ဒ်လဲၣ် ဒီးနပာ်ဖျါထီၣ်လၢ နအိၣ်ကတီၤပာ်စၢၤနသးလၢ တၢ်နးတၢ်ဖှီၣ်ဖးဒိၣ် ကသ့ဒ်လဲၣ်. ဒီးခါဆူညါ ဖဲတၢ်နးတၢ်ဖှီၣ်ဖးဒိၣ် အိၣ်ထီၣ်အခါ နကသ့ၣ်ညါလၢ နကဘၣ်လဲၤခီဖျိ တၢ်ကီတၢ်ခဲဒ်လဲၣ် ဒီးနကဆဲးအိၣ်ဒီး တၢ်တူၢ်န့ၢ်ခီၣ်ကဲ. တၢး၂၃.၀၇ ၂ ¶၄; ၃-၄ ¶၈

ပမ့မ့ၢ် ပှၤလၢအဘၣ်တၢ်ဒိးဖှူအီၤမ့ၢ်ဂ့ၤ, “သိလၢအဂၤတဖၣ်” မ့ၢ်ဂ့ၤ ပကဘၣ်ဆဲးလဲၤတၢ်လၢ “ကျဲစီဆှံ” အပူၤ. (ယိၤ ၁၀:၁၆) ပမ့ၢ်လဲၤတၢ်လၢ ကျဲစီဆှံအပူၤန့ၣ် ကမၤစၢၤပှၤဒ်သိး ပကဆဲးဘူၣ်ထီၣ်ဘါထီၣ် ယဟိဝၤယွၤ ခဲအံၤဒီးခါဆူညါ ဖဲယွၤအဘီအမုၢ် မၤဂ့ၤထီၣ်က့ၤ ဟီၣ်ခိၣ်အတၢ်အိၣ်သးအခါ. ဒီးစးထီၣ်လၢ ၁၉၁၉ နံၣ်န့ၣ် ပှၤအကကွဲၢ်တဖၣ် လၢအမ့ၢ် ပိာ်မုၣ်, ပိာ်ခွါ ဒီးဖိသၣ်တဖၣ်န့ၣ် ဟးထီၣ်ကွံာ်လၢ ဘၤဘူၤလိၣ်ဖးဒိၣ် လၢအမ့ၢ် တၢ်ဘူၣ်တၢ်ဘါကမၣ် ဒီးအဝဲသ့ၣ် လဲၤက့ၤတၢ်လၢ ကျဲမုၢ်ဖးဒိၣ်တဘိအံၤအပူၤ. လၢညါန့ၣ် ယဟိဝၤယွၤ မၤဝဲဒ်သိး ပှၤကထုးကွံာ် တၢ်နီးတၢ်ဘျးလၢ ပှၤယူဒၤဖိလၢ အက့ၤကဒါလၢ ကီၢ်အံၣ်စရ့လးအဂီၢ်. (ၡါ ၅၇:၁၄) မ့မ့ၢ်လၢ “ကျဲစီဆှံ” လၢပစိၤခဲအံၤဟီမီၤ. ပထံၣ်ဘၣ်လၢ ပူၤကွံာ်အနံၣ်လၢအကယၤ တချုးဖဲ ၁၉၁၉ နံၣ်န့ၣ် ယဟိဝၤယွၤ သူဝဲပိာ်ခွါတဖၣ်လၢ အအဲၣ်အီၤပျံၤအီၤ ဒ်သိးအဝဲသ့ၣ် ကမၤစၢၤပှၤဂၤလၢ ကဟးထီၣ်ကွံာ်လၢ ဘၤဘူၤလိၣ်ဖးဒိၣ်အပူၤ. (ထိၣ်သတြီၤဒီး ယၡါယၤ ၄၀:၃.) ပှၤပိာ်ခွါတဖၣ်လၢ ယဟိဝၤယွၤသူဝဲန့ၣ် အဝဲသ့ၣ် ကတဲာ်ကတီၤကျဲ ဒ်သိး ပှၤလၢအသးဘျၢတဖၣ် ကဟးထီၣ်ကွံာ်လၢ တၢ်ဘူၣ်တၢ်ဘါကမၣ်အပူၤ ဒီးဘူၣ်ထီၣ်ဘါထီၣ်က့ၤ ယဟိဝၤယွၤ တပူၤဃီဒီး ယဟိဝၤယွၤအပှၤဂီၢ်မုၢ်. တၢး၂၃.၀၅ ၁၆ ¶၈-၉

ယဟိဝၤယွၤ ဘၣ်သးဝဲလၢ ပကမၤအတၢ်မၤလၢတၢ်သးခု ဒီးမၤအတၢ်မၤလၢ တၢ်သးအိၣ်. (၂ ကရံၣ် ၉:၇) အဃိ ဖဲပတၢ်သးဆူၣ် တအိၣ်ဘၣ်အခါ ပမ့ၢ်မၤလၢပှဲၤပဖီတၢၣ်န့ၣ် အကမၣ်ဧါ. ပကကွၢ်သကိး စီၤပီလူး အတၢ်လဲၤခီဖျိ. စီၤပီလူး တဲဝဲလၢ “ယဒိလီၤတီၢ်လီၤယနီၢ်ခိ ဒီးဒုးကဲထီၣ်အီၤလၢကုၢ်.” (၁ ကရံၣ် ၉:၂၅-၂၇, တၢ်ဂ့ၢ်အဘျဲၣ်.) ဖဲအံၤန့ၣ် ပထံၣ်ဘၣ်လၢ စီၤပီလူး ကမၤတၢ်လၢအဘၣ်အဂီၢ် အတၢ်သးဆူၣ် မ့ၢ်တအိၣ်ဘၣ်နာ်က့ အမၢဆူၣ်လီၤအသးလၢ ကမၤတၢ်လၢအဘၣ်. အဃိ တၢ်လၢစီၤပီလူး မၤဝဲလၢ ယဟိဝၤယွၤအဂီၢ်န့ၣ် ယဟိဝၤယွၤ ဘၣ်သးဝဲဧါ. ယဟိဝၤယွၤ ဘၣ်သးဝဲ. ဒီးခီဖျိလၢ စီၤပီလူး အတၢ်ကျဲးစၢးအဃိ ယဟိဝၤယွၤ ဆိၣ်ဂ့ၤက့ၤအီၤ. (၂ တံၤ ၄:၇, ၈) ပဝဲနာ်က့ ဖဲပတၢ်သးဆူၣ် တအိၣ်ဘၣ်အခါ ပမ့ၢ်ကျဲးစၢး မၤလၢပှဲၤပဖီတၢၣ်န့ၣ် ယဟိဝၤယွၤ ကဘၣ်သးဝဲစ့ၢ်ကီး. ယဟိဝၤယွၤ သ့ၣ်ညါဝဲလၢ ပမၤတၢ်တခါခါ မ့ၢ်တမုာ်ဘၣ်နာ်က့ ခီဖျိလၢ ပအဲၣ်အီၤအဃိ ပမၤဒံး. ပထံၣ်ဘၣ်လၢ ယဟိဝၤယွၤ ဆိၣ်ဂ့ၤစီၤပီလူးအဃိ ပသ့ၣ်ညါလၢ ယဟိဝၤယွၤ ကဆိၣ်ဂ့ၤပှၤစ့ၢ်ကီး. (စံး ၁၂၆:၅) ဒီးပမ့ၢ်ထံၣ်ဘၣ်လၢ ယဟိဝၤယွၤ ဆိၣ်ဂ့ၤပှၤန့ၣ် ပတၢ်သးဆူၣ် ကအိၣ်အါထီၣ်. တၢး၂၃.၀၅ ၂၉ ¶၉-၁၀

တၢ်မၢဖိပီလူး ဒိလီၤဝဲ ပှၤလၢအတပူၤဖျဲးလၢ ယဟိဝၤယွၤ အမုၢ်နံၤန့ၣ် အလီၤဂာ်ဒ်သိးဒီး ပှၤလၢအမံ. ပှၤလၢအမံန့ၣ် အတသ့ၣ်ညါ တၢ်ကဲထီၣ်သးလၢ အခိၣ်အဃၢၤဘၣ် ဒီးတၢ်ဆၢကတီၢ် ပူၤကွံာ်ထဲလဲၣ်န့ၣ် အတသ့ၣ်ညါဝဲဘၣ်. အဃိ တၢ်အရ့ဒိၣ် မ့ၢ်ကဲထီၣ်အသးနာ်က့ အဝဲသ့ၣ်တသ့ၣ်ညါဘၣ် ဒီးအဝဲသ့ၣ်ကဘၣ်မၤဒ်လဲၣ်န့ၣ် အတကျၢစ့ၢ်ကီးဘၣ်. ဆၢကတီၢ်ခဲအံၤ ပှၤအါတက့ၢ်န့ၣ် လီၤဂာ်ဒ်သိးဒီး အဝဲသ့ၣ်မံလၢ နီၢ်သးတကပၤ. (ရိ ၁၁:၈) အဝဲသ့ၣ် တနာ်ဝဲလၢ ပအိၣ်မူဘၣ် “လၢမုၢ်နံၤခံကတၢၢ်တဖၣ်အပူၤ” ဘၣ်. ဒီးတယံာ်လၢၤဘၣ် တၢ်နးတၢ်ဖှီၣ်ဖးဒိၣ် ကစးထီၣ်သးန့ၣ် အဝဲသ့ၣ်တနာ်စ့ၢ်ကီးဘၣ်. (၂ ပ့း ၃:၃, ၄) မ့မ့ၢ်ပှၤန့ၣ် ပသ့ၣ်ညါလၢ မုၢ်စံၣ်ညီၣ်အနံၤ ကဟဲဘူးထီၣ်မၣ်ဘူးထီၣ် အဃိ အရ့ဒိၣ်လၢ ကိးနံၤဒဲးန့ၣ် ပကဘၣ်စီၣ်မဲာ်စီၣ်နါ ဒီးပတဘၣ်မံသပ့ၤဘၣ်. (၁ သ့း ၅:၆) ဒီးပကဘၣ်ပာ်သးမုာ်မုာ် ဒီးပာ်သးဂၢၢ်ဂၢၢ်. ဘၣ်မနုၤအဃိလဲၣ်. မ့ၢ်လၢဆၢကတီၢ်ခဲအံၤန့ၣ် ယဟိဝၤယွၤ အမုၢ်နံၤ ဘူးထီၣ်မၣ်ဘူးထီၣ် အဃိပှၤကမၢဆူၣ်ပှၤ ဒ်သိးဒီး ပကအိၣ်ဃူ ပဒိၣ်တဖုဖု မ့တမ့ၢ် ပကမၤဘၣ်ထွဲသးဒီး ထံဂ့ၢ်ကီၢ်ဂ့ၢ်. အဃိ အရ့ဒိၣ်လၢ ပကဘၣ်အိၣ်လၢ တၢ်ဘၢၣ်စၢၤ ဒီးတဘၣ်ပၣ်ဃုာ်လၢ အဝဲသ့ၣ်အကျါဘၣ်. ဘၣ်ဆၣ် ပကတဲက့ၤ အဝဲသ့ၣ်ဒ်လဲၣ်အဂီၢ် ပတလိၣ်ဘၣ်ယိၣ်တၢ် အါတလၢဘၣ်. ကစၢ်ယွၤအသးစီဆှံကမၤစၢၤပှၤ ဒ်သိးပကပာ်ပသးမုာ်မုာ်, ပာ်သးဂၢၢ်ဂၢၢ် ဒီးဆၢတဲာ်တၢ်လၢအဘၣ်.—လူၤ ၁၂:၁၁, ၁၂. တၢး၂၃.၀၆ ၁၀ ¶၆-၇

ဖဲနနၢ်ဟူ စီၤၡံၡိၣ်အမံၤအခါ နဆိမိၣ်ထီၣ် မနုၤလဲၣ်. ဘၣ်သ့ၣ်သ့ၣ် နကဆိမိၣ်ဘၣ်လၢ စီၤၡံၡိၣ်န့ၣ် အကဲပှၤလၢ အဂံၢ်ဆူၣ်ဒိၣ်မး. ဘၣ်ဆၣ် ခီဖျိလၢ စီၤၡံၡိၣ် ဆၢတဲာ်တၢ်ကမၣ်အဃိ အထံၣ်ဘၣ် တၢ်နးတၢ်ဖှီၣ်နးမး. စီၤၡံၡိၣ် မၤကမၣ်ဘၣ်တၢ် သနာ်က့ ယဟိဝၤယွၤ သးစၢၢ်ဆၢလၢ အတၢ်သးတီဟီ. အဃိ ဒ်သိး ပကန့ၢ်ဘၣ်အဘျုးအဂီၢ် ယဟိဝၤယွၤ မၢပှၤကွဲးဖျါထီၣ် စီၤၡံၡိၣ်အဂ့ၢ် လၢလံာ်စီဆှံအပူၤ. ယဟိဝၤယွၤ သူဝဲစီၤၡံၡိၣ်ဒ်သိး ကမၤစၢၤဝဲ ပှၤအံၣ်စရ့လးဖိ. စီၤၡံၡိၣ် သံဝံၤပူၤကွံာ်အနံၣ်လၢ အကယၤတဖၣ်န့ၣ် ယဟိဝၤယွၤ အသးစီဆှံထိးဘၣ်ဝဲ တၢ်မၢဖိပီလူးအသးလၢ ကကွဲးလီၤဝဲ စီၤၡံၡိၣ်အမံၤလၢ ပိာ်ခွါလၢ အသးတီတဖၣ်အကျါ. (ဧ့ၤ ၁၁:၃၂-၃၄) စီၤၡံၡိၣ်န့ၣ် ဖဲအထံၣ်ဘၣ် တၢ်အိၣ်သး ကီခဲအခါ အသန့ၤအသးလၢ ယဟိဝၤယွၤ. အဃိ စီၤၡံၡိၣ် အဒိအတဲာ်န့ၣ် မၤစၢၤပှၤသ့ အါမး ဒီးလၢစီၤၡံၡိၣ် အအိၣ်န့ၣ် ပဟံးန့ၢ်တၢ်မၤလိ သ့ဒီဒူၣ်ဒံး. တၢး၂၃.၀၉ ၂ ¶၁-၂

ပမၤအါထီၣ် ပတၢ်တူၢ်န့ၢ်ခီၣ်ကဲသ့ခီဖျိ ပဃ့ထုကဖၣ်လၢ ယဟိဝၤယွၤအအိၣ် မၢ်မၢ် ဒီးတဲဘၣ်အီၤလၢ ပတၢ်ကိၢ်တၢ်ဂီၤခဲလၢာ်. (၁ သ့း ၅:၁၇) ဘၣ်သ့ၣ်သ့ၣ် ခဲအံၤန့ၣ် နတထံၣ်ဘၣ် တၢ်ကီတၢ်ခဲနးနးဘၣ်. သနာ်က့ ဖဲနသးတမုာ်ဘၣ်, နခိၣ်နူာ်ဘံဘူ ဒီးနတသ့ၣ်ညါလၢ နကဘၣ်မၤမနုၤလဲၣ်အခါ နဃ့ယဟိဝၤယွၤ အတၢ်မၤစၢၤဧါ. တၢ်ကီတၢ်ခဲလၢ နထံၣ်ဘၣ်ခဲအံၤန့ၣ် အမ့ၢ်ကဲ တၢ်ယိယိဖိနာ်က့ နမ့ၢ်ဃ့တၢ်မၤစၢၤလၢ ယဟိဝၤယွၤအအိၣ် ထီဘိန့ၣ် ခါဆူညါ ဖဲနထံၣ်ဘၣ် တၢ်ကီတၢ်ခဲနးနးအခါ နကဃ့တၢ်မၤစၢၤလၢအအိၣ် တဘျီဃီ. နမ့ၢ်မၤဒ်န့ၣ်န့ၣ် နကနာ်သပှၢ်တၢၢ်လၢ ယဟိဝၤယွၤ ကဘၣ်မၤစၢၤနၤ လၢအဆၢကတီၢ်ဖဲလဲၣ် ဒီးအကဘၣ်မၤစၢၤနၤဒ်လဲၣ်န့ၣ် အသ့ၣ်ညါဝဲ အဂ့ၤကတၢၢ်. (စံး ၂၇:၁, ၃) ဆၢကတီၢ်ခဲအံၤ ဖဲပထံၣ်ဘၣ် တၢ်ကီတၢ်ခဲအခါ ပမ့ၢ်တီဒီး ယဟိဝၤယွၤန့ၣ် ခါဆူညါ ဖဲပထံၣ်ဘၣ် တၢ်နးတၢ်ဖှီၣ်ဖးဒိၣ်အခါ ပကအိၣ်ဒီး တၢ်တူၢ်န့ၢ်ခီၣ်ကဲ. (ရိ ၅:၃) ဘၣ်မနုၤအဃိ ပတဲဒ်န့ၣ်လဲၣ်. ဒီပုၢ်ဝဲၢ်မုၣ်ခွါအါဂၤ တဲဝဲလၢ အဝဲသ့ၣ် လဲၤခီဖျိ တၢ်ကီတၢ်ခဲန့ၢ်ဝံၤလီၢ်ခံ အတၢ်လဲၤခီဖျိ မၤစၢၤအဝဲသ့ၣ်ဒ်သိး အကဆဲးအိၣ်ဒီး တၢ်တူၢ်န့ၢ်ခီၣ်ကဲ ဖဲအဝဲသ့ၣ်ထံၣ်ဘၣ် တၢ်ကီတၢ်ခဲ လၢခံတဘျီ. ခီဖျိလၢ ယဟိဝၤယွၤ မၤစၢၤအဝဲသ့ၣ်လၢ ကလဲၤခီဖျိ တၢ်ကီတၢ်ခဲအဃိ အဝဲသ့ၣ် နာ်ဝဲသပှၢ်တၢၢ်လၢ ယဟိဝၤယွၤ ကဆဲးမၤစၢၤအဝဲသ့ၣ်ဒံး. တကးဒံးဘၣ် အဝဲသ့ၣ်နာ်န့ၢ် ယဟိဝၤယွၤအဃိ ဖဲအထံၣ်ဘၣ် တၢ်မၤကွၢ် လၢခံတဘျီအခါ အဝဲသ့ၣ်အိၣ်ဒီး တၢ်တူၢ်န့ၢ်ခီၣ်ကဲ.—ယၤ ၁:၂-၄. တၢး၂၃.၀၇ ၃ ¶၇-၈

ခီဖျိလၢ ယဟိဝၤယွၤ အိၣ်ဒီး တၢ်ဆီၣ်လီၤသး ဒီးတၢ်သးကညီၤအဃိ အအိၣ်ဒီး တၢ်ထံၣ်အကြၢးအဘၣ်. အဒိ တချုးဖဲ ယဟိဝၤယွၤ ကမၤဟးဂီၤ ပှၤအၢပှၤသီလၢ ဝ့ၢ်စဒိၣ်အပူၤ ဒံးဘၣ်န့ၣ် အပာ်ဖျါထီၣ် တၢ်ဆီၣ်လီၤသးဒ်လဲၣ်. ယဟိဝၤယွၤဆှၢလီၤ မူခိၣ်ကလူးတဖၣ်လၢ ကတဲဘၣ်စီၤလိာ်လၢ ကလဲၤဃ့ၢ်ပူၤဖျဲးသးလၢ ကစၢၢ်ကလိအကျါ. ဘၣ်ဆၣ် စီၤလိာ် လဲၤဃ့ၢ်ပူၤဖျဲးအသးဖဲန့ၣ် တဘူၣ်ဘၣ်. ဒီးအဃ့ကညး ယဟိဝၤယွၤလၢ အကဃ့ၢ်လၢ ဝ့ၢ်စိၤဧၢ်လၢ အကဲဝဲ ဝ့ၢ်ဆံးဆံးဖိတဖျၢၣ်. နီၢ်ကီၢ်န့ၣ် ယဟိဝၤယွၤ ကမၤဟးဂီၤဝဲ ဝ့ၢ်တဖျၢၣ်အံၤ စ့ၢ်ကီး. ဒီးယဟိဝၤယွၤ မ့ၢ်မၢဆူၣ်စီၤလိာ်လၢ ကဒိကနၣ် အတၢ်ဟံးစုနဲၣ်ကျဲန့ၣ် အမၤဝဲသ့ ဘၣ်ဆၣ် ယဟိဝၤယွၤ တမၤဝဲဒ်န့ၣ်ဘၣ်. ယဟိဝၤယွၤ ဒိကနၣ်စီၤလိာ် အတၢ်ဃ့ကညး ဒီးအတမၤဟးဂီၤ ဝ့ၢ်စိၤဧၢ်လၢၤဘၣ်. (၁ မိၤ ၁၉:၁၈-၂၂) အနံၣ်လၢအကယၤ ပူၤကွံာ်အလီၢ်ခံ ယဟိဝၤယွၤ ပာ်ဖျါထီၣ်စ့ၢ်ကီး တၢ်သးကညီၤလၢ ပှၤနံၤနဝ့ဖိ အဖီခိၣ်ဒ်လဲၣ်. ယဟိဝၤယွၤ ဆှၢလီၤဝဲ ဝံယိၤနါဒ်သိး ကလဲၤတဲဘၣ် ပှၤနံၤနဝ့ဖိ လၢအအၢအသီတဖၣ်လၢ ယဟိဝၤယွၤ ကမၤဟးဂီၤဝဲ ဝ့ၢ်နံၤနဝ့ ဒီးပှၤနံၤနဝ့ဖိခဲလၢာ်. ပှၤနံၤနဝ့ဖိတဖၣ်န့ၣ် ပီၢ်ယၢ်လီၤက့ၤအသး ဒီးယဟိဝၤယွၤ သးကညီၤဘၣ်အဝဲသ့ၣ် အဃိ ယဟိဝၤယွၤ တမၤဟးဂီၤအဝဲသ့ၣ်လၢၤဘၣ်.—နါ ၃:၁, ၁၀; ၄:၁၀, ၁၁. တၢး၂၃.၀၇ ၂၁ ¶၅

ပမၤလိန့ၢ်တၢ်လၢ စီၤယိၤအၣ်အအိၣ်ဒ်လဲၣ်. စီၤယိၤအၣ်န့ၣ် အလီၤဂာ်ဒ်သိးဒီး သ့ၣ်တထူၣ်လၢ အဂံၢ်လီၤတယိာ်ဘၣ် ဒီးအလိၣ်ဘၣ် တၢ်တၢၣ်လၢကဖီၣ်ဂၢၢ်အီၤ. အဒိ လၢခံ စီၤယဟိၤယဒါ လၢအလီၤဂာ်ဒ်သိးဒီး တၢ်တၢၣ်လၢအဖီၣ်ဂၢၢ်အီၤန့ၣ် သံကွံာ်ဝဲ. အဃိ စီၤယိၤအၣ် ကနၣ်က့ၤလၢ ပှၤလၢအထီဒါက့ၤတၢ်မ့ၢ်တၢ်တီတဖၣ် အကလုၢ် ဒီးအတဆဲးတီဒီး ယဟိဝၤယွၤလၢၤဘၣ်. တၢ်အဒိအံၤ ပာ်ဖျါထီၣ်ဝဲလၢ ပပျံၤကစၢ်ယွၤန့ၣ် တဘၣ်မ့ၢ်ထဲလၢ ပဟံၣ်ဖိဃီဖိ ဒီးပှၤလၢတၢ်အိၣ်ဖှိၣ်ပူၤ ပာ်လီၤန့ၢ်ပှၤ တၢ်ဒိတၢ်တဲာ် လၢအဂ့ၤအဃိဘၣ်. ဘၣ်ဆၣ် ဒ်သိးပကဆဲးပျံၤကစၢ်ယွၤ ဒီးအိၣ်ဒီးတၢ်ရ့လိာ်သးဒီးအီၤလၢ အဂ့ၤအဂီၢ် ပကဘၣ်မၤအါထီၣ် ပတၢ်အဲၣ်ဒီးတၢ်ပာ်ကဲကစၢ်ယွၤ လၢပနီၢ်ကစၢ်. ပမၤဒ်န့ၣ်သ့ခီဖျိ ပမၤလိလံာ်စီဆှံ, ဆိကမိၣ်ထံ တၢ်ဂ့ၢ်လၢပဖး ဒီးဃ့ထုကဖၣ်ထီဘိ. (ယံး ၁၇:၇, ၈; ကလီး ၂:၆, ၇) တၢ်လၢ ယဟိဝၤယွၤ ဃ့ပှၤန့ၣ် အတအါတလၢဘၣ်. ဖဲ စံၣ်တဲၤတဲလီၤတၢ် ၁၂:၁၃ န့ၣ်ယဟိဝၤယွၤ တဲဘၣ်ပှၤလၢ ပကဘၣ် “ပျံၤယွၤလၢအမ့ၢ်အတီတဂၤ ဒီးအိၣ်မူမၤထွဲ အတၢ်မၤလိာ်တဖၣ် . . . အဝဲန့ၣ်မ့ၢ်ဝဲ ပှၤဟီၣ်ခိၣ်ဖိ အမူဒါ.” ပမ့ၢ်ပျံၤယဟိဝၤယွၤန့ၣ် ခါဆူညါ ပမ့ၢ်ထံၣ်ဘၣ် တၢ်မၤကွၢ်ဒ်လဲၣ်ဒ်လဲၣ် နာ်က့ ပကဆဲးတီအီၤ. ဒီးတၢ်လၢကမၤဟးဂီၤ ပတၢ်ရ့လိာ်သးဒီး ယဟိဝၤယွၤန့ၣ် တအိၣ်နီတမံၤဘၣ်. တၢး၂၃.၀၆ ၁၉ ¶၁၇-၁၉

ဖဲအဆၢဖိ ၅ န့ၣ်ကစၢ်ယွၤစးထီၣ် အတၢ်ကတိၤလၢ “ပှၤတဂၤလၢ အဆ့ၣ်နီၤလၢ လီၢ်ပစိာ်အလိၤန့ၣ် တဲဝဲ.” (လီၣ် ၂၁:၅) လံာ်လီၣ်ဖျါ ပာ်ဖျါထီၣ်ဝဲလၢ လၢတၢ်ထံၣ်လၢညါခီအပူၤန့ၣ် ယဟိဝၤယွၤ အနီၢ်ကစၢ်ဒၣ်ဝဲ တဲတၢ်န့ၣ် အိၣ်ဝဲထဲသၢဘျီ ဒီးတၢ်တဘျီအံၤန့ၣ် အကဲဝဲ အဆိကတၢၢ်တဘျီ. အဃိ တၢ်ကတိၤအံၤ တမ့ၢ်မူခိၣ်ကလူး လၢအအိၣ်ဒီးအစိကမီၤတဂၤ တဲဝဲဘၣ် ဒီးတမ့ၢ်ယ့ၣ်ၡူး လၢအဂဲၤဆၢထၢၣ် သမူထီၣ်က့ၤ တဲဝဲစ့ၢ်ကီးဘၣ်. ယဟိဝၤယွၤ တဲဝဲဒ်န့ၣ် လၢအနီၢ်ကစၢ်အဃိ ပနာ်န့ၢ် အတၢ်အၢၣ်လီၤတဖၣ် သ့ဝဲသပှၢ်တၢၢ်. ဘၣ်မနုၤအဃိ ပနာ်န့ၢ်အီၤသ့လဲၣ်. ခီဖျိလၢ ယဟိဝၤယွၤန့ၣ် “အလံၣ်တၢ်လီတၢ် တသ့ဘၣ်.” (တံ ၁:၂) အဃိ တၢ်ကတိၤလၢ ပဖးဘၣ်ဖဲ လီၣ်ဖျါ ၂၁:၅, ၆ န့ၣ်အကဟဲလၢပှဲၤထီၣ်နီၢ်ကီၢ်. ယဟိဝၤယွၤ ဆဲးတဲဝဲလၢ “ကွၢ်မီၤ.” ကြံးအတၢ်ကတိၤလၢ ပှၤကွဲးကျိာ်ထံက့ၤအီၤလၢ “ကွၢ်မီၤ” န့ၣ်ပှၤသူအီၤတလီၢ်လီၢ် လၢလံာ်လီၣ်ဖျါအပူၤ. ယဟိဝၤယွၤ ဆဲးတဲဝဲ မနုၤလဲၣ်. အတဲဝဲလၢ “ယမၤကဲထီၣ် တၢ်အသီခဲလၢာ်လီၤ.” ပသ့ၣ်ညါလၢ ခါဆူညါမၣ် ယဟိဝၤယွၤ ကမၤကဲထီၣ် တၢ်အသီခဲလၢာ်. ဘၣ်ဆၣ် ယဟိဝၤယွၤ သ့ၣ်ညါဝဲလၢ အတၢ်အၢၣ်လီၤအံၤ ကဟဲလၢပှဲၤထီၣ် သပှၢ်တၢၢ်အဃိ အတဲတၢ်လီၤဂာ်ဒ်သိးဒီး အတၢ်အၢၣ်လီၤတဖၣ်အံၤ ကဲထီၣ်အသးလံ.—ၡါ ၄၆:၁၀. တၢး၂၃.၁၁ ၃-၄ ¶၇-၈

တၢ်မၢဖိပ့းတရူး ဘၣ်ဆဲးမၤနၢၤကွံာ် အတၢ်ဂံၢ်စၢ်ဘါစၢ်တဖၣ်ဒံး. ပကကွၢ်သကိး အဒိတနီၤ. ဖဲယ့ၣ်ၡူး ၡဲပၠးဝဲလၢ ဒ်သိးအကမၤလၢပှဲၤထီၣ် ဝံအတၢ်စံးပာ်အဂီၢ် ပှၤကမၤနးမၤဖှီၣ်အီၤ ဒီးအကဘၣ်သံအခါ စီၤပ့းတရူးတဲအီၤလၢ တၢ်တဘၣ်ကဲထီၣ်အသးဒီးနၤ ဒ်န့ၣ်ဘၣ်. (မၢ် ၈:၃၁-၃၃) တကးဒံးဘၣ် စီၤပ့းတရူး ဒီးတၢ်မၢဖိအဂၤတဖၣ် တဲအါလိာ်သး ဘၣ်ဃးဒီး မတဂၤမ့ၢ် ပှၤအဒိၣ်ကတၢၢ်လဲၣ်န့ၣ် တဘျုးဘျီညါ. (မၢ် ၉:၃၃, ၃၄) ဒီးတချုးဖဲ ယ့ၣ်ၡူးသံဒံးဘၣ်တနၤန့ၣ် စီၤပ့းတရူး ထုးထီၣ်အနး ဒီးကျီတဲာ်ဝဲ ပှၤတဂၤအနၢ်ကု. (ယိၤ ၁၈:၁၀) ဒီးဖဲတၢ်တနၤဃီန့ၣ် စီၤပ့းတရူး ပျံၤတၢ် ဒီးအတဲဝဲလၢ အတသ့ၣ်ညါယ့ၣ်ၡူးဘၣ်န့ၣ် သၢဘျီညါ. (မၢ် ၁၄:၆၆-၇၂) အဃိ စီၤပ့းတရူး သးဘၣ်ဒိဒိၣ်မး ဒီးအဟီၣ်ဝဲနးမး. ယ့ၣ်ၡူး တပာ်တ့ၢ်ကွံာ် အတၢ်မၢဖိလၢ အသးလီၤစၢ်ဒိၣ်မး တဂၤအံၤဘၣ်. ဖဲယ့ၣ်ၡူး ဂဲၤဆၢထၢၣ် သမူထီၣ်က့ၤ ဝံၤအလီၢ်ခံ အဟ့ၣ်စီၤပ့းတရူး တၢ်ခွဲးတၢ်ယာ်ဒ်သိး စီၤပ့းတရူး ကပာ်ဖျါထီၣ်လၢ မ့ၢ်အအဲၣ်အီၤဒံးဧါ. အဃိ ယ့ၣ်ၡူးမၢ စီၤပ့းတရူး ကွၢ်ထွဲအသိဖိတဖၣ်ဂ့ၤဂ့ၤ. (ယိၤ ၂၁:၁၅-၁၇) စီၤပ့းတရူး မၤထွဲဝဲ ဒ်ယ့ၣ်ၡူးတဲအီၤအသိး. ဒီးဖဲပှၤမၤဘူၣ်ယဲၢ်ဆံအနံၤ လၢဝ့ၢ်ယရူၤၡလ့ၣ်န့ၣ် စီၤပ့းတရူးအိၣ်ဖဲန့ၣ် ဒီးအပၣ်ဃုာ်လၢ ပှၤဘၣ်တၢ်ဒိးဖှူအီၤလၢသးစီဆှံ အဆိကတၢၢ်တဖၣ်အကျါ. တၢး၂၃.၀၉ ၂၂ ¶၆-၇

တၢ်မၢဖိပ့းတရူး ဟ့ၣ်ဂံၢ်ဟ့ၣ်ဘါ တၢ်အိၣ်ဖှိၣ်သးပှၢ်တဖၣ်လၢ “အံးထွဲကွၢ်ထွဲ ကစၢ်ယွၤအသိ.” (၁ ပ့း ၅:၁-၄) နမ့ၢ်ကဲတၢ်အိၣ်ဖှိၣ်သးပှၢ်န့ၣ် ပနာ်လၢ နကအဲၣ်နဒီပုၢ်ဝဲၢ်မုၣ်ခွါတဖၣ် ဒီးနဘၣ်သး အံးထွဲကွၢ်ထွဲအဝဲသ့ၣ်. သနာ်က့ ဘၣ်သ့ၣ်သ့ၣ် နတၢ်မၤအါ ဒီးနလီၤဘှံးအဃိ နကဆိမိၣ်ဘၣ်လၢ နမၤလၢပှဲၤနမူဒါ တန့ၢ်လၢၤဘၣ်. နမ့ၢ်ဆိမိၣ်ဘၣ်ဒ်န့ၣ်န့ၣ် နကမၤဒ်လဲၣ်. တဲဘၣ်ယဟိဝၤယွၤလၢ နတၢ်တူၢ်ဘၣ်တဖၣ်. စီၤပ့းတရူး တဲဝဲလၢ “ပှၤတဂၤဂၤ မ့ၢ်မၤစၢၤပှၤဂၤန့ၣ် မ်အသန့ၤအသးလၢ တၢ်ဂံၢ်တၢ်ဘါလၢ ကစၢ်ယွၤဟ့ၣ်လီၤဝဲန့ၣ်တက့ၢ်.” (၁ ပ့း ၄:၁၁) ဒီပုၢ်ဝဲၢ်မုၣ်ခွါတနီၤန့ၣ် ထံၣ်ဘၣ်ဒီး တၢ်ကီတၢ်ခဲတဖၣ်လၢ အမၤလီၤမၢ်ကွံာ်ဝဲလၢ ဆၢကတီၢ်ခဲအံၤတသ့ဘၣ်. နမ့ၢ်ကဲတၢ်အိၣ်ဖှိၣ်သးပှၢ်န့ၣ် သ့ၣ်နီၣ်ထီၣ်လၢ တၢ်လၢနမၤစၢၤအဝဲသ့ၣ်တသ့ဘၣ်န့ၣ် “ပှၤကွၢ်သိအခိၣ်” ယ့ၣ်ၡူးခရံာ် မၤစၢၤအဝဲသ့ၣ်သ့. ဒီးသ့ၣ်နီၣ်ထီၣ်လၢ ယ့ၣ်ၡူးကမၤစၢၤပှၤလၢ ဆၢကတီၢ်ခဲအံၤ ဒီးလၢဟီၣ်ခိၣ်သီအပူၤစ့ၢ်ကီး. ယဟိဝၤယွၤ ဘၣ်သးဝဲလၢ တၢ်အိၣ်ဖှိၣ်သးပှၢ်တဖၣ် ကအဲၣ်ဒီပုၢ်ဝဲၢ်မုၣ်ခွါ, ကကွၢ်ထွဲ အဝဲသ့ၣ် ဒ်သိတဖုအသိး ဒီးက “ကဲထီၣ်တၢ်ဒိတၢ်တဲာ်လၢ သိတဖုန့ၣ်အဂီၢ်.” တၢး၂၃.၀၉ ၂၉-၃၀ ¶၁၃-၁၄

ပကဘၣ်ဟးဆှဲး ပှၤဟီၣ်ခိၣ်ဖိ အတၢ်ဆိမိၣ်. ပမ့ၢ်အိၣ်ဒီးတၢ်ထံၣ် ဒ်သိးဒီး ပှၤလၢအတပာ်ကဲ ယဟိဝၤယွၤ အတၢ်သိၣ်တၢ်သီဘၣ်န့ၣ် ပဝဲစ့ၢ်ကီး ပတကနၣ်ယဟိဝၤယွၤ ဒီးအတၢ်သိၣ်တၢ်သီလၢၤဘၣ်. (၁ ကရံၣ် ၃:၁၉) ပှၤလၢအတူၢ်လိာ် “ဟီၣ်ခိၣ်အံၤ အတၢ်ကူၣ်သ့န့ၣ်” ညီနုၢ် အဝဲသ့ၣ် တဒိကနၣ် ယဟိဝၤယွၤ အကလုၢ်လၢၤဘၣ်. အဒိ ခရံာ်ဖိတနီၤလၢ ဝ့ၢ်ပ့ၢ်ကမူး ဒီးဝ့ၢ်သူၤအတံရၤန့ၣ် အိၣ်ဒီးတၢ်ထံၣ် ဒ်သိးဒီး ပှၤလၢအခိၣ်အဃၢၤ လၢအတအိၣ်ဒီး လုၢ်လၢ်လၢအဂ့ၤဘၣ် ဒီးဘူၣ်ထီၣ်ဘါထီၣ် တၢ်ဂီၤတၢ်ဖှီၣ်. ခီဖျိလၢ ခရံာ်ဖိတဖၣ်အံၤ တထံၣ် တၢ်မၤကမၣ်မုၣ်ကမၣ်ခွါ ဒ်တၢ်ကမၣ်အသိးဘၣ်အဃိ ယ့ၣ်ၡူးသိၣ်က့ၤအဝဲသ့ၣ်. (လီၣ် ၂:၁၄, ၂၀) ဆၢကတီၢ်ခဲအံၤ ပှၤလၢပဃၢၤတဖၣ် ကဆီၣ်သနံးပှၤလၢ ပကတူၢ်လိာ် တၢ်ထံၣ်လၢအကမၣ်. ပဟံၣ်ဖိဃီဖိ ဒီးပသကိးတနီၤ ကတဲပှၤလၢ ပှၤန့ၣ်ပဃံးတလၢ ဒီးပတလိၣ်မၤထွဲ ယဟိဝၤယွၤ အတၢ်သိၣ်တၢ်သီဘၣ်. အဝဲသ့ၣ် ကတဲပှၤလၢ လံာ်စီဆှံ အတၢ်ဘျၢန့ၣ် တကဲဘျုးလၢ ဆၢကတီၢ်ခဲအံၤလၢၤဘၣ်အဃိ ပမ့ၢ်မၤဒ် ပနီၢ်ကစၢ် တၢ်ဘၣ်သးနာ်က့ တဘၣ်နီမံၤဘၣ်. တဘျီတခီၣ်န့ၣ် ပကဆိမိၣ်ဘၣ်လၢ ယဟိဝၤယွၤ တဟ့ၣ်ပှၤ တၢ်ဟံးစုနဲၣ်ကျဲ လီၤတံၢ်လီၤဆဲးဘၣ်. အဃိ ဘၣ်သ့ၣ်သ့ၣ် ပကဘၣ်သး “မၤအါန့ၢ်ဒံး တၢ်ကွဲးအသးတဖၣ် အိၣ်ဝဲအသိး.”—၁ ကရံၣ် ၄:၆. တၢး၂၃.၀၇ ၁၆ ¶၁၀-၁၁

ယ့ၣ်ၡူးအမိၢ် နီၢ်မၤရံ လိၣ်ဘၣ်ဝဲ တၢ်ဟ့ၣ်ဂံၢ်ဟ့ၣ်ဘါ. နီၢ်မၤရံ တဖျီသးဒံးဘၣ်, ဘၣ်ဆၣ် အကဘၣ်ဒၢထီၣ် ဒီးအကလုၢ်ဒိၣ်ထီၣ်အဖိစ့ၢ်ကီး အတၢ်လဲၤခီဖျိတအိၣ်ဘၣ်. ဒီးအဖိခွါလၢ အကဘၣ်လုၢ်ဒိၣ်ထီၣ်ဝဲတဂၤအံၤ မုၢ်ကအိၣ်ဝဲတနံၤန့ၣ် အကကဲထီၣ်ဝဲ မ့းၡံအၤ. ထဲန့ၣ်တကးဒံးဘၣ် အဝဲစ့ၢ်ကီး တမံဃုာ်ဘၣ်ဒီး ပှၤနီတဂၤဒံးဘၣ်အဃိ နီၢ်မၤရံ ကၡဲပၠးဝဲ အတၢ်အဲၣ်တီ စီၤယိၤသး လၢတၢ်ဂ့ၢ်တဖၣ်အံၤဒ်လဲၣ်. (လူၤ ၁:၂၆-၃၃) ဒ်သိး နီၢ်မၤရံ မၤလၢပှဲၤအမူဒါ လၢအကီအခဲ ကသ့အဂီၢ် အဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါဒ်လဲၣ်. နီၢ်မၤရံ ဃ့တၢ်မၤစၢၤ လၢပှၤဂၤအအိၣ်. အဒိ အဝဲသံကွၢ် မူခိၣ်ကလူး ကၤဘြံၤအ့လးလၢ ကဒုးသ့ၣ်ညါအါထီၣ်အီၤ တၢ်ဂ့ၢ်တၢ်ကျိၤ ဘၣ်ဃးဒီး အမူဒါ. (လူၤ ၁:၃၄) ဖဲန့ၣ်ဝံၤအလီၢ်ခံ နီၢ်မၤရံ လဲၤဝဲလၢ “ကစၢၢ်ကလိအကျါ” လၢကီၢ်ယူဒၤအပူၤ ဒ်သိး ကလဲၤအိၣ်သကိးဝဲ အဘူးအတံၢ် နီၢ်အ့းလံၤစါဘ့း. ဖဲနီၢ်အ့းလံၤစါဘ့း ထံၣ်နီၢ်မၤရံအခါ အပတြၢၤဝဲ နီၢ်မၤရံ. ဒီးကစၢ်ယွၤ အသးစီဆှံ ထိၣ်ဟူးထိၣ်ဂဲၤထီၣ် နီၢ်အ့းလံၤစါဘ့းလၢ ကတဲဖျါထီၣ်ဝဲ ဝံအတၢ်စံးပာ် ဘၣ်ဃးဒီး နီၢ်မၤရံအဖိခွါလၢ ကအိၣ်ဖျဲၣ်ထီၣ်တဂၤအံၤ အဂ့ၢ်. (လူၤ ၁:၃၉-၄၅) ဖဲန့ၣ်န့ၣ် နီၢ်မၤရံတဲဝဲလၢ ယဟိဝၤယွၤ “ပာ်ဖျါထီၣ် အစုတၢ်စိတၢ်ကမီၤ.” (လူၤ ၁:၄၆-၅၁) ဖဲအံၤပထံၣ်ဘၣ်လၢ ယဟိဝၤယွၤ သူဝဲမူခိၣ်ကလူး ကၤဘြံၤအ့လး ဒီးနီၢ်အ့းလံၤစါဘ့း ဒ်သိး ကဟ့ၣ်ဂံၢ်ဟ့ၣ်ဘါဝဲ နီၢ်မၤရံ. တၢး၂၃.၁၀ ၁၄-၁၅ ¶၁၀-၁၂

ထဲဒၣ်ခရံာ်ဖိစှၤဂၤန့ၣ် အဝဲသ့ၣ် ဘၣ်တၢ်ဒိးဖှူအီၤ လၢသးစီဆှံအဃိ အဝဲသ့ၣ်အိၣ်ဒီး တၢ်ရ့လိာ်သးဒီးယဟိဝၤယွၤ လီၤလီၤဆီဆီ. ပှၤလၢ အဘၣ်တၢ်ဃုထၢထီၣ်အီၤတဖၣ်အံၤ အနီၣ်ဂံၢ် အိၣ်ဝဲ ၁၄၄,၀၀၀ ဒီးပှၤတဖၣ်အံၤ ကမၤသကိးတၢ်ဒီး ယ့ၣ်ၡူး လၢမူခိၣ် ဒ်ပှၤလုၢ်တၢ်ဒိၣ်တဖၣ်အသိး. (လီၣ် ၁၄:၁) တၢ်စီဆှံအလီၢ် လၢဒဲစီဆှံအပူၤန့ၣ် ဒိလီၤဝဲ ပှၤလၢအဘၣ်တၢ်ဒိးဖှူအီၤတဖၣ် အတၢ်အိၣ်သး လၢအမ့ၢ် ဖဲအဝဲသ့ၣ် အိၣ်ဒံးလၢဟီၣ်ခိၣ်ချၢအခါ ကစၢ်ယွၤ လုၢ်ဖိအဝဲသ့ၣ် ဒ်အဖိလၢနီၢ်သးတခီ. (ရိ ၈:၁၅-၁၇) မ့မ့ၢ်လၢ တၢ်လီၢ်စီဆှံကတၢၢ် လၢဒဲစီဆှံအပူၤန့ၣ် ဒိလီၤဝဲ မူခိၣ် လၢအမ့ၢ် ယဟိဝၤယွၤ အိၣ်ဝဲအလီၢ်. ဒီး “ယၣ်ဘျးသဒၢ” လၢအအိၣ်လၢ တၢ်စီဆှံအလီၢ် ဒီးတၢ်လီၢ်စီဆှံကတၢၢ်အဘၢၣ်စၢၤန့ၣ် ဒိလီၤဝဲ ယ့ၣ်ၡူးအနီၢ်ခိ. ယ့ၣ်ၡူးအနီၢ်ခိန့ၣ် တြီဃာ်အီၤဒ်သိး အသုတလဲၤထီၣ်လၢမူခိၣ် ဒ်ပှၤလုၢ်တၢ်ခိၣ် အဒိၣ်ကတၢၢ် လၢနီၢ်သးတၢ်လုၢ်ဟံၣ်အပူၤတဂ့ၤအဂီၢ်. မ့ၢ်လၢယ့ၣ်ၡူး ဟ့ၣ်လုၢ်ထီၣ်အနီၢ်ခိအံၤ ဒ်တၢ်လုၢ်လၢပှၤဟီၣ်ခိၣ်ဖိအဂီၢ် အဃိ ကျဲအိးထီၣ်အသးလၢ ပှၤလၢအဘၣ်တၢ်ဒိးဖှူအီၤတဖၣ် ကလဲၤထီၣ်ဘၣ်လၢမူခိၣ်. အဝဲသ့ၣ်စ့ၢ်ကီး ဒ်သိးအကလဲၤထီၣ်ဘၣ်လၢမူခိၣ်အဂီၢ် အဝဲသ့ၣ် ဘၣ်ပာ်တ့ၢ်ကွံာ် အနီၢ်ခိ.—ဧ့ၤ ၁၀:၁၉, ၂၀; ၁ ကရံၣ် ၁၅:၅၀. တၢး၂၃.၁၀ ၂၈ ¶၁၃

ဖဲပှၤအ့ဖရဲၣ်ဖိတဖၣ် ပာ်ဒ့ၣ်ပာ်ကမၣ်အီၤအခါ စီၤကံးဒဧိၣ် ပာ်အသးမုာ်မုာ်. (စံၣ်ညီၣ် ၈:၁-၃) စီၤကံးဒဧိၣ် တသးပှံၢ်ထီၣ်အဝဲသ့ၣ်ဘၣ်. ဒီးအပာ်ဖျါထီၣ် တၢ်ဆီၣ်လီၤသးခီဖျိ အကနၣ်န့ၢ် အဝဲသ့ၣ် ဒီးတဲတၢ်ဒီးအဝဲသ့ၣ်မုာ်မုာ်. အဃိ ပှၤအ့ဖရဲၣ်ဖိတဖၣ် အသးခုၣ်လီၤက့ၤဝဲ. တၢ်အိၣ်ဖှိၣ်သးပှၢ်လၢ အကူၣ်တၢ်သ့န့ၣ် ပှၤမ့ၢ်ပာ်ဒ့ၣ်ပာ်ကမၣ် အဝဲသ့ၣ်နာ်က့ အဝဲသ့ၣ်ကွၢ်လိ စီၤကံးဒဧိၣ် ခီဖျိပာ်အသးမုာ်မုာ် ဒီးကနၣ်န့ၢ်ပှၤဂၤ. (ယၤ ၃:၁၃) အဝဲသ့ၣ်မၤဝဲဒ်န့ၣ်အဃိ လၢတၢ်အိၣ်ဖှိၣ်ပူၤ တၢ်ဃူတၢ်ဖိးအိၣ်အါထီၣ်. ဖဲစီၤကံးဒဧိၣ် မၤနၢၤ ပှၤမံးဒယၣ်ဖိအခါ အဟ့ၣ်တၢ်လၤကပီၤခဲလၢာ်လၢ ယဟိဝၤယွၤအအိၣ်. (စံၣ်ညီၣ် ၈:၂၂, ၂၃) တၢ်အိၣ်ဖှိၣ်သးပှၢ်တဖၣ် ကွၢ်လိ စီၤကံးဒဧိၣ်ကသ့ဒ်လဲၣ်. အဝဲသ့ၣ် ကွၢ်လိစီၤကံးဒဧိၣ်သ့ခီဖျိ ဖဲအမၤတၢ်တမံၤဂ့ၤတမံၤဂ့ၤအခါ အဟ့ၣ် တၢ်လၤကပီၤခဲလၢာ်လၢ ယဟိဝၤယွၤအအိၣ်. (၁ ကရံၣ် ၄:၆, ၇) အဒိ တၢ်အိၣ်ဖှိၣ်သးပှၢ်တဂၤ ပှၤမ့ၢ်ပတြၢၤအီၤလၢ အသိၣ်လိတၢ်ဂ့ၤမးန့ၣ် ဘၣ်သ့ၣ်သ့ၣ် အကတဲက့ၤလၢ တၢ်သိၣ်လိတဖၣ်န့ၣ် အသန့ၤထီၣ်သးလၢ ကစၢ်ယွၤအကလုၢ်ကထါ ဒီးအန့ၢ်ဘၣ်တၢ်သိၣ်လိလၢ ယဟိဝၤယွၤ အတၢ်ကရၢကရိအအိၣ်. တၢ်အိၣ်ဖှိၣ်သးပှၢ်တဖၣ် ကဘၣ်ဆိမိၣ်ထံလၢ ဖဲအဝဲသ့ၣ်သိၣ်လိတၢ်အခါ အဘၣ်သးလၢ ပှၤကပတြၢၤ ယဟိဝၤယွၤဧါ မ့တမ့ၢ် အဘၣ်သးလၢ ပှၤကပတြၢၤအဝဲသ့ၣ်ဧါ. တၢး၂၃.၀၆ ၄ ¶၇-၈

တၢ်လၢပဃ့တဖၣ် ပမ့ၢ်တဒိးန့ၢ်ဘၣ် အတၢ်စံးဆၢဘၣ်န့ၣ် ပကဘၣ် သံကွၢ်လီၤပသးလၢ ‘တၢ်လၢယဃ့န့ၣ် အကြၢးအဘၣ်စ့ၢ်ကီးဧါ.’ ညီနုၢ်န့ၣ် ပဆိကမိၣ်လၢ ပသ့ၣ်ညါတၢ်အဂ့ၤကတၢၢ် လၢပနီၢ်ကစၢ်အဂီၢ်လံ. ဘၣ်ဆၣ် တၢ်လၢပဃ့တဖၣ်န့ၣ် ဘၣ်သ့ၣ်သ့ၣ် အတကဲဘျုးလၢပဂီၢ် ယံာ်ယံာ်ဘၣ်. ဘၣ်သ့ၣ်သ့ၣ် ပကဃ့ယဟိဝၤယွၤလၢ အကမၤဘၣ်ဂီၢ်ထီၣ်က့ၤ ပတၢ်ကီတၢ်ခဲဒ်အံၤဒ်န့ၣ် ဘၣ်ဆၣ် အကမၤဘၣ်ဂီၢ်ထီၣ် ပတၢ်ကီတၢ်ခဲဒ်လဲၣ်န့ၣ် အသ့ၣ်ညါဝဲ ဂ့ၤဒိၣ်န့ၢ်ဒံးပှၤဒံး. ဒီးပတၢ်ဃ့တနီၤန့ၣ် ဘၣ်သ့ၣ်သ့ၣ် အတဘၣ်လိာ်သးဒီး ယဟိဝၤယွၤ အတၢ်ဘၣ်သးဘၣ်. (၁ ယိၤ ၅:၁၄) ဆိကမိၣ်ကဒါက့ၤ မိပါလၢအဃ့ ယဟိဝၤယွၤဒ်သိး အဖိတဖၣ် ကဆဲးအိၣ်လၢ တၢ်မ့ၢ်တၢ်တီအပူၤ. ဘၣ်သ့ၣ်သ့ၣ် အဝဲသ့ၣ်ဃ့ဝဲဒ်အံၤန့ၣ် အဝဲသ့ၣ် ဆိကမိၣ်ဝဲလၢ အတကမၣ်ဘၣ်. ဘၣ်ဆၣ် ယဟိဝၤယွၤ တမၢဆူၣ်ပှၤလၢ ပကဘူၣ်ထီၣ်ဘါထီၣ်အီၤဘၣ်. ယဟိဝၤယွၤ အဲၣ်ဒိးလၢ ပဝဲကိးဂၤဒဲး ဒီးပဖိစ့ၢ်ကီး ကဃုထၢလၢ ကဘူၣ်ထီၣ်ဘါထီၣ်အီၤ လၢပနီၢ်ကစၢ်. (၅ မိၤ ၁၀:၁၂, ၁၃; ၃၀:၁၉, ၂၀) အဃိ မိပါတဖၣ် ဃ့ယဟိဝၤယွၤလၢ ကမၤစၢၤအဝဲသ့ၣ် ဒ်သိးအဝဲသ့ၣ် ကမၤစၢၤက့ၤအဖိလၢ ကသ့ၣ်ညါထီၣ် တၢ်မ့ၢ်တၢ်တီ, ကအဲၣ်ယဟိဝၤယွၤ ဒီးကကဲထီၣ် ယဟိဝၤယွၤ အတံၤသကိး.—ကတိၤ ၂၂:၆; အ့း ၆:၄. တၢး၂၃.၁၁ ၂၁ ¶၅; ၂၃ ¶၁၂

ဘၣ်မနုၤအဃိ ပတဲလၢ တၢ်မၤမုာ်ထီၣ်လိာ်သးန့ၣ် အကဲဝဲ ပပာ်ဖျါထီၣ် တၢ်အဲၣ်လဲၣ်. လံာ်စီဆှံတၢ်ကွဲးကျိာ်ထံ အဂၤတဘ့ၣ် ပာ်ဖျါထီၣ်ဝဲလၢ စီၤပီလူးသူဝဲ တၢ်ကတိၤ “တၢ်မၤမုာ်ထီၣ်က့ၤ” န့ၣ်အခီပညီမ့ၢ်ဝဲ “ဖဲပှၤတဂၤ ဘၣ်လဲၤခီဖျိ တၢ်အိၣ်သးကီခဲအခါ ပအိၣ်လၢအကပၤ ဒီးဟ့ၣ်ဂံၢ်ဟ့ၣ်ဘါအီၤ.” အဃိ ဖဲပမၤမုာ်ထီၣ်က့ၤ ဒီပုၢ်ဝဲၢ်မုၣ်ခွါ တဂၤဂၤလၢ အလဲၤခီဖျိ တၢ်အိၣ်သးကီခဲအခါ ပမၤစၢၤအီၤလၢ အကဆဲးမၤ ယဟိဝၤယွၤအတၢ်မၤ ဒီးဆဲးတီဒီးအီၤ. ဒီးဖဲပမၤမုာ်ထီၣ်က့ၤ ဒီပုၢ်ဝဲၢ်မုၣ်ခွါ တဘျီဂ့ၤတဘျီဂ့ၤန့ၣ် ပပာ်ဖျါထီၣ်လၢ ပအဲၣ်အဝဲသ့ၣ်. (၂ ကရံၣ် ၇:၆, ၇, ၁၃) တၢ်ဒိသူၣ်ဒိသး ဒီးတၢ်မၤမုာ်ထီၣ်က့ၤန့ၣ် အဘၣ်ထွဲလိာ်သး. ဘၣ်မနုၤအဃိ ပတဲဒ်န့ၣ်လဲၣ်. ပှၤလၢအအိၣ်ဒီး တၢ်ဒိသူၣ်ဒိသးန့ၣ် ဖဲအထံၣ်ဘၣ် ပှၤတဂၤဂၤ လဲၤခီဖျိဘၣ် တၢ်နးတၢ်ဖှီၣ်အခါ အဘၣ်သး မၤမုာ်ထီၣ်က့ၤ ပှၤတဂၤန့ၣ်အသး ဒီးမၤစၢၤအီၤတမံၤမံၤ. အဃိ တၢ်ဒိသူၣ်ဒိသးန့ၣ် ထိၣ်ဟူးထိၣ်ဂဲၤထီၣ်ပှၤလၢ ပကမၤမုာ်ထီၣ်က့ၤပှၤသး. စီၤပီလူးတဲဝဲလၢ ယဟိဝၤယွၤ အတၢ်ဒိသူၣ်ဒိသးန့ၣ် အဘၣ်ထွဲလိာ်သးဒီး အမၤမုာ်ထီၣ်က့ၤပှၤသး. တကးဒံးဘၣ် အတဲဝဲလၢ ယဟိဝၤယွၤန့ၣ် “အမ့ၢ် ပၢ်လၢအပှဲၤဒီး တၢ်သးကညီၤ ဒီးအမ့ၢ်ဝဲ တၢ်မၤမုာ်ခဲလၢာ် အကစၢ်.”—၂ ကရံၣ် ၁:၃ တၢး၂၃.၁၁ ၉-၁၀ ¶၈-၁၀

ပှၤလၢအပိာ်ယ့ၣ်ၡူးခရံာ်အခံ ကိးဂၤဒဲးန့ၣ် ကထံၣ်ဘၣ် တၢ်နးတၢ်ဖှီၣ်. အဒိ ဆိကမိၣ်ကွၢ် တၢ်မၢဖိပီလူး အတၢ်လဲၤခီဖျိ. စီၤပီလူးတဲဘၣ် ပှၤလၢအအိၣ်လၢ ဝ့ၢ်သ့းစၤလနံလၢ “ဖဲပအိၣ်ဒီးသုအခါန့ၣ် ပတဲဆိပာ်သုလၢ ပကတူၢ်ဘၣ်တၢ်နးတၢ်ဖှီၣ် ဒီးဒ်သုသ့ၣ်ညါအသိး တၢ်ဟဲကဲထီၣ်အသး ဒ်န့ၣ်.” (၁ သ့း ၃:၄) ဒီးအတဲဘၣ် ပှၤကရံၣ်သူးဖိလၢ “ဒီပုၢ်ဝဲၢ်သ့ၣ်ဧၢ, ပအဲၣ်ဒိးလၢ သုကသ့ၣ်ညါ ဘၣ်ဃးဒီး တၢ်ကီတၢ်ခဲလၢ ပလဲၤခီဖျိဘၣ်အီၤ . . . ပကမူဧါ တမူဧါန့ၣ် ပတသ့ၣ်ညါလၢၤဘၣ်.” (၂ ကရံၣ် ၁:၈; ၁၁:၂၃-၂၇) ခရံာ်ဖိလၢ ဆၢကတီၢ်ခဲအံၤစ့ၢ်ကီး ကထံၣ်ဘၣ်ဝဲ တၢ်မၤနးမၤဖှီၣ် တမံၤမံၤ. (၂ တံၤ ၃:၁၂) ခီဖျိလၢ နနာ်ယ့ၣ်ၡူး ဒီးပိာ်အခံအဃိ ဘၣ်သ့ၣ်သ့ၣ် နသကိး ဒီးနဘူးနတံၢ် ကတဲဆါနၤ မ့တမ့ၢ် တရ့ဒီးနၤဂ့ၤဂ့ၤဘၣ်. ဒီးခီဖျိလၢ နကျဲးစၢးမၤတၢ် တီတီလိၤလိၤအဃိ နတၢ်မၤခိၣ် မ့တမ့ၢ် ပှၤလၢနတၢ်မၤလီၢ်န့ၣ် ကမၤကီမၤခဲနၤ. (ဧ့ၤ ၁၃:၁၈) ခီဖျိလၢ နတဲဘၣ်ပှၤဂၤလၢ နတၢ်မုၢ်လၢ်အဂ့ၢ်အဃိ နထံၣ်ဘၣ် ပဒိၣ်တၢ်တြီမၤတံာ်တာ်စ့ၢ်ကီးဧါ. နမ့ၢ်ထံၣ်ဘၣ် တၢ်နးတၢ်ဖှီၣ် တမံၤဂ့ၤတမံၤဂ့ၤ သနာ်က့ စီၤပီလူး တဲဝဲလၢ နကဘၣ်အိၣ်ဒီး တၢ်သးခု. တၢး၂၃.၁၂ ၁၀-၁၁ ¶၉-၁၀

စီၤယၤကိာ်ထံၣ်ဘၣ်ဒီး တၢ်ကီတၢ်ခဲ အါမး. အဖိခွါခံဂၤ လၢအမ့ၢ် စီၤစူၤမ့းအိၣ် ဒီးစီၤလ့ၤဝံန့ၣ် မၤမဲာ်ဆှးအဟံၣ်ဖိဃီဖိ ဒီးမၤဟးဂီၤ ယဟိဝၤယွၤအမံၤ. တကးဒံးဘၣ် ဖဲနီၢ်ရၤဃ့လး အိၣ်ဖျဲၣ်ထီၣ် အဖိခံဂၤတဂၤအခါ အသံသဒၣ်ကွံာ် စီၤယၤကိာ်. ဒီးခီဖျိလၢ တၢ်သၣ်ဝံၤလီၤဒိ အိၣ်ထီၣ်နးမးအဃိ ဖဲစီၤယၤကိာ် သးပှၢ်ထီၣ်အခါ အဟံၣ်ဖိဃီဖိ ဘၣ်လဲၤအိၣ်က့ၤလၢ ကီၢ်အဲၤကူပတူး. (၁ မိၤ ၃၅:၁၆-၁၉; ၃၇:၂၈; ၄၅:၉-၁၁, ၂၈) စီၤယၤကိာ် ထံၣ်ဘၣ် တၢ်ကီတၢ်ခဲအါမးနာ်က့ အနာ်န့ၢ်ယဟိဝၤယွၤ ဒီးအနာ် ယဟိဝၤယွၤ တၢ်အၢၣ်လီၤထီဘိ. အဃိ ယဟိဝၤယွၤ ဒုးသ့ၣ်ညါ စီၤယၤကိာ်လၢ အဘၣ်သူၣ်ဘၣ်သးအီၤ. အဒိ ယဟိဝၤယွၤ ဆိၣ်ဂ့ၤစီၤယၤကိာ် ဒီးဟ့ၣ်အီၤ တၢ်ဖိတၢ်လံၤဒီဒူၣ်. တကးဒံးဘၣ် စီၤယၤကိာ်န့ၣ် အဆိမိၣ်လၢ အဖိခွါစီၤယိၤသး သံသဒၣ်ကွံာ်အီၤဖးယံာ်လံ အဃိ ဖဲအထံၣ်လိာ်က့ၤသးဒီး စီၤယိၤသးအခါ နဆိမိၣ်ကွၢ် အကသးခုစံးဘျုးယဟိဝၤယွၤ ဖးဒိၣ်ညါ. ပထံၣ်ဘၣ်လၢ စီၤယၤကိာ် အတၢ်ရ့လိာ်သးဒီး ယဟိဝၤယွၤန့ၣ် ဖးဂ့ၤညါအဃိ မၤစၢၤအီၤလၢ အကလဲၤခီဖျိ အတၢ်ကီတၢ်ခဲ. (၁ မိၤ ၃၀:၄၃; ၃၂:၉, ၁၀; ၄၆:၂၈-၃၀) ပဝဲစ့ၢ်ကီး ပတၢ်ရ့လိာ်သးဒီး ယဟိဝၤယွၤ မ့ၢ်ဂ့ၤန့ၣ် ပမ့ၢ်ထံၣ်ဘၣ် တၢ်ကီတၢ်ခဲလၢ ပတဆိမိၣ်ဘၣ်ဘၣ်နာ်က့ ပလဲၤခီဖျိအီၤကန့ၢ်. တၢး၂၃.၀၄ ၁၅ ¶၆-၇

စံးထီၣ်ပတြၢၤ အဆၢဒိၣ် ၂၃ န့ၣ်အမ့ၢ်ဝဲ ထါသးဝံၣ်တယုၢ် လၢအပာ်ဖျါထီၣ် ယဟိဝၤယွၤ အတၢ်အဲၣ် ဒီးအတၢ်ကဟုကယာ်အဂ့ၢ်. ဖဲန့ၣ် စီၤဒၤဝံး တဲဝဲဘၣ်ဃးဒီး အတၢ်ရ့လိာ်သးဒီး ယဟိဝၤယွၤ လၢအမ့ၢ် အပှၤကွၢ်သိ အဂ့ၢ်. စီၤဒၤဝံး ပျဲဝဲလၢ ယဟိဝၤယွၤ ကဟံးစုနဲၣ်ကျဲအီၤ ဒီးအသန့ၤအသးလၢ ယဟိဝၤယွၤ လၢာ်လၢာ်ဆ့ဆ့အဃိ အတူၢ်ဘၣ်ဝဲလၢ အအိၣ်ဘၣ် ပူၤပူၤဖျဲးဖျဲး. တကးဒံးဘၣ် စီၤဒၤဝံး သ့ၣ်ညါဝဲလၢ ယဟိဝၤယွၤ ကပာ်ဖျါထီၣ် အတၢ်အဲၣ်လၢအဖီခိၣ် လၢအတၢ်အိၣ်မူ ဒီတစိၤညါ. ဘၣ်မနုၤအဃိ စီၤဒၤဝံး နာ်ဝဲသပှၢ်တၢၢ်လၢ ယဟိဝၤယွၤ အဲၣ်အီၤလဲၣ်. တၢ်လၢစီၤဒၤဝံး လိၣ်ဘၣ်ဝဲန့ၣ် ယဟိဝၤယွၤ ဟ့ၣ်လီၤအီၤ ထီဘိအဃိ စီၤဒၤဝံးတူၢ်ဘၣ်ဝဲလၢ ယဟိဝၤယွၤ ကွၢ်ထွဲအီၤဂ့ၤဂ့ၤ. စီၤဒၤဝံး သ့ၣ်ညါစ့ၢ်ကီးလၢ ယဟိဝၤယွၤ ကဲအသကိး ဒီးယဟိဝၤယွၤ ဘၣ်သူၣ်ဘၣ်သးအီၤ. အဃိ ခါဆူညါ တၢ်မ့ၢ်ကဲထီၣ်သး ဒ်လဲၣ်သနာ်က့ စီၤဒၤဝံးသ့ၣ်ညါဝဲလၢ ယဟိဝၤယွၤ ကဟ့ၣ်အီၤ တၢ်လၢအလိၣ်ဘၣ်ဝဲ ခဲလၢာ်. ခီဖျိလၢ စီၤဒၤဝံး နာ်ဝဲလၢ ယဟိဝၤယွၤအဲၣ်အီၤ ဒီးကကွၢ်ထွဲအီၤဂ့ၤဂ့ၤအဃိ စီၤဒၤဝံး တဘၣ်ယိၣ်တၢ်ဘၣ် ဒီးအအိၣ်ဒီး တၢ်သးခု ဒီးတၢ်သူၣ်မံသးမုာ်.—စံး ၁၆:၁၁. တၢး၂၄.၀၁ ၂၈-၂၉ ¶၁၂-၁၃

စးထီၣ်လၢ ဟီၣ်ခိၣ်တၢ်ဒုး ခံဘျီတဘျီန့ၣ် ယဟိဝၤယွၤ အပှၤဂီၢ်မုၢ် လၢထံကီၢ်အါဘ့ၣ် အိၣ်ဘၣ်မုာ်မုာ်ခုၣ်ခုၣ် ဒီးဒိးန့ၢ်ဘၣ် တၢ်သဘျ့လၢ ကစံၣ်တဲၤတဲလီၤတၢ်အဂီၢ်. တကးဒံးဘၣ် တၢ်စံၣ်တဲၤတဲလီၤတၢ်မၤန့ၣ် လဲၤထီၣ်လဲၤထီဒိၣ်မး. လၢပစိၤခဲအံၤစ့ၢ်ကီး ပှၤပၢဆှၢတၢ်ကမံးတံာ်တဖၣ် ဆဲးဃုဝဲ ယ့ၣ်ၡူးခရံာ် အတၢ်ဟံးစုနဲၣ်ကျဲ. တၢ်ဟံးစုနဲၣ်ကျဲလၢ အဝဲသ့ၣ်ဟ့ၣ်လီၤ ဒီပုၢ်ဝဲၢ်မုၣ်ခွါန့ၣ် အဝဲသ့ၣ် အဲၣ်ဒိးဝဲလၢ အကဘၣ်လိာ်သးဒီး ယဟိဝၤယွၤ ဒီးယ့ၣ်ၡူးခရံာ် အတၢ်ဘၣ်သး. ဒီးအဝဲသ့ၣ်သူဝဲ ကဝီၤအပှၤကွၢ်တၢ် ဒီးတၢ်အိၣ်ဖှိၣ်သးပှၢ်တဖၣ် ဒ်သိးကဟ့ၣ်လီၤ တၢ်ဟံးစုနဲၣ်ကျဲလၢ တၢ်အိၣ်ဖှိၣ်ဖိအအိၣ်. ပှၤလၢအဘၣ်တၢ်ဒိးဖှူအီၤ လၢအကဲ တၢ်အိၣ်ဖှိၣ်သးပှၢ် ဒီးတၢ်အိၣ်ဖှိၣ်သးပှၢ်အဂၤ ခဲလၢာ်န့ၣ် အဝဲသ့ၣ်အိၣ်လၢ ယ့ၣ်ၡူးခရံာ် “အစုထွဲ.” (လီၣ် ၂:၁) ဒီးတၢ်အိၣ်ဖှိၣ်သးပှၢ်တဖၣ်အံၤ အဝဲသ့ၣ်ကဲ ပှၤတလၢတပှဲၤဘၣ် ဒီးတဘျီတခီၣ်န့ၣ် အမၤကမၣ်ဘၣ်တၢ်စ့ၢ်ကီး. အဒိ စီၤမိၤၡ့, စီၤယိၤၡူ ဒီးတၢ်မၢဖိတဖၣ်စ့ၢ်ကီး တဘျီတခီၣ်န့ၣ် အဝဲသ့ၣ် မၤကမၣ်ဘၣ်တၢ်. (၄ မိၤ ၂၀:၁၂; ၡူ ၉:၁၄, ၁၅; ရိ ၃:၂၃) သနာ်က့ ယ့ၣ်ၡူးခရံာ် ဟံးစုနဲၣ်ကျဲဝဲ ကုၢ်လၢအတီ ဒီးတၢ်အိၣ်ဖှိၣ်သးပှၢ်တဖၣ် ဒီးအကဆဲးဟံးစုနဲၣ်ကျဲ အဝဲသ့ၣ် “ကိးမုၢ်နံၤဒဲး တုၤလီၤလၢ တၢ်အကတၢၢ်.” အဃိ တၢ်ဟံးစုနဲၣ်ကျဲလၢ ယ့ၣ်ၡူးခရံာ် ဟ့ၣ်လီၤဝဲ ပှၤလၢအတီခိၣ်ရိၤမဲတၢ်တဖၣ်န့ၣ် ပနာ်အီၤသ့ သပှၢ်တၢၢ်. တၢး၂၄.၀၂ ၂၃-၂၄ ¶၁၃-၁၄

ဆၢကတီၢ်ခဲအံၤ ပမၤသးခု ယဟိဝၤယွၤအသး သ့ခီဖျိ ပတဲဘၣ်ဃးဒီးအဂ့ၢ် ဒီးတဲဖျါထီၣ်လၢ ပစံးဘျုးစံးဖှိၣ်အီၤ ဒီးပအဲၣ်အီၤဒိၣ်မး. ဖဲပလဲၤစံၣ်တဲၤတဲလီၤတၢ်အခါ ပကဘၣ်နီၣ်ဘၣ်လၢ ပတၢ်တိာ်ပာ် အခိၣ်သ့ၣ်န့ၣ်မ့ၢ်ဝဲဒ်သိး ပကမၤစၢၤပှၤဂၤလၢ အဝဲသ့ၣ် ကဘၣ်သး ရ့လိာ်သးဒီး ယဟိဝၤယွၤ ဒီးသုးဘူးအသးလၢအအိၣ် ဒီးထံၣ်အီၤဒ် ပါတဂၤလၢအအဲၣ်ပှၤ. (ယၤ ၄:၈) ပဘၣ်သးတဲဘၣ်ပှၤဂၤလၢ ယဟိဝၤယွၤအဂ့ၢ်, အတၢ်အဲၣ်, အတၢ်တီတၢ်လိၤ, အတၢ်ကူၣ်သ့, အတၢ်စိတၢ်ကမီၤ ဒီးအတၢ်ဂ့ၤတၢ်ဝါ လၢအဂၤတဖၣ် လၢလံာ်စီဆှံအပူၤ. ဒီးဖဲပဂုာ်ကျဲးစၢး ကွၢ်လိ ယဟိဝၤယွၤအခါ ပပာ်ဖျါထီၣ်လၢ ပစံးထီၣ်ပတြၢၤအီၤ ဒီးမၤသးခုအသး. ခီဖျိလၢ ပမၤဒ်န့ၣ်အဃိ ပှၤထံၣ်ဝဲလၢ ပလီၤဆီဒီး ပှၤအဂၤတဖၣ် ဒီးအဝဲသ့ၣ် ဘၣ်သးသ့ၣ်ညါဝဲလၢ ဘၣ်မနုၤအဃိ ပလီၤဆီဒီးပှၤဂၤလဲၣ်. (မး ၅:၁၄-၁၆) အဃိ ဖဲပရ့လိာ်သး ဒီးမၤသကိးတၢ်ဒီး အဝဲသ့ၣ်အခါ ပတဲပၠးအဝဲသ့ၣ်လၢ ဘၣ်မနုၤအဃိ ပလီၤဆီဒီးပှၤအဂၤလဲၣ်သ့. လၢခံန့ၣ် ပှၤလၢအသးဘျၢတဖၣ် ကဘၣ်သး ရ့လိာ်သးဒီးယဟိဝၤယွၤ ဒီးသုးဘူးအသးလၢအအိၣ်. ပမ့ၢ်စံးထီၣ်ပတြၢၤ ယဟိဝၤယွၤ ဒ်အံၤန့ၣ် ပမၤတၢ်ဘၣ်အသး ဒီးမၤသးခုအသး.—၁ တံၤ ၂:၃, ၄. တၢး၂၄.၀၂ ၁၀ ¶၇

ဒ်သိး နကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤ လၢနီၢ်သးတခီအဂီၢ် နကဘၣ်မၤလိန့ၢ် တၢ်သ့တၢ်ဘၣ် လၢအကဲဘျုး. နမ့ၢ်မၤဒ်န့ၣ်န့ၣ် အကမၤစၢၤနၤလၢ နကတူၢ်လိာ် မူဒါတဖၣ်လၢ တၢ်အိၣ်ဖှိၣ်အပူၤ, နကအိၣ်ဒီးတၢ်မၤလၢ နကလုၢ်အီၣ်နသး ဒီးနဟံၣ်ဖိဃီဖိအဂီၢ်. တကးဒံးဘၣ် နကအိၣ်ဒီး တၢ်ရ့လိာ်သးဒီးပှၤဂၤလၢအဂ့ၤ. အဒိ မၤလိသးလၢ နဖးလံာ်ဒီးကွဲးလံာ်ကသ့ဂ့ၤဂ့ၤ. လံာ်စီဆှံ တဲဝဲလၢ ပှၤလၢ အပာ်လီၤတၢ်ဆၢကတီၢ်လၢ အကဖး ကစၢ်ယွၤအကလုၢ်ကထါ ဒီးဆိကမိၣ်ထံအီၤ ကိးနံၤဒဲးန့ၣ် အကအိၣ်ဒီး တၢ်သးခု ဒီးအမၤတၢ် ကကဲထီၣ်လိၣ်ထီၣ်. (စံး ၁:၁-၃) အဃိ ဒီပုၢ်ဝဲၢ်ခွါတဂၤ မ့ၢ်ဖးလံာ်စီဆှံ ကိးနံၤဒဲးန့ၣ် အကသ့ၣ်ညါထီၣ် ယဟိဝၤယွၤ အတၢ်ထံၣ် ဒီးကမၤစၢၤအီၤလၢ အဆိကမိၣ်တၢ် ကသ့ဂ့ၤဂ့ၤ ဒီးမၤထွဲ လံာ်စီဆှံ အတၢ်ဟံးစုနဲၣ်ကျဲ. (ကတိၤ ၁:၃, ၄) ဒီပုၢ်ဝဲၢ်မုၣ်ခွါတဖၣ် လိၣ်ဘၣ်ဝဲ ဒီပုၢ်ဝဲၢ်ခွါလၢ အသိၣ်လိတၢ်သ့ ဒီးအဟ့ၣ်ကူၣ်တၢ် လၢအဒိးသန့ၤထီၣ်သးလၢ လံာ်စီဆှံအပူၤ အတၢ်မၤစၢၤ. အဃိ နဖးလံာ် ဒီးကွဲးလံာ် မ့ၢ်သ့ဂ့ၤဂ့ၤန့ၣ် နကတဲာ်ကတီၤ နတၢ်စံၣ်တဲၤတဲလီၤ ဒီးဟ့ၣ်ထီၣ်တၢ်စံးဆၢ လၢအကဲဘျုး ဒီးမၤဂၢၢ်ကျၢၤ ပှၤဂၤအတၢ်နာ်သ့. ဒီးဖဲနမၤ နီၢ်ကစၢ်တၢ်မၤလိလံာ်စီဆှံအခါ နကွဲးနီၣ်ဃာ် တၢ်ဂ့ၢ်လၢအကဲဘျုး သ့စ့ၢ်ကီး. တၢ်ဂ့ၢ်လၢ နကွဲးနီၣ်ဃာ်တဖၣ်န့ၣ် ကမၤစၢၤနၤဒ်သိး နကမၤဂၢၢ်ကျၢၤထီၣ် နတၢ်နာ် ဒီးဟ့ၣ်ဂံၢ်ဟ့ၣ်ဘါပှၤဂၤ. တၢး၂၃.၁၂ ၂၆-၂၇ ¶၉-၁၁

ဖဲပပျံၤတၢ်အခါ ပကဘၣ် ဆိကမိၣ်ထံ ဘၣ်ဃးဒီး တၢ်လၢယဟိဝၤယွၤ ကမၤန့ၢ်ပှၤ လၢခါဆူညါ ဖဲမုၣ်ကီၤလံၢ်တအိၣ်လၢၤဘၣ်. ဖဲ ၂၀၁၄ တၢ်အိၣ်ဖှိၣ်ဖးဒိၣ်န့ၣ် ပထံၣ်ဘၣ် တၢ်ဒုးနဲၣ်တၢ်အဒိလၢ ပါတဂၤ တဲသကိးတၢ်ဒီး အဟံၣ်ဖိဃီဖိ ဘၣ်ဃးဒီး တၢ်လၢကအကဲထီၣ်သး လၢဟီၣ်ခိၣ်ပၤရဒံစူးအပူၤ ဒီးတၢ်လၢအကဲထီၣ်သးလၢ ဆၢကတီၢ်ခဲအံၤ ဒ် ၂ တံၤမသ့း ၃:၁-၅ ပာ်ဖျါထီၣ်ဝဲအသိး. ဒီးပါတဂၤန့ၣ် တဲဝဲဒ်အံၤ. “လၢဟီၣ်ခိၣ်သီအပူၤန့ၣ် တၢ်သးခုအဒိၣ်ကတၢၢ် အဆၢကတီၢ် ကအိၣ်ထီၣ်ဝဲ. ပှၤဟီၣ်ခိၣ်ဖိ ကအဲၣ်လိာ်အသး တဂၤဒီးတဂၤ, ကအဲၣ် တၢ်မ့ၢ်တၢ်တီ, တပာ်ထီၣ်ထီသးဘၣ်, တဆိကမိၣ်ဒိၣ်လီၤသးဘၣ်, ကစံးထီၣ်ပတြၢၤ ကစၢ်ယွၤ, ကဒိကနၣ် အမိအပါအကလုၢ်, ကသ့ၣ်ညါ စံးဘျုးစံးဖှိၣ်တၢ်, အသးကတီ, ကအဲၣ်အဟံၣ်ဖိဃီဖိ, အခိၣ်တကိၤဘၣ်, ကတဲဂ့ၤပှၤဂၤထီဘိ, ကပၢၤသူၣ်ပၢၤသး, ကအိၣ်ဒီးတၢ်သးစူၤ, ကအဲၣ်တၢ်လၢအဂ့ၤ, ကမ့ၢ်ပှၤလၢ ပှၤနာ်န့ၢ်အီၤသ့, ကကွၢ်န့ၢ်တၢ်လၢပှၤဂၤအဂီၢ်, ကအိၣ်ဒီး တၢ်ဆီၣ်လီၤသး, အကအဲၣ်ကစၢ်ယွၤဒိၣ်န့ၢ် အအဲၣ်တၢ်မုာ်တၢ်ပၠီၣ် ဒီးကသးတီဒီးကစၢ်ယွၤနီၢ်ကီၢ်. ပှၤဒ်န့ၣ်တဖၣ်န့ၣ် ရ့ဒီးအဝဲသ့ၣ်ဘူးဘူးတက့ၢ်.” မ့မ့ၢ်ပဝဲမီၤ, ပတဲသကိးဒီး ပဟံၣ်ဖိဃီဖိ မ့တမ့ၢ် ဒီပုၢ်ဝဲၢ်မုၣ်ခွါတဖၣ် ဘၣ်ဃးဒီး တၢ်အိၣ်မူလၢ ဟီၣ်ခိၣ်သီအဂ့ၢ် စ့ၢ်ကီးဧါ. တၢး၂၄.၀၁ ၆ ¶၁၃-၁၄

လံာ်စီဆှံ တဲဝဲလၢ “ယဟိဝၤယွၤ ဘၣ်သးဝဲ အပှၤဂီၢ်မုၢ်.” (စံး ၁၄၉:၄) အဃိ ပသ့ၣ်ညါလၢ ယဟိဝၤယွၤ ဘၣ်သူၣ်ဘၣ်သး အပှၤဂီၢ်မုၢ်ခဲလၢာ်. ဘၣ်ဆၣ် ပှၤတနီၤနီၤန့ၣ် အသးဟးဂီၤ ဒီးတဘျီတခီၣ် အဝဲသ့ၣ် ဆိကမိၣ်လီၤသးလၢ ‘ယဟိဝၤယွၤ ဘၣ်သူၣ်ဘၣ်သးယၤ စ့ၢ်ကီးဧါ.’ လၢလံာ်စီဆှံအစိၤ ပှၤသးတီတနီၤလၢ အဘူၣ်ထီၣ်ဘါထီၣ် ယဟိဝၤယွၤန့ၣ် တဘျီတခီၣ် အဝဲသ့ၣ် သးဟးဂီၤ ဒီးတူၢ်ဘၣ်ဝဲဒ်န့ၣ်. (၁ မူၤ ၁:၆-၁၀; ဘး ၂၉:၂, ၄; စံး ၅၁:၁၁) လံာ်စီဆှံ ပာ်ဖျါထီၣ်ဝဲ ပျီပျီလၢ ပှၤဟီၣ်ခိၣ်ဖိ တကဲပှၤလၢပှၤပှဲၤဘၣ် သနာ်က့ အဝဲသ့ၣ်ဒိးန့ၢ်ဘၣ် ယဟိဝၤယွၤ အတၢ်ဘၣ်သးသ့. ပကဒိးန့ၢ်ဘၣ် အတၢ်ဘၣ်သးအဂီၢ် ပကဘၣ် မၤမနုၤလဲၣ်. ပကဘၣ်စူၢ်က့ၤနာ်က့ၤ ယ့ၣ်ၡူးခရံာ် ဒီးဒိးဘျၢထံ. (ယိၤ ၃:၁၆) ပမၤဒ်န့ၣ်အဃိ ပပာ်ဖျါထီၣ်လၢ ပှၤအါဂၤအမဲာ်ညါလၢ ပပီၢ်ယၢ်လီၤက့ၤသး ဒီးပအၢၣ်လီၤလၢ ပကမၤ ယဟိဝၤယွၤ အတၢ်ဘၣ်သး. (မၤတၢ် ၂:၃၈; ၃:၁၉) ခီဖျိလၢ ပမၤဒ်အံၤအဃိ ပတၢ်ရ့လိာ်သးဒီး ယဟိဝၤယွၤ ဂ့ၤဒိၣ်ထီၣ် ဒီးပမၤသးခု ယဟိဝၤယွၤအသး. ပမ့ၢ်ဂုာ်ကျဲးစၢး အိၣ်မူဒ် ပအၢၣ်လီၤပာ်စၢၤ ယဟိဝၤယွၤအသိးန့ၣ် အကဘၣ်သူၣ်ဘၣ်သးပှၤ ဒီးပကကဲထီၣ် အသကိး ဘူးဘူးတံၢ်တံၢ်.—စံး ၂၅:၁၄. တၢး၂၄.၀၃ ၂၆ ¶၁-၂

ပဒိၣ်တဖၣ် မ့ၢ်တြီဃာ် ပတၢ်စံၣ်တဲၤတဲလီၤတၢ်မၤနာ်က့ ပဘၣ်ကွၢ်လိ ယ့ၣ်ၡူးအပျဲၢ်အဘီၣ်တဖၣ် ဒီးဆဲးစံၣ်တဲၤတဲလီၤတၢ်. ဒီးပနာ်သပှၢ်တၢၢ်လၢ ယဟိဝၤယွၤ ကမၤစၢၤပှၤဒ်သိး ပကဆဲးစံၣ်တဲၤတဲလီၤတၢ်. အဃိ ဃ့ယဟိဝၤယွၤလၢ အကဟ့ၣ်ပှၤ တၢ်သးဒူဒီးတၢ်ကူၣ်သ့ ဒီးဃ့စ့ၢ်ကီးလၢ ယဟိဝၤယွၤ ကမၤစၢၤနၤ ဒ်သိးနလဲၤခီဖျိ တၢ်ကီတၢ်ခဲကန့ၢ်. ပဝဲအါဂၤန့ၣ် ပထံၣ်ဘၣ်ဒီး တၢ်ဆူးတၢ်ဆါ, တၢ်သူၣ်အုးသးအုး, ပှၤလၢပအဲၣ်တဖၣ် သံသဒၣ်ကွံာ်ပှၤ, ဟံၣ်ဖိဃီဖိတၢ်အိၣ်သးကီခဲ, ပထံၣ်ဘၣ် တၢ်မၤအၢမၤနး ဒီးတၢ်ကီတၢ်ခဲအဂၤစ့ၢ်ကီး. တကးဒံးဘၣ် ပထံၣ်ဘၣ် တၢ်ကီတၢ်ခဲ ဒ်သိးဒီး တၢ်ဆါရၤလီၤသး ဒီးတၢ်ဒုးတၢ်ယၤ. အဃိ ပကဘၣ် ဃ့ထုကဖၣ်လၢ ယဟိဝၤယွၤအအိၣ် လၢပသးဒီဖျၢၣ်. ဒ်ပတဲဖျါထီၣ် ပတၢ်တူၢ်ဘၣ်လၢ ပသကိးလၢ ပမုာ်ဒီးအီၤတဂၤအသိး ပတဲဖျါထီၣ် ပတၢ်တူၢ်ဘၣ်လၢ ယဟိဝၤယွၤအအိၣ်သ့. ဒီးပကဘၣ် နာ်သပှၢ်တၢၢ်လၢ ယဟိဝၤယွၤ ‘ကမၤစၢၤပှၤ.’ (စံး ၃၇:၃, ၅) ဖဲပ “ဘၣ်ကီဘၣ်ခဲ” အခါ တၢ်ထုကဖၣ် မၤစၢၤပှၤဒ်သိးပက “အိၣ်ဂၢၢ်ဆိးကျၢၤ.” (ရိ ၁၂:၁၂) ယဟိဝၤယွၤ သ့ၣ်ညါဝဲလၢ အခ့အပှၤတဖၣ် ဘၣ်လဲၤခီဖျိ တၢ်ကီတၢ်ခဲ ဒီး “အဝဲနၢ်ဟူ အဝဲသ့ၣ် အတၢ်ကိးပသူထီၣ်လၢ တၢ်မၤစၢၤအဂီၢ်.”—စံး ၁၄၅:၁၈, ၁၉. တၢး၂၃.၀၅ ၅-၆ ¶၁၂-၁၅

ဖဲပဘၣ်ဆၢတဲာ် တၢ်လၢအရ့ဒိၣ်အခါ ပကဘၣ် ဃုသ့ၣ်ညါ “တၢ်ဘၣ်ယဟိဝၤယွၤ အသး အိၣ်ဒ်လဲၣ်” ဝံၤဒီး ပကဘၣ်မၤထွဲအီၤ. (အ့း ၅:၁၇) ပမ့ၢ်ဃုသ့ၣ်ညါ လံာ်စီဆှံ အတၢ်ဟံးစုနဲၣ်ကျဲ လၢအဘၣ်ထွဲလိာ်သးဒီး ပတၢ်အိၣ်သးန့ၣ် ပပာ်ဖျါထီၣ်လၢ ပဃုကွၢ် ယဟိဝၤယွၤ အတၢ်ထံၣ်. ဒီးပမ့ၢ်မၤထွဲ ယဟိဝၤယွၤ အတၢ်ဟံးစုနဲၣ်ကျဲန့ၣ် ပဆၢတဲာ်တၢ်လၢအဘၣ် ကသ့. “မုၣ်ကီၤလံၢ်” လၢအမ့ၢ် ပဒုၣ်ပဒါန့ၣ် အဘၣ်သးလၢ ပကလူၤထဲ တၢ်အိၣ်လၢဟီၣ်ခိၣ် တုၤလၢ ပတၢ်ဆၢကတီၢ်လၢ ပကမၤ ကစၢ်ယွၤ အတၢ်မၤအဂီၢ် တအိၣ်လၢၤဘၣ်. (၁ ယိၤ ၅:၁၉) အဒိ ခရံာ်ဖိတဂၤ ကသးစၢၢ်ဆၢလၢ အကမၤ ယဟိဝၤယွၤအတၢ်မၤအဂီၢ် ဘၣ်သ့ၣ်သ့ၣ် အကစးထီၣ် ဆိကမိၣ်လၢ အကဃုကျိၣ်စ့, တၢ်ကူၣ်ဘၣ်ကူၣ်သ့ ဒီးကမၤတၢ်ဆူၣ်ဆူၣ်. အမ့ၢ်မၤဝဲဒ်န့ၣ်န့ၣ် အပာ်ဖျါထီၣ်ဝဲလၢ အအိၣ်ဒီး တၢ်ထံၣ်ဒ်သိးဒီး ပှၤလၢအတဘူၣ်ထီၣ်ဘါထီၣ် ယဟိဝၤယွၤဘၣ်. နီၢ်ကီၢ်ဒု ပမၤ တၢ်သ့ၣ်တဖၣ်အံၤန့ၣ် အတကမၣ်ဘၣ်, သနာ်က့ ပတဘၣ်ပာ်ဆိ တၢ်သ့ၣ်တဖၣ်အံၤ လၢနီၣ်ဂံၢ်တၢ လၢပတၢ်အိၣ်မူပူၤဘၣ်. တၢး၂၄.၀၃ ၂၄ ¶၁၆-၁၇